الرئيسية
![[b]مســـــــرحية رســـــــــالة جــــــندي مسرحية من فصل واحد تأليف الأستاذ / عماد الشرقاوى Empty](https://2img.net/i/empty.gif)
مســـــــرحية
رســـــــــالة جــــــندي
مسرحية من فصل واحد
تأليف
الأستاذ / عماد الشرقاوى
![[b]مســـــــرحية رســـــــــالة جــــــندي مسرحية من فصل واحد تأليف الأستاذ / عماد الشرقاوى 76854-10](https://i.servimg.com/u/f53/20/21/51/47/76854-10.jpg)
(2)
المشهد الاول
" في احدي قري الصعيد النائية وفي شهر وفي الرابع عشر من رمضان المبارك تبدأ الاحداث"
"منزل متواضع الحوائط بها آثار دهان قديم باهت ومتآكل ، مملوؤة بالبقع والسقف منخفض ، صورة للاب الراحل معلقة غلى احدي حوائط الصالة، المصباح البدائي معلق ايضا بجانب الباب الخشبي ، صينية بها بعض القلل مغطاة بقطعة من القماش في جانب من الصالة، راديو قديم موضوع على رف خشبي بجانب صورة الاب ، وفي المقابل صورة للإبن.. اما الارض في مغطاة بحصيرة متهالكة لا تفرق بينها ةبين الارض.. صاح الديك وانتشر نور الصباح وعلت اصوات الناس والمركبات .. تدخل من جانب المسرح الايمن سيدة في منتصف العمر تلبس حلة الصعيد المعروفة .. قمحية اللون ، متوسطة الطول ، يتدلى قرطها الذهبي من اذنيها .. تاخذ المقشة المصنوعة من اسلاب النخيل وتبدأ يومها بعد ان صلت الفجر بتنظيف البيت ..تنظر الى صورة زوجها الراحل المعلقة على الحائط وتكلمه..
الام: صباح الخير يا حاج وهدان.. صباح الخير يا بو تمام.. كنت راجل زين والله .. راجل صح .. بهيبتك .. وطلتك الحلوة وضحكتك الزينة .. اتوحشت ضحكتك قوي وكمان اتوحشت شخطتك وانت بتقوللي ....
همي يا هنيه بالفطور عاوز اروح الغيط قبل النور ..
اللقمة البدرية هنيه يا هنيه..
نشوفوا حالنا ولقمة عيشنا..
الارض طيبة قوي يا هنيه وعاوزه اللي يحبها
(3)
تقوم تحبه وتديله احسن حاجه..
كنت حنين علينا قوي ياحاج.. الله يرحمك ..
نسيت اقولك يا حاج.. خوك الحاج همام مسيبناشي واصل وبيشوف كل طلباتنا الله يبارك فيه هوه وبته سلمى خطيبة تمام .. بت زينه وطيبه وبتحبني قوي ... باذنك ياحاج اشوف هنادي اتاخرت ليه..
تنادي على ابنتها وهي تواصل التنظيف..
***********************
الام: هنادي .. يا هنادي.. انتي فين يا بنيتي..
لساك نايمة عاد!
قومي يلا عوزاك.. بطلي كسل امال ..
امال لما تبقي ست بيت وتتجوزي هتعملي ايه..
هتتاخري اكده ..
داني لو جوزك اقطع رقبتك ..
همي يا بتي وشهلي شوي..
هنادي:" من الخارج" انا صاحية يا ماي ، كنت بتسبح وجاية حالا..
دايما مستعجله اكده ..النهار لساه مشقشق ..
(" تدخل شابة صغيرة بشعرها المتدلي على جبينها .. عيونها سوداء مع وجه مليح وابتسامة صافية..)
هنادي: صباح الخير والسعادة والهنا على احلي ام
القمر الحلوة قوي قوي (: تنحني وتقبل يدها وراسها وتاخذ من يدها المقشة وتجلسها على الكنبة المهترئة.)
(4)
هنادي: انا بحبك قوى قوي يا اماي ..
قوليلي يا ماي انت زينه ليه اكده ..
اقولك على شي .. وانا ماشية معاكي في السوق الناس عم بتتغمز عليكي وسمعتهم بوداني
الام: سمعت ايه يا مخبله؟
هنادي : بيقولوا هنيه لساها زينه واحلي من بتها واللي يشوفها يقول اختها او بتها علشان اكده بوي كان بيحبك قوي وبيغار عليكي من الهوا اللي معدي..
الام: اتحشمي يابت .. انا لسه مكلماه ..
هنادي: مكلمه مين ياماي؟
الام: بوكي يا هبله..
هنادي: لساك بتتكلمي معاه ياماي ؟
الام: ولحد ما اموت يا بتي.. كان صدره واسع وحنين وكنت بستناه لما ياجي من الغيط واقوله كل حاجة ...
هنادي: ايوه ياماي ..سمعتك مرة وانت بتحكيله وكان هوه ولا بلاش..
الام: ولا بلاش يابت قولي كان ايه..
هنادي :كان نايم وكان صوت شخيره واصل للشارع
الام: اكتمي يا بت ..
هنادي: قعدت اضحك انا وتمام ..
الام: تمااااااااااااااام! اشوقتله قوي قوي يا هنادي..
من يوم مخدوه للجهادية وعنيا مبتعرف النوم..
(5)
قلقانه عليه قوي يا بتي..
خايفة يروح زي ابوكي ما راح وبقينا وحدينا ....
وتمام هو راجلنا دلوك..
صحيح عمك همام بيشقر علينا من وقت للتاني لكن ولدي تمام حاجة تانيه خالص..
هنادي : متخافي على ولدك يا اماي ..
هوه شجاع وزين وبيحب مصر قوي قوي ..
وكأن مفيش غيرها من بلاد ربنا .. مغمض عنيه ومبيعرف غيرها .. بيحب ترابها .. معجون بطينها .. وكان يقولي
تمام: يا بت ياهنادي تعرفي الارض دي اللي بنزرعها هي ايه؟
هنادي : ايه يا خوي؟
تمام: عرضنا وشرفنا مبالك بقا مصر ارضها تبقا ايه؟
هنادي: صح يا تمام تبقي البيت الكبير اللي بيلمنا جواها..
تمام: صح يا هنادي جبت الكلام الحلو دا كله منين ..
هنادي: انت ناسي
تمام: ناسي ايه يا هنادي
هنادي : من كلامك عن مصر .. من وصفك ليها.. من شعرك اللي بتغنيه كل ليلة .. من حكاويك وحلمك اللي مبينتهيش
تمام : حلم يا بنت ابوي قولي..
هنادي : حلمك سينا تتحرر وتنضف مصر من النجاسة والعفن اللي فيها
(6)
تمام: اي والله يا هنادي ده حلم العمر
الام: : تقف الام: وهيه تستاهل نحبها كلنا ..اغلى تراب بنعيش عليه.. ربنا كرمها في القرآن وحكى عنها انها ارض الامان .. ارض الخير .. ارض المحبة والسلام.. وانا في الكتاب كان سيدنا يقولنا لما تاجي مصر في القرآن .. شوفو بلدنا عظيمة ازاي .. نقوله كيف يا سيدنا .. يقول لما يذكرها ربنا باسمها " مصر" تبقى مكانتها عنديه ايه..
هنادي: اماي.. اقولك شيء ومتزعليش مني..
الام: قولي..
هنادي: مره سمعت تمام بيقول كلام عن مصر يدوخ..
كلام جميل قوى..
مش عارفه بيجيب الكلام ده منين.. عقله وقلبه وكل شيء لمصر..
اه ياماي لوسمعتي الكلام اللي قالوا ..
احلى بكتير من اللي بيقولوا الشاعر ابو ربابه في المولد
اي والله ياماي .. كان بيسجله في جهاز التسجيل..
قعدت ورا الباب وسمعت كلامه كله وساعة ما خلص فريت لجوة ..
بس انا كنت وعياله ..
خليته خرج من اهنه وقعدت اسمعه مره وتنين ولا زهجتش..
الام: كنتي بتتصنتي عليه يابت ..طيب لما ياجي هوعيه وهاقوله كل شيء..
هنادي: لا لا ياماي يده تقيله قوي .. بس اتوحشتها ..
الام: بقولك ايه يا بتي..
(7)
هنادي: نعمين يا ست الكل..
الام: اشوقت لصوته قوي قوي ..
فزي قومي وهاتي اللبتاع ده..هوه اسمه ايه؟
هنادي: الشريط يا ماي ..
الام : شريط وحصيرة يا مخبله ..
بتتمقلتي عليا يا بت ..
أنطقي اسمه ايه لقطم رقابتك.. انطقي..
هنادي: والله العظيم اسمه اكده .. الشريط .. الشريط
الام : خلاص يا هبله انتي مفكراني غبيه ولا ايه؟؟(" تحدث نفسها" جك خابط ياهنيه طول عمرك مبتعرفي شيء واصل.. وعامله ام العريف والكل يقول الحاجة راحت والحاجة جت) " تلفت لهنادي" .. انتى لسه اهنا غوري هاتي اللبتاع ده ..
