الرئيسية
بطاقة الكتاب
-----------------------------------------------------------------------
عنوان المؤَلَّف : الدنيا حالها كده
المؤلِّف : السيد محمد صابر
التصنيف : مسرحية
رقم الإيداع :
عدد الصفحات : صفحة
رقم الإصدار الداخلى :
تاريخ الإصدار الداخلى : 8 / 2017 طبعة أولى
تصميم الغلاف والتنسيق : دار النيل والفرات للنشر والتوزيع
-------------------------------------------------------------
جميع حقوق الطبع والنشر محفوظة للشاعر، ولا يحق لأى دار نشر طبع ونشر وتوزيع الكتاب الا بموافـقة كتابية وموثـقة من الشاعـــر
كلمة الناشر
الإهـــــــداء
إلى أبى وأمى من هم سببا لوجودى
إلى زوجتى الحبيبة وشريكة عمرى
إلى أبنائى وأحفادى
إلى أصدقائى وأقاربى
إلى كل من تهمه كينونتى ووجودى
أهديكم جميعا ثانى أعمالى المسرحية
متمنيا من الله عز وجل أن تنال إعجابكم
وأن أكون قد إستطعت أن أعبر فيها
عما يدور حولنا من أحداث جعلت
الدنيا حالها كده
المؤلف
الممثلين حسب الظهور على المسرح
======================
الدور الممثل
1- الجد
2- الجدة
3- أم رفعت (زوجة الإبن)
4- إخلاص (الإبنة الكبرى)
5- رفعـــت (الإبن الأكبر )
6- عــادل (أمين الشرطة )
7- صالح (مدرس الرياضيات )
8- الأب (الأستاذ شفيق)
9- سوسو (أخر العنقود)
10- سمير (فنان تشكيلى واهم )
11- شريفة (الممرضة )
12- فايق (طالب الثانوية )
13- عسكرى القسم
14- الدكتور أشرف
15- عصام (الإبن الغائب )
16- عبد الرحمن
17- أم عبد الرحمن
18- زوجة رفعت
19- زوجة صالح
20- طفل رفعت (عمره سنتين )
21- طفلين حديثى الولادة (توأم أخلاص)
مسرحية الدنيا حالها كده
=========
تدور الاحداث فى منزل يضم كل أفراد العائلة الجد والجدة للأب إلى جانب الأم الضعيفة الجاهلة التى ليس لها أى اهتمامات سوا رعاية بيتها وتجهيز الطعام والشراب للجميع الى جانب تسعة ابناء هم حسب الظهور على المسرح :-
***********
1- إخلاص : البنت الكبرى والتى تعانى من مشكلة العنوسة حيث بلغت من العمر 35 عاما ولم تتزوج بسبب عدم توافر فرصة زواج مناسبة لها وهى حاصلة على ليسانس الحقوق ولكنها لم تعمل بالمحاماة ولم تتح لها فرصة العمل الحكومى بسبب تقدير مقبول التى حصلت به على ليسانس الحقوق .
*********************************************
2- رفعت : الأبن الثانى فى الترتيب وهو شاب حصل على معهد فوق المتوسط (معهد فنى تجارى ) يبلغ من العمر 33 عاما أنهى فترة التجنيد منذ فترة ولم يجد عملا مناسبا فيعمل فى اى شئ يتاح له حتى وصل به الحال إلى أحتراف النصب .
*********************************************
3- صالح : وهو شاب فى 30 من عمره أدى الخدمة العسكرية بعد أن حصل على بكارليوس تربية فى الرياضيات ويعمل مدرس فى إحدى المدارس الإعدادية ويعمل طوال اليوم فى إعطاء الدروس الخصوصية فى منازل الطلاب .
*********************************************
4- عادل : شاب فى ال27 من عمره يتمتع ببنية جسمانية رائعة مما اهله لدخول معهد أمناء الشرطة بعد دبلوم التجارة ليصبح أمين شرطة فى إدارة المرور لكنه يتعامل مع وظيفته على أنها منجم ذهب تدر عليه يوميا مبلغا لابأس به يحاول ان يكون هو الأمر الناهى فى البيت لما يقدمه للأسرة من دعم مادى ويرفض الزواج بشكل قاطع .
*********************************************
5- سمير : وهو شاب فى 25 من عمره لم يؤدى الخدمة العسكرية وحصل على المعافاة لعدم اللياقة الطبية بسبب ضعف نظره الشديد الذى حرمه ايضا من ا/لعمل فى اى وظيفة حكومية وحاصل على دبلوم صنايع قسم زخرفة ويخيل اليه انه فنان تشكيلى من طراز نادر وينتظر الفرصة للظهور .
******************************************************
6- شريفة : الأبنة الثانية فى 23من عمرها وهى حاصلة على دبلوم تمريض وتعمل فى إحدى المستشفيات الحكومية وتعمل أيضا مع الدكتور أشرف أخصائى النساء والتوليد فى عيادته الخاصة والتى يقوم فيها بإجراء العمليات المحرمة لما تدر عليه من دخل كبير يفى بمتطلبات زوجته التى تود العيش دائما فى رغد ورفاهية دون النظر من أين تأتى الأموال .
*********************************************
7- عصام : توأم شريفة فى 23 من عمره وهو شاب رافض لكل شئ حوله لجأ إلى الجماعات الدينية المختلفة للهروب من واقع يعتبره او يصفه بأن متخلف وكافر بفعل الافكار التى إكتسبها من الدروس والمحاضرات التى يحضرها لهؤلاء رغم تفوقه العلمى والدراسى ترك الجامعة من عامها الاول ويرفض أداء الخدمة العسكرية لإعتقاده أنها غير مجدية فالجهاد ليس بالجندية وله طرق واساليب اخرى .
*********************************************
8- فايق : وهو شاب فى العشرين من عمره مازال فى الثانوية العامة لانه يتعامل معها على ان المواد الدراسية لكل سنة يجب ان تكون لعامين وليس لعام واحد وينحدر الى ادمان المخدرات معتمدا على دعم اخته شريفة المادى الدائم له .
