الرئيسية
![مسرحية (يا أهل المغنى وجعتوا دمغنا )[b]تأليف الأديب والشاعر دكتور/ السيد محمد صابر Empty](https://2img.net/i/empty.gif)
تأليف الأديب والشاعر دكتور/
![مسرحية (يا أهل المغنى وجعتوا دمغنا )[b]تأليف الأديب والشاعر دكتور/ السيد محمد صابر Dscf0210](https://i.servimg.com/u/f53/20/21/51/47/dscf0210.jpg)
![مسرحية (يا أهل المغنى وجعتوا دمغنا )[b]تأليف الأديب والشاعر دكتور/ السيد محمد صابر Dscf0211](https://i.servimg.com/u/f53/20/21/51/47/dscf0211.jpg)
![مسرحية (يا أهل المغنى وجعتوا دمغنا )[b]تأليف الأديب والشاعر دكتور/ السيد محمد صابر Dscf0212](https://i.servimg.com/u/f53/20/21/51/47/dscf0212.jpg)
مسرحية
(يا أهل المغنى وجعتوا دمغنا )
=====================
الفصل الأول
=======
المشهد الأول
========
حارة مصرية – بيوت متهالكة – مقهى بلدى
=========================
يخرج من باب المقهى عامل المقهى ( كروان ) فى زيه المعتاد الجلباب المخطط والطاقية الشيبكة ومريلة عامل المقهى يقوم برص الكراسى ورش المياه امام المقهى وهو يغنى بصوته العذب أغنية أم كلثوم ياصباح الخير ياللى معانا وهو يستمع لها فى الراديو بصوت أم كلثوم ليفاجئ بقطع الأغنية ليذاع خبر هاااام ..........
المذيع : خبر هااااااااام مبروك لمصر العظيمة أم الفنون نهنئ الشعب العظيم بفوز المطرب الشاب ( حباكة الأمير ) بجائزة عالمية فى مهرجان بباكو الدولى العالمى للاغنية العربية الف مليون مبروك لمصر ........ هنا القاهرة
يدخل المعلم ( حمودة )الى المسرح ليجد كروان يقف مذهولا امام الراديو بعد انتهاء الخبر ينادى عليه
حمودة : كروااااان انت ياد ياكروااان مالك واقف زى تمثال لاظوغلى كده ؟ فى ايه ؟
كروان : هه!!!..... هه!!! ...... لا أبدا يا معلم م الفرحة هههههههههههههههه
حمودة : فرحة ........ خير يارب اللهم اجعله خير ؟
كروان : حباكة الأمير يا معلم مطرب الجنازات ههههههههه
حمودة : ماله يا فتاح يا عليم يارزاق يا كريم
كروان : خد جايزة عالمية النهارده والخبر اتذاع فى الراديو
حمودة : انت بتقول ايه معقول يا ناس حباكة ابن ام حباكة ياخد جايزة عالمية
والجايزة دى فى ايه يا ابن الفقرية ؟
كروان : فى الغنى يا معلمى فى الغنى هههههههههههه
حمودة : هو حباكة بيغنى يا فقرى هو بيعرف يتكلم اصلا
كروان : امال ايه يا معلمى دا عبا ييجى عشرين شريط
حمودة : عشرين شريط ايه ؟
كروان: كاسيت يا معلمى عشرين شريط كاسيت
حمودة : عباهم ازاى وايه ؟
كروان : يا معلمى مش انت سمعت اغنية عبيله واديله
حمودة : هو فى اغنية اسمها عبيله واديله انت باين عليك اتهبلت النهارده انت مبلبع حاجة ولا ايه
كروان : هبلبع ايه بس يا معلمى مانت عارفنى
حمودة : مانت بتقول كلام لا يتفهم ولا يتعقل
كروان : والله يا معلمى فى اغنية بتقول عبيله واديله ودى بقى الحكمة اللى مشى عليها حباكة مطرب التوك توك
يدخل عليهما حسن أفندى نهاوند عازف العود وفنان المنطقة الغلبان
حسن نهاوند : صبااااح الخيرات يا معلم عرفت اللى حصل
المعلم : صباح الخير يا فنان خير ان شاء الله
حسن نهاوند : عجيبة جديدة من عجايب الدنيا ههههههههههه
المعلم : خير يارب اللهم اجعله خير
نهاوند : حباكة ..........
المعلم : أنت كمان ياراجل دانا بقول عنك انك عاقل وفنان
نهاوند : انا كمان ايه يا معلم
المعلم : هتقولى حباكة ماله المدهول على عينه ده ماله ؟
نهاوند : التلفزيون جاى يصوره والإذاعة كمان
المعلم : الله هو جرى ايه فيك يا بلد حباكة يكش يكون عشان الجايزة
نهاوند : هو انت عرفت يا معلم
المعلم : الواد كروان بيقولى الراديو بيذيع اسم حباكة لا وايه بيهنوا الشعب المصرى
نهاوند : امال ايه يا معلم دا فاز بجايزة عالمية علشان اغنية دوس على رجلى بالراحة أمى هتديلك تفاحة
المعلم : نعم يا اخويا دوس ايه ؟ وامى هتديلك ايه ؟
نهاوند : بالراحة وتفاحة يا معلم دى مكسرة الدنيا فى التوك توك
المعلم : طيب هو بيعرف يقول
نهاوند : اماااااااااااااااااااااااااال دا بقى عقبال املتك نجم النجوم
المعلم : طب جوم جوم شوف مين اللى جايين دول
يدخل على المسرح ثلاثة رجال وسيدة فى زى غريب عن اهل الحارة واشكال مختلفة يتجولون فى الحارة ويتهامسون ضاحكين
المذيعة : ايه يا جماعة المكان ده ؟
المخرج : دا حى شعبى يا استاذة فى ناس عايشين هنا منهم النجم بتاعنا
المصور : لوكيشن يجنن يا جماعة هو لسة فى المناظر دى فى مصر
المذيعة : طيب خلينا نخلص شغلنا ونمشى من هنا انا مش قادرة استحمل بصراحة ستروه
نهاوند الفنان : اهلا وسهلا بالأمورة والبهاوات خير عايزين حد هنا ولا ايه ؟
المخرج : بنسأل عن بيت النجم حباكة
نهاوند الفنان : النجم حباكة .... ايوه ايوه هو البيت اللى هناك ده فى اخر الشارع هو حضرتكم من التلفزيون صح ؟
المذيعة : مش باين علينا؟ انت متعرفنيش ولا ايه ؟
نهاوند الفنان : انا بشبه على حضرتك وبقول شوفتك فين شوفتك فين
المذيعة : شوفتنى فين ؟ دا باين عليه مش عايش فى الدنيا ااااااااااااااااااف
نهاوند : هى مالها كده ؟ تعالوا اتفضلوا نقعد نشرب حاجة عند المعلم حمودة عمدتنا وكبير الحارة
المخرج : تعالوا ونبدأ تصوير من هنا من القهوة
المعلم حمودة : اهلا اهلا بالبهوات اتفضلوا يا كروان ... يا كروان
كروان : ايوه جااااااااااااااااااااااااااااااااى اامرنى يا معلمى (ويتفاجئ بالحضور) مين اهلا اهلا بالست المذيعة منورة حارة معلش
المذيعة : معلش ؟؟؟ ههههههههههههههههههههه
كروان : ايوه يا ست هانم اشهر حارة فى مصر كلها حارة معلش
المذيعة :اوك معلش معلش0000اهم حاجه نقابل النجم دا ونمشى بسرعه
كروان:طب قوليلي يا ست هانم تشربي ايه الاول حضرتك والبهوات
المذيعة : لا مفيش داعي عاوزين نقابل حلبكه دا خلينا نمشى
كروان :حلبكه مين يا هانم هههههههههههه اسمه حباكة
وكل الموجودين يضحكو
كروان: مقولتليش بردو هتشربى ايه لازم تشربي حاجه دى اول مره تيجى هنا ودا واجب
المذيعة :اوك اوك لو لازم يبقي ايس بوريو
كروان :ايس مين يا هانم ؟ لامؤاخذه دا بيتاكل ولا بيتشرب البتاع ديه؟
المذيعه: خلاص ....... خلاص نادوا اسمه ايه دا خلينا نمشى مش قادره اقعد اكتر من كدا
المخرج : طيب يلا نعمل لقاء مع المعلم حمودة على مينادو النجم
يتخير المخرج مكانا للتصوير فى منتصف المسرح لتظهر خلفية الحارة فى التصوير ويقف المعلم حمودة والمذيعة استعدادا للتصوير
المخرج : استاند باى هنبدأ ياجماعة جاهزة يا استاذة ؟
المذيعة : جاهزة اتفضل
المخرج للمصور : جاهزين ؟
المصور : جاهزين يا استاذ
المخرج : اكشن
المذيعة : سيداتى انساتى سادتى من حارة (معلش ) مسقط رأس نجمنا المحبوب العالمى المطرب الرائع حبلكة الامير .......... يقاطعها المخرج
المخرج : استوب ....... يا استاذة اسمه حباكة ..... حباكة يا استاذة مش حبلكة
المذيعة : مت؟اسفة يا استاذ يعنى من قلة الاسامى
المخرج : معلش يا استاذة حباكة .. حباكة
المذيعة : خلاص يا استاذ ( حباكة ) ههههههههههه
المذيعة تعيد المقدمة مرة اخرى وتبدأ الحوار مع المعلم حمودة
المذيعة : نحب نتعرف بحضرتك يا معلم
المعلم : انا المعلم حمودة صاحب القهوة دى أنا ااقدم سكان المنطقة بيسمونى عمدة الحارة وكبيرها
المذيعة : يبقى أكيد لك دور كبير فى إظهار موهبة النجم المحبوب حباكة
المعلم : والله الكدب خيبة أنا بس النهارده الصبح عرفت إن حباكة ده نجم وأنه كمان محبوب ولا عمرى سمعته بيغنى فى اى يوم يا استاذة ده ما بيعرفش يتكلم يبقى هيغنى ازاى بس والله دى مصيبة
المخرج : استوب ......... أيه الكلام ده يا معلم ........ بقى ده اسمه كلام البرنامج هيتذاع فى القناة الفضائية وهيسمعه العالم كله .......... وده نجم فاز بجائزة عالمية يعنى نجم عالمى
المعلم : انت بتتكلم على مين يا فندى حباااااااااكة مش ممكن !!!! مش ممكن أبدا
المخرج : يا معلم لازم تقول انه كان نجم من يومه كان ماشى يغنى طول عمره موهوب يعنى
المعلم : يعنى اكدب و اخش النار ااقول كلام محصلش ده لا عمره غنى ولا كان بيعرف ينطق كلمتين على بعض يافندى
المذيعة : انت لو قولت زى ما احنا عايزين يا معلم هتاخد 200 جنيه فورا
المعلم : 200 جنيه واقول انه كان نجم من يومه ؟
المخرج : ايوه ويمكن يبقوا 300
المعلم : الاستاذ حباكة الأمير ده ابن حتتى وانا مربيه على ايدى وطول عمره وهو ماشى ماشى يغنى على روحه كويس كده يا فندى معقول كده ...
المخرج : ايوه يامعلم اثبت على كده بس بلاش على روحه دى لايفكروا كان بيعمل حاجة تانية هههههههه ......... موجها كلامة للمذيعة .... جاهزين ؟
المذيعة : جاهزين يا استاذ
المذيعة للمعلم : ايوه يا معلم بتقول ايه ؟
المعلم : الأستاذ حباكة ده من يوم ما اتولد وهو بيغنى بس بصراحة كلامه مش مفهوم واحنا كنا بنحسبه بيغنى هندى اى والله
المذيعة : يمكن علشان كده فاز بالجايزة العالمية ؟
المعلم : الله ينور عليك يا استاذة الخواااااااااااااااااجات بس اللى بتفهمه سامحنى يارب
المذيعة : بنشكرك يا معلم ولقائنا دلوقتى مع الاستاذ ؟
الاستاذ نهاوند : انا نهاوند فنان المنطقة وانا اللى علمت النجم المحبوب حباكة الغنى من صغره
وعلمتة ازاى يطلع على السلم وينزل
المذيعة : سلم ايه ؟
نهاوند : السلم الموسيقى يا استاذة اصله كان كل ما ييجى يطلع يقع
المخرج : أستوب ....... يقع ايه بس يا استاذ هو فى نجم بيقع بردو ....... هتاخد 200 جنيه زى المعلم قول بقى
نهاوند : الاستاذ حباكة الامير علمنى ازاى اطلع على السلم علشان انا كنت كل ما اجى اطلع اقع بس هو من يومه فوريرة اى والله فوريرة
المذيعة بنشكر حضرتك جدا يا استاذ ..........
نهاوند : نهاوند يا ست هانم نهاوند
المخرج يسمع صوت كروان وهو يلبى نداء الزبائن بايوه جااااااااااااااااااااااااى بصوته الرائع فيريد ان يصور معه لقاء عن النجم حباكة وخاصة انه فى نفس سنه تقريبا ينادى عليه
المخرج : أنت يااااااااااا
كروان : ايوه جااااااااااااااااااااااى أامرنى يا استاذنا شاى قهوة حلبة حصى جنزابيل
المخرج : لا ..... لا ......... انا عايزك تصور معانا
كروان : اصور ايه يا باشا ؟
المخرج : انت تعرف النجم المحبوب حباكة ؟
كروان : النجم المحبوب حباكة ؟
المخرج : ايوه ....... اللى فاز بالجايزة العالمية انت مش من المنطقة هنا ولا ايه ؟
كروان : حباكة ده صاحبى وكان بيشتغل معايا هنا فى القهوة دى وكل الزباين كانت مبطقهوش سبحان الله كان وشه كشر ومبيعرفش يتكلم .