هنادي : الشريط ياماي..
الام: غوري يالا..
" تذهب هنادي واذ بطرقات على الباب .. وده وقته مكنا قاعدين في حالنا .. طيب طيب هتكسر الباب ، تذهب لتفتح ، كان عمها همام وابنته سلمى خطيبة تمام
هنادي: عمي همام ! اتفضل ياعمي ، ادخلي يا سلمي" تتعانقان"
الام: مين يا هنادي؟
هنادي: عمي همام وسلمى يا ماي..
(
الام:: "تقابلهم برتحاب شديد" يا الف مرحبا يا حاج .. ازيك يا سلمى عامله ايه يا بتي" تاخذها في احضانها" محدش بيشوفك يعني بقالك يومين غايبه عن عيني انتي عارفه لما بشوفك بفرح كتير يا عروسة ولدي الغالي تمام..
سلمى: الحمد لله وانا كمان بحبك قوي قوي ونفسي اقعد عنديكم على طول ياماي الحاجة ام تمام: تخجل:..
همام: حوصل ايه يا سلمى. كل ما ياجي اسم تمام تخجلي اكده وتقعدي امسهمه وتتنهدي .. متستعجليش قرب ياجي ونفرح بيكو .. متبقيش حنينه قوي اكده..
سلمى: خلاص بقا يا بوي مش عريسي وبتشوق له وكمان واد عمي يعني اخوي قبل ميكون عريسي
الام: لو مؤاخذه يا حاج رمضان كريم .. مش عارفين نقدمولك شي..
همام: الله اكرم يا حاجة دنا صاحب بيت ومش غريب ..
" تعود هنادي ومعها جهاز التسجيل"
همام: ايه اللي جايباه ده يا هنادي؟
الام: البت المخبله دي بتقول ان تمام قعد جوا اللبتاع ده.." تقاطعها هنادي"
هنادي الشريط ياماي..
الام: ايوه الشريط .. فهمانه خلاص..وقال كلام حلو قوي عن مصر..
سلمى: اسمعه يابوي وحياة امي عندك.. انا عارفه انت بتحبها كد ايه..
همام: " يستدير ويخرج زفرة من فمه " امك ليه بس بتفكريني؟"
سلمى: فيه حاجه يا بوي؟ بتقول حاجة اوصلها لامي .. سمعتك يابوي .. متخافش..
(9)
همام: لا .. لا دي هيه الغالية..
سلمى : عارف يابوي .. عارفة يامة الحاجة اخر مرة قعدنا انا تمام لحالنا قبل ميسافر قالي ايه ؟
الام : قال ايه يا بنيتي ..
سلمي: قالي.." منظر جانبي في الناحية الاخرى للمسرح تمام يجلس مع سلمى "
تمام: انت ياسلمى غالية عندي قوي ولما بياجي اسمك قلبي بيدق وبروح في دنيا تانية .. وبحلم بيوم جوازنا .. ان شاء الله تكون فرحانة ويايا هسعدك يابت وهحطك ف عيوني من جوه
سلمي: تسلم لي .. وانت كمان يا تمام لما افكر فيك مبعرف طعم النوم .. واقعد اقول يارب قرب الايام بقا علشان اكون معاك واسعدك واكون جمبك على الحلوة والمره وعمري مزعلك مني ابدا .. وانا عارفه انت بحبني كد ايه .. بس انا اكتر بكتير وحياة ربنا
تمام : سلمي!
سلمى: عيون سلمى.. اسمي حلو قوي من خاشمك..
تمام: بس اقولك حاجة ولا تزعليش ..
سلمى : لا انا عمري ما زعل من تمام ابدا .. دانته عريس ياواد عمي .. قول ومتخافش
تمام : في واحدة تانية بحبها اكتر منك ..
سلمي : اكتر مني يا تمام وبتقولها فوشي كمان يا حزنك يا سلمى .. يا كسرتك قدام اهلك يا سلمى.. واحده تانيه يا واد عمي .. خد دبلتك اهي الحمد لله اني عرفت قبل الفاس متقع في الراس ..
(10)
تمام: اقعدي يا مخبلة انتي ..
سلمى: اقعد كيف.. وكيف مبقاش مخبلة لا لا مش قاعدة
تمام: انت عرفتي مين دي اللي بحبها اكتر منك ؟
سلمى : لا ومش عايزة اعرف .. روح لها وسيبني في حالي
تمام: امي هنيه..
سلمي : امك هنيه ..هههههههههههه يا شيخ وقعت قلبي طيب منا كمان بحبها اكتر منك .. وهيه كمان بتحبني قوي بس الحقيقة بتحبك اكتر من عمرها..
تمام:بعرف.. بس حبي لامي الكبيرة اكتر منكو التنين..
سلمى : امك الكبيرة مين؟ دا الحاجة هنية كبيرة قوي " وفي نفسها" قربت تموت "
تمام : امي الكبيرة هي مصر يا سلمى .. مصر البهية الحلوة الطيبة ..مصر الجدعة .. مصر ام النيل وام البشر امنا كلنا .. بعشقها يا سلمى ونفسي اعمل حاجة ليها وارد جميلها علينا..
سلمى : عندك حق يا تمام انا كمان بعشق ترابها ..
سلمى : شفتو بقى كلامة زين ازاى ؟
هنادي: اتوحشتك قوي يا خوي..
الام: يلا يا هنادي شغلي اللبتاع ده..
حاضر يااماي" تشغل الجهاز ويسمعو صوت تمام وهو يتكلم عن مصر..
قالوا عنك كلام كتير
وانا من كلامهم يا مصر يا مه
(11)
انا بغير
قالوا انك شمس الشتا
وحضنك دفا ملوش نظير
وانك سما تمطر هنا
ترقص قلوبنا وكمان تطير
وقالوا عنك كلام كتير
قالوا ان ترابك دا حنا
وان ارضك مش بس ارض
كمان دى جنه
وان نيلك مش ميه تجري
يا مصر يامه د سلسبيل
فارد جناحه عليكي يامه نهار وليل
شوفي ابتسامته لما عيونك تبتسم
حاضن من جوه قلبه جدور النخيل
رغم انه ف بلاد كتيرة
لكن بيحلف انك حبه الكبير
وقالوا عنك كلام كتير
قالوا انك ام الرجال خيرة الجنود
قاعدة ع الشط يا امي
من الامان بتستحمي
(12)
وباعلى صوتك كمان تغني
شوف يا جدع ابني اسد الحدود
واقف وشايل همته
وامه انا مصر هيه عزته
مش همه حر ولا زمهرير
وقالوا عنك كلام كتير
قالوا انك سمرة جدعه بملايه لف
والنيل خطيبك الشاب الاسمر
من هواكي قلبه رف
وانك اميرة
مدا ضفايرك ضفتين للنيل الامير
وقالوا عنك كلام كتير
سلمى: يابوي صوته جميل قوي" تتنهد" اسمعه تاني ولا اقولك يا هنادي هاتي اللبتاع ده
هنادي: وانتي كمان يا سلمى اسمه الشريط
سلمى: خبراه الشريط هاتيه اسمعه عندي واتنوس بصوت تمام..
الام: مشتقالك قوي يا ولدي..
همام : اللي اجمل من كل ده كلامه الزين عن مصر.. وكانه معجون فيها .. مصر دي حته منه .. عقله طاير بحبها .. كلامه زين صح ..
(13)
هنادي: صوح يا عمي.. هوه اخوي غرقان في حب مصر كل كلامه عنيها وكيف هيه حبيبته الغالية وبيفكري ازاي يرد جمايلها زي ما بيقول ..
الام: انا علمته يكون شجاع وقولتله اوعاك يا ولدي تبقى جبان.. وقلتله خد بالك من مصر .. دي مصر هي كل شي . قاللي:: وصيتك حاططها جوه عنيا متقلقيش على تمام يا ماي..
سلمى: مصر بس يامه الحاجه.. وسلمى لا...
الام : كيف يا بنيتي؟ دانتي في قلبه زي مصر
همام: طيب يا حاجة نسيبك لحالك..
الام: ودي تاجي ياحاج نفطروا سوا.. قومي يا هنادى خدي سلمى وجهزوا الفطار على ما نتحدت انا عمك شوي..
هنادي: من عنيا ياماي قومي معايا يا سلمى..
همام:لا لا لا مره تاني ورايا مصلحة اكده .. همي يا سلمى..
سلمى : حاضر يا بوي..
" تقف الام وهنادي وتودعان همام وسلمى..
(14)
المشهد الثاني
=======
وسط الرمال الملتهبة في الصحراء الحارقة وداخل احد الخنادق يجلس تمام مع احد اصدقائة يدعى سامي بزي الحرب وآثار المعارك بادية عي وجهه ويبدوا متعبا جدا..
سامي: مالك يا تمام؟ سارح في ايه ..
قولي انا اخوك يا ولد العم ..