*********************************************
9- سوسو ( سماح) : هى البنت الصغرى وأخر العنقود فى السادسة عشر من عمرها لا تشعر بأى أهتمام عائلى فالكل مشغول عنها بما لديه من مشاغل ومشكلات تجد ما تريد من خلال شبكة التواصل الإجتماعى الفيس بوك
*********************************************
المشهد الأول
=====
المسرح : بيت الأستاذ / شفيق عبد المتجلى الأب
الديكور : صالة الشقة بها بعض المقاعد وعدد 2 كنبة بلدى
على المسرح يظهر بصفة دائمة فى الخلفية الجدة والجد كل منهما يجلس على كنبة فى وضع الشارد ذهنيا وكأنه يحاول أن يتذكر شئ من الماضى .
الجدة : ياترى ياشفيق يابنى نتيجة الثانوية العامة بتاعتك
ظهرت ولا لسة ؟
ولو كانت ظهرت نجحت ولا لا ؟
ولو نجحت هتجيب المجموع اللى يدخلك كلية الطب
ولا لا ؟
ثم تشرد من جديد
الجد : ياترى لو روحت الشغل النهارده هاقبلها وأشوفها
تانى؟
ياترى هتيجى تطلب اخلص لها الورق زى ما وعدتنى
ولا ايه ؟
انا لازم أشوفها لازم ههههههههههههه
تدخل فى هذه اللحظة أم الأولاد زوجة الأستاذ شفيق عبد المتجلى أم رفعت
سيدة فى الخمسين من عمرها تظهر عليها علامات البلاهة والجهل فى ملبسها وطريقة حديثها
لتسأل الجد والجدة أن كانوا فى حاجة لأى شئ
أم رفعت : ايوه ياما بتنادى عايزة حاجة عايز حاجة يابا ؟
فلا يرد عليها أحد تعيد السؤال مرة ومرات دون رد
تقوم بحمل بعض بقايا الطعام من أمامهما وتنصرف إلى المطبخ .
يرن جرس الباب لتظهر إخلاص البنت الكبرى
شابة فى ال35 من عمرها لم تتزوج تساعد امها فى الاعمال المنزلية وتجلس تنتظر ابن الحلال
إخلاص : مين ع الباب (يستمر جرس الباب فى شكل غريب )
تسرع إخلاص الى الباب تفتحه
ليدخل اخيها( رفعت )شاب فى 33 سنة من عمره
مسرعا وكأن هناك من يجرى ورائه
رفعت : سنة على ما تفتحى الباب ؟
إخلاص : وانت مستعجل كده ليه حد بيجرى وراك ؟
رفعت : بيجرى ورايا !!! بيجرى ورايا ليه ؟ انا الحمد لله
صاغ سليم لا بعت ولا اشتريت
إخلاص : بعت ايه ؟؟
رفعت : بقولك لا بعت ولا اشتريت الراجل جه يطلب عربية
يشتريها دليته على البايع وخت العمولة
بتاعتى وخلاص انا مالى ان كانت العربية مش
موجودة اصلان ؟
اخلاص : عربية مش موجودة ازاى ؟ يعنى نصبتوا على الراجل
وبعتوله الهوى او الترماى
رفعت : ناس معندهاش ضمير راجل رايح يشترى عربية كان
لازم يشوفها الاول قبل ما يدفع فلوسه
كتب العقد ودفع الفلوس وقام يشوف العربية اتارى
العربية بتاعت واحد كان قاعد على القهوة
قام خد عربيته ومشى انا مالى
ههههههههههههههههه
اخلاص : انت مش هتبطل الشغل بتاعك ده يارفعت الفلوس دى
حرام واللى بتعمله ده اسمه نصب
رفعت : خليك فى نفسك يا استاذة يعنى عايزانى ااقعد من غير
شغل دا حتى الايد البطالة
ملهاش لازمة القوالة ههههههههههههههه
تدخل الام فى هذه اللحظة لتسأل رفعت هتغدى دلوقتى يارفعت ولا هتستنى اللى جايين من بره
رفعت : ازيك يا حاجة انت طبختى ايه النهارده ؟
الام : عاملة مسقعة بتنجان وبطاطس باللحمة المفرومة
رفعت : الله عليك يا ست الكل دايما مواكبة العصر حتى فى
طبيخك ماهى كلها مسقعة قولى
لبنتك الاستاذة علميها انها مسقعة مش اى حاجة
تانية
الام : ماهى يابنى اللى بتساعدنى وعارفة ازاى بتتعمل
المسقعة
رفعت : امال هى بتفهمنى غلط ليه هههههههههههههه ؟
الان يرن جرس الباب لتذهب اخلاص لتفتح الباب لتجد الاخ الاصغر عادل أمين الشرطة
عائد من عمله يدخل ليلقى السلام على الجميع .
عادل : السلام عليكم
يرد الجميع وعليكم السلام
رفعت : أبن حلال جييت فى وقتك تمام
عادل : خير فى حاجة ولا ايه ؟
رفعت : النهارده واحد اشترى عربية واللى باعها مش صاحبها
وكتبوا عقد ودفع الفلوس
ولما راح يشوفها كان صاحبها اخدها ومشى من قدام
القهوة
عادل : واللى يخصك مين فيهم اللى باع والا اللى اشترى ؟
رفعت : اللى باع صاحبى واللى اشترى عن طريقى
عادل : تبقى العربية موجودة
الجدة : مبروك يا شفيق يا بنى الف مبروك لولو لو لى
عادل : اهى جدتك قالت لك يا عم اعتبر الموضوع خلصان بس
هيدفع ولا ايه ؟.
رفعت : اكيد يا باشا ااقل شئ استكين ههههههههههههههههه
يرن جرس الباب من جديد لتذهب إخلاص لتفتح الباب وإذا به الأستاذ صالح مدرس الرياضيات
يدخل فى عجلة ليطلب الطعام من على الباب .