المخرج : لا لا انت اكيد قاصدك على حباكة تانى
كروان : يا فندى ده متربى معايا فى الحارة
المخرج : انت هتصور معانا ولا لا هتاخد 200 جنيه
كروان : طبعا هصور 200 جنيه يانهار ابيض لازم اصور
المخرج : بس تسيبك من الكلام الفارغ بتاعك اللى انت قولته
كروان : طبعا طبعا 200 جنيه يا نهااااااااااااااااااااااار ابيض
المخرج : طب تعالى ..................... موجها كلامه للمذيعة والمصور والمساعدين جاهزين ؟
المذيعة : جاهزة يا استاذ انا طول عمرى جاهزة
المصور : جاهزين يا استاذ جاهزين
المذيعة : نتعرف بحضرتك
كروان : انا اسمى كروان من اشد المعجبين بالنجم المحبوب حباكة
المذيعة : تعرف ايه عن بداياته ؟
كروان : هو لسه ما بتداش
المذيعة : ازاى وهو فاز بالجايزة العالمية الكبيرة دى
كروان : اقصد انه لسه عنده كتير كتير قوى دا فنان فنان قوى ومطرب مطرب جامد قوى هاحكى لحضرتك على حاجة كنا مرة فى فرح ابتسام بنت ام جلال جارتنا هنا فى الحارة واصر انه يغنى فى الفرح والفرح كان كبير والناس كتير والستات مالية الفرح طلع ماسك المايك وقال يا ليل بس الناس سابت الفرح وقعدت تجرى تجرى تجرى ههههههههههههههههههه
المذيعة : تجرى ؟ ليه ؟
كروان : تجرى أنا قولت تجرى ؟ اه ايوه فعلا من حلاوة الصوت حضرتك مش بتشوفى المعجبات بتعمل ايه مع النجوم ؟
المذيعة : ايوه .... ايوه فهمت يعنى هو مطرب مميز
كروان : مميز ؟؟؟؟ ايوه مميز جدا جدا جدا
المذيعة : نشكر حضرتك جدا جدا جدا
المذيعة موجها كلامها للمخرج : هو النجم ده اـأخر ليه هو فى كده ؟
المخرج : نجم يا استاذة ...... ومش اى نجم دا نجم النجوم ومتنسيش الناس دى بتقوم من النوم متأخر وعلى مايلبس ويجهز هياخد وقت
المذيعة : طيب انا هاروح أخد كابتشينو فى اى كافيتريا قريبة وارجع يكون جهز
المخرج : اوك .... روحى انت واحنا هنجهز اللوكيشن
تخرج المذيعة ويختفى المخرج وطاقم البرنامج ليقفل الستار على المشهد الأول
======================================================
المشهد الثانى
========
يرفع الستار على زفة كبيرة من اهل المنطقة وفرقة المطرب حباكة الامير احتفالا بفوزه بالجائزة يظهر فى وسطهم المطرب حباكة فى زي النوم الخاص به تى شيرت وبنطلون ترينج يوحى بانه لسه صاحى من النوم وشعر منعكش ..........................
أم حباكة تقف فى وسط الزفة ترقص رقصة غريبة تنم عن جهل وعدم وعى وطيبة وهى تزغرت من أن لأخر لتعبر عن فرحتها ومن وقت لاخر تقف تحييى حباكة ورفاقه اصحاب الإنجاز الكبير
أم حباكة : ابنى ... حباكة .... العالمى .... الفنان
زغزغة صاحب الصاجات : يردد خلفها فى شكل التحية
إبنك ... الاستاذ حباكة ..... العالمى ...... الفنان الكبير
ام حباكة : رقصنى يا عم بعد انتهاء التحية
تعود الفرقة لتعزف نغمات راقصة
زغزغة : خدناها خدناها ..... الجايزة العالمية .... خدناها خدناها
ويردد خلفه الحضور فى شكل زفة بلدى
زغزغة : يابن الحتة يا فنان ..... بكره هتلعب فى اليابان
ويردد خلفه الحضور من اهل الحارة وفرقته الخاصة
أم حباكة : التفاحة فى ايدى اهى ...........
ويردد خلفها الحضور
زغزغة : تفاحتك يا ست الكل ...... حلوة لذيذة وزى الفل
ويردد خلفه الحضور
=====================================================
طاقم البرنامج يجلس على المقهى ومعهم المذيعة يشاهدوا هذا المنظر الغريب إنتظارا للقاء النجم المحبوب حباكة
المذيعة : ايه ده شايفين ؟سامعين ؟
المخرج : ايوه ايوه ده اكيد هو بس ده مجهز نفسه على الأخر شكله كان فى الكوافير ولسه جااااى
ولا الوليه اللى بترقص دى ههههههههههههههههههه
المعلم حمودة : دى ام حباكة يا استاذ فرحانة علشن ابنها
المصور : طيب ده هنصوره ازاى يا جماعة دا لاشكل ولا لون
المخرج : انت بتقول ايه دا بكره هيكون استايل كل الشباب فى مصر ويمكن يكون الزى المصرى الوطنى يلا يا جماعة نجهز علشان نخلص ونمشى من هنا
المذيعة : طيب ازاى هاقف قدامه واسأله انا هموت من الضحك ومش هاعرف اشتغل خالص
المخرج : لا يا استاذة احنا لازم نخلص شغلنا
المذيعة : طب يلا يلا انا جاهزة
المخرج يندس فى وسط الزفة ليقتلع حباكة من وسطهم لإجراء الحوار معه ولكنه يقابل بمعارضة شديدة من مؤيدى ومحبى حباكة ويجد صعوبة كبيرة فى إقناعهم بشخصيته وانه مخرج من التلفزيون يريد عمل لقاء مع النجم حتى ينجح فى النهاية على ان يتم الحوار فى حضورهم جميعا .وأن الحوار يكون مع امه اولا .
المخرج لحباكة : الامر لله .......ثم ينادى على المذيعة والمصورين لعمل القاء وسط هذه الجلبة والجمع الغفير من الناس
المذيعة : معقول ستروه انا لا يمكن اشتغل كده
المخرج : معلش يا استاذة هنعمل ايه بس يلا بقى خلينا نخلص هنبدأ بالأم
المذيعة : سيداتى انساتى سادتى وأخيرا حان اللقاء مع الام العظيمة ام مطرب الاغنية العربية الحائز على الجائزة العالمية اهلا بيك يا حاجة
ام حباكة : حاجة ...... يسمع من بؤك ربنا يا حلوة
المذيعة : عايزين نعرف منك طفولة حباكة كانت ازاى ؟
ام حباكة : يعنى ايه يا اختى
المذيعة : يعنى وهو طفل كان بيغنى كان مهتم بالغناء والموسيقى
أم حباكة : حباكة طول عمره كويس كويس قوى
المذيعة : يعنى كان بيغنى وهو صغير ؟
ام حباكة : لا يا حبيبتى ده جاله على كبر
المذيعة ضاحكة : هو ايه يا حاجة اللى جاله على كبر
ام حباكة : الجايزة يا حبيبتى الجايزة الكبيرة دى
المذيعة : طيب قوليلنا هو عمل ايه علشان يفوز بالجايزة ؟
ام حباكة : عمل ايه ازاى يعنى ؟
المذيعة : بشكرك يا حاجة والف مليون مبروك الجايزة
نرحب الان بالنجم المحبوب حباكة الامير الفائز بالجايزة العالمية فى الاغنية العربية من مهرجان بباكو الدولى
المديعة : بنرحب بيك يا فنان وبنقولك الف مبروك
حباكة : اهلا اهلا يا موزة صباحو عسل
المخرج : لا لا يا استاذ مش كده خلى كلامك مهذب شوية
حباكة : مش فاهم وجهة نظرك يا استاذ يعنى انا مش مؤدب يعنى
المخرج : لا يانجم مش قصدى بس فى كلام للتصوير وكلام مينفعش
حباكة : يعنى انت جاى تعلمنى؟؟؟ انت مش عارف انا مين ؟؟؟؟
المخرج : لا لا ازاى يا نجم ............ انا اسف يلا وقول اللى انت عايزة
حباكة : ايوه يا موزة ؟
المذيعة : طبعا الشعب كله فرحان لانك حصلت على الجايزة العالمية فى الاغنية العربية نحب نسمع منك جزء بسيط منها ...
حباكة : على عينى انت تأمرى (ثم يوجه كلامه للفرقة المصاحبة له ) يلاااااااااا
تعزف الفرقة لحن الأغنية الذى هو عبارة عن خبط ورزع دون الموسيقى ليغنى حباكة ويرقص الحضور من أهل الحارة
ياليلى ياليلى ياليلى ياااااااااااااااااااااااا ليل
يا عينى يا عينى ياااااااااااااااااااااااايا عينى
ياااااااااااااااااااااااا اللى انت دايس عليا قوى
ياللى انت دايس عليا قوى وانا بقوووووول أى
دوس عليا بالراحة بالراحة بالراحة الدور الجاااااااااااااى
دوس دوس دوس دووووووووووووووووووووووووس
دوس على رجلى بالراحة ..
.... الفرقة تردد (أى أى أى اى )
وامى تديلك تفاحة .........
.....الفرقة (أى أى أى أى )
دوس على رجلى ومتقوليش
...................(أى أى أى أى )
أصل أنا رجلى مبتوجعنيش
.........................(أى أى أى أى )
دوس على رجلى يا عم الحااااااااااج
.................... (أى أى أى أى )
دوس والنبى متقولش لحد
....................(أى أى أى أى )
ياعم دوس .......
....................(أى أى أى أى )
والنبى دوس .......
....................(أى أى أى أى )
ياعم دوس ........
....................(أى أى أى أى )
والنبى دوس
....................(أى أى أى أى )
دوس دوس دوس دوووووووووووووووووس على رجلى
دوس على رجلى وما تقوليش
بس راضين بقرش حشيش
دوس على رجلى بالراحة
وأمى تديلك تفاحة
وأمى وأمى وأمى
وأمى وأمى وأمى
وأمى وأمى وأمى
أمى هتديلك تفاااااااااااااااااااااااااااااااااااحة
ليصفق الجميع للنجم المحبوب
وتغلق السار لينتهى المشهد الثانى
=======================
المشهد الثالث
=======
نفس الديكور للمقهى البلدى
كروان : يفتح الراديو ليستمع لصوت ام كلثوم فى أغنية يا صباح الخير ياللى معانا ليفاجئ بأغنية المطرب النجم الجديد حباكة تذاع (دوس على رجلى بالراحة ) فينهار ضاحكا ويضرب كف على كف فى استغراب شديد ثم يقول لنفسه
معقول يا ناس يوصل حالنا لكده بدل ما نسمع صوت الست نسمع الحمار ده بينهق على الصبح والله غريبة يا بلد ثم يغلق الراديو نهائيا ويبدأ فى رص الكراسى ورش المياه امام المقهى
تمر عليه أم حباكة وتلقى عليه التحية صباح الخير يا كروان يا بنى
كروان : صباح الخير يا خالة عاملة ايه ؟
ام حباكة : عاملة ايه ازاى يعنى .....
كروان : يعنى كويسة يا خالة الحمد لله
ام حباكة : ايوه الحمد لله انا طول عمرى كويسة
كروان : الحمد لله والنجم الكبير عامل ايه بعد سهرة امبارح انا شايفه راجع بالليل متأخر وكان كده شكله تعبان مسطول سكران حاجة زى كده يعنى
ام حباكة : هو داخل عليا امبارح بيغنى انا لا مسطول ولا بطوح
كروان : ماشاء الله بيعرف يختار الاغنية المناسبة للحالة هههههههههههه
ام حباكة : متعرفش يا ابنى هم الناس بتوع امبارح دول كانوا جايين ليه
كروان : اللهم صلى على النبى انت مش عارفة يا خالة كانوا جيين ليه ؟
ام حباكة : والنبى يابنى مانا عارفة انا لاقيتهم بيهيصوا ويغنوا وفرحنين قولت افرح معاهم
كروان : لا لا يا خالة دكان موضوع كده بس فرحة يعنى مش حاجة وحشة
ام حباكة : بجد يابنى
كروان : بجد يا خالة
ام حباكة : ربنا يفرحكم على طول يابنى وتزغرت
تأتيه خوخة بنت المعلم حمودة وهى تبكى بكاءا شديدا
كروان : يا فتاح يا عليم يا رزاق يا كريم مالك يا خوخة ؟؟؟؟
خوخة : خلاص يا كروان
كروان : خلاص ايه ابوكى حصل له حاجة
خوخة : لا بعد الشر عليه انشاله حباكة
كروان : امال في ايه بس بتعيطى ليه انا عارف انا اصتبحت بوشه العكر على الصبح
خوخة : حباكة خطبنى من ابويا وابويا وافق عليه خلاص
كروان : وانا ؟ دانا قايل للمعلم من سنة وهو كان موافق دا حتى هو اللى بيحوش لى المهر يا خوخة وانت عارفة
خوخة : حباكة جاله امبارح بالعربية المرشيدس وقاله انه نقل فى شقة على النيل كبيرة قوى وواسعة
وأنه مش هيكلف ابويا ولا مليم
كروان : ايوه طبعا عنده حق
خوخة : بس انا عايزاك انت يا كروان بحبك انت ومش طيقااااااااااااه
كروان : الزمن ده مش بتاع حب الزمن دا بتاع الفلوس والهلس
خوخة : يعنى ايه ؟ اوافق عليه يا كروان
كروان : حباكة بقى الاستاذ حباكة النجم المجبوب واغانيه بتتسمع وهى لا كلام ولا صوت ولا لحن بس هو بقى رجل هذا الزمان
خوخة : يعنى خلاص ..............؟
كروان : بتمنى لك السعادة يا خوخة
خوخة : الوداع يا كروان .......... الوداع يا كروان ......... الوداع يا كروان
(وتغادر المسرح)
كروان : يقف مذهولا ........... ويغنى بصوته العذب
جانى حبيبى والدموع
مالية عينيه
وانا اللى كنت بحبه عايش
وبخاف عليه
وف لحظة قالى بودعك
وأنسى اللى كاااااااان
إنسى غرامنا وحبنا
بأمر الزماااااااااااان
أنسى ياروحى ذكريات
كانت ما بنا وعمر فات
عشان ياروحى ف الزمن دا
مافيش غراااااااام والحب مات
بعد أدائه هذه الأغنية يبكى بكاء حارا وتصادف تواجد أحد المنتجيين المحترامين اصحاب الذوق الرفيع الذين يبحثون عن الجواهر فى كل مكان الأستاذ / طاهر مظلوم ينادى عليه ....