تمام: اتوحشت امي قوي.قوى وشايفها قدامي بتنادي على وتحط اكلي على الطبليه وكاني موجود ساعة الفطار بتحبني كد عنيها
سامي : امك بس؟؟ ههههه ياراجل وخطيبتك؟
تمام : سلمى" "يبتسم" طبعا وهيه كمان بت زينه ومتربية زين وبتحبني وانا كمان .. تعرف ياسامي امي دي ايه؟
سامي:ايه يعني ؟ زي كل الامهات
تمام: لا لا امي غير كل الامهات .. امي دي هيه مصر بطيبتها وسماحتها وسلامها .. بحبها قوي وقلبي بيرفرف لما تاجي سيرتها..
سامي: مين امك ولا.... خطيبتك يا مكار
تمام: انته غبي اكده ليه.. بقولك هما واحد .. تعا اوريك حاجه.. " يفتح تمام حقيبته ويخرج شالا بعلم مصر شوف امي جايبالي ايه وانا صغير ؟ كانت تقولي حطو على راسك دايما .. اقولها ليه؟ تقولي: عشان مصر تكون فوق راسك وتحافظ عليها.. كانت تقولي: اوعاك تخلي ولاد القرود دول يخدوا حبايه واحدة من رملها وتمسكني وتهزني.. اقول لها حاضر وتهزني واقول لها حاضر وتهزني واقول لها حاضر وبعد شوي اقول لها ليه ياماي بتهزنيني كتير اكده ؟ تقولى : علشان اوقع كل حبة خوف جواك
(15)
واملاك محبة وقوة .. مصر عوزاك قوي اسد متهابش الموت .. مصر عاوزة كل شبابها يكون على كد المسؤولية..مصر عاوزة كل واحد في حتته يحطها جوه عنيه.. وتقولي وهيه رافعه راسها لفوق:: خلي بالك من مصر ياولدي.. حبها اكتر مني ومن الدنيا كلاتها هيه تستحق يا ولدي ..كل ده لما جاني جواب الجهادية..
سامي: يااااااااااااه كل ده حب!
تمام: بقولك ايه يا سامي انا حابب اكتب لامي جواب .. عاوز افضفض ليها زي زمان..
سامي: طيب اسيبك مع نفسك سلاااااااااام..
" يجلس تمام يكتب خطابه لامه "
ابدأ كلامي ياماي بالسلام...
" فجأة يسمع صوت سامي وهو يناديه" فيطوي الورقة دون ان يكمل خطابه"
سامي: يا تمام يا تمام ... انته يا صعيدي ... القائد عاوزنا ضروري
تمام: انا جاي حالا .. استنه..
سامي: هم شوية .."يخرج تمام مع سامي ويذهبا الي مقر القائد"
" داخل غرفة القيادة التي هي عبارة عن خندق كبير يجلس القائد وحوله الجنود وهو يحد لكل واحد منهم دوره في المعركة"
القائد:"موجها كلامه الى الجنود" ازيككو يا رجالة .. طبعا كلكم عارفين احنا هنا ليه .. انا عاوز كل واحد منكم يقول لي شعوره ايه
انا يا فندم جاي ومودع اهلي " يخرج علما من مخلته" ودا كفني فدا مصر ..
(16)
2- وانا ساي ب ابني مولود وسايب له رساله لما يكبر لو مت .. بقولو فيها .. انا لو مرجعتش مش مهم .. المهم مصر تعيش
وانا واخد عهد على نفسي وكاتب على صدري " مصر اولا " ومش راجع الا لما سينا ترجع
4-وأنا يافندم سيبت بيتى وغيطى وكل أهلى وجاى اضحى بحياتى وروحى فدا بلدى وامى مصر
5- تمام" وانا سايب امي واختي وبيتي وخطيبتي وعمي وكل همي ترجع سينا واقتل ولاد القرود .. يا فندم انا ابن مصر وفداها في كل مكان وكل وقت..
6- سامي" اما انا ابويا شارك في 48 و56 وحرب اليمن والنكسة وكسيح .. قاللي انت الامل لمصر رجعلي كرامتي يوم ماترجع بالنصر وانا مصمم ارده كرامته وافرحه..
القائد: الله عليكو يا رجالة مصر هوه ده اللي انا عاوزه منكم .. التصميم والارادة والشجاعة لامنا كلنا وترابنا الغالي في سينا .. طبعا عرفتم هتافنا الموحد؟
تمام: طبعا يا فندم: الله اكبر..
القائد: هيه كلمه واحده هقولها لكم
القائد: مصر امانه ف اديكم."يلتفت الى تمام"
القائد: في رجالة من مصر هينضموا ليكم في المعركه.
تمام: يعطيه التحيه وينصرف هو والرجال الى المعركة.
" يتجه تمام وسامي مع الرجال لينفذوا مهمتهم في المعركة كالعادة.. تمام وسامي في خندق واحد ..
(17)
بدأت المعركة وانهال الرصاص من كل جانب وامتلآت الرمال بدماء القتلي وخاصة من جانب القرود..
عاد تمام وسامي الى خندقيهما .. بعد دقائق رفع تمام راسه بعد سماع وابل من الرصاص .. فتح عينيه على اخرها عندما راي وحشا مصريا يصرع اولاد القرود ..
تمام: الله الله الله مش ده حسين ابن عم ابراهيم جارنا في البلد .. ايه اللي جابو اهنه .. اااااه هما دول اللي قال عنيهم القائد ..
سامي: حسين مين؟
تمام: شايفه هناك الاسد اللي طايح في الصهاينه ولا عنتر " وكز سامي:
سامي: عاوز ايه يا تمام .. براحة شويه انت فاكر نفسك مع اصحابك في البلد ولا ايه
تمام : بص يا سامي ده عمال يرش رصاص على ولاد القرود وموتهم كلهم ..راجل يا ولد.. عارف حسين ده واحنا صغار مكنش يعرف ينطق حرف واحد ويقول الكلمة في ساعتين اي والله وكلنا كنا بنضحك عليه وهو ساكت مبيردش .. .. وكان يقعد بيناتنا ويمشي من غير منحس به.. كان قليل الكلام يا سامي .. بس كان ليه بصه غريبه قوي وكانه بيقولنا انا ساكت بمزاجي وهياجي وقت الكلام .. ايه اللي غيره اكده؟
سامي: هوه اللي هناك ده.. ما شاء الله راجل بجد وعنيد؟
تمام: ايوه هوه .. ده صاحبي متربين مع بعضينا .. إلحق ياسامي قرد من القرود صابه في قلبه هنعمل ايه دلوك .. .. والله لرايح وجايبه ولو اموت معاه .. ده صاحبي وبيموت اسيبه اياك..
سامي: استنى يا مجنون المكان كله ضرب ورصاص هتموت ..
تمام: لا مش هستنه غطي انته ضهري وبس
(18)
" خرج تمام من الخندق وزحف على الرمال وكان سامي يغطي ظهره حتى وصل الى حسين وحمله وذهب به الى خندق اخر كبير..
وصل سامي اليهما ..وضع تمام قطرات من الماء في فم حسين الذي كان على قيد الحياه بالرغم من نزيف الدم المستمر.. يضمد سامي جراحه .. فتح حسين عينيه بعد فتره بالرغم من احساسة بالالم الشديد..
تمام:" موجها كلامه لحسين" كيفك دلوك يابن عمي؟
حسين: " بصعوبة شديدة" الحمد لله.. ملتفتا تجاه تمام مبتسما محاولا القيام لتحيته عندما عرفه....
حسين: : بصعوبه" تمام ولد عمي يا الف مرحبا
تمام:مرحب بك يا خوي كيفك دلوك؟
" اغشي على حسين مره اخرى"
سامي: سيبه يا تمام هيفوك بعد شويه
تمام : اسيبه كيف يا سامي .. اخوي بيروح مني وقاعد زي الحريم اكده
سامي : اصبر بس شويه .. متنساش احنا فين ..
" فترة صمت يقطعها صوت حسين وهو يتالم مع حركته" استرد حسين وعيه لفترة وبادل تمام الحديث..
تمام: عامل ايه دلوك يا صاحبي؟
حسين: الحمد لله احسن ربنا يبارك فيكيا واد عمي انته والدفعة الجميل ده
سامي: خليك مستريح انا اخوك سامي من حلوان..
تمام: قولي يا حسين.. انا عمري مشفتك بالشجاعة دي وصوتك عالى وواضح وانته بتتكلم مع العساكر وبتزعق في القرود.. جبت الشجاعة والصوت العالي ده منين
(19)
حسين: قصدك اني كنت قليل الكلام.. كنت شايله لوقت عوزه وجه الوقت
تمام: اه وكمان عمري مسمعتك بتتكلم عن مصر امنا الحلوة دي اللي احنا اهنه عشان نحافظ على ترابها الغالي..