صالح : انت يا حاجة الأكل جاهز انا مستعجل معنديش وقت ؟
رفعت : طب سلم يا استاذ الأول انا مشوفتكش من اسبوعين
صالح : السلام عليكم ..... معلش والله ماعندى وقت عندى
حصة بعد ربع ساعة ومتأخر
رفعت : اروح ادى الحصة مكانك وبالنص ههههههههههههههه
عادل : نص ايه يا معلم التلت والتلتين هو صاحب المصلحة
صالح : الله الغنى يا اخوانا انا متشكر خالص كل واحد يخليه
فى نفسه
الجدة من جديد : الف مبروك يا شفيق الف مبروك يا ابنى لو لو
لو لو لوى
أخلاص : اية ياجدة انت جاية معاكى زغاريت هو انا
هتجوز ولا ايه ؟
الأم : أثناء خروجها من المطبخ ياريت يابنتى نفسى
ربنا يعدلهالك واشوفك فى بيت جوزك وأشيل
عيالك
إخلاص : خلاص بقى ياما راحت علينا والحمد لله على كل
حال .
رفعت : ياريت نبطل كلام فى الموضوع ده علشان ما
تقلبش نكد خلونا فى المسقعة بتاعتك
ياما هناكل ولا ايه ؟
الأم : طيب انا هاجهز لكم الأكل وبعدين اخواتكم وابوكم
يا كلوا لما ييجوا .
صالح : بسرعة ياما انا مستعجل قوى الوقت بيجرى
الجد : معقولة انتظر كل ده وماتجيش ؟ هى نسيت
المعاد ولا أيه ؟ انا عبد المتجلى أفندى كبير
موظفى قلم الحسابات أخد بمبة ؟
ليضحك الجميع على
ويرن جرس الباب من جديد يسرع رفعت الى الباب
ليدخل الاب الاستاذ شفيق عبد المتجلى عائدا من
عمله
الاب : السلام عليكم
يرد الجميع : وعليكم السلام ياحاج حمدالله ع السلامة
الأب : الله يسلمكم جميعا ويسلم على الجد والجدة ويقبل
ايديهم
الام : انت جيت ياسى شفيق؟
الاب : لا لسة هاجى كمان شوية ههههههههههه
الام : حمد الله ع السلامة ربنا يخليك لينا يارب انا
عمللكم حبة مسقعة انما ايه هتكلوا صوابعكم وراها
الاب : جميل ............. امال فين باقى الولاد ؟
الام : سمير جوه فى المرسم من امبارح
وسوسو فاتحه الكامبيوتر بتاعها وقاعدة قدامه من بليل
وشريفة لسة فى المستشفى وقالت هتطلع على العيادة على طول علشان
عندهم عمليات كتير النهارده ومش هتيجى الا بليل متأخر
وفايق مع اصحابه طالعين رحلة ابصر فين كده
وعصام بعد ما صلى الفجر قال انه هيسافر الواحات النهارده عنده شغل هناك
واحد جابهوله وهيقعد شهر او شهرين ويرجع
انا هجز الغدا غيروا هدومكم وثوانى الأكل هيكون جاهز
الجد :انا مش هاكلمها تانى هوانا شوية انا عبد المتجلى
أفندى على سن ورمح ثم يبكى
ليغلق الستار على نهاية المشهد الأول
******************
المشهد الثانى
======
يفتح الستار على الجد والجدة فى مكانهما المعتاد
الجدة : مش سامعة زغاريت ولا حاجة هى نتيجة الإعدادية
لسة ما ظهرتش الواد شفيق
هيتجنن يا ناس وأبوه ولا هوه هنا مين هيجيبله
النتيجة .
سوسو تظهر لأول مرة لترد على جدتها
سوسو : نتيجة ايه ياتيتة الأعدادية هههههههه والواد شفيق
يعنى نتيجة الاعدادية بتاعت بابا طيب هاتى رقم
الجلوس بتاعه وانا اجيبهالك من ع النت
هههههههههههههههههههههه
الجدة : انت مين يا حلوة ؟
سوسو : انا سوسو يا تيتة سوسو بنت الواد شفيق اللى فى
الاعدادية بابا فى الاعدادية
وانا فى اولى ثانوى هههههههههههه
الجدة : (وكأنها لم تسمعها ولم تراها ) ربنا ينجحك وياخد
بيدك يابنى
سوسو : يارب يا اختى يارب هههههههههههههه
الام : انت صحيتى يا فالحة؟ بردو مش هتروحى المدرسة ؟
سوسو : لا ياماما انا لسة نايمة ...... وبعدين مدرسة إيه هو
لسة فى حد بيروح المدرسة فى الزمن ده ؟ انت طيبة
قوى يا ماما
إخلاص : ياما سيبك منها هى مدرستها ع النت بتتعلم منها كل
حاجة احنا اللى جهلة ياريتنا لا روحنا مدارس ولا
جامعة ضيعنا عمرنا ع الفاضى وادينا قاعدين .
الام : يعنى فى مدرسة ع النت دا ياحبيبتى وبتدى شهادة ؟
اخلاص : ايوه ياما بتدى شهادة كبيرة قوى
سوسو : وبعدين بقى معاكم احنا لسة الصبح !!!
الجد : أه بس لو تيجى وأشوفها أنا مش عارف هى أختفت
كدا ليه دى كانت موعدانى هتيجى اخلص لها الورق
من المصلحة ونروح نتغدى سوا
الأم : هى مين دى يابا ؟
الجد : انت اللى مين يا أمورة ؟
الأم : انا مرات ابنك يابا أم رفعت
الجد : ابنى مين انا لسة متجوزتش اخلف ازاى !!!