طاهر : انت ياااااااااااااااا .... لوسمحت
كروان : ايوه جااااااااااااااااااااااااااى ... أأمرنى يا استاذ طلباتك
طاهر : هو انت شغال هنا فى القهوة دى
كروان : ايوه يا استاذ ........ اامرنى تشرب ايه حضرتك
طاهر : لا انا عايز اتكلم معاك شوية
كروان : انا تحت أمرك
طاهر ممكن دلوقتى ولا هاعطلك عن شغلك
كروان : لا ابدا انا تحت امرك
طاهر : انا سمعت صوتك دلوقتى ومن اسلوبك حاسس انك متعلم ومثقف وفنان حقيقى
كروان : والله يا استاذ انا بعشق المغنى واللحن الجميل والكلمة الحلوة بس مفيش بخت
طاهر : انا طاهر المظلوم منتج فنى بس بحب انتج اعمال تعيش اعمال فنية حقيقية انتجت لمطربين كبار اغانيهم عايشة وبتتسمع من ناس عندها ذوق فنى راقى
كروان : علشان كده مظلوم يا استاذ مظلوم
طاهر : يمكن ايوه ....يمكن مش بكسب كتير زى غيرى ........ بس مكسبى الحقيقى ان انتاجى الفنى هايعيش ويفضل سنين كتير حتى بعد ما اموت
كروان : ربنا يبارك فيك ويديك طول العمر ان شاء الله
طاهر : انا سمعت صوتك وعجبنى كتير قوى وعايز اعمل معاك شغل وانا عندى حفلة فى الأوبرا كمان شهرين وعايز ااقدمك فيها انت تستاهل وصوتك كمان يستاهل
كروان : انا يا استاذ مظلوم ؟ انا اغنى واغنى فى الاوبرا كمان
طاهر : ايوه وليه لا
كروان : سبحان الله العظيم انا كنت باحلم أنى أغنى بس وحد يسمعنى
طاهر : انت فنان حقيقى ياكروان بجد كروان اسم على مسمى
كروان : الله يكرمك يا استاذنا وهنشتغل امتى ؟
طاهر : من دلوقتى لو حبيت
كروان : انا جاهز ان شاء الله
طاهر توكلنا على الله ده الكارت بتاعى هنتظرك الساعة 9 مساء تجيلى هاكون مجهزلك الكلمات والملحن ونبدأ على طول ان شاء الله .
كروان : ان شاء الله قبل المعاد هتلقينى عندك يا استاذنا
يأتى المعلم حمودة ويلقلى السلام اثناء وداع كروان للاستاذ طاهر المظلوم
حمودة موجها كلامه لكروان : ايه يا كروان احنا بنوصل الزباين ولا ايه ؟
كروان : لا يامعلمى دا واحد كان عايز حاجة ولاقاها الحمد لله
حمودة : حاجة ايه يعنى ؟ شحات ؟ بس شكله ما يديش على شحات خالص
كروان : المظاهر بتغر ناس كتير قوى يا معلم يعنى عندك حباكة مثلا بعد العربية والشقة اصبح حد محترم من حقه يناسب المعلم حمودة كبير الحارة وعمدتها
حمودة : انت بترمى على ايه ع الصبح انت المفروض تفرح.... هى خوخة مش زى اختك ؟ ولما اختك تبقى فى خير تفرحلها وبعدين حباكة هينقلها نقلة تانية خالص .
كروان : الف مبروك يا معلم ربنا يتمم بخير ... بس انا يا معلم عايز ااقولك على حاجة بس مكسوف منك
حمودة : قول يا كروان انت زى ابنى انا اللى مربيك ومينفعش تتكسف منى
كروان : انا مش هاقدر ااقعد تانى فى الحارة يا معلم
حمودة : هاتروح فين ؟ انت ملكش اى حد فى الدنيا غيرنا يا كروان
كروان : بلاد الله واسعة يا معلم ربنا موجود
حمودة : يعنى خلاص يا كروان
كروان : اشوف وشك بخير يا معلم
حمودة : طيب لو احتجت اى شئ انا موجود وبيتى موجود يا كروان مع السلامة
كروان مع السلامة يا معلم .......... يترك كروان المسرح وهو يغنى
عينى عليك يا قلب
حملك دا هم كبير
فاتوك كل الأحبة
فى بحر م التفكير
يمكن نقابل حبيب
يحس بأوجعنا
ولا قلوب ترحمك
وف يوم تجمعنا
تغلق الستار لينتهى الفصل الأول
=================================================
الفصل الثانى :-
==========
المشهد الأول
=======
تفتح الستار على المقهى البلدى والعامل الجديد (محمود ) يفتح الراديو ليستمع لأغنية أم كلثوم يا صباح الخير يا للى معانا ويحاول ان يدندن معها اثناء رص الكراسى خارج المقهى ......
المعلم حمودة : والله زمان فكرتنى بالغالى ياترى فين اراضيه دلوقتى
محمود : هومين ده يا معلمى ؟
المعلم حموده : الغالى ابنى كروان يا محمود ياترى انت فين ياكروان والدنيا عملت ايه معاك ؟
محمود : بس انا معرفش ان ليك ابن يا معلم معرفش غير الست خوخة اللى هتتجوز بعد يومين الاستاذ حباكة المطرب
حمودة : متجبليش سيرة الزفت ده
محمود : ليه بس يا معلمى دا بسم الله مشاء الله مشهور والفلوس معاه زى الرز
حمودة : ايوه يا سيدى الفلوس معاه زى الرز خلته بيشرب كل ليلة ويسكر وبرشام وحشيش وبلاوى زرقة ومصايب وفضايح كل يوم الناس بتقولى اخبار زى الزفت عنه كل يوم وانا مش عارف اعمل ايه فى موضوع الخطوبة المنيلة دى انا ظلمت كروان وافتريت عليه وخليته ساب الحتة كلها ويمكن يكون ساب البلد كلها وهج كمان ................ تعرف يا محمود ؟
محمود : خير يا معلمى ...........
حمودة : كروان ده كان انسان بجد محترم ومؤدب انا مربيه على ايدى كان بيحب خوخة وخوخة كانت بتحبه بس انا قعدت ازن على ودنها لحد ما وافقت على سخام البرك حباكة كنت فاكر انها هتكون سعيدة لما تركب المرشيدس وتعيش فى شقة على النيل مع ان الأدب والأحترام اهم من الفلوس ميت مرة
محمود : وبعدين يا معلم ؟ ها تعمل ايه دلوقتى ؟
حمودة : مش عارف والله يا ابنى حباكة بقى بلطجى وبيتحامى فى شلة البلطجية اللى حواليه وخايف يعمل اى حاجة فى البنت لو فسخت الخطوبة
محمود : ازاى يا معلمى رجالة الحتة كلها معاك شوف عايز تعمل ايه واحنا كلنا معاك
حمودة : يلااااا اللى عايزه ربنا هو اللى هيكون
يدخل حسن افندى نهاوند للمقهى ويلقى التحية على المعلم السلام عليكم يا معلم حمودة
حمودة : وعليكم السلام يا فنان وحشنا والله بقالك كام يوم مش باين يعنى انا كنت بفكر ازورك النهارده
حسن نهاوند : فيك الخير والله يا معلم انا فعلا كنت تعبان وراقد فى السرير بقالى كام يوم
حمودة : الف سلامة عليك يا غالى طيب مش تبعتلى اى حد يعرفنى
حسن نهاوند : والله ماحبتش اتعبك يا معلم وخصوصا إن كروان كان بيجيلى كل يوم يسأل عنى ويشوف طلباتى وجابلى الدكتور والدوا وانا قولت اكيد انت اللى بتبعته
حمودة : بتقول مين ؟ كروان ؟
حسن نهاوند : ايوه يا معلم صبيك كروان كان دايما يعدى عليا بعد ميعاد القهوة ويسألنى ان كنت عايز حاجة او محتاج حاجة
حمودة : انت بتقول كروان ؟
حسن نهاوند : ايوه يا معلم كروان
حمودة : يعنى كروان لسة فى الحارة ؟
حسن نهاوند : هو فى ايه يا معلم ؟ هو كروان مش صبيك اللى شغال معاك ؟
حمودة : ااقولك ايه بس يا فنان كروان من يوم ماعرف ان خوخة خطبها حباكة وهو ساب القهوى وحتى الاوضة اللى كان عايش فيها فى البيت سابها
حسن نهاوند : انت بتقول ايه يا معلم دا كان كل ليلة بيجى بلبس القهوة ويقولى انه لسة مشطب ويقعد معايا شوية ويستأذن علشان هيصحى بدرى يفتح القهوة
حمودة : والله ما عنت عارف اى حاجة خالص
نهاوند : هو فرح خوخة مش بعد يومين ؟
حمودة : ايوه يا سيدى بعد يومين
حسن نهاوند : الف الف مبروك يا معلم ربنا يتمم بخير وتفرح بأولادها
حمودة : الله يبارك فيك بس والله قلبى مش مطمن عليها يا خويا
حسن نهاوند : ليه بس بتقول كده ؟
حمودة : حباكة من يوم الجايزة المهببة دى وهو انسان تانى خالص افتكر انه نجم بجد وعايش حياة غريبة سكر ومخدرات وبرشام وحريم وحاجات كتير كده
نهاوند : لا اله الا الله .......... معقول ؟
حمودة : اى والله بعد القرش مابقى فى ايده نسى نفسه واصله وعايش زى البلطجية من كباريه لكباريه ومن غرزة لعرزة
نهاوند : لك حق متكنش مطمن يا معلم اللى زى ده ما يتأمنش على عرض
حمودة : دبرنى يا استاذنا نعمل ايه فى المصيبة دى ؟
نهاوند : وخوخة رأيها ايه ؟
حمودة : والله البنت حالها يحزن بس هى خلاص راضية باللى قسمه ربنا
نهاوند : سيبها لله يا معلم ربنا هو اللى هيدبرها
حمودة ينادى على محمود : يا محمود انت يااااااد تعالى شوف عمك نهاوند يشرب ايه
محمود : ايوه جااااااااااااااااااااااااااااااااااااااى اامرنى يا استاذنا طلباتك
نهاوند : هو ده الصبى الجديد بعد كروان
حمودة : ايوه هو ولد مؤدب ومحترم قوى وباين عليه متعلم وابن ناس
محمود : ده بس من ذوقك وكرم اخلاقك يا معلمى
نهاوند : هات شاى يا محمود شاى خفيف سكر زيادة
محمود : من عينى يا استاذنا
نهاوند : شكله مش من الحتة يا معلم جالك ازاى ده ؟
حموده : والله لاقيته قاعد فى يوم جعان وطلب شاى ومكنش معاه فلوس وقالى اشغله علشان يلاقى اللقمة وسكن مكان كروان فوق السطوح عندى
نهاوند : يعنى خد مكان كروان فى البيت والقهوة؟ ارزاااااااااااق
حمودة : كروان والله وحشنى ونفسى اشوفه
نهاوند:: ان شاء الله يرجع بالسلامة انت زى والده وهو اصيل وبيتمر فيه العيش والملح
حمودة : ياااااااااااااااارب
اثناء جلوسهم يفاجئوا ببعض الشباب يمر امامهم يجرون فى الحارة بشكل غريب
حمودة : خير يارب فى ايه ؟
نهاوند : مش عارف والله يا معلم استنى هسأل واشوف
بكار : الحق يامعلم ............ الحق يامعلم
المعلم : فى ايه يا ابنى خير يارب
بكار : البوليس بيدور على حباكة وبيقول انه تاجر مخدرات
المعلم ونهاوند معا : حباكة تاجر مخدرات يادى المصيبة
لينتهى المشهد الاول على هذا الخبر السعيد
=================================================
المشهد الثانى :-
========
يفتح الستار على المقهى والمعلم حمودة والاستاذ حسن نهاوند عائدين من قسم الشرطة ليجلسوا على المقهى
حمودة : انا لحد دلوقتى مش مصدق يا استاذ حسن اللى بيحصل ده حلم ولا علم
حسن نهاوند : والله دى حاجة تحير يا معلم معقول حباكة بعد كل اللى حصل ده بيتاجر فى المخدرات
حمودة : سبحان الله العظيم والله انا كان قلبى حاسس ان فى حاجة غلط بتحصل
نهاوند : والثراء والغنى المفاجئ ده كنا بنحسب انه من الشهرة والمجد يطلع من تجارة المخدرات
حمودة : الشهرة والمجد ؟ لمين وليه يا استاذنا ؟
نهاوند : ما انت شوفت جايزة عالمية وتصوير تلفزيون ولقاءات اذاعة وهيصة
حمودة : انا يمكن صدقت فى الأول وقولت اهى الدنيا بتتغير ويمكن يكون ده التغيير بس مع مرور الأيام لاقيت ان مهما اتغيرت الدنيا فلازم يكون الشئ الجميل والاصيل هو اللى باقى
نهاوند : طيب متعرفش يكون مستخبى فين ؟
حموده : انا لو اعرف اروح اسلمه بنفسى اللى زيه يستحق الاعدام ده بيدمر اجيال ان كان بالغنى ولا المخدرات وهم الاتنين زى بعض تمام
يدخل المسرح رجل فى زى مهندم جدا ووسامة عالية يدخل على المعلم حمودة والاستاذ حسن ويلقى التحية عليهم .