حسين: شوف يا صاحبي.. انا بحب مصر قوي قوي ويمكن اكتر منك كمان وسكوتي ده كان اعتراض على اللي بيحصل فيها .. احنا كلنا مقصرين في حقها ومش عارفين قيميتها .. دايما متفرقين والازمة بس هيه اللي بتجمعنا ، دايما رد فعل مش فعل ، انا عاوز بلدي حبيبتي مصر تتجمع ف كل وقت ومش وقت الازمة بس.. انا عاوز مصر دي تكون فعل مش رد فعل ..انا عاوز مصر تكون هيه البادية هيه الاولي هيه الاساس والكل ياخد منه عايزين ندي ومنخدش من حد
تمام : بس احنا وقت الشدة ايد واحده.
حسين: وده كويس بس ميكونش الاساس .. الطبيعي اننا نكون يد واحده على طول في كل وقت وكل شي.. بص على البلاد التانية يا واد عمي كلامهم قليل عملهم كتير واوعي تفتكر اننا اللي بنحب بلادنا بس هما كمان بس عما ناصحين ..متنورين عنديهم عقل وقلب اما احنا عندينا قلب وخفيف كمان .. عرفت ليه كنت ساكت " يعلو صدره ويهبط ويسكت لفتره..
تمام: كلامك زين والله ياصاحبي..
"يفيق حسين ويشير لتمام ان يقترب منه فيفعل تمام
حسين: لو ربنا قدر لك الحياه عاوزك توصل رسالة لامي.. اتوحشتها قوي..
تمام: ربنا هيشفيك ان شاء الله وهترجع لحضنها ونكون سوا ان شاء الله .. قول
(20)
حسين: قولها ولدك حسين كان قليل الكلام بس حبه لوطنه مصر علمه يتكلم ويعبر عن حبها بالفعل والاجتهاد ومش بالكلام وبس " سكت حسين سكوتا طويلا ولم يتكلم بعد ذلك.. احتضنه الموت .. هزه تمام ولكنه لم يرد .. وهنا ادرك انه مات شهيدا.. بكى بشده على صاحبه ولم تنم عيناه "
" اغنيه" دم الشهيد
ش هـ ي د شهيد
رجع مصر من جديد
نقطة دمه
دمعة امه
زرعت شجرة
طرحت زهرة
زهرة حرة
آه حرية من جديد
ش ه ي د شهيد
رجع مصر من جديد
حلف انه ميرجع بيته
يهجر عمله كمان وغبطه
عارف انك يا مصر غالية
قدم روحه لتبقي عالية
حضن الموت ومات سعيد
(21)
يا مصر ابنك مات شهيد
ش هـ ي د شهيد
رجع مصر من جديد
يا مصر انتي باقيه واحنا
تراب ف ارضك شجرك ونخلك
شطك ونيلك
نبتك وخيرك
ارجوكي يا مه
يا مصر يامه
ف يوم متنسي دم الشهيد
ده هوه يامه اللي زرعلك
ف عز ليلك نهار جديد
ش هـ ي د شهيد
رجع مصر من جديد
(22)
المشهد الثالث والاخير
*****************
" بعد ايام .. داخل المنزل.. تنتهي الام من صلاة العصر وتتمتم بدعاء لاولادها وخاصة تمام.. تنادي على هنادي"
الام: انتي فين يا بنيتي ، همي شوي، عمك همام وسلمى علوصول، خلصي.. هنسحرهم ولا ايه ..
هنادي: حاضر يا هنيه..
الام: هنيه حاف اكده يا قليلة الرباية..
هنادي: بدلعك يا ام تمام
الام: صليتي العصر يا بت؟
هنادي: والضهر والفجر كمان..ازاي مصليش وهي اللي بتخليني ارتاح وقلبي مليه الرضا.. مش انتي دايما تقولي اللي ميصليش ملوش لزمة يعيش.. وانا بسمع كلامك الزين ده يا ماي
" طرقات على الباب"
الام: همي يا هنادي عمك وسلمى على الباب..
" تهرول هنادي وتفتح الباب واذ بساعي البريد يعطيها جواب من تمام"
هنادي: اماي اماي جواب من خوي تمام .. نفسه فيه ياماي
الام: افتحي بسرعه واقريه..
هنادي: والوكل يا هنيه..
الام: يكلوا الموجود.. دا جواب من الغالي ابن الغالي كان نفسي بوكي يكون موجود ويقرا الجواب هوه ويطمن .. الله يرحمه عاش راجل ومات
(23)
راجل وخلف راجل.. اقري يا بتي مانتي متعلمه كفايه ورافعه راسي وصاقته الابتدائية.."
هنادي: تسلميلي يا حاجة دايما بترفعي من نفسياتي.. تهم هنادي بالقراءة الا ان الباب يدق مرة اخرى .. تذهب لتفتح
هنادي: طيب خلاص .. الباب اتجنن النهارده جك خابط ف نفوخك.. تفتح الباب" همام وسلمى"
هنادي : اتفضل يا عمي
الام: اتفضل يا حاج
همام: " يجلس" يزيد فضلك ياحاجة..
هنيه: وش الخير انتوا.. جايين على جواب تمام
سلمى: جواب من تمام يا هناكي يا سلمى ..اقراه يامه الحاجة..
همام: لا هنادي هيه اللي هتقراه .. متعلمه اكتر منك
هنادي: الله يجبر بخاطرك يا عمي.. متزعليش يا سلمى كل واحد على كد علامه..
تقرأ هنادي جواب تمام"
==============
أبدأ كلامي يامايا بالسﻻم
كيفك انتي
وكيف هنادى
وخطيبتي سلمى وعمي همام
وكيف غيطان القمح واسراب الحمام
(24)
وسط المدافع والنيران بكتبلكو
مشتاقلكو
مشتاق لكل شبر عندكو
ابعتي يما وطمنيني
ع الحبايب والجيران
أما أنا فاطمني
ولدك همام
من يوم مازرعتي فيا الحب لبﻻدي
اصبح كﻻمي عن الوطن احلى كﻻم
من يوم م قلتي يا ولدي
اوعاك تبقا جبان
في كل خطوه اكون اولهم
شايل سﻻحي ووطني
ف عيوني ملونهم
وكلامك اوعاك تبقا جبان
على كتافي شايلهم
ولو تطول السنين
تصوري واحنا في عز المعركة قابلت مين؟
والدم بيروي المكان
زي السواقي في الغيطان
(25)
لما بتروي زرعنا العطشان
قابلت مين؟
الواد حسين
منتي خبراه
كان منطوي
مكنتش تعرف شفته لغة الكﻻم
حب الوطن حرره نحرره
شفته طايح ف الصهاينه
ولا عنتر
عمال يرش الموت من مدفعه ويكبر
الله أكبر الله أكبر الله أكبر
صرخت وقلت مين نطقه
وخلا لسانه بيعبر
رد اللي جانبي وقال يا صاجبي
ربنا وتراب الوطن غالي ميتقدر
قلت يا صاحبي تمام
وشفت ف عنيه السمر
مصر الحلوه بتصلي
وكف ايده بالدم الحر متحني
وبص لي وقالي
(26)
ياصاحبي لو في يوم شفت امي قولها
ولدك حب الوطن علمه لغة الكﻻم
وغمض عينيه للأبد
وعينيا يامايا من يومها
مش راضية تنام
وعينيا يامايا من يومها
مش راضيه تنام
ولدك تمام
" يبكي الجميع"
هنادي: وبيقول كمان انه جاي بكره الصبح مع جثة حسين" تترك الرسالة وتنخرط في البكاء"
الام: يا حبيبي يا حسين يا ولدي ..كان واد زين صح.. متعلم ومتربي ومؤدب ومكنش يرفع راسه من الارض لو قابل وحده في الشارع..
سلمى : صح يا مه الحاجة كان مؤدي ويخدم الكل .. شافني مره شايله تقيل في الشارع وقفني وشال عني لحد الدار ومشي علطول من غير ميقف .. ومره تانيه شاف واحد بيضايقني قام مسخرة وقل قيمته قدام الناس كلها .. كان زي اخوي ..
هنيه: ابلغ امه كيف دلوك دلني يا حاج؟
(27)
همام: لا اله الا الله يا الحاجة ام حسين مؤمنة وقويه.. بعرف عنها انها معلماه زين .. كنت اشوفها مقعداه جمبيها وهو صغير وتتحدت معاه وهو عينه في عنيها وبيسمع كلامها .. وبعدين كلاتنا فدا مصر
الام: دبرنا يا حاج.. نبلغها كيف عقلي هيشط مني وقلبي واجعني .. كان هوه تمام اصحاب وحبايب ومبيفترقوش ؟
همام:شوفي يا حاجة: نفطروا وبعدين نروح عنديه.. البيت قريب مش بعيد
" تقوم الام وتفتح المذياع على نشرة الاخبار
الام: نسمع اللي بيحصل ونشوف عملنا ايه في ولاد القرود
المذيع: هنا القاهرة .. نجحت قواتنا المسلحة الباسلة في اقتحام قناة السويس وتلقين العدو الاسرائيلي درسا في فنون الحرب لن ينساه .. وتتوالى الضربات على العدو الذي فقد وعيه . وسنواليكم بالاخبار تباعا .. هنا القاهرة..