الأم : لسة ايه ؟ الله يخزى شيطانك ياحاج 85سنة ولسة
متجوزتش
الجد : (وكأنه فى عالم أخر لا يرى ولا يسمع) بس هى لو
تيجى
سوسو : ستى كانت بتدعى لبابا ينجح فى الاعدادية من شوية
وجدى منتظر العروسة بتاعته بيحب ياخونا والحب
بهدلة ههههههههههههه
إخلاص : كتر خير الدنيا ناس عدت ال80 سنة الله يكون فى
عونهم احنا فى سننا ده وعايشين فى توهة .
سوسو : طيب انا هسيبك فى التوهة واروح اشوف اصحابى
وحشونى قوى .
أخلاص : اصحابك على الفيس ؟
سوسو : ايوه ............. عندك مانع ؟
أخلاص : لا يا حبيبتى روحى بسرعة زمانهم عاملين مظاهرة
منتظرينك .
سوسو : سلام بقى
أخلاص : سلام وتجلس على الكنبة بجوار جدتها لتجد نفسها
تقلدها فى جلستها دون قصد
وتردد بدون وعى بس لو ييجى ياااااااااارب
تدخل الأم الى المسرح ومعها اكياس الباذنجان والكوسة تنادى على أخلاص
الام : يلا يا اخلاص علشان نجهز الغدا ابوكى زمانه راجع
واخواتك
أخلاص : حاضر ياما انت هتعملى ايه النهارده ؟
الام : هنعمل مسقعة بالكوسة والباذنجان واللحمة المفرومة
أخلاص : ايه ياما هو كل يوم مسقعة ؟ عايزين نغير
الام : ما احنا غيرنا يا بنتى كانت بالباذنجان والبطاطس
خلناها بالكوسة والباذنجان وانت شوفتى هما كلوها
ازى امبارح
اخلاص : هو حد دارى ياما على رأيك كل الاكل بقى زي بعضه
العيشة كلها بقت كل يوم زى اللى قابله خلااااااااص
يخرج سمير من المرسم إلى الصالة ممسكا فى يده
لوحة بها رسم غير مفهوم ويرتدى البالطو الأبيض
مقلدا للفنانين الكبار مرتديا نظارته الطبية السميكة
ليخبر الجميع انه انهى اللوحة خلاص..
سمير : إيه رأيكم يا جماعة انا خلصتها خلاص اللوحة دى انا
متأكد أنها هتعمل ثورة فى عالم الفن التشكيلى
إخلاص : فن تشكيلى ايه بس ياسمير انت مش هاتعقل بقى ؟
سمير : وإنت ايه فهمك فى الفن التشكيلى يا ..؟ ولا بلاش انت
اختى الكبيرة وانا مش عايز أغلط فيكى .
إخلاص : عايز تقول يا جاهلة ربنا يسمحك
سمير : لا ااقولك ولا تقوليلى انا داخل المرسم
تدخل شريفة بعد ان استيقظت من النوم بعد ليلة عمل
شاق
شريفة : صباح الخير يا جماعة عاملين ايه ؟
ليرد الجميع : صباح الخير
اخلاص : انت مش هتروحى الشغل النهارده ولا ايه ؟
شريفة : لا انا خدت اجازة النهارده كان عندنا عمليات كتير
امبارح تصورى عشر عمليات امبارح !!
إخلاص : عمليات ولادة ؟
شريفة : ولادة ايه بس عشر عمليات اجهاض
اخلاص : اجهاض اعوز بالله ليه كده ؟
شريفة : بنات عائلات كبيرة عايشين حياة الغرب بيصاحبوا
ويحبوا وبعدين يجروا على عيادة الدكتور يلحقوا
نفسهم
إخلاص : بس العمليات دى حرام يا شريفة وقانونا لا يجوز
كمان
شريفة : انت عارفة امبارح بس انا اخدت كام 5000 جنيه
اخلاص : 5000 جنية فى ليلة واحدة ؟
شريفة : والدكتور اشرف 15000 جنيه بس بيتعب جدا والله
إخلاص : الله يكون فى عونه 15000 جنيه فى ليلة
شريفة : انا عايزة افطر وادخل ااااانام انا هموت م التعب انا
وصلت الفجر من العيادة وملحقتش انام
إخلاص : حاضر يا حبيبتى هاجهز لك الفطار حالا وتردد اثناء
سيرها
(5000جنيه الله يكون فى عونك انت بتتعبى قوى )
الجد : بس لو تييجى هى انا هاخدها واروح للمأذون على طول
شريفة : صباح الخير يا جدى هى مين دى ؟باين عليك شقى
ياجدى ومقطع السمكة وديلها
يرن جرس الباب تذهب شريفة لتفتح الباب لتجد
اخوها فايق يدخل فايق فى حالة من التعب الشديد
بعد سهرة حمراء جمعت بين المخدرات والخمور
والحريم يترنح .
شريفة : اهلا فايق مالك يالا عامل كده ليه ؟ انت مسطول ولا
ايه ؟
فايق : لا لا لا ابدا انا فايق خالص اهوه ازيك يا حبيبتى
شريفة : فايق بقى ده شكل واحد فايق ؟
فايق : ايوه انا فايق اخوكى فااااااااايق ههههههههههه
شريفة : انت هتموت نفسك كده انت كنت فين ؟
فايق : كانت حتة سهرة انما ايه اممممممممممممممممممموه
شريفة : وبعدين معاك يعنى ؟ انت مش هتبطل السهرات
السودة دى
فايق : بيقولوا سهرة حمرا مش سودة
شريفة : انا ما عنتش هديلك فلوس تانى
فايق : وأهون عليك ؟ فايق اخوكى حبيبك يبقى مفلس
شريفة : مانت هتموت نفسك كده
فايق : طيب ادخل انام والصبح نتكلم اصلى تعبان قوى قوى
قوى
شريفة : الصبح ؟ هو احنا بالليل ؟ طيب روح نام روح
فايق : تصبحى على خير يا موزة هههههههههههههههه
يرن جرس الباب من جديد تذهب شريفة لتفتح الباب
لتجد والدها فى حالة حزن شديد يلقى السلام عليها
شريفة : حمدالله ع السلامة يا بابا جيت بدرى النهارده يعنى !!!