كروان : السلام عليكم ورحمة الله وبركاته يا معلمى
حمودة : مين كرواااان ابنى حبيبى
حسن نهاوند : كروان مين يا معلم ؟ البيه ده يبقى كروان ؟
كروان : ايوه يا عم حسن انا كروان
حموده : ايوه هو كروان وحشتنى قوى يا ابنى انت فين وفين اراضيك وايه الحلاوة دى كلها
كروان : انا بقالى فترة يا معلم بجهز لحفلة الأوبر هتكون بكره ان شاء الله
حسن نهاوند: الأوبر ؟ الله الله الله
كروان : وقولت لازم تكونوا اول المدعوين انتم اهلى وانا مليش حد غيركم وعارف انكم هتفرحولى
حمودة : طول عمرك اصيل يا كروان معلش يا بنى انا غلط فى حقك
كروان : لا يا معلم انت اب كان بيحلم لبنته بحياة سعيدة وانا عاذرك
حسن نهاوند : طول عمرى بقول انك فنان حقيقى ولازم هتوصل يا كروان
كروان : الحمد لله ربنا اكرمنى ولسة فى ناس عايزة تسمع طرب وكلام جميل
نهاوند : انت ابن حلال يا كروان واصيل وتستاهل كل خير
حموده : عرفت اللى حصل يا كروان يا بنى
كروان : خير يا معلمى ؟ حصل ايه ؟
حمودة :مش حباكة طلع بيتاجر فى المخدرات والبوليس بيدور عليه فى كل حتة
كروان : مش عارف ااقولك ايه يا معلم والله انا مش مستغرب لده
حمودة : عندك حق يابنى اللى يرضى يغنى الكلام اللى بيغنيه يعمل اى شئ ده غناه اكتر من المخدرات فى التأثير على الناس والشباب بالذات
كروان : طيب وخوخة يا معلم هتعمل ايه فى موضوع زواجها
حمودة : خلاص يابنى ربنا هو اللى حلها من عنده انا كنت عايش فى دوامة وحيرة كبيرة انت تعرف ان الفرح كان المفروض بكره ؟
كروان : ايوه عارف يامعلم وحمدت ربنا ان الحفلة بتاعتى هتكون بكره علشان ماكنتش هاقدر احضر واشوفها بتتزف لغيرى
تأتى فى اللحظة دى خوخة الى المقهى لتفاجئ بكروان بشكله الجدد فتفرح كثيرا لعودته وتقول له
خوخة : حمد الله على السلامة يا كروان وحشتنى قوى ااقصدشش وحشتنا قوى وهى تنظر لابيها
حمودة : عندك حق يابنتى وحشنا قوى قوى قوى
كروان : وانتم كمان وحشتونى والله بس انا كنت كل يوم اشوفكم من بعيد واطمئن عليكم
حمودة : كروان بقى مطرب يا خوخة مطرب جميل محترم وهيغنى فى الأوبرا بكره وجاى يعزمنا على الحفلة بتاعته
خوخة : الحمد لله يابا هو يستاهل كل خير ويستاهل اجمل بنات الدنيا كمان
كروان : انت بتقولى ايه انت اجمل بنات الدنيا فى عينيا يا خوخة ... موجها كلامه للمعلم ... ياترى الموافقة القديمة سارية يا معلم ؟
المعلم : ايوه طبعا انا هلاقى لبنتى راجل زيك ياكروان
خوخة : يعنى ايه يابا وحباكة هتعمل فيه ايه دا الفرح بكره ؟
المعلم : خلاص يابنتى ربنا خلصنا منه على خير
خوخة : بجد يابا ؟
المعلم : بجد يا بنتى
حسن نهاوند : الحمد لله يابنتى كل شئ رجع لاصله خلاص موجها كلامه لكروان سمعنا حاجة حلوة بالمناسبة السعيدة دى
كروان : من عينى انا قلبى هو اللى هيغنى يا استاذنا
قولت اسافر قولت هاجر
وابقى اشوفك من بعيد
المهم تكون ياروحى
فى كل لحظة تكون سعيد
تعيش حياتك تذوب اهاتك
تطيب ألامك تنتهى
مع كل فرحة ويوم جديد
أما أنا وذكرياتى
وكل لحظة من حياتى
هنتظر لحظة لقاك
واملى عينى أه يا عينى
بطلتك .. بضحكتك ...
من مكانى من بعيد لبعيد
يغادروا المسرح جميعا إلا محمود صبى المقهى ليدخل حباكة ومعه بعض أفراد عصابته متخفيين ملثمين ليجلسوا على المقهى للتحدث فى أمور صفقة مخدرات
حباكة : تعالوا يارجالة نقعد هنا فى الركن ده
سنارة : ايوه يا معلم تعالوا هنا المكان ده هادى
شوكة : لازم نأمن المكان ونتأكد ان محدش يعرفنا ولا يسمعنا
بيخة : طيب يامعلمى هنبيع البضاعة ازاى فى الركن البعيد الهادى
حباكة : بضاعة ايه يا ابن العبيطة انت هتودينا فى داهية
سنارة : اهدوا يا جماعة الواد بتاع القهوة جاااى
محمود : أيوه جاااااااااااااااااى طلبات البهوات
حباكة : هتلنا يابنى طقم شاى
شوكة : بس اغلى المية كويس براحتك يعنى
محمود : من عينى حاضر ايوه جاااااااااااااى وينصرف ليأخذ مكانا قريبا يستطيع ان يسمع ما يقولون
حباكة : بصوا يارجالة البضاعة مش شوية واحنا بقت ظروفنا صعبة وحركتنا محدودة ودى ملايين مش لعبة لازم نفكر فى طريقة لتصريف البضاعة
شوكة : من قولت من الأول نخلى على أزازة يوزع هو البضاعة وياخد اللى هو عايزة
حباكة : على أزازة ملقتش الا ده انت ناسى انه سارق قبل كدة 20 بزازة من معلمه
شوكة : معلمه هو اللى بخيل يا معلم دايما كان واكل عرقه ومابيرعيش رجالته كويس
سنارة : لا انا مع المعلم حباكة اللى يخون معلمه يخون اى حد
حباكة: طب عايزين نتصرف بسرعة
محمود : ايوه جااااااااااااى احلى شاى لاحلى رجالة واجمل معلمين
حباكة : اخلص ياااااااااد حط الشاى وامشى
محمود : حاضر يا معلمى انت تأمر
حباكة: وبعدين يارجالة لازم نتصرف بسرعة مفيش وقت وبعدين انا عايز افضى دماغى لموضوع تانى مهم
سنارة : خير يا معلم موضوع ايه ؟
حباكة : خوخة يا رجالة انتم عارفين انى بحبها من زمان ومش حاسيبها
بيخة : خوخة ههههههه ايوه دى حلوة قوى يا معلم وانا كمان بحبها
حباكة : خلوا ابن العبيطة ده يمشى من هنا انا مش ناقصه هو كمان
شوكة : خلينا فى موضوع البضاعة يا معلم مفيش الا على أزازة هو كان نفسه يبقى معلم ويشتغل لواحده احنا نديله الفرصة دى ونشيله البضاعة وهنعرف ناخد تمنها منه بمعرفتنا
فى هذه الأثناء تأتى سارينة البوليس ليفر الجميع فى سرعة وخفة
مع تصفيق الحاضرين ينتهى المشهد الثانى
المشهد الثالث :-
=========
المعلم حمودة وخوخة وكروان والاستاذ حسن نهاوند يدخلون المسرح بعد حفلة الأوبر فارحين مسرورين
يشيدون بالحفل وصوت كروان ونجاحه الكبير .
المعلم : الله الله الله رجعتنا لأيام وزمن الفن الجميل يا كروان ربنا يبارك فيك يابنى
كروان : الحمد لله ربنا كرمنى يا معلمى والفضل بعد ربنا يرجع ليكم انتم اهلى
حسن نهاوند : انت فنان أصيل يا كروان مطرب حقيقى علشان كده ربنا ادالك اللى تستحقه
خوخة : وبعدين يعنى انا ماشية معاكم هوا مفيش ولا كلمة حلوة ليا من الكلام الحلو ده
المعلم : أزاى يا بنتى ماهو الكلام الحلو ده ليك بردو أنت ايه وكروان أيه
حسن نهاوند : طبعا يا خوخة كروان ده أخوكى يعنى نجاحه هو نجاحك وفرحته هى فرحتك ولا أيه ؟
خوخة : كلامك كل صح إلا حاجة واحدة بس يا عمى حسن
المعلم : ايوه صحيح أنا عارفها وعلشان كده فرحكم الخميس اللى جاى
كروان : بجد يا معلمى الخميس الجاى ؟
المعلم : ايوه يا حبيبى انا عايز أطمئن عليها قبل ما اموت ومش هكون مطمئن عليها الا وهى معاك
حسن نهاوند : تصوروا أنا كنت ناسى أنكم مش اخوات انتم حبايب وحبايب قوى كمان طيب يلا روحوا روحوا انتم وانا هقعد مع المعلم شوية وهيحصلكم الواد محمود لسة فاتح القهوة اهو
المعلم : غريبة صحيح الواد ده سهران ليه لحد دلوقتى تعالى نشوف
حسن نهاوند : تعالى يا معلم وانا عايزك فى حاجة مهمة
المعلم : تعالى نقعد هنا وينادى على محمود .......... محمود انت ياد يا محمود
محمود : نعمين يا معلمى ويظهر عليه الحزن الشديد
المعلم : مالك يا محمود ايه مزعلك قوى كده ؟
محمود : اصل خلاص يا معلم هسيب القهوة وهسيب الحتة وهارجع مكان ما جيت
المعلم : ليه كده يابنى دانت بقيت مننا خلاص وخدنا عليك وخدت علينا
حسن نهاوند : ماهو ده الموضوع اللى انا عايزك فيه يا معلم
المعلم : انت كنت عارف انه ماشى يا حسن
حسن نهاوند : هو هيقولك بقى طالما هو فتح الموضوع
المعلم :فى ايه يا جماعة انا هموت م القلق حرام عليكم ضيعتوا فرحتى الليلة بنجاح كروان
حسن نهاوند : لا لا لا انت هتفرح قد فرحتك ميت مرة لما تعرف
محمود : بص يا معلم حمودة انا مش محمود ولا انا عامل القهوة انا الرائد/ سمير عبد الواحد من مدرية أمن قنا وكنت جاى فى مهمة وهى القبض على اخطر عصابة مخدرات فى البلد وللاسف متورط معاهم بشكل كبير المغنى ده اللى اسمه حباكة .....
المعلم : مش محمود ؟ مش محمود ازاى ؟ رائد ؟ رائد ازاى ؟ حباكة ؟ حباكة ازاى ؟
الرائد سمير : اهدى بس يا معلم وانا هافهمك كل شئ ............ طبعا عصابات المخدرات بتكون تقريبا عارفة كل طاقم الإدارة الموجود كل ضابط وكل فرد علشان كده بتكليف من الوزير بصفة شخصية وبدون علم الادارة هنا اتكلفت انا بالمهمة دى وجيت علشان اعيش بينكم واكون قريب من مسرح الاحداث هنا .
المعلم : ايوه فهمت ..
الرائد سمير : علشان كده يا معلم انا عايزك تعمل فرح بنتك بكره مش يوم الخميس
المعلم : بكره ؟
الرائد سمير : ايوه بكره وعايز الخبر ده يوصل لحباكة وفرقته بأى طريقة مش عايز يبقى عندهم وقت عايز المفاجئة تشلهم يقوموا يظهروا بشكل عشوائى وبدون ترتيب
المعلم : وبعدين ؟
الرائد سمير: انا جهزت مع الإدارة هنا الخطة علشان يتم القبض عليهم كلهم مرة واحدة
المعلم : على بركة الله يبقى الفرح بكره
حسن نهاوند : سبحان الله كل شئ مترتب من ربنا علشان الغلبان كروان ربنا شايل له الفرح كله مرة واحدة
المعلم : طيب انا هاروح البيت اعرفهم ان الفرح بكره ان شاء الله وانت قفل القهوة وحصلنى على البيت يامحمود .............. لا لا انا هقفل القهوة يا حضرة الظابط
الرائد سمير : لا يا معلم انا لحد ما يتم القبض عليهم انا محمود صبى القهوة عايز كل شئ يمشى طبيعى
المعلم : تمام يا فندم ............
الرائد سمير : انا مين يا معلمى ؟
المعلم : انت سمير بيه صبى القهوة
الرائد سمير : اسمى محمود يا معلم محمود
المعلم : ايوه ايوه انت الواد محمود
الرائد سمير : الله ينور عليك يا معلم ومتقولش اى حاجة للعروسين خليها مفاجئة ...تمام ؟
المعلم وحسن نهاوند معا : تمام تمام التمام
يغادروا جميعا المسرح ليظهر بعد فترة بسيطة عمال الفراشة يقمون بتعليق الزينة استعدادا للفرح
واثناء زفة العروسة والعريس يفاجئ الجميع بحباكة فى شكل المجرم الملثم ومعه اخرون يحاولون ارهاب الموجودين وخطف العروسة فيتم القبض عليهم جميعا من قوة الشرطة الموجودة ويتم اخذهم الى قسم الشرطة ليقف على المسرح العريس كروان والعروسة خوخة والمعلم حمودة وحسن نهاوند وبعض اهل الحارة ليغنى كروان هذه الاغنية ........