المذيعه: حان الان موعد صلاة المغرب نتمنى لكم صوما مقبولا وافطارا شهيا .
" الجميع جالس على مائدة الافطار .. انتهوا من افطارهم ..
همام: كل سنه وانتي طيبه يا ام تمام متشكرين..
هنيه: على ايه يا حاج
سلمي : كل سنه وانتي طيبه يا مه الحاجة وكلك زين قوي تسلم يدك ..
هنيه: بالهنا يا بنيتي ان شاء الله عن قريب انتي اللي هتوكلينا من يدك ؟
سلمي: بخجل .. ان شاء الله
(28)
همام: طيب انا اروح الجامع اصلي المغرب ونتقابل قدام دار ام حسين
الام: وانا هقوم اصلي كمان .. يلا يا هنادي انتي وسلمي روحوا صلوا الله يهديكم ويفتح عليكم ..
ستار
" داخل الدار التي تشبه دار ام تمام جلس همام وهنيه مع ام حسين التي ترحب بهم"
ام حسين: ياالف مرحبا ياحاج همام يا مرحبتين يا ام تمام
خطوة عزيزة.. ايه يا خيتي بقالي فتره مشفتكيش ..
هنية: يعز مقدارك يا ام حسين.. الحقيقة احنا مقصرين معاكي حبتين حقك عليا انتي عارفة المشاغل بقا انا وهنادي وحدينا ومقدرش اسيبها لوحدها .. من يوم تمام مخدوه الجهادية وانا قاعدة لحالي انا وهنادي..
ام حسين: وانا كمان قاعدة لحاي من الجهادية مخدت ولدي حسين ربنا يرجعوا بالسلامة ..
هنيه: انا كنت عاوزة اقولك شي.. تتردد.. قول انته يا حاج همام..
ام حسين: متردده ليه قولي اللي ف نفسك ولا تخافي احنا خوات صح؟
هنيه: صح ...
همام: ايوه هقول اهوه.. بقولك ايه يا ام حسين.. بقالك قد ايه مسمعتيش حاجة عن ولدك حسين؟
ام حسين: من زمان من اول مخدوه للجهادية .. اتوحشته قوي قوي وقلبي عمال يدق بقاله كام يوم كل ما ياجي اسمه قلبي يفط من الفرحة ده نور عيني اللي بشوف بيها بس هوه مقصر معايا مبعتليش جواب من اسبوع .... اقولكو شي؟
(29)
همام وهنيه: قولي..
ام حسين : شفته عشيه جايلي في المنام لابس ابيض ووشه ابيض وبيضحاكلي بس قلبه مجروح يا حبة عيني .. قلت هيه الحرب اكده..
وكماني اصحابه شيلينه لفوق كانه عريس ليلة حنته .. هوه بيحب بلده قوي قوي وبيكره القرود قوي قوي ورايح ومشمر درعاته عشان يرجع والنصر معاه.. وانا مستنياه علشان ازفه هو واصحابه وازغرط واملى الدنيا زغاريت .. اتوحشته قوي .. دموعها تنزل ..
هنيه: اهو جايلك بكره واصحابه شايلينه برضك
ام حسين: بتقولي بكره.. بكره.. يا فرحتك يا زينه.. تلتفت لهنيه" شايلينه..
همام:" يوجه كلامه لهنيه" اقفلي خاشمك ده " لزينه ام حسين" شوفي ياام حسين " ربنا رزق ولدك حسين الشهادة .. وبقيتي ام الشهيد " صمتت زينه ولم ترد نهائيا ولم تدمع عيناها بل اصبحت اكثر قوه.
ام حسين: انا ولدي وعيلتي فداك وتعيش انتي يا مصر.. انتي الاصل ..انتي الباقية واحنا الماشيين.
." خرجت هنيه وهمام وتركوا زينه والمذياع يقدم
" صباح جديد.. القرية كلها في استقبال الابطال ... الرجال والنساء بزي واحد ابيض وغطاء الراس علم مصر .. حانت اللحظة المرتقبه.. جاءت سيارة الاسعاف وبداخلها جثمان حسين .. يخرجها الجنود.. تتقدم زينه من وسط الناس رافعة راسها .. تصل الى النعش الملفوف بعلم مصر تنظر الى تمام الواقف بجانبها .. تطلق زغرودة طويلة ثم تنطلق الزغاريد من كل مكان
بسم الله الرحمن الرحيم
(30)
" ولا تحسبن الذين قتلوا في سبيل الله امواتا بل احياء عن ربهم يرزقون" صدق الله العظيم
" يتقدم تمام ليسلم على عمه وخطيبته واخته ويقف امام امه يقبل راسها ويديها
تمام: انا عاوز اقولكم شي يا اهل بلدي : مش حسين صاحبي بس هو اللي قدم روحه فدا مصر في ناس كتيرة قوي الناس متعرفهاش.. دافعوا عن البلد بارواحهم من غير شيء الا الحب والكرامة والعزة .. في كل بلد بطل شهيد .. وفي كل بيت ام شهيد شجاعة وقوية زي الارض بتحب ولادها وبتديهم وبتعلمهم علشان يردولها الجميل .. في ناس استشهدوا قدام عيني فرحانين ووشهم غرقان بالدم والابتسامة مفرقتهوش.. في شهدا سابوا وراهم اطفال وزوجه وفيه شهدوا كانوا امل اهاليهم في الحياه وضحوا بارواحهم .. عاوز اقول ان حسين هو رمز الشهدا في مصر كلها .. واسمحوا لي اقدم لكم شهدا كتير من الناس ميسمعوش عنهم حاجة
*******************************************************
إبــراهيــم الرفـــاعـــي"
المجموعة 39 قتال
(أسطـــورة العمليــــات الخــاصـــــة)
فمن هو المقاتل إبراهيم الرفاعي ؟؟
ولد البطل إبراهيم الرفاعي في محافظة الدقهلية في السابع والعشرين من يونيه 1931 ، وقد ورث عن جده(الأميرالاى ) عبد الوهاب لبيب التقاليد العسكرية والرغبة في التضحية فداءاً للوطن ، كما كان لنشئته وسط أسرة تتمسك بالقيم الدينية أكبر الأثر على ثقافته وأخلاقه.
(31)
التحق إبراهيم بالكلية الحربية عام 1951 وتخرج 1954
ومن أبطال حرب التحرير والعبـــــور
العميد حسن أبو سعدة " أحد أسود سيناء "
فى يوم 8 أكتوبر 1973 قام العميد حسن أبو سعدة قائد الفرقة الثانية مشاة بالجيش الثانى بصد الهجوم المضاد الذى قام به لواء 190 مدرع الإسرائيلى ( دبابات هذا اللواء كانت تتراوح ما بين 75 حتى 100 دبابة ) وتدمير كافة دباباته وأسر قائد إحدى كتائب اللواء وهو العقيد عساف ياجورى.
الشهيد عمرو طلبه توفى في منطقه القنطرة شرق سيناء بعد أن أدى مهمته على أكمل وجه وساهم في انتصار لن يُمحي من ذاكرة المصريين مهما مرت السنين .. وسطر لنا أسطورة في الفداء بالروح أغلي مايملك من أجل تراب الوطن..
العميد يسري عمارة وكان وقت الحرب برتبة نقيب وهو البطل الذى أسر - عساف ياجوري - أشهر أسير إسرائيلي في حرب أكتوبر حيا ًعلى أرض المعركة بالرغم من إصابته ، كما سبق له الاشتراك مع أسرة التشكيل في حرب الإستنزاف في أسر أول ضابط إسرائيلي واسمه دان افيدان شمعون
محمد المصرى و الذى تمكن من إصطياد 27 دبابة مستخدما فى ذلك 30 صاروخ فقط من ضمنها دبابة عساف ياجورى الذى طلب أن يراه فبعد أن تم أسره قال عساف أنه يريد كوب ماء ليروى عطشه و الثانى مشاهدة الشاب الذى ضرب دبابته و أخذ عساف ينظر إليه بإعجاب
(32)
تمام:
حرب اكتوبر علمتنا التحدي والاصرار والصمود.. علمتنا ازاي نحافظ على كرامتنا .. علمتنا ازاي نكون ايد واحده .. المسلم والمسيحي الكبير والصغير.. الغني والفقي كنا بنصلي على الرمل صف واحد من تغيير تمييز.. علمتنا يكون لنا هدف ونصر على تحقيقه.. علمتنا ازاي نكون نفس واحد وقلب واحد .. ووصلت رسالة للعالم كله ان مصر دايما قويه بايمانها بالله سبحانه وتعالى وبرجالها ودعوات امهاتنا ..
يصطف الجميع لتحية العلم الذي يرفع في وسط المسرح..