الاب : الله يسلمك ياشريفة وأنت ماروحتيش الشغل النهارده
ليه ؟
شريفة : والله يابابا انا رجعت الفجر من العيادة وكنت هلكانة
هموت من التعب طول الليل عمليات لما هلكت
الأب : الله يكون فى العون يا بنتى بس اهو كله بثوابه وانتم
ملايكة الرحمة وخصوصا
موضوع الولادة ده دا صعب قوى
شريفة : ايوه يابابا صعب جدا وخطر خالص ربنا يستر بس
ماقولتليش انت رجعت بدرى
ليه النهارده ومالك زعلان قوى كده ؟
الاب : ااقولك ايه بس يا بنتى والله الواحد محتار ومستغرب
اللى بيحصل
شريفة : خير يابابا قلقتنى ؟
الأب : عمك عبد السلام يابنتى انت عارفاه .
شريفة : ايوه عارفاه يابابا
الأب : النهارده تعيشى انت توفى فى المصلحة واحنا قاعدين
شريفة : لا اله الا الله البقاء لله يابابا .... هو كان تعبان ولا
حاجة ؟
الأب : لا يابنتى بعيد عنك وربنا يستر ولايانا بنته الوحيدة
معندوش غيرها لا ولاد ولا بنات .
شريفة : مالها ؟
الاب : رجعت البيت متأخرة أمبارح وتعبانة جدا بيسألها وبعد
إلحاح عرف انها رجعة من
عند الدكتور بعد عملية إجهاض ولايعوز بالله
شريفة : معقول ؟ هى كان أسمها ايه ؟
الأب : أسمها بسمة
شريفة : (بسمة عبد السلام..... بسمة عبد السلام...... بسمة عبد السلام اااه نمرة 6 )
الأب : نمرة 6 يعنى ايه ؟
شريفة : لا يابابا ولا حاجة انا بقول بس لوكان عندها اخوات
تانية كانوا راعوها وخدوا بالهم منها
الاب : الله يرحمه ما استحملش وراح فيها
شريفة : طيب يا بابا هو ادفن مش معقول
الاب : لا يابنتى انا قولت على ما يجهزوه للدفن اجى اكل لقمة واغير هدومى وارجع احضر الدفن وافضل فى العزاء ده كان زى اخويا تمام الله يرحمه .
شريفة : واجب يابابا الله يرحمه ووووووووويرحمها هى كمان
الاب : ايوه يابنتى ويستر كل الولايا
ام رفعت : تدخل الى المسرح لتفاجئ بزوجها قد عاد من العمل تبادره بالسؤال ابو رفعت انت جييت ؟ مالك تعبان ولا ايه ؟ الف سلامة عليك يا خويا قولى حاسس بايه راسك بطنك ظهرك لازم رجليك فى ايه يا خويا بس طمنى
الاب : اهدى شوية يا ام رفعت اديلى فرصة اخد نفسى
الأم : انا بس اتخضيت عليك يا خويا انت عارف ملناش
غيرك
الاب : الاستاذ عبد السلام مات النهارده فى الشغل وانت عارفة انه كان زى اخ قبل مايكون صديق
الام : يا عييييييينى الله يرحمه ويحسن إليه كان طيب وراجل
امير
الاب : انا عايز اكل لقمة واغير هدومى علشان الحق الدفنة
الام : من عينى يا خويا المسقعة ع النار على ما تغير هدومك
يكون كل شئ جاهز
شريفة : انا كنت هاكل يابابا كويس انك هتاكل معايا
الأب : هاغير هدومى وأجى .........
يرن جرس الباب من جديد تذهب شريفة لتفتح
الباب فإذا بعسكرى من قسم الشرطة يسأل عن
رفعت
العسكرى : ده منزل رفعت شفيق عبد المتجلى ؟
شريفة : أيوه أخويا أى خدمة
العسكرى : مطلوب لجناب ضابط المباحث فى قسم الشرطة
شريفة : ليه خير هو عمل حاجة ؟
العسكرى : متقدم فيه بلاغ من أحد المواطنين الشرفاء بأنه
تعاون مع أحد النصابين للنصب عليه فى شراء
سيارة هو موجود ؟
شريفة : لا والله هو تقريبا فى الشغل
العسكرى : تمام أمضى حضرتك هنا ولازم يحضر للقسم خلال
ساعتين من دلوقتى يأما هتيجى قوة وتقبض عليه
شريفة : حاضر هابلغه
العسكرى : مع أداء التحية العسكرية بشكل كوميدى تمام يافندم
شريفة : تغلق الباب خلفه وتنادى على ابوها باااااابا ...يابابا
الأب : أيوه يا شريفة حاضر جاى مستعجلة كلى أنت
شريفة : أكل ايه بس تعالى فى مصيبة
الأب : مصيبة تانى أستر يارب
لينتهى المشهد الثانى
المشهد الثالث
=======
نفس الديكور منزل الاستاذ شفيق عبد المتجلى
الجد والجدة فى نفس حالة التوهان
الجد : مش ممكن لازم يكون حصل لها حاجة هى عمرها ما
تأخرت عليا فى ميعاد أنا لازم أروح أشوف حصل لها
أيه أنا مش هاعقد أنتظر كده ويمكن تكون محتاجالى
....... ويهم بالوقف ليجلس مرة أخرى لعدم قدرته على
الوقف وينسى كل شئ مرة أخرى
أم رفعت : تدخل إلى المسرح لتحضر الطعام للجد والجدة وهى
تقول صباح الخير يابا صباح الخير ياما دون أن
تنتظر رد طبعا ثم تجلس بجوار الجد لتطعمه الطعام
بيدها وتقول له ................