======================================= =========
إنتظرتك عمرى كله
بشوق وقلب مليان حنين
وافترقنا فى يوم ياعمرى
وقلب كان مجروح حزين
بس رجعت لحضنى تانى
راجع تحقق لى الامانى
بالفرح والقرب راجع
راحت خلاص كل المواجع
وتصالحت مع السنين
قرب منى كمان قرب
ايدى فى ايدك
عينى فى عينك
قلبى يضمك
قلبى يضمك شوق وحنين
==========
تمت
مسرحية
(يا أهل المغنى وجعتوا دمغنا )
=====================
الفصل الأول
=======
المشهد الأول
========
حارة مصرية – بيوت متهالكة – مقهى بلدى
=========================
يخرج من باب المقهى عامل المقهى ( كروان ) فى زيه المعتاد الجلباب المخطط والطاقية الشيبكة ومريلة عامل المقهى يقوم برص الكراسى ورش المياه امام المقهى وهو يغنى بصوته العذب أغنية أم كلثوم ياصباح الخير ياللى معانا وهو يستمع لها فى الراديو بصوت أم كلثوم ليفاجئ بقطع الأغنية ليذاع خبر هاااام ..........
المذيع : خبر هااااااااام مبروك لمصر العظيمة أم الفنون نهنئ الشعب العظيم بفوز المطرب الشاب ( حباكة الأمير ) بجائزة عالمية فى مهرجان بباكو الدولى العالمى للاغنية العربية الف مليون مبروك لمصر ........ هنا القاهرة
يدخل المعلم ( حمودة )الى المسرح ليجد كروان يقف مذهولا امام الراديو بعد انتهاء الخبر ينادى عليه
حمودة : كروااااان انت ياد ياكروااان مالك واقف زى تمثال لاظوغلى كده ؟ فى ايه ؟
كروان : هه!!!..... هه!!! ...... لا أبدا يا معلم م الفرحة هههههههههههههههه
حمودة : فرحة ........ خير يارب اللهم اجعله خير ؟
كروان : حباكة الأمير يا معلم مطرب الجنازات ههههههههه
حمودة : ماله يا فتاح يا عليم يارزاق يا كريم
كروان : خد جايزة عالمية النهارده والخبر اتذاع فى الراديو
حمودة : انت بتقول ايه معقول يا ناس حباكة ابن ام حباكة ياخد جايزة عالمية
والجايزة دى فى ايه يا ابن الفقرية ؟
كروان : فى الغنى يا معلمى فى الغنى هههههههههههه
حمودة : هو حباكة بيغنى يا فقرى هو بيعرف يتكلم اصلا
كروان : امال ايه يا معلمى دا عبا ييجى عشرين شريط
حمودة : عشرين شريط ايه ؟
كروان: كاسيت يا معلمى عشرين شريط كاسيت
حمودة : عباهم ازاى وايه ؟
كروان : يا معلمى مش انت سمعت اغنية عبيله واديله
حمودة : هو فى اغنية اسمها عبيله واديله انت باين عليك اتهبلت النهارده انت مبلبع حاجة ولا ايه
كروان : هبلبع ايه بس يا معلمى مانت عارفنى
حمودة : مانت بتقول كلام لا يتفهم ولا يتعقل
كروان : والله يا معلمى فى اغنية بتقول عبيله واديله ودى بقى الحكمة اللى مشى عليها حباكة مطرب التوك توك
يدخل عليهما حسن أفندى نهاوند عازف العود وفنان المنطقة الغلبان
حسن نهاوند : صبااااح الخيرات يا معلم عرفت اللى حصل
المعلم : صباح الخير يا فنان خير ان شاء الله
حسن نهاوند : عجيبة جديدة من عجايب الدنيا ههههههههههه
المعلم : خير يارب اللهم اجعله خير
نهاوند : حباكة ..........
المعلم : أنت كمان ياراجل دانا بقول عنك انك عاقل وفنان
نهاوند : انا كمان ايه يا معلم
المعلم : هتقولى حباكة ماله المدهول على عينه ده ماله ؟
نهاوند : التلفزيون جاى يصوره والإذاعة كمان
المعلم : الله هو جرى ايه فيك يا بلد حباكة يكش يكون عشان الجايزة
نهاوند : هو انت عرفت يا معلم
المعلم : الواد كروان بيقولى الراديو بيذيع اسم حباكة لا وايه بيهنوا الشعب المصرى
نهاوند : امال ايه يا معلم دا فاز بجايزة عالمية علشان اغنية دوس على رجلى بالراحة أمى هتديلك تفاحة
المعلم : نعم يا اخويا دوس ايه ؟ وامى هتديلك ايه ؟
نهاوند : بالراحة وتفاحة يا معلم دى مكسرة الدنيا فى التوك توك
المعلم : طيب هو بيعرف يقول
نهاوند : اماااااااااااااااااااااااااال دا بقى عقبال املتك نجم النجوم
المعلم : طب جوم جوم شوف مين اللى جايين دول
يدخل على المسرح ثلاثة رجال وسيدة فى زى غريب عن اهل الحارة واشكال مختلفة يتجولون فى الحارة ويتهامسون ضاحكين
المذيعة : ايه يا جماعة المكان ده ؟
المخرج : دا حى شعبى يا استاذة فى ناس عايشين هنا منهم النجم بتاعنا
المصور : لوكيشن يجنن يا جماعة هو لسة فى المناظر دى فى مصر
المذيعة : طيب خلينا نخلص شغلنا ونمشى من هنا انا مش قادرة استحمل بصراحة ستروه
نهاوند الفنان : اهلا وسهلا بالأمورة والبهاوات خير عايزين حد هنا ولا ايه ؟
المخرج : بنسأل عن بيت النجم حباكة
نهاوند الفنان : النجم حباكة .... ايوه ايوه هو البيت اللى هناك ده فى اخر الشارع هو حضرتكم من التلفزيون صح ؟
المذيعة : مش باين علينا؟ انت متعرفنيش ولا ايه ؟
نهاوند الفنان : انا بشبه على حضرتك وبقول شوفتك فين شوفتك فين
المذيعة : شوفتنى فين ؟ دا باين عليه مش عايش فى الدنيا ااااااااااااااااااف
نهاوند : هى مالها كده ؟ تعالوا اتفضلوا نقعد نشرب حاجة عند المعلم حمودة عمدتنا وكبير الحارة
المخرج : تعالوا ونبدأ تصوير من هنا من القهوة
المعلم حمودة : اهلا اهلا بالبهوات اتفضلوا يا كروان ... يا كروان
كروان : ايوه جااااااااااااااااااااااااااااااااى اامرنى يا معلمى (ويتفاجئ بالحضور) مين اهلا اهلا بالست المذيعة منورة حارة معلش
المذيعة : معلش ؟؟؟ ههههههههههههههههههههه
كروان : ايوه يا ست هانم اشهر حارة فى مصر كلها حارة معلش
المذيعة :اوك معلش معلش0000اهم حاجه نقابل النجم دا ونمشى بسرعه
كروان:طب قوليلي يا ست هانم تشربي ايه الاول حضرتك والبهوات
المذيعة : لا مفيش داعي عاوزين نقابل حلبكه دا خلينا نمشى
كروان :حلبكه مين يا هانم هههههههههههه اسمه حباكة
وكل الموجودين يضحكو
كروان: مقولتليش بردو هتشربى ايه لازم تشربي حاجه دى اول مره تيجى هنا ودا واجب
المذيعة :اوك اوك لو لازم يبقي ايس بوريو
كروان :ايس مين يا هانم ؟ لامؤاخذه دا بيتاكل ولا بيتشرب البتاع ديه؟
المذيعه: خلاص ....... خلاص نادوا اسمه ايه دا خلينا نمشى مش قادره اقعد اكتر من كدا
المخرج : طيب يلا نعمل لقاء مع المعلم حمودة على مينادو النجم
يتخير المخرج مكانا للتصوير فى منتصف المسرح لتظهر خلفية الحارة فى التصوير ويقف المعلم حمودة والمذيعة استعدادا للتصوير
المخرج : استاند باى هنبدأ ياجماعة جاهزة يا استاذة ؟
المذيعة : جاهزة اتفضل
المخرج للمصور : جاهزين ؟
المصور : جاهزين يا استاذ
المخرج : اكشن
المذيعة : سيداتى انساتى سادتى من حارة (معلش ) مسقط رأس نجمنا المحبوب العالمى المطرب الرائع حبلكة الامير .......... يقاطعها المخرج
المخرج : استوب ....... يا استاذة اسمه حباكة ..... حباكة يا استاذة مش حبلكة
المذيعة : مت؟اسفة يا استاذ يعنى من قلة الاسامى
المخرج : معلش يا استاذة حباكة .. حباكة
المذيعة : خلاص يا استاذ ( حباكة ) ههههههههههه
المذيعة تعيد المقدمة مرة اخرى وتبدأ الحوار مع المعلم حمودة
المذيعة : نحب نتعرف بحضرتك يا معلم
المعلم : انا المعلم حمودة صاحب القهوة دى أنا ااقدم سكان المنطقة بيسمونى عمدة الحارة وكبيرها
المذيعة : يبقى أكيد لك دور كبير فى إظهار موهبة النجم المحبوب حباكة
المعلم : والله الكدب خيبة أنا بس النهارده الصبح عرفت إن حباكة ده نجم وأنه كمان محبوب ولا عمرى سمعته بيغنى فى اى يوم يا استاذة ده ما بيعرفش يتكلم يبقى هيغنى ازاى بس والله دى مصيبة
المخرج : استوب ......... أيه الكلام ده يا معلم ........ بقى ده اسمه كلام البرنامج هيتذاع فى القناة الفضائية وهيسمعه العالم كله .......... وده نجم فاز بجائزة عالمية يعنى نجم عالمى
المعلم : انت بتتكلم على مين يا فندى حباااااااااكة مش ممكن !!!! مش ممكن أبدا
المخرج : يا معلم لازم تقول انه كان نجم من يومه كان ماشى يغنى طول عمره موهوب يعنى
المعلم : يعنى اكدب و اخش النار ااقول كلام محصلش ده لا عمره غنى ولا كان بيعرف ينطق كلمتين على بعض يافندى
المذيعة : انت لو قولت زى ما احنا عايزين يا معلم هتاخد 200 جنيه فورا
المعلم : 200 جنيه واقول انه كان نجم من يومه ؟
المخرج : ايوه ويمكن يبقوا 300
المعلم : الاستاذ حباكة الأمير ده ابن حتتى وانا مربيه على ايدى وطول عمره وهو ماشى ماشى يغنى على روحه كويس كده يا فندى معقول كده ...
المخرج : ايوه يامعلم اثبت على كده بس بلاش على روحه دى لايفكروا كان بيعمل حاجة تانية هههههههه ......... موجها كلامة للمذيعة .... جاهزين ؟
المذيعة : جاهزين يا استاذ
المذيعة للمعلم : ايوه يا معلم بتقول ايه ؟
المعلم : الأستاذ حباكة ده من يوم ما اتولد وهو بيغنى بس بصراحة كلامه مش مفهوم واحنا كنا بنحسبه بيغنى هندى اى والله
المذيعة : يمكن علشان كده فاز بالجايزة العالمية ؟
المعلم : الله ينور عليك يا استاذة الخواااااااااااااااااجات بس اللى بتفهمه سامحنى يارب
المذيعة : بنشكرك يا معلم ولقائنا دلوقتى مع الاستاذ ؟
الاستاذ نهاوند : انا نهاوند فنان المنطقة وانا اللى علمت النجم المحبوب حباكة الغنى من صغره
وعلمتة ازاى يطلع على السلم وينزل
المذيعة : سلم ايه ؟
نهاوند : السلم الموسيقى يا استاذة اصله كان كل ما ييجى يطلع يقع
المخرج : أستوب ....... يقع ايه بس يا استاذ هو فى نجم بيقع بردو ....... هتاخد 200 جنيه زى المعلم قول بقى
نهاوند : الاستاذ حباكة الامير علمنى ازاى اطلع على السلم علشان انا كنت كل ما اجى اطلع اقع بس هو من يومه فوريرة اى والله فوريرة
المذيعة بنشكر حضرتك جدا يا استاذ ..........
نهاوند : نهاوند يا ست هانم نهاوند
المخرج يسمع صوت كروان وهو يلبى نداء الزبائن بايوه جااااااااااااااااااااااااى بصوته الرائع فيريد ان يصور معه لقاء عن النجم حباكة وخاصة انه فى نفس سنه تقريبا ينادى عليه
المخرج : أنت يااااااااااا
كروان : ايوه جااااااااااااااااااااااى أامرنى يا استاذنا شاى قهوة حلبة حصى جنزابيل
المخرج : لا ..... لا ......... انا عايزك تصور معانا
كروان : اصور ايه يا باشا ؟
المخرج : انت تعرف النجم المحبوب حباكة ؟
كروان : النجم المحبوب حباكة ؟
المخرج : ايوه ....... اللى فاز بالجايزة العالمية انت مش من المنطقة هنا ولا ايه ؟
كروان : حباكة ده صاحبى وكان بيشتغل معايا هنا فى القهوة دى وكل الزباين كانت مبطقهوش سبحان الله كان وشه كشر ومبيعرفش يتكلم .