تمت
الأشخاص حسب الظهور :-
هنية .............................. جهاد
هنادى ............................. سمر
همام .............................. محمد حسن
سلمى ........................... حنان مهاود
تمام ............................... مجدى صقر
سامى ...................... ..... محمد ايمن
القائد ............................. كامل مصطفى
العسكرى الاول .................. السمرى
العسكرى الثانى .................. محمود
العسكرى الثالث ................. محمد جمال
*************************************************
رســـــــــالة جــــــندي
مسرحية من فصل واحد
تأليف
الأستاذ / عماد الشرقاوى
(2)
المشهد الاول
" في احدي قري الصعيد النائية وفي شهر وفي الرابع عشر من رمضان المبارك تبدأ الاحداث"
"منزل متواضع الحوائط بها آثار دهان قديم باهت ومتآكل ، مملوؤة بالبقع والسقف منخفض ، صورة للاب الراحل معلقة غلى احدي حوائط الصالة، المصباح البدائي معلق ايضا بجانب الباب الخشبي ، صينية بها بعض القلل مغطاة بقطعة من القماش في جانب من الصالة، راديو قديم موضوع على رف خشبي بجانب صورة الاب ، وفي المقابل صورة للإبن.. اما الارض في مغطاة بحصيرة متهالكة لا تفرق بينها ةبين الارض.. صاح الديك وانتشر نور الصباح وعلت اصوات الناس والمركبات .. تدخل من جانب المسرح الايمن سيدة في منتصف العمر تلبس حلة الصعيد المعروفة .. قمحية اللون ، متوسطة الطول ، يتدلى قرطها الذهبي من اذنيها .. تاخذ المقشة المصنوعة من اسلاب النخيل وتبدأ يومها بعد ان صلت الفجر بتنظيف البيت ..تنظر الى صورة زوجها الراحل المعلقة على الحائط وتكلمه..
الام: صباح الخير يا حاج وهدان.. صباح الخير يا بو تمام.. كنت راجل زين والله .. راجل صح .. بهيبتك .. وطلتك الحلوة وضحكتك الزينة .. اتوحشت ضحكتك قوي وكمان اتوحشت شخطتك وانت بتقوللي ....
همي يا هنيه بالفطور عاوز اروح الغيط قبل النور ..
اللقمة البدرية هنيه يا هنيه..
نشوفوا حالنا ولقمة عيشنا..
الارض طيبة قوي يا هنيه وعاوزه اللي يحبها
(3)
تقوم تحبه وتديله احسن حاجه..
كنت حنين علينا قوي ياحاج.. الله يرحمك ..
نسيت اقولك يا حاج.. خوك الحاج همام مسيبناشي واصل وبيشوف كل طلباتنا الله يبارك فيه هوه وبته سلمى خطيبة تمام .. بت زينه وطيبه وبتحبني قوي ... باذنك ياحاج اشوف هنادي اتاخرت ليه..
تنادي على ابنتها وهي تواصل التنظيف..
***********************
الام: هنادي .. يا هنادي.. انتي فين يا بنيتي..
لساك نايمة عاد!
قومي يلا عوزاك.. بطلي كسل امال ..
امال لما تبقي ست بيت وتتجوزي هتعملي ايه..
هتتاخري اكده ..
داني لو جوزك اقطع رقبتك ..
همي يا بتي وشهلي شوي..
هنادي:" من الخارج" انا صاحية يا ماي ، كنت بتسبح وجاية حالا..
دايما مستعجله اكده ..النهار لساه مشقشق ..
(" تدخل شابة صغيرة بشعرها المتدلي على جبينها .. عيونها سوداء مع وجه مليح وابتسامة صافية..)
هنادي: صباح الخير والسعادة والهنا على احلي ام
القمر الحلوة قوي قوي (: تنحني وتقبل يدها وراسها وتاخذ من يدها المقشة وتجلسها على الكنبة المهترئة.)
(4)
هنادي: انا بحبك قوى قوي يا اماي ..
قوليلي يا ماي انت زينه ليه اكده ..
اقولك على شي .. وانا ماشية معاكي في السوق الناس عم بتتغمز عليكي وسمعتهم بوداني
الام: سمعت ايه يا مخبله؟
هنادي : بيقولوا هنيه لساها زينه واحلي من بتها واللي يشوفها يقول اختها او بتها علشان اكده بوي كان بيحبك قوي وبيغار عليكي من الهوا اللي معدي..
الام: اتحشمي يابت .. انا لسه مكلماه ..
هنادي: مكلمه مين ياماي؟
الام: بوكي يا هبله..
هنادي: لساك بتتكلمي معاه ياماي ؟
الام: ولحد ما اموت يا بتي.. كان صدره واسع وحنين وكنت بستناه لما ياجي من الغيط واقوله كل حاجة ...
هنادي: ايوه ياماي ..سمعتك مرة وانت بتحكيله وكان هوه ولا بلاش..
الام: ولا بلاش يابت قولي كان ايه..
هنادي :كان نايم وكان صوت شخيره واصل للشارع
الام: اكتمي يا بت ..
هنادي: قعدت اضحك انا وتمام ..
الام: تمااااااااااااااام! اشوقتله قوي قوي يا هنادي..
من يوم مخدوه للجهادية وعنيا مبتعرف النوم..
(5)
قلقانه عليه قوي يا بتي..
خايفة يروح زي ابوكي ما راح وبقينا وحدينا ....
وتمام هو راجلنا دلوك..
صحيح عمك همام بيشقر علينا من وقت للتاني لكن ولدي تمام حاجة تانيه خالص..
هنادي : متخافي على ولدك يا اماي ..
هوه شجاع وزين وبيحب مصر قوي قوي ..
وكأن مفيش غيرها من بلاد ربنا .. مغمض عنيه ومبيعرف غيرها .. بيحب ترابها .. معجون بطينها .. وكان يقولي
تمام: يا بت ياهنادي تعرفي الارض دي اللي بنزرعها هي ايه؟
هنادي : ايه يا خوي؟
تمام: عرضنا وشرفنا مبالك بقا مصر ارضها تبقا ايه؟
هنادي: صح يا تمام تبقي البيت الكبير اللي بيلمنا جواها..
تمام: صح يا هنادي جبت الكلام الحلو دا كله منين ..
هنادي: انت ناسي
تمام: ناسي ايه يا هنادي
هنادي : من كلامك عن مصر .. من وصفك ليها.. من شعرك اللي بتغنيه كل ليلة .. من حكاويك وحلمك اللي مبينتهيش
تمام : حلم يا بنت ابوي قولي..
هنادي : حلمك سينا تتحرر وتنضف مصر من النجاسة والعفن اللي فيها
(6)
تمام: اي والله يا هنادي ده حلم العمر
الام: : تقف الام: وهيه تستاهل نحبها كلنا ..اغلى تراب بنعيش عليه.. ربنا كرمها في القرآن وحكى عنها انها ارض الامان .. ارض الخير .. ارض المحبة والسلام.. وانا في الكتاب كان سيدنا يقولنا لما تاجي مصر في القرآن .. شوفو بلدنا عظيمة ازاي .. نقوله كيف يا سيدنا .. يقول لما يذكرها ربنا باسمها " مصر" تبقى مكانتها عنديه ايه..
هنادي: اماي.. اقولك شيء ومتزعليش مني..
الام: قولي..
هنادي: مره سمعت تمام بيقول كلام عن مصر يدوخ..
كلام جميل قوى..
مش عارفه بيجيب الكلام ده منين.. عقله وقلبه وكل شيء لمصر..
اه ياماي لوسمعتي الكلام اللي قالوا ..
احلى بكتير من اللي بيقولوا الشاعر ابو ربابه في المولد
اي والله ياماي .. كان بيسجله في جهاز التسجيل..
قعدت ورا الباب وسمعت كلامه كله وساعة ما خلص فريت لجوة ..
بس انا كنت وعياله ..
خليته خرج من اهنه وقعدت اسمعه مره وتنين ولا زهجتش..
الام: كنتي بتتصنتي عليه يابت ..طيب لما ياجي هوعيه وهاقوله كل شيء..
هنادي: لا لا ياماي يده تقيله قوي .. بس اتوحشتها ..
الام: بقولك ايه يا بتي..
(7)
هنادي: نعمين يا ست الكل..
الام: اشوقت لصوته قوي قوي ..
فزي قومي وهاتي اللبتاع ده..هوه اسمه ايه؟
هنادي: الشريط يا ماي ..
الام : شريط وحصيرة يا مخبله ..
بتتمقلتي عليا يا بت ..
أنطقي اسمه ايه لقطم رقابتك.. انطقي..
هنادي: والله العظيم اسمه اكده .. الشريط .. الشريط
الام : خلاص يا هبله انتي مفكراني غبيه ولا ايه؟؟(" تحدث نفسها" جك خابط ياهنيه طول عمرك مبتعرفي شيء واصل.. وعامله ام العريف والكل يقول الحاجة راحت والحاجة جت) " تلفت لهنادي" .. انتى لسه اهنا غوري هاتي اللبتاع ده ..
هنادي : الشريط ياماي..
الام: غوري يالا..
" تذهب هنادي واذ بطرقات على الباب .. وده وقته مكنا قاعدين في حالنا .. طيب طيب هتكسر الباب ، تذهب لتفتح ، كان عمها همام وابنته سلمى خطيبة تمام
هنادي: عمي همام ! اتفضل ياعمي ، ادخلي يا سلمي" تتعانقان"
الام: مين يا هنادي؟
هنادي: عمي همام وسلمى يا ماي..