عارف يابا أنا عامله زيك تمام مش عارفة اى حاجة
م اللى بتحصل حوليا العيال بتدخل وتخرج لا
باعرف مين جه ولا مين راح زيك تمام أنت وأمى
الفرق بينى وبينكم أنكم محدش عايز منكم أى حاجة
أما أنا مطلوب منى أعمل كل حاجة للكل
ثم تفرغ من إطعام الجد لتذهب إلى الجدة
عاملة إيه ياما ثم تشرع فى إطعامها بيدها
وتقول عارفة ياما الوحدة مننا عايزة تشوف عيالها
كلهم كويسين وعايزة تطمن على الكبير والصغير
فيهم بس أنا مابعرفش اى حاجة عن اى حد فيهم
يمكن عشان كبروا بس هم لسة عيالى ولسة محدش
منهم بقاله حياته الخاصة كلهم لسة موجودين معايا
فى البيت انا مش عارفة اعمل ايه والله ........ الف
هنا وشفا ياما ربنا يخليكم لينا انتم البركة ...
ثم تنصرف للمطبخ كالمعتاد ليدخل إلى المسرح سمير الفنان التشكيلى
سمير : الواحد عايز يعمل لوحة كبيرة عظيمة كده واوقع عليها
زى بيكاسو اعمل مثلا لوحة الجدة ليزا او الجد ليزة
زى الموناليزا هتكون أشهر منها كمان
يجلس سمير امام الجدة ويشرع فى رسمها على اللوحة ليفاجئ بها تقول ....
الجدة : الحمد لله النتيجة ظهرت وشفيق نجح فى الإبتدائية
بتفوق لكن عبد المتجلى ماجاش لسة م الشغل لحد
دلوقتى ياترى فى ايه استرها يارب ويرجع بألف سلامة
سمير : ابتدائية ايه ياتيتة ؟ بابا خلص تعليم واشتغل وخلاص
اقرب يطلع ع المعاش كمان هههههههه (لكنه لم يأتيه
أى رد من الجدة ) يردد يا تيتة ... ياااااااتيتة.....يا تيتة
تدخل الام مرة اخرى للمسرح تقول لسمير ....
الام : ايه ياسمير بتعمل ايه يابنى ؟
سمير : ولا حاجة يا ماما هرسم لوحة الجدة ليزا
الام : مين دى يا ابنى ؟
سمير : جدتى أم شفيق ههههههههههه
الام : ايوه يابنى علشان تدعيلك ربنا يوفقك يابنى ويسهلهالك
سمير : ياااااااااااااااااارب
لتدخل سوسو اخر العنقود تقول
سوسو : صباح الخير يا سمير ... صباح الخير يا جدى صباح
الخير يا تيتة
سمير : صباح الخير مين سوسو ؟ وحشانى والله انا بقالى
اسبوع مشوفتكيش الفيس شاغلك قوى كده
سوسو : والله يا سمير انا أنضميت ليجى 200 جروب كلهم
روشين طحن
سمير : وطبعا أنت بتطحنى معاهم طول الليل والنهار
سوسو : أعمل ايه بس باجى ااقوم ألاقى بوستات بتنزل تربطنى
تانى اقدام الجهاز لازم اشارك وارد على اصحابى
الروشين
سمير : الله يكون فى العون بتتعبى قوى
سوسو : قوى قوى يا سمير هى فين ماما ؟ ياماما يماما
الأم : ايوه ياسوسو عايزة ايه ؟
سوسو : انا جعانة قوى يا ماما عايزة أكل أنا مش فاكرة كلت
أمتى أخر مرة بس انا جعانة قوى
الأم : تعالى المطبخ وجهزى اى حاجة كوليها انت مش بنت
زى البنات ؟
سوسو : انا ادخل المطبخ ؟ يانهار بينك انت عايزة اصحابى
يشيروا الخبر والفضيحة تبقى بجلاجل فى خلال ثانية
واحدة
تدخل شريفة للمسرحة وتلقى التحية على الجميع وتقبل
يد الجدة والجد
شريفة : صباح الخير صباح الخير يااااجدى صباح الخير يا تيتة
ايه ياسوسو عاملة هيصة ليه ع الصبح كده
سوسو : تصورى ياشريفة ماما بتقولى ادخل المطبخ
شريفة : لا طبعا غلطانة تدخلى المطبخ ازاى جواز ومعدش فيه
جواز تتعلمى شغل المطبخ ليه
مجهود زيادة يعنى وبعدين بكره الجواز يكون ع النت
والعلاقات الزوجية والمعاملات تبقى
بالرسايل يعنى والناس نايمة ع السرير لا امك غلطانة
انت عايزة ايه م المطبخ
سوسو : عايزة اكل مش عارفة فطار ولا غدا بس عايزة اكل
وخلاص حاسة انى جعانة قوى
شريفة : حاضر انا هادخل اجهزلك اكل واجيبوه لحضرتك فى
الاوضة
سوسو : تسلميلى يا اختى يا حبيبتى ويخليكى ليا
شريفة : من غير ما تدعى يا حبيبتى هو مخلينى ما تتعبيش
نفسك وتدعى انا قاعدة هو لا هاروح ولا اجى
ثم تنصرف كلا منهما الى حيث تريد فى هذه الاثناء
كان سمير منهمكا فى رسم اللوحة حتى كاد ان يفرغ
منها ثم يقف وينظر لها من بعيد ويقول ...
سمير : الله عليك يا فنان هتكون اجمل لوحة لوحة التيتاليزا
يرن جرس الباب فيذهب سمير ليفتح الباب بعد عدد من
الرنات المتتلية ليدخل الاب والاخ رفعت عائدين من
القسم
سمير : اهلا يابابا حمد الله ع السلامة يارفعت
رفعت : الله يسلمك يافنان
الاب : وبعدين يابنى معاك مشاوير القسم كترت قوى
رفعت : اعمل بس يا بابا يعنى ااقعد فى البيت من غير شغل
الاب : هو لازم يكون شغلك نصب على مخليق ربنا؟ دلولا
زملات اخوك عادل كنت اتبهدلت فى القسم ومكناش
عرفنا نعملك اى حاجة
رفعت : ايوه صحيح الواد عادل ده طلع كلمته مسموعة باشا
باشا يعنى شوفتنى يابا وانا قاعد حاطت رجل على رجل
عند الضابط .......