المخرج : لا لا انت اكيد قاصدك على حباكة تانى
كروان : يا فندى ده متربى معايا فى الحارة
المخرج : انت هتصور معانا ولا لا هتاخد 200 جنيه
كروان : طبعا هصور 200 جنيه يانهار ابيض لازم اصور
المخرج : بس تسيبك من الكلام الفارغ بتاعك اللى انت قولته
كروان : طبعا طبعا 200 جنيه يا نهااااااااااااااااااااااار ابيض
المخرج : طب تعالى ..................... موجها كلامه للمذيعة والمصور والمساعدين جاهزين ؟
المذيعة : جاهزة يا استاذ انا طول عمرى جاهزة
المصور : جاهزين يا استاذ جاهزين
المذيعة : نتعرف بحضرتك
كروان : انا اسمى كروان من اشد المعجبين بالنجم المحبوب حباكة
المذيعة : تعرف ايه عن بداياته ؟
كروان : هو لسه ما بتداش
المذيعة : ازاى وهو فاز بالجايزة العالمية الكبيرة دى
كروان : اقصد انه لسه عنده كتير كتير قوى دا فنان فنان قوى ومطرب مطرب جامد قوى هاحكى لحضرتك على حاجة كنا مرة فى فرح ابتسام بنت ام جلال جارتنا هنا فى الحارة واصر انه يغنى فى الفرح والفرح كان كبير والناس كتير والستات مالية الفرح طلع ماسك المايك وقال يا ليل بس الناس سابت الفرح وقعدت تجرى تجرى تجرى ههههههههههههههههههه
المذيعة : تجرى ؟ ليه ؟
كروان : تجرى أنا قولت تجرى ؟ اه ايوه فعلا من حلاوة الصوت حضرتك مش بتشوفى المعجبات بتعمل ايه مع النجوم ؟
المذيعة : ايوه .... ايوه فهمت يعنى هو مطرب مميز
كروان : مميز ؟؟؟؟ ايوه مميز جدا جدا جدا
المذيعة : نشكر حضرتك جدا جدا جدا
المذيعة موجها كلامها للمخرج : هو النجم ده اـأخر ليه هو فى كده ؟
المخرج : نجم يا استاذة ...... ومش اى نجم دا نجم النجوم ومتنسيش الناس دى بتقوم من النوم متأخر وعلى مايلبس ويجهز هياخد وقت
المذيعة : طيب انا هاروح أخد كابتشينو فى اى كافيتريا قريبة وارجع يكون جهز
المخرج : اوك .... روحى انت واحنا هنجهز اللوكيشن
تخرج المذيعة ويختفى المخرج وطاقم البرنامج ليقفل الستار على المشهد الأول
======================================================
المشهد الثانى
========
يرفع الستار على زفة كبيرة من اهل المنطقة وفرقة المطرب حباكة الامير احتفالا بفوزه بالجائزة يظهر فى وسطهم المطرب حباكة فى زي النوم الخاص به تى شيرت وبنطلون ترينج يوحى بانه لسه صاحى من النوم وشعر منعكش ..........................
أم حباكة تقف فى وسط الزفة ترقص رقصة غريبة تنم عن جهل وعدم وعى وطيبة وهى تزغرت من أن لأخر لتعبر عن فرحتها ومن وقت لاخر تقف تحييى حباكة ورفاقه اصحاب الإنجاز الكبير
أم حباكة : ابنى ... حباكة .... العالمى .... الفنان
زغزغة صاحب الصاجات : يردد خلفها فى شكل التحية
إبنك ... الاستاذ حباكة ..... العالمى ...... الفنان الكبير
ام حباكة : رقصنى يا عم بعد انتهاء التحية
تعود الفرقة لتعزف نغمات راقصة
زغزغة : خدناها خدناها ..... الجايزة العالمية .... خدناها خدناها
ويردد خلفه الحضور فى شكل زفة بلدى
زغزغة : يابن الحتة يا فنان ..... بكره هتلعب فى اليابان
ويردد خلفه الحضور من اهل الحارة وفرقته الخاصة
أم حباكة : التفاحة فى ايدى اهى ...........
ويردد خلفها الحضور
زغزغة : تفاحتك يا ست الكل ...... حلوة لذيذة وزى الفل
ويردد خلفه الحضور
=====================================================
طاقم البرنامج يجلس على المقهى ومعهم المذيعة يشاهدوا هذا المنظر الغريب إنتظارا للقاء النجم المحبوب حباكة
المذيعة : ايه ده شايفين ؟سامعين ؟
المخرج : ايوه ايوه ده اكيد هو بس ده مجهز نفسه على الأخر شكله كان فى الكوافير ولسه جااااى
ولا الوليه اللى بترقص دى ههههههههههههههههههه
المعلم حمودة : دى ام حباكة يا استاذ فرحانة علشن ابنها
المصور : طيب ده هنصوره ازاى يا جماعة دا لاشكل ولا لون
المخرج : انت بتقول ايه دا بكره هيكون استايل كل الشباب فى مصر ويمكن يكون الزى المصرى الوطنى يلا يا جماعة نجهز علشان نخلص ونمشى من هنا
المذيعة : طيب ازاى هاقف قدامه واسأله انا هموت من الضحك ومش هاعرف اشتغل خالص
المخرج : لا يا استاذة احنا لازم نخلص شغلنا
المذيعة : طب يلا يلا انا جاهزة
المخرج يندس فى وسط الزفة ليقتلع حباكة من وسطهم لإجراء الحوار معه ولكنه يقابل بمعارضة شديدة من مؤيدى ومحبى حباكة ويجد صعوبة كبيرة فى إقناعهم بشخصيته وانه مخرج من التلفزيون يريد عمل لقاء مع النجم حتى ينجح فى النهاية على ان يتم الحوار فى حضورهم جميعا .وأن الحوار يكون مع امه اولا .
المخرج لحباكة : الامر لله .......ثم ينادى على المذيعة والمصورين لعمل القاء وسط هذه الجلبة والجمع الغفير من الناس
المذيعة : معقول ستروه انا لا يمكن اشتغل كده
المخرج : معلش يا استاذة هنعمل ايه بس يلا بقى خلينا نخلص هنبدأ بالأم
المذيعة : سيداتى انساتى سادتى وأخيرا حان اللقاء مع الام العظيمة ام مطرب الاغنية العربية الحائز على الجائزة العالمية اهلا بيك يا حاجة
ام حباكة : حاجة ...... يسمع من بؤك ربنا يا حلوة
المذيعة : عايزين نعرف منك طفولة حباكة كانت ازاى ؟
ام حباكة : يعنى ايه يا اختى
المذيعة : يعنى وهو طفل كان بيغنى كان مهتم بالغناء والموسيقى
أم حباكة : حباكة طول عمره كويس كويس قوى
المذيعة : يعنى كان بيغنى وهو صغير ؟
ام حباكة : لا يا حبيبتى ده جاله على كبر
المذيعة ضاحكة : هو ايه يا حاجة اللى جاله على كبر
ام حباكة : الجايزة يا حبيبتى الجايزة الكبيرة دى
المذيعة : طيب قوليلنا هو عمل ايه علشان يفوز بالجايزة ؟
ام حباكة : عمل ايه ازاى يعنى ؟
المذيعة : بشكرك يا حاجة والف مليون مبروك الجايزة
نرحب الان بالنجم المحبوب حباكة الامير الفائز بالجايزة العالمية فى الاغنية العربية من مهرجان بباكو الدولى
المديعة : بنرحب بيك يا فنان وبنقولك الف مبروك
حباكة : اهلا اهلا يا موزة صباحو عسل
المخرج : لا لا يا استاذ مش كده خلى كلامك مهذب شوية
حباكة : مش فاهم وجهة نظرك يا استاذ يعنى انا مش مؤدب يعنى
المخرج : لا يانجم مش قصدى بس فى كلام للتصوير وكلام مينفعش
حباكة : يعنى انت جاى تعلمنى؟؟؟ انت مش عارف انا مين ؟؟؟؟
المخرج : لا لا ازاى يا نجم ............ انا اسف يلا وقول اللى انت عايزة
حباكة : ايوه يا موزة ؟
المذيعة : طبعا الشعب كله فرحان لانك حصلت على الجايزة العالمية فى الاغنية العربية نحب نسمع منك جزء بسيط منها ...
حباكة : على عينى انت تأمرى (ثم يوجه كلامه للفرقة المصاحبة له ) يلاااااااااا
تعزف الفرقة لحن الأغنية الذى هو عبارة عن خبط ورزع دون الموسيقى ليغنى حباكة ويرقص الحضور من أهل الحارة
ياليلى ياليلى ياليلى ياااااااااااااااااااااااا ليل
يا عينى يا عينى ياااااااااااااااااااااااايا عينى
ياااااااااااااااااااااااا اللى انت دايس عليا قوى
ياللى انت دايس عليا قوى وانا بقوووووول أى
دوس عليا بالراحة بالراحة بالراحة الدور الجاااااااااااااى
دوس دوس دوس دووووووووووووووووووووووووس
دوس على رجلى بالراحة ..
.... الفرقة تردد (أى أى أى اى )
وامى تديلك تفاحة .........
.....الفرقة (أى أى أى أى )
دوس على رجلى ومتقوليش
...................(أى أى أى أى )
أصل أنا رجلى مبتوجعنيش
.........................(أى أى أى أى )
دوس على رجلى يا عم الحااااااااااج
.................... (أى أى أى أى )
دوس والنبى متقولش لحد
....................(أى أى أى أى )
ياعم دوس .......
....................(أى أى أى أى )
والنبى دوس .......
....................(أى أى أى أى )
ياعم دوس ........
....................(أى أى أى أى )
والنبى دوس
....................(أى أى أى أى )
دوس دوس دوس دوووووووووووووووووس على رجلى
دوس على رجلى وما تقوليش
بس راضين بقرش حشيش
دوس على رجلى بالراحة
وأمى تديلك تفاحة
وأمى وأمى وأمى
وأمى وأمى وأمى
وأمى وأمى وأمى
أمى هتديلك تفاااااااااااااااااااااااااااااااااااحة
ليصفق الجميع للنجم المحبوب
وتغلق السار لينتهى المشهد الثانى
=======================
المشهد الثالث
=======
نفس الديكور للمقهى البلدى
كروان : يفتح الراديو ليستمع لصوت ام كلثوم فى أغنية يا صباح الخير ياللى معانا ليفاجئ بأغنية المطرب النجم الجديد حباكة تذاع (دوس على رجلى بالراحة ) فينهار ضاحكا ويضرب كف على كف فى استغراب شديد ثم يقول لنفسه
معقول يا ناس يوصل حالنا لكده بدل ما نسمع صوت الست نسمع الحمار ده بينهق على الصبح والله غريبة يا بلد ثم يغلق الراديو نهائيا ويبدأ فى رص الكراسى ورش المياه امام المقهى
تمر عليه أم حباكة وتلقى عليه التحية صباح الخير يا كروان يا بنى
كروان : صباح الخير يا خالة عاملة ايه ؟
ام حباكة : عاملة ايه ازاى يعنى .....
كروان : يعنى كويسة يا خالة الحمد لله
ام حباكة : ايوه الحمد لله انا طول عمرى كويسة
كروان : الحمد لله والنجم الكبير عامل ايه بعد سهرة امبارح انا شايفه راجع بالليل متأخر وكان كده شكله تعبان مسطول سكران حاجة زى كده يعنى
ام حباكة : هو داخل عليا امبارح بيغنى انا لا مسطول ولا بطوح
كروان : ماشاء الله بيعرف يختار الاغنية المناسبة للحالة هههههههههههه
ام حباكة : متعرفش يا ابنى هم الناس بتوع امبارح دول كانوا جايين ليه
كروان : اللهم صلى على النبى انت مش عارفة يا خالة كانوا جيين ليه ؟
ام حباكة : والنبى يابنى مانا عارفة انا لاقيتهم بيهيصوا ويغنوا وفرحنين قولت افرح معاهم
كروان : لا لا يا خالة دكان موضوع كده بس فرحة يعنى مش حاجة وحشة
ام حباكة : بجد يابنى
كروان : بجد يا خالة
ام حباكة : ربنا يفرحكم على طول يابنى وتزغرت
تأتيه خوخة بنت المعلم حمودة وهى تبكى بكاءا شديدا
كروان : يا فتاح يا عليم يا رزاق يا كريم مالك يا خوخة ؟؟؟؟
خوخة : خلاص يا كروان
كروان : خلاص ايه ابوكى حصل له حاجة
خوخة : لا بعد الشر عليه انشاله حباكة
كروان : امال في ايه بس بتعيطى ليه انا عارف انا اصتبحت بوشه العكر على الصبح
خوخة : حباكة خطبنى من ابويا وابويا وافق عليه خلاص
كروان : وانا ؟ دانا قايل للمعلم من سنة وهو كان موافق دا حتى هو اللى بيحوش لى المهر يا خوخة وانت عارفة
خوخة : حباكة جاله امبارح بالعربية المرشيدس وقاله انه نقل فى شقة على النيل كبيرة قوى وواسعة
وأنه مش هيكلف ابويا ولا مليم
كروان : ايوه طبعا عنده حق
خوخة : بس انا عايزاك انت يا كروان بحبك انت ومش طيقااااااااااااه
كروان : الزمن ده مش بتاع حب الزمن دا بتاع الفلوس والهلس
خوخة : يعنى ايه ؟ اوافق عليه يا كروان
كروان : حباكة بقى الاستاذ حباكة النجم المجبوب واغانيه بتتسمع وهى لا كلام ولا صوت ولا لحن بس هو بقى رجل هذا الزمان
خوخة : يعنى خلاص ..............؟
كروان : بتمنى لك السعادة يا خوخة
خوخة : الوداع يا كروان .......... الوداع يا كروان ......... الوداع يا كروان
(وتغادر المسرح)
كروان : يقف مذهولا ........... ويغنى بصوته العذب
جانى حبيبى والدموع
مالية عينيه
وانا اللى كنت بحبه عايش
وبخاف عليه
وف لحظة قالى بودعك
وأنسى اللى كاااااااان
إنسى غرامنا وحبنا
بأمر الزماااااااااااان
أنسى ياروحى ذكريات
كانت ما بنا وعمر فات
عشان ياروحى ف الزمن دا
مافيش غراااااااام والحب مات
بعد أدائه هذه الأغنية يبكى بكاء حارا وتصادف تواجد أحد المنتجيين المحترامين اصحاب الذوق الرفيع الذين يبحثون عن الجواهر فى كل مكان الأستاذ / طاهر مظلوم ينادى عليه ....