(
الام:: "تقابلهم برتحاب شديد" يا الف مرحبا يا حاج .. ازيك يا سلمى عامله ايه يا بتي" تاخذها في احضانها" محدش بيشوفك يعني بقالك يومين غايبه عن عيني انتي عارفه لما بشوفك بفرح كتير يا عروسة ولدي الغالي تمام..
سلمى: الحمد لله وانا كمان بحبك قوي قوي ونفسي اقعد عنديكم على طول ياماي الحاجة ام تمام: تخجل:..
همام: حوصل ايه يا سلمى. كل ما ياجي اسم تمام تخجلي اكده وتقعدي امسهمه وتتنهدي .. متستعجليش قرب ياجي ونفرح بيكو .. متبقيش حنينه قوي اكده..
سلمى: خلاص بقا يا بوي مش عريسي وبتشوق له وكمان واد عمي يعني اخوي قبل ميكون عريسي
الام: لو مؤاخذه يا حاج رمضان كريم .. مش عارفين نقدمولك شي..
همام: الله اكرم يا حاجة دنا صاحب بيت ومش غريب ..
" تعود هنادي ومعها جهاز التسجيل"
همام: ايه اللي جايباه ده يا هنادي؟
الام: البت المخبله دي بتقول ان تمام قعد جوا اللبتاع ده.." تقاطعها هنادي"
هنادي الشريط ياماي..
الام: ايوه الشريط .. فهمانه خلاص..وقال كلام حلو قوي عن مصر..
سلمى: اسمعه يابوي وحياة امي عندك.. انا عارفه انت بتحبها كد ايه..
همام: " يستدير ويخرج زفرة من فمه " امك ليه بس بتفكريني؟"
سلمى: فيه حاجه يا بوي؟ بتقول حاجة اوصلها لامي .. سمعتك يابوي .. متخافش..
(9)
همام: لا .. لا دي هيه الغالية..
سلمى : عارف يابوي .. عارفة يامة الحاجة اخر مرة قعدنا انا تمام لحالنا قبل ميسافر قالي ايه ؟
الام : قال ايه يا بنيتي ..
سلمي: قالي.." منظر جانبي في الناحية الاخرى للمسرح تمام يجلس مع سلمى "
تمام: انت ياسلمى غالية عندي قوي ولما بياجي اسمك قلبي بيدق وبروح في دنيا تانية .. وبحلم بيوم جوازنا .. ان شاء الله تكون فرحانة ويايا هسعدك يابت وهحطك ف عيوني من جوه
سلمي: تسلم لي .. وانت كمان يا تمام لما افكر فيك مبعرف طعم النوم .. واقعد اقول يارب قرب الايام بقا علشان اكون معاك واسعدك واكون جمبك على الحلوة والمره وعمري مزعلك مني ابدا .. وانا عارفه انت بحبني كد ايه .. بس انا اكتر بكتير وحياة ربنا
تمام : سلمي!
سلمى: عيون سلمى.. اسمي حلو قوي من خاشمك..
تمام: بس اقولك حاجة ولا تزعليش ..
سلمى : لا انا عمري ما زعل من تمام ابدا .. دانته عريس ياواد عمي .. قول ومتخافش
تمام : في واحدة تانية بحبها اكتر منك ..
سلمي : اكتر مني يا تمام وبتقولها فوشي كمان يا حزنك يا سلمى .. يا كسرتك قدام اهلك يا سلمى.. واحده تانيه يا واد عمي .. خد دبلتك اهي الحمد لله اني عرفت قبل الفاس متقع في الراس ..
(10)
تمام: اقعدي يا مخبلة انتي ..
سلمى: اقعد كيف.. وكيف مبقاش مخبلة لا لا مش قاعدة
تمام: انت عرفتي مين دي اللي بحبها اكتر منك ؟
سلمى : لا ومش عايزة اعرف .. روح لها وسيبني في حالي
تمام: امي هنيه..
سلمي : امك هنيه ..هههههههههههه يا شيخ وقعت قلبي طيب منا كمان بحبها اكتر منك .. وهيه كمان بتحبني قوي بس الحقيقة بتحبك اكتر من عمرها..
تمام:بعرف.. بس حبي لامي الكبيرة اكتر منكو التنين..
سلمى : امك الكبيرة مين؟ دا الحاجة هنية كبيرة قوي " وفي نفسها" قربت تموت "
تمام : امي الكبيرة هي مصر يا سلمى .. مصر البهية الحلوة الطيبة ..مصر الجدعة .. مصر ام النيل وام البشر امنا كلنا .. بعشقها يا سلمى ونفسي اعمل حاجة ليها وارد جميلها علينا..
سلمى : عندك حق يا تمام انا كمان بعشق ترابها ..
سلمى : شفتو بقى كلامة زين ازاى ؟
هنادي: اتوحشتك قوي يا خوي..
الام: يلا يا هنادي شغلي اللبتاع ده..
حاضر يااماي" تشغل الجهاز ويسمعو صوت تمام وهو يتكلم عن مصر..
قالوا عنك كلام كتير
وانا من كلامهم يا مصر يا مه
(11)
انا بغير
قالوا انك شمس الشتا
وحضنك دفا ملوش نظير
وانك سما تمطر هنا
ترقص قلوبنا وكمان تطير
وقالوا عنك كلام كتير
قالوا ان ترابك دا حنا
وان ارضك مش بس ارض
كمان دى جنه
وان نيلك مش ميه تجري
يا مصر يامه د سلسبيل
فارد جناحه عليكي يامه نهار وليل
شوفي ابتسامته لما عيونك تبتسم
حاضن من جوه قلبه جدور النخيل
رغم انه ف بلاد كتيرة
لكن بيحلف انك حبه الكبير
وقالوا عنك كلام كتير
قالوا انك ام الرجال خيرة الجنود
قاعدة ع الشط يا امي
من الامان بتستحمي
(12)
وباعلى صوتك كمان تغني
شوف يا جدع ابني اسد الحدود
واقف وشايل همته
وامه انا مصر هيه عزته
مش همه حر ولا زمهرير
وقالوا عنك كلام كتير
قالوا انك سمرة جدعه بملايه لف
والنيل خطيبك الشاب الاسمر
من هواكي قلبه رف
وانك اميرة
مدا ضفايرك ضفتين للنيل الامير
وقالوا عنك كلام كتير
سلمى: يابوي صوته جميل قوي" تتنهد" اسمعه تاني ولا اقولك يا هنادي هاتي اللبتاع ده
هنادي: وانتي كمان يا سلمى اسمه الشريط
سلمى: خبراه الشريط هاتيه اسمعه عندي واتنوس بصوت تمام..
الام: مشتقالك قوي يا ولدي..
همام : اللي اجمل من كل ده كلامه الزين عن مصر.. وكانه معجون فيها .. مصر دي حته منه .. عقله طاير بحبها .. كلامه زين صح ..
(13)
هنادي: صوح يا عمي.. هوه اخوي غرقان في حب مصر كل كلامه عنيها وكيف هيه حبيبته الغالية وبيفكري ازاي يرد جمايلها زي ما بيقول ..
الام: انا علمته يكون شجاع وقولتله اوعاك يا ولدي تبقى جبان.. وقلتله خد بالك من مصر .. دي مصر هي كل شي . قاللي:: وصيتك حاططها جوه عنيا متقلقيش على تمام يا ماي..
سلمى: مصر بس يامه الحاجه.. وسلمى لا...
الام : كيف يا بنيتي؟ دانتي في قلبه زي مصر
همام: طيب يا حاجة نسيبك لحالك..
الام: ودي تاجي ياحاج نفطروا سوا.. قومي يا هنادى خدي سلمى وجهزوا الفطار على ما نتحدت انا عمك شوي..
هنادي: من عنيا ياماي قومي معايا يا سلمى..
همام:لا لا لا مره تاني ورايا مصلحة اكده .. همي يا سلمى..
سلمى : حاضر يا بوي..
" تقف الام وهنادي وتودعان همام وسلمى..
(14)
المشهد الثاني
=======
وسط الرمال الملتهبة في الصحراء الحارقة وداخل احد الخنادق يجلس تمام مع احد اصدقائة يدعى سامي بزي الحرب وآثار المعارك بادية عي وجهه ويبدوا متعبا جدا..
سامي: مالك يا تمام؟ سارح في ايه ..
قولي انا اخوك يا ولد العم ..
تمام: اتوحشت امي قوي.قوى وشايفها قدامي بتنادي على وتحط اكلي على الطبليه وكاني موجود ساعة الفطار بتحبني كد عنيها
سامي : امك بس؟؟ ههههه ياراجل وخطيبتك؟
تمام : سلمى" "يبتسم" طبعا وهيه كمان بت زينه ومتربية زين وبتحبني وانا كمان .. تعرف ياسامي امي دي ايه؟
سامي:ايه يعني ؟ زي كل الامهات
تمام: لا لا امي غير كل الامهات .. امي دي هيه مصر بطيبتها وسماحتها وسلامها .. بحبها قوي وقلبي بيرفرف لما تاجي سيرتها..