الاب : ايوه فعلا انت كنت قاعد كده ليه يا قليل الادب دا انا
ابوك ومعملتهاش
رفعت : كان لازم كده يابابا علشان الضابط يصدق انى بريئ
لوكشيت منه كان لبسنى قضية تانية حتى لو كنت بريئ
وبعدين عادل ااقصد الباشا عادل اخويا يعنى ضهر جامد
الاب : طيب يافالح اروح اشوف عملولى ايه فى الشغل النهارده
رفعت : طريق السلامة يا حاج تروح وترجع بألف سلامة ياحاج
هتوحشنا قوى ياحاج يردد حتى يخرج الاب
موجها كلامه لسمير ..........
رفعت : سمير أنا شايف انك فنان كويس وعايز أخدمك ياسمير
سمير : ازاى يعنى ؟
رفعت : انت بترسم لوحاتك وبتشيلها لا حد بيشوفها ولا حد
بيعرف عنها حاجة
سمير : ايوه وبعدين يعنى ؟
رفعت : انا هاخدها واوزعهالك وهتجيبلك فلوس كويسة قوى
سمير : بتتكلم جد ؟
رفعت : طبعا شغل يا حبيبى شغل بس طبعا ليا نسبة من الدخل
ده نقول 50%
سمير : 50% كتير قوى خليهم 25%
رفعت : انت هتفاصل خليهم مركونين
سمير : خلاص ياعم انا موافق
رفعت : بس ترسم اللى هقولك عليه تمام
سمير : تمام زى ايه ؟
رفعت : يعنى مناظر كده .. كده يعنى
سمير : يعنى مناظر عريانة يعنى
رفعت : الله ينور عليك فهمتنى
سمير : بسيطة انا كل اللى رسمته لحد دلوقتى مناظر عريانة
حتى صورة تيتاليزا اللى لسة برسمها ناوى تكون تتاليزا
عريانة
رفعت : يابن الايه دانت فنان كبير بقى وانا معرفش اصل
المناظر دى هى اللى بتجيب فلوس
من الناس الاغنية انت عارف كل واحد منهم لازم تكون
عنده فى بيته او فيلته صور
عريانة من باب انه مثقف يعنى هههههههههههه
سمير : اتفقنا انا عندى جوه ييجى 50 لوحة منهم القاعدة
واللى نايمة واللى .......
رفعت : واللى ايه الله يخرب بيتك
سمير : واللى بتستحمى يا عم فى ايه ؟
رفعت : ادخل هاتهم بسرعة دا كنز يابنى بسرعة
ينصرف سمير مسرعا لاحضار اللوحات فى حين يقف رفعت يحدث نفسه .....
رفعت : انا شوفت اللوحات دى عند الاستاذ جلال بتاع المعرض
بتاع التحف ولما سألته عنها قال انها غالية قوى
ومطلوبة انا اروح له وهو اكيد هايشترى منى على طول
دا قال ان اللوحة سعرها بيعدى ال2000 جنيه بعد
البرواز والذى منه
يدخل سمير بعد ان احضر اللوحات ملفوفة فى ورق
سميك ليعطيها لرفعت
سمير : ادى اللوحات ياعم رفعت بس خلى بالك منها
رفعت : طبعا هاخلى بالى
سمير : بس انا عايز فى اللوحة الواحدة مش ااقل من عشرين
جنيه
رفعت : عشرين جنيه فى اللوحة مش كتير
سمير : متنساش انك هتاخد 50%
رفعت : ايوه صح انت صح هههههههههه
ينصرف رفعت لبيع اللوحات وسمير الى حجرته
ليبادر الجد يقول ..........فى لحظة فوقان غير معتادة
الجد : يابن النصابة الواد هيبيع اللوحة ب2000 ويحاسب اخوه على 10 جنيه وانا مالى بس هى لو تيجى انا مش عارف هى غابت كده ليه بس
تظهراخلاص على المسرح وهى تحدث نفسها فى
استغراب شديد
إخلاص : سلمى بنت ام حسين اتخطبت ؟ سلمى اللى كنت بعلمها الف باء وهى فى الحضانة هتتجوز وانا لسة زى ما انا سلمى اللى عندها 19 سنة وانا اللى عندى 35 سنة قاعدة لسة جنب امى طب اعمل ايه اروح فين قولولى يا ناس اروح فين واعمل ايه انا هتجنن صحيح اتخطبت لراجل عربى عنده 50 سنة بس وماله احسن من القاعدة كده وبعدين العربى دا معاه فلوس هيجيب ويجيب ويجيب ..........