طاهر : انت ياااااااااااااااا .... لوسمحت
كروان : ايوه جااااااااااااااااااااااااااى ... أأمرنى يا استاذ طلباتك
طاهر : هو انت شغال هنا فى القهوة دى
كروان : ايوه يا استاذ ........ اامرنى تشرب ايه حضرتك
طاهر : لا انا عايز اتكلم معاك شوية
كروان : انا تحت أمرك
طاهر ممكن دلوقتى ولا هاعطلك عن شغلك
كروان : لا ابدا انا تحت امرك
طاهر : انا سمعت صوتك دلوقتى ومن اسلوبك حاسس انك متعلم ومثقف وفنان حقيقى
كروان : والله يا استاذ انا بعشق المغنى واللحن الجميل والكلمة الحلوة بس مفيش بخت
طاهر : انا طاهر المظلوم منتج فنى بس بحب انتج اعمال تعيش اعمال فنية حقيقية انتجت لمطربين كبار اغانيهم عايشة وبتتسمع من ناس عندها ذوق فنى راقى
كروان : علشان كده مظلوم يا استاذ مظلوم
طاهر : يمكن ايوه ....يمكن مش بكسب كتير زى غيرى ........ بس مكسبى الحقيقى ان انتاجى الفنى هايعيش ويفضل سنين كتير حتى بعد ما اموت
كروان : ربنا يبارك فيك ويديك طول العمر ان شاء الله
طاهر : انا سمعت صوتك وعجبنى كتير قوى وعايز اعمل معاك شغل وانا عندى حفلة فى الأوبرا كمان شهرين وعايز ااقدمك فيها انت تستاهل وصوتك كمان يستاهل
كروان : انا يا استاذ مظلوم ؟ انا اغنى واغنى فى الاوبرا كمان
طاهر : ايوه وليه لا
كروان : سبحان الله العظيم انا كنت باحلم أنى أغنى بس وحد يسمعنى
طاهر : انت فنان حقيقى ياكروان بجد كروان اسم على مسمى
كروان : الله يكرمك يا استاذنا وهنشتغل امتى ؟
طاهر : من دلوقتى لو حبيت
كروان : انا جاهز ان شاء الله
طاهر توكلنا على الله ده الكارت بتاعى هنتظرك الساعة 9 مساء تجيلى هاكون مجهزلك الكلمات والملحن ونبدأ على طول ان شاء الله .
كروان : ان شاء الله قبل المعاد هتلقينى عندك يا استاذنا
يأتى المعلم حمودة ويلقلى السلام اثناء وداع كروان للاستاذ طاهر المظلوم
حمودة موجها كلامه لكروان : ايه يا كروان احنا بنوصل الزباين ولا ايه ؟
كروان : لا يامعلمى دا واحد كان عايز حاجة ولاقاها الحمد لله
حمودة : حاجة ايه يعنى ؟ شحات ؟ بس شكله ما يديش على شحات خالص
كروان : المظاهر بتغر ناس كتير قوى يا معلم يعنى عندك حباكة مثلا بعد العربية والشقة اصبح حد محترم من حقه يناسب المعلم حمودة كبير الحارة وعمدتها
حمودة : انت بترمى على ايه ع الصبح انت المفروض تفرح.... هى خوخة مش زى اختك ؟ ولما اختك تبقى فى خير تفرحلها وبعدين حباكة هينقلها نقلة تانية خالص .
كروان : الف مبروك يا معلم ربنا يتمم بخير ... بس انا يا معلم عايز ااقولك على حاجة بس مكسوف منك
حمودة : قول يا كروان انت زى ابنى انا اللى مربيك ومينفعش تتكسف منى
كروان : انا مش هاقدر ااقعد تانى فى الحارة يا معلم
حمودة : هاتروح فين ؟ انت ملكش اى حد فى الدنيا غيرنا يا كروان
كروان : بلاد الله واسعة يا معلم ربنا موجود
حمودة : يعنى خلاص يا كروان
كروان : اشوف وشك بخير يا معلم
حمودة : طيب لو احتجت اى شئ انا موجود وبيتى موجود يا كروان مع السلامة
كروان مع السلامة يا معلم .......... يترك كروان المسرح وهو يغنى
عينى عليك يا قلب
حملك دا هم كبير
فاتوك كل الأحبة
فى بحر م التفكير
يمكن نقابل حبيب
يحس بأوجعنا
ولا قلوب ترحمك
وف يوم تجمعنا
تغلق الستار لينتهى الفصل الأول
=================================================
الفصل الثانى :-
==========
المشهد الأول
=======
تفتح الستار على المقهى البلدى والعامل الجديد (محمود ) يفتح الراديو ليستمع لأغنية أم كلثوم يا صباح الخير يا للى معانا ويحاول ان يدندن معها اثناء رص الكراسى خارج المقهى ......
المعلم حمودة : والله زمان فكرتنى بالغالى ياترى فين اراضيه دلوقتى
محمود : هومين ده يا معلمى ؟
المعلم حموده : الغالى ابنى كروان يا محمود ياترى انت فين ياكروان والدنيا عملت ايه معاك ؟
محمود : بس انا معرفش ان ليك ابن يا معلم معرفش غير الست خوخة اللى هتتجوز بعد يومين الاستاذ حباكة المطرب
حمودة : متجبليش سيرة الزفت ده
محمود : ليه بس يا معلمى دا بسم الله مشاء الله مشهور والفلوس معاه زى الرز
حمودة : ايوه يا سيدى الفلوس معاه زى الرز خلته بيشرب كل ليلة ويسكر وبرشام وحشيش وبلاوى زرقة ومصايب وفضايح كل يوم الناس بتقولى اخبار زى الزفت عنه كل يوم وانا مش عارف اعمل ايه فى موضوع الخطوبة المنيلة دى انا ظلمت كروان وافتريت عليه وخليته ساب الحتة كلها ويمكن يكون ساب البلد كلها وهج كمان ................ تعرف يا محمود ؟
محمود : خير يا معلمى ...........
حمودة : كروان ده كان انسان بجد محترم ومؤدب انا مربيه على ايدى كان بيحب خوخة وخوخة كانت بتحبه بس انا قعدت ازن على ودنها لحد ما وافقت على سخام البرك حباكة كنت فاكر انها هتكون سعيدة لما تركب المرشيدس وتعيش فى شقة على النيل مع ان الأدب والأحترام اهم من الفلوس ميت مرة
محمود : وبعدين يا معلم ؟ ها تعمل ايه دلوقتى ؟
حمودة : مش عارف والله يا ابنى حباكة بقى بلطجى وبيتحامى فى شلة البلطجية اللى حواليه وخايف يعمل اى حاجة فى البنت لو فسخت الخطوبة
محمود : ازاى يا معلمى رجالة الحتة كلها معاك شوف عايز تعمل ايه واحنا كلنا معاك
حمودة : يلااااا اللى عايزه ربنا هو اللى هيكون
يدخل حسن افندى نهاوند للمقهى ويلقى التحية على المعلم السلام عليكم يا معلم حمودة
حمودة : وعليكم السلام يا فنان وحشنا والله بقالك كام يوم مش باين يعنى انا كنت بفكر ازورك النهارده
حسن نهاوند : فيك الخير والله يا معلم انا فعلا كنت تعبان وراقد فى السرير بقالى كام يوم
حمودة : الف سلامة عليك يا غالى طيب مش تبعتلى اى حد يعرفنى
حسن نهاوند : والله ماحبتش اتعبك يا معلم وخصوصا إن كروان كان بيجيلى كل يوم يسأل عنى ويشوف طلباتى وجابلى الدكتور والدوا وانا قولت اكيد انت اللى بتبعته
حمودة : بتقول مين ؟ كروان ؟
حسن نهاوند : ايوه يا معلم صبيك كروان كان دايما يعدى عليا بعد ميعاد القهوة ويسألنى ان كنت عايز حاجة او محتاج حاجة
حمودة : انت بتقول كروان ؟
حسن نهاوند : ايوه يا معلم كروان
حمودة : يعنى كروان لسة فى الحارة ؟
حسن نهاوند : هو فى ايه يا معلم ؟ هو كروان مش صبيك اللى شغال معاك ؟
حمودة : ااقولك ايه بس يا فنان كروان من يوم ماعرف ان خوخة خطبها حباكة وهو ساب القهوى وحتى الاوضة اللى كان عايش فيها فى البيت سابها
حسن نهاوند : انت بتقول ايه يا معلم دا كان كل ليلة بيجى بلبس القهوة ويقولى انه لسة مشطب ويقعد معايا شوية ويستأذن علشان هيصحى بدرى يفتح القهوة
حمودة : والله ما عنت عارف اى حاجة خالص
نهاوند : هو فرح خوخة مش بعد يومين ؟
حمودة : ايوه يا سيدى بعد يومين
حسن نهاوند : الف الف مبروك يا معلم ربنا يتمم بخير وتفرح بأولادها
حمودة : الله يبارك فيك بس والله قلبى مش مطمن عليها يا خويا
حسن نهاوند : ليه بس بتقول كده ؟
حمودة : حباكة من يوم الجايزة المهببة دى وهو انسان تانى خالص افتكر انه نجم بجد وعايش حياة غريبة سكر ومخدرات وبرشام وحريم وحاجات كتير كده
نهاوند : لا اله الا الله .......... معقول ؟
حمودة : اى والله بعد القرش مابقى فى ايده نسى نفسه واصله وعايش زى البلطجية من كباريه لكباريه ومن غرزة لعرزة
نهاوند : لك حق متكنش مطمن يا معلم اللى زى ده ما يتأمنش على عرض
حمودة : دبرنى يا استاذنا نعمل ايه فى المصيبة دى ؟
نهاوند : وخوخة رأيها ايه ؟
حمودة : والله البنت حالها يحزن بس هى خلاص راضية باللى قسمه ربنا
نهاوند : سيبها لله يا معلم ربنا هو اللى هيدبرها
حمودة ينادى على محمود : يا محمود انت يااااااد تعالى شوف عمك نهاوند يشرب ايه
محمود : ايوه جااااااااااااااااااااااااااااااااااااااى اامرنى يا استاذنا طلباتك
نهاوند : هو ده الصبى الجديد بعد كروان
حمودة : ايوه هو ولد مؤدب ومحترم قوى وباين عليه متعلم وابن ناس
محمود : ده بس من ذوقك وكرم اخلاقك يا معلمى
نهاوند : هات شاى يا محمود شاى خفيف سكر زيادة
محمود : من عينى يا استاذنا
نهاوند : شكله مش من الحتة يا معلم جالك ازاى ده ؟
حموده : والله لاقيته قاعد فى يوم جعان وطلب شاى ومكنش معاه فلوس وقالى اشغله علشان يلاقى اللقمة وسكن مكان كروان فوق السطوح عندى
نهاوند : يعنى خد مكان كروان فى البيت والقهوة؟ ارزاااااااااااق
حمودة : كروان والله وحشنى ونفسى اشوفه
نهاوند:: ان شاء الله يرجع بالسلامة انت زى والده وهو اصيل وبيتمر فيه العيش والملح
حمودة : ياااااااااااااااارب
اثناء جلوسهم يفاجئوا ببعض الشباب يمر امامهم يجرون فى الحارة بشكل غريب
حمودة : خير يارب فى ايه ؟
نهاوند : مش عارف والله يا معلم استنى هسأل واشوف
بكار : الحق يامعلم ............ الحق يامعلم
المعلم : فى ايه يا ابنى خير يارب
بكار : البوليس بيدور على حباكة وبيقول انه تاجر مخدرات
المعلم ونهاوند معا : حباكة تاجر مخدرات يادى المصيبة
لينتهى المشهد الاول على هذا الخبر السعيد
=================================================
المشهد الثانى :-
========
يفتح الستار على المقهى والمعلم حمودة والاستاذ حسن نهاوند عائدين من قسم الشرطة ليجلسوا على المقهى
حمودة : انا لحد دلوقتى مش مصدق يا استاذ حسن اللى بيحصل ده حلم ولا علم
حسن نهاوند : والله دى حاجة تحير يا معلم معقول حباكة بعد كل اللى حصل ده بيتاجر فى المخدرات
حمودة : سبحان الله العظيم والله انا كان قلبى حاسس ان فى حاجة غلط بتحصل
نهاوند : والثراء والغنى المفاجئ ده كنا بنحسب انه من الشهرة والمجد يطلع من تجارة المخدرات
حمودة : الشهرة والمجد ؟ لمين وليه يا استاذنا ؟
نهاوند : ما انت شوفت جايزة عالمية وتصوير تلفزيون ولقاءات اذاعة وهيصة
حمودة : انا يمكن صدقت فى الأول وقولت اهى الدنيا بتتغير ويمكن يكون ده التغيير بس مع مرور الأيام لاقيت ان مهما اتغيرت الدنيا فلازم يكون الشئ الجميل والاصيل هو اللى باقى
نهاوند : طيب متعرفش يكون مستخبى فين ؟
حموده : انا لو اعرف اروح اسلمه بنفسى اللى زيه يستحق الاعدام ده بيدمر اجيال ان كان بالغنى ولا المخدرات وهم الاتنين زى بعض تمام
يدخل المسرح رجل فى زى مهندم جدا ووسامة عالية يدخل على المعلم حمودة والاستاذ حسن ويلقى التحية عليهم .
كروان : السلام عليكم ورحمة الله وبركاته يا معلمى
حمودة : مين كرواااان ابنى حبيبى
حسن نهاوند : كروان مين يا معلم ؟ البيه ده يبقى كروان ؟
كروان : ايوه يا عم حسن انا كروان
حموده : ايوه هو كروان وحشتنى قوى يا ابنى انت فين وفين اراضيك وايه الحلاوة دى كلها
كروان : انا بقالى فترة يا معلم بجهز لحفلة الأوبر هتكون بكره ان شاء الله
حسن نهاوند: الأوبر ؟ الله الله الله
كروان : وقولت لازم تكونوا اول المدعوين انتم اهلى وانا مليش حد غيركم وعارف انكم هتفرحولى
حمودة : طول عمرك اصيل يا كروان معلش يا بنى انا غلط فى حقك
كروان : لا يا معلم انت اب كان بيحلم لبنته بحياة سعيدة وانا عاذرك
حسن نهاوند : طول عمرى بقول انك فنان حقيقى ولازم هتوصل يا كروان
كروان : الحمد لله ربنا اكرمنى ولسة فى ناس عايزة تسمع طرب وكلام جميل
نهاوند : انت ابن حلال يا كروان واصيل وتستاهل كل خير
حموده : عرفت اللى حصل يا كروان يا بنى
كروان : خير يا معلمى ؟ حصل ايه ؟
حمودة :مش حباكة طلع بيتاجر فى المخدرات والبوليس بيدور عليه فى كل حتة
كروان : مش عارف ااقولك ايه يا معلم والله انا مش مستغرب لده
حمودة : عندك حق يابنى اللى يرضى يغنى الكلام اللى بيغنيه يعمل اى شئ ده غناه اكتر من المخدرات فى التأثير على الناس والشباب بالذات
كروان : طيب وخوخة يا معلم هتعمل ايه فى موضوع زواجها
حمودة : خلاص يابنى ربنا هو اللى حلها من عنده انا كنت عايش فى دوامة وحيرة كبيرة انت تعرف ان الفرح كان المفروض بكره ؟
كروان : ايوه عارف يامعلم وحمدت ربنا ان الحفلة بتاعتى هتكون بكره علشان ماكنتش هاقدر احضر واشوفها بتتزف لغيرى
تأتى فى اللحظة دى خوخة الى المقهى لتفاجئ بكروان بشكله الجدد فتفرح كثيرا لعودته وتقول له
خوخة : حمد الله على السلامة يا كروان وحشتنى قوى ااقصدشش وحشتنا قوى وهى تنظر لابيها
حمودة : عندك حق يابنتى وحشنا قوى قوى قوى
كروان : وانتم كمان وحشتونى والله بس انا كنت كل يوم اشوفكم من بعيد واطمئن عليكم
حمودة : كروان بقى مطرب يا خوخة مطرب جميل محترم وهيغنى فى الأوبرا بكره وجاى يعزمنا على الحفلة بتاعته
خوخة : الحمد لله يابا هو يستاهل كل خير ويستاهل اجمل بنات الدنيا كمان
كروان : انت بتقولى ايه انت اجمل بنات الدنيا فى عينيا يا خوخة ... موجها كلامه للمعلم ... ياترى الموافقة القديمة سارية يا معلم ؟
المعلم : ايوه طبعا انا هلاقى لبنتى راجل زيك ياكروان
خوخة : يعنى ايه يابا وحباكة هتعمل فيه ايه دا الفرح بكره ؟
المعلم : خلاص يابنتى ربنا خلصنا منه على خير
خوخة : بجد يابا ؟
المعلم : بجد يا بنتى
حسن نهاوند : الحمد لله يابنتى كل شئ رجع لاصله خلاص موجها كلامه لكروان سمعنا حاجة حلوة بالمناسبة السعيدة دى
كروان : من عينى انا قلبى هو اللى هيغنى يا استاذنا
قولت اسافر قولت هاجر
وابقى اشوفك من بعيد
المهم تكون ياروحى
فى كل لحظة تكون سعيد
تعيش حياتك تذوب اهاتك
تطيب ألامك تنتهى
مع كل فرحة ويوم جديد
أما أنا وذكرياتى
وكل لحظة من حياتى
هنتظر لحظة لقاك
واملى عينى أه يا عينى
بطلتك .. بضحكتك ...
من مكانى من بعيد لبعيد
يغادروا المسرح جميعا إلا محمود صبى المقهى ليدخل حباكة ومعه بعض أفراد عصابته متخفيين ملثمين ليجلسوا على المقهى للتحدث فى أمور صفقة مخدرات
حباكة : تعالوا يارجالة نقعد هنا فى الركن ده
سنارة : ايوه يا معلم تعالوا هنا المكان ده هادى
شوكة : لازم نأمن المكان ونتأكد ان محدش يعرفنا ولا يسمعنا
بيخة : طيب يامعلمى هنبيع البضاعة ازاى فى الركن البعيد الهادى
حباكة : بضاعة ايه يا ابن العبيطة انت هتودينا فى داهية
سنارة : اهدوا يا جماعة الواد بتاع القهوة جاااى
محمود : أيوه جاااااااااااااااااى طلبات البهوات
حباكة : هتلنا يابنى طقم شاى
شوكة : بس اغلى المية كويس براحتك يعنى
محمود : من عينى حاضر ايوه جاااااااااااااى وينصرف ليأخذ مكانا قريبا يستطيع ان يسمع ما يقولون
حباكة : بصوا يارجالة البضاعة مش شوية واحنا بقت ظروفنا صعبة وحركتنا محدودة ودى ملايين مش لعبة لازم نفكر فى طريقة لتصريف البضاعة
شوكة : من قولت من الأول نخلى على أزازة يوزع هو البضاعة وياخد اللى هو عايزة
حباكة : على أزازة ملقتش الا ده انت ناسى انه سارق قبل كدة 20 بزازة من معلمه
شوكة : معلمه هو اللى بخيل يا معلم دايما كان واكل عرقه ومابيرعيش رجالته كويس
سنارة : لا انا مع المعلم حباكة اللى يخون معلمه يخون اى حد
حباكة: طب عايزين نتصرف بسرعة
محمود : ايوه جااااااااااااى احلى شاى لاحلى رجالة واجمل معلمين
حباكة : اخلص ياااااااااد حط الشاى وامشى
محمود : حاضر يا معلمى انت تأمر
حباكة: وبعدين يارجالة لازم نتصرف بسرعة مفيش وقت وبعدين انا عايز افضى دماغى لموضوع تانى مهم
سنارة : خير يا معلم موضوع ايه ؟
حباكة : خوخة يا رجالة انتم عارفين انى بحبها من زمان ومش حاسيبها
بيخة : خوخة ههههههه ايوه دى حلوة قوى يا معلم وانا كمان بحبها
حباكة : خلوا ابن العبيطة ده يمشى من هنا انا مش ناقصه هو كمان
شوكة : خلينا فى موضوع البضاعة يا معلم مفيش الا على أزازة هو كان نفسه يبقى معلم ويشتغل لواحده احنا نديله الفرصة دى ونشيله البضاعة وهنعرف ناخد تمنها منه بمعرفتنا
فى هذه الأثناء تأتى سارينة البوليس ليفر الجميع فى سرعة وخفة
مع تصفيق الحاضرين ينتهى المشهد الثانى
المشهد الثالث :-
=========
المعلم حمودة وخوخة وكروان والاستاذ حسن نهاوند يدخلون المسرح بعد حفلة الأوبر فارحين مسرورين
يشيدون بالحفل وصوت كروان ونجاحه الكبير .
المعلم : الله الله الله رجعتنا لأيام وزمن الفن الجميل يا كروان ربنا يبارك فيك يابنى
كروان : الحمد لله ربنا كرمنى يا معلمى والفضل بعد ربنا يرجع ليكم انتم اهلى
حسن نهاوند : انت فنان أصيل يا كروان مطرب حقيقى علشان كده ربنا ادالك اللى تستحقه
خوخة : وبعدين يعنى انا ماشية معاكم هوا مفيش ولا كلمة حلوة ليا من الكلام الحلو ده
المعلم : أزاى يا بنتى ماهو الكلام الحلو ده ليك بردو أنت ايه وكروان أيه
حسن نهاوند : طبعا يا خوخة كروان ده أخوكى يعنى نجاحه هو نجاحك وفرحته هى فرحتك ولا أيه ؟
خوخة : كلامك كل صح إلا حاجة واحدة بس يا عمى حسن
المعلم : ايوه صحيح أنا عارفها وعلشان كده فرحكم الخميس اللى جاى
كروان : بجد يا معلمى الخميس الجاى ؟
المعلم : ايوه يا حبيبى انا عايز أطمئن عليها قبل ما اموت ومش هكون مطمئن عليها الا وهى معاك
حسن نهاوند : تصوروا أنا كنت ناسى أنكم مش اخوات انتم حبايب وحبايب قوى كمان طيب يلا روحوا روحوا انتم وانا هقعد مع المعلم شوية وهيحصلكم الواد محمود لسة فاتح القهوة اهو
المعلم : غريبة صحيح الواد ده سهران ليه لحد دلوقتى تعالى نشوف
حسن نهاوند : تعالى يا معلم وانا عايزك فى حاجة مهمة
المعلم : تعالى نقعد هنا وينادى على محمود .......... محمود انت ياد يا محمود
محمود : نعمين يا معلمى ويظهر عليه الحزن الشديد
المعلم : مالك يا محمود ايه مزعلك قوى كده ؟
محمود : اصل خلاص يا معلم هسيب القهوة وهسيب الحتة وهارجع مكان ما جيت
المعلم : ليه كده يابنى دانت بقيت مننا خلاص وخدنا عليك وخدت علينا
حسن نهاوند : ماهو ده الموضوع اللى انا عايزك فيه يا معلم
المعلم : انت كنت عارف انه ماشى يا حسن
حسن نهاوند : هو هيقولك بقى طالما هو فتح الموضوع
المعلم :فى ايه يا جماعة انا هموت م القلق حرام عليكم ضيعتوا فرحتى الليلة بنجاح كروان
حسن نهاوند : لا لا لا انت هتفرح قد فرحتك ميت مرة لما تعرف
محمود : بص يا معلم حمودة انا مش محمود ولا انا عامل القهوة انا الرائد/ سمير عبد الواحد من مدرية أمن قنا وكنت جاى فى مهمة وهى القبض على اخطر عصابة مخدرات فى البلد وللاسف متورط معاهم بشكل كبير المغنى ده اللى اسمه حباكة .....
المعلم : مش محمود ؟ مش محمود ازاى ؟ رائد ؟ رائد ازاى ؟ حباكة ؟ حباكة ازاى ؟
الرائد سمير : اهدى بس يا معلم وانا هافهمك كل شئ ............ طبعا عصابات المخدرات بتكون تقريبا عارفة كل طاقم الإدارة الموجود كل ضابط وكل فرد علشان كده بتكليف من الوزير بصفة شخصية وبدون علم الادارة هنا اتكلفت انا بالمهمة دى وجيت علشان اعيش بينكم واكون قريب من مسرح الاحداث هنا .
المعلم : ايوه فهمت ..
الرائد سمير : علشان كده يا معلم انا عايزك تعمل فرح بنتك بكره مش يوم الخميس
المعلم : بكره ؟
الرائد سمير : ايوه بكره وعايز الخبر ده يوصل لحباكة وفرقته بأى طريقة مش عايز يبقى عندهم وقت عايز المفاجئة تشلهم يقوموا يظهروا بشكل عشوائى وبدون ترتيب
المعلم : وبعدين ؟
الرائد سمير: انا جهزت مع الإدارة هنا الخطة علشان يتم القبض عليهم كلهم مرة واحدة
المعلم : على بركة الله يبقى الفرح بكره
حسن نهاوند : سبحان الله كل شئ مترتب من ربنا علشان الغلبان كروان ربنا شايل له الفرح كله مرة واحدة
المعلم : طيب انا هاروح البيت اعرفهم ان الفرح بكره ان شاء الله وانت قفل القهوة وحصلنى على البيت يامحمود .............. لا لا انا هقفل القهوة يا حضرة الظابط
الرائد سمير : لا يا معلم انا لحد ما يتم القبض عليهم انا محمود صبى القهوة عايز كل شئ يمشى طبيعى
المعلم : تمام يا فندم ............
الرائد سمير : انا مين يا معلمى ؟
المعلم : انت سمير بيه صبى القهوة
الرائد سمير : اسمى محمود يا معلم محمود
المعلم : ايوه ايوه انت الواد محمود
الرائد سمير : الله ينور عليك يا معلم ومتقولش اى حاجة للعروسين خليها مفاجئة ...تمام ؟
المعلم وحسن نهاوند معا : تمام تمام التمام
يغادروا جميعا المسرح ليظهر بعد فترة بسيطة عمال الفراشة يقمون بتعليق الزينة استعدادا للفرح
واثناء زفة العروسة والعريس يفاجئ الجميع بحباكة فى شكل المجرم الملثم ومعه اخرون يحاولون ارهاب الموجودين وخطف العروسة فيتم القبض عليهم جميعا من قوة الشرطة الموجودة ويتم اخذهم الى قسم الشرطة ليقف على المسرح العريس كروان والعروسة خوخة والمعلم حمودة وحسن نهاوند وبعض اهل الحارة ليغنى كروان هذه الاغنية ........
======================================= =========
إنتظرتك عمرى كله
بشوق وقلب مليان حنين
وافترقنا فى يوم ياعمرى
وقلب كان مجروح حزين
بس رجعت لحضنى تانى
راجع تحقق لى الامانى
بالفرح والقرب راجع
راحت خلاص كل المواجع
وتصالحت مع السنين
قرب منى كمان قرب
ايدى فى ايدك
عينى فى عينك
قلبى يضمك
قلبى يضمك شوق وحنين
==========
تمت