يرن جرس الباب من جديد لتدخل شريفة فى عجلة تقول
شريفة : ازيك يا اخلاص يا اختى عاملة ايه كويسة
اخلاص : ايوه كويسة (تقولها فى انكسار ) انت جاية بدرى
النهارده يعنى
شريفة : اصل فى موضوع كده يارب يحصل
اخلاص : موضوع ايه خير ؟
شريفة : الدكتور اشرف طلب يتجوزنى
أخلاص : أنت كمان ؟ ااقصد الف مبروك يا حبيبتى بس دا
متجوز يعنى معاه واحدة ست هتتجوزى على ضرة يا
شريفة ؟
شريفة : ايوه وايه يعنى ؟ المهم نتجوز ونتجوز بسرعة كمان
أخلاص : ليه بسرعة ؟ مستعجلة على ايه ؟
شريفة : لازم استعجل الايام بتجرى المهم بابا يوافق واخواتك
أخلاص : هو حصل حاجة ما بينكم ؟ حصل حاجة صح ؟ انت حامل ؟
شريفة : اوعى تجيبى اى سيرة لاى حد لحد ما يتم الجواز
اخلاص : هى دى حاجة تتقال ولا تتحكى بس ليه كده عملتى كده ليه ؟
انت مش صغيرة علشان ينضحك عليكى ؟
شريفة : ينضحك عليا انا انت طيبة قوى يا اخلاص المهم اشرف جاى دلوقتى علشان يكلم بابا لازم يوافق يا اخلاص على كل شئ يطلبه الدكتور اشرف فهمانى كل شئ
اخلاص : بابا لسة فى الشغل بس اكيد زمانه جااااااااى
فى هذه اللحظة يرن جرس الباب تذهب اخلاص لتفتح
الباب فى حين تنصرف شريفة الى الداخل يدخل الاب
فى حالة اجهاد شديد لتبادره أخلاص
أخلاص : حمد الله ع السلامة يابابا مالك كده تعبان ولا ايه ؟
الاب : تعبان قوى يا بنتى مش قادر اتحكم فى جسمى خالص
أخلاص : لا فوق كده انا عندى خبر هيفرحك قوى
الاب : خير يا أخلاص ؟
أخلاص : فى عريس جاى يخطب شريفة
الاب : عريس بتتكلمى جد مين يا اخلاص وجاى
لشريفة بنتى معقول اول مرة اكون ابو العروسة
بجد بتتكلمى جد هو فين؟ هو فين ؟
اخلاص : ايوه صحيح يا بابا اول مرة ربنا يتمم بخير ان
شاء الله العريس الدكتور اشرف اللى شريفة
بتشتغل معاه وجاى دلوقتى هى قالت كده
............. ارزاق
الاب : بس يا بنتى دا متجوز !!!!
إخلاص : وايه يعنى يابابا المهم انه عايز يتجوزها ولازم
يتجوزها
الاب : بتقولى لازم ؟
اخلاص : ااقصد طالما هى موافقة يبقى خلاص
الاب : ايوه طالما هى موافقة خلاص انت قولتى لماما ؟
اخلاص : لا لسة شريفة معرفانى حالا كنت لسة هقولها
وانت بترن الجرس ع الباب.
الاب ينادى على الام ليخبرها بموضوع العريس
الاب : ياام رفعت ........ انت يا ام رفعت
الام : ايوه ياحبيبى انت جيت ؟
الاب : لا لسة ......... تعالى يا ولية فى خبر حلو عشانك
الام : خير يارب قول يا وش الخير
الاب : فى عريس جاى لبنتك زغرتى امال
الام : لولولولولولولولولولى الف مبروك يا اخلاص جه
اليوم اللى هشوفك عروسة الحمد لله
أخلاص : مش انا يا ماما دى شريفة
الام : شريفة ........ لايمكن ازاى الصغيرة تتجوز
قبل الكبيرة
الاب : صغيرة ايه وكبيرة ايه يا ولية البنت جالها نصيبها
خلاص وان شاء الله اخلاص ييجى نصيبها عن قريب المهم الفرح يدخل البيت الحمد لله احمدك يارب واشكر فضلك عقبالك يا اخلاص
اخلاص : ان شاء الله يا بابا ان شاء الله
الام : والعريس ده نعرفه ؟ من الحتة يعنى ؟
اخلاص : الدكتور اشرف يا ماما اللى شريفة بتشتغل معاه
الام : بس ده كبير عليها ومتجوز كمان
الاب : هى موافقة المهم هى موافقة خلينا نفرح بقى
يرن جرس الباب تذهب اخلاص لتفتح الباب ليدخل
الدكتور اشرف شاب فى الأربعينات من عمره وسيم
وشيك جدا تظهر عليه علامات الثراء
دكتور اشرف : السلام عليكم يا جماعة
الاب والام : وعليكم السلام اهلا يادكتور اهلا يابنى اتفضل
دكتور اشرف : والله ياعمى انا محرج من حضرتك جدا بس انا
هدخل فى الموضوع على طول
الاب : اتفضل يابنى خير
اشرف : انا طالب القرب منك فى شريفة وانت عارف اننا
بنشتغل مع بعض من سنتين تقريبا وهى عارفة
عنى كل شئ
الاب : ايوه يابنى اهلا وسهلا
اشرف : بس انا ليا ظروف خاصة جدا هى عرفاها
ومتفهماها كويس قوى وموافقة عليها بس باقى ان
حضرتك توافق
الاب : ظروف ايه يابنى خير
اشرف : طبعا حضرتك عارف انى متجوز وطبعا حضرتك
عارف وضعى ومركزى مش عايز شوشرة وفضايح
واهل مراتى ناس غناى قوى ووصلين وبيساعدونى
فى شغلى كتير ولهم افضال عليا كتير ومش عايز
اخسرهم
الاب : طيب يابنى لما هى الحكاية كده ومراتك كويسة واهلها
كويسين ولهم افضال عليك جاى تتجوز بنتى ليه
اشرف : واضح جدا ان شريفة ماقلتش لحضرتك كل حاجة
الاب : كل حاجة زى ايه يعنى ؟ هو فى ايه يابنى
اشرف : والله يا عمى للاسف احنا مضطرين نتجوز ونتجوز
بسرعة جدا
الاب : مضطرين ازاى يعنى
اشرف : مضطرين يا عمى مضطرين ويشاور بيده على البطن
علامة الحمل بدون تصريح بالكلام
فى هذه اللحظة تخرج شريفة من غرفتها تحمل حقيبة
سفر كبيرة جمعت فيها كل متعلقاتها فى بيت ابيها لتذهب
مع اشرف إلى شقتها الجديدة التى قام بتأجيرها لها
لتكون عش الزوجية وقام بفرشها بفرش متواضع لضيق
الوقت .
ليفهم الأب الموضوع متأخرا جدا وتخرج إبنته امام عينه
ليجلس هو وزوجته وابنته الكبرى فى حسرة يبكون على هذه الفرحة المكبوتة
لينتهى الفصل الاول