سامي: مين امك ولا.... خطيبتك يا مكار
تمام: انته غبي اكده ليه.. بقولك هما واحد .. تعا اوريك حاجه.. " يفتح تمام حقيبته ويخرج شالا بعلم مصر شوف امي جايبالي ايه وانا صغير ؟ كانت تقولي حطو على راسك دايما .. اقولها ليه؟ تقولي: عشان مصر تكون فوق راسك وتحافظ عليها.. كانت تقولي: اوعاك تخلي ولاد القرود دول يخدوا حبايه واحدة من رملها وتمسكني وتهزني.. اقول لها حاضر وتهزني واقول لها حاضر وتهزني واقول لها حاضر وبعد شوي اقول لها ليه ياماي بتهزنيني كتير اكده ؟ تقولى : علشان اوقع كل حبة خوف جواك
(15)
واملاك محبة وقوة .. مصر عوزاك قوي اسد متهابش الموت .. مصر عاوزة كل شبابها يكون على كد المسؤولية..مصر عاوزة كل واحد في حتته يحطها جوه عنيه.. وتقولي وهيه رافعه راسها لفوق:: خلي بالك من مصر ياولدي.. حبها اكتر مني ومن الدنيا كلاتها هيه تستحق يا ولدي ..كل ده لما جاني جواب الجهادية..
سامي: يااااااااااااه كل ده حب!
تمام: بقولك ايه يا سامي انا حابب اكتب لامي جواب .. عاوز افضفض ليها زي زمان..
سامي: طيب اسيبك مع نفسك سلاااااااااام..
" يجلس تمام يكتب خطابه لامه "
ابدأ كلامي ياماي بالسلام...
" فجأة يسمع صوت سامي وهو يناديه" فيطوي الورقة دون ان يكمل خطابه"
سامي: يا تمام يا تمام ... انته يا صعيدي ... القائد عاوزنا ضروري
تمام: انا جاي حالا .. استنه..
سامي: هم شوية .."يخرج تمام مع سامي ويذهبا الي مقر القائد"
" داخل غرفة القيادة التي هي عبارة عن خندق كبير يجلس القائد وحوله الجنود وهو يحد لكل واحد منهم دوره في المعركة"
القائد:"موجها كلامه الى الجنود" ازيككو يا رجالة .. طبعا كلكم عارفين احنا هنا ليه .. انا عاوز كل واحد منكم يقول لي شعوره ايه
انا يا فندم جاي ومودع اهلي " يخرج علما من مخلته" ودا كفني فدا مصر ..
(16)
2- وانا ساي ب ابني مولود وسايب له رساله لما يكبر لو مت .. بقولو فيها .. انا لو مرجعتش مش مهم .. المهم مصر تعيش
وانا واخد عهد على نفسي وكاتب على صدري " مصر اولا " ومش راجع الا لما سينا ترجع
4-وأنا يافندم سيبت بيتى وغيطى وكل أهلى وجاى اضحى بحياتى وروحى فدا بلدى وامى مصر
5- تمام" وانا سايب امي واختي وبيتي وخطيبتي وعمي وكل همي ترجع سينا واقتل ولاد القرود .. يا فندم انا ابن مصر وفداها في كل مكان وكل وقت..
6- سامي" اما انا ابويا شارك في 48 و56 وحرب اليمن والنكسة وكسيح .. قاللي انت الامل لمصر رجعلي كرامتي يوم ماترجع بالنصر وانا مصمم ارده كرامته وافرحه..
القائد: الله عليكو يا رجالة مصر هوه ده اللي انا عاوزه منكم .. التصميم والارادة والشجاعة لامنا كلنا وترابنا الغالي في سينا .. طبعا عرفتم هتافنا الموحد؟
تمام: طبعا يا فندم: الله اكبر..
القائد: هيه كلمه واحده هقولها لكم
القائد: مصر امانه ف اديكم."يلتفت الى تمام"
القائد: في رجالة من مصر هينضموا ليكم في المعركه.
تمام: يعطيه التحيه وينصرف هو والرجال الى المعركة.
" يتجه تمام وسامي مع الرجال لينفذوا مهمتهم في المعركة كالعادة.. تمام وسامي في خندق واحد ..
(17)
بدأت المعركة وانهال الرصاص من كل جانب وامتلآت الرمال بدماء القتلي وخاصة من جانب القرود..
عاد تمام وسامي الى خندقيهما .. بعد دقائق رفع تمام راسه بعد سماع وابل من الرصاص .. فتح عينيه على اخرها عندما راي وحشا مصريا يصرع اولاد القرود ..
تمام: الله الله الله مش ده حسين ابن عم ابراهيم جارنا في البلد .. ايه اللي جابو اهنه .. اااااه هما دول اللي قال عنيهم القائد ..
سامي: حسين مين؟
تمام: شايفه هناك الاسد اللي طايح في الصهاينه ولا عنتر " وكز سامي:
سامي: عاوز ايه يا تمام .. براحة شويه انت فاكر نفسك مع اصحابك في البلد ولا ايه
تمام : بص يا سامي ده عمال يرش رصاص على ولاد القرود وموتهم كلهم ..راجل يا ولد.. عارف حسين ده واحنا صغار مكنش يعرف ينطق حرف واحد ويقول الكلمة في ساعتين اي والله وكلنا كنا بنضحك عليه وهو ساكت مبيردش .. .. وكان يقعد بيناتنا ويمشي من غير منحس به.. كان قليل الكلام يا سامي .. بس كان ليه بصه غريبه قوي وكانه بيقولنا انا ساكت بمزاجي وهياجي وقت الكلام .. ايه اللي غيره اكده؟
سامي: هوه اللي هناك ده.. ما شاء الله راجل بجد وعنيد؟
تمام: ايوه هوه .. ده صاحبي متربين مع بعضينا .. إلحق ياسامي قرد من القرود صابه في قلبه هنعمل ايه دلوك .. .. والله لرايح وجايبه ولو اموت معاه .. ده صاحبي وبيموت اسيبه اياك..
سامي: استنى يا مجنون المكان كله ضرب ورصاص هتموت ..
تمام: لا مش هستنه غطي انته ضهري وبس
(18)
" خرج تمام من الخندق وزحف على الرمال وكان سامي يغطي ظهره حتى وصل الى حسين وحمله وذهب به الى خندق اخر كبير..
وصل سامي اليهما ..وضع تمام قطرات من الماء في فم حسين الذي كان على قيد الحياه بالرغم من نزيف الدم المستمر.. يضمد سامي جراحه .. فتح حسين عينيه بعد فتره بالرغم من احساسة بالالم الشديد..
تمام:" موجها كلامه لحسين" كيفك دلوك يابن عمي؟
حسين: " بصعوبة شديدة" الحمد لله.. ملتفتا تجاه تمام مبتسما محاولا القيام لتحيته عندما عرفه....
حسين: : بصعوبه" تمام ولد عمي يا الف مرحبا
تمام:مرحب بك يا خوي كيفك دلوك؟
" اغشي على حسين مره اخرى"
سامي: سيبه يا تمام هيفوك بعد شويه
تمام : اسيبه كيف يا سامي .. اخوي بيروح مني وقاعد زي الحريم اكده
سامي : اصبر بس شويه .. متنساش احنا فين ..
" فترة صمت يقطعها صوت حسين وهو يتالم مع حركته" استرد حسين وعيه لفترة وبادل تمام الحديث..
تمام: عامل ايه دلوك يا صاحبي؟
حسين: الحمد لله احسن ربنا يبارك فيكيا واد عمي انته والدفعة الجميل ده
سامي: خليك مستريح انا اخوك سامي من حلوان..
تمام: قولي يا حسين.. انا عمري مشفتك بالشجاعة دي وصوتك عالى وواضح وانته بتتكلم مع العساكر وبتزعق في القرود.. جبت الشجاعة والصوت العالي ده منين
(19)
حسين: قصدك اني كنت قليل الكلام.. كنت شايله لوقت عوزه وجه الوقت
تمام: اه وكمان عمري مسمعتك بتتكلم عن مصر امنا الحلوة دي اللي احنا اهنه عشان نحافظ على ترابها الغالي..
حسين: شوف يا صاحبي.. انا بحب مصر قوي قوي ويمكن اكتر منك كمان وسكوتي ده كان اعتراض على اللي بيحصل فيها .. احنا كلنا مقصرين في حقها ومش عارفين قيميتها .. دايما متفرقين والازمة بس هيه اللي بتجمعنا ، دايما رد فعل مش فعل ، انا عاوز بلدي حبيبتي مصر تتجمع ف كل وقت ومش وقت الازمة بس.. انا عاوز مصر دي تكون فعل مش رد فعل ..انا عاوز مصر تكون هيه البادية هيه الاولي هيه الاساس والكل ياخد منه عايزين ندي ومنخدش من حد
تمام : بس احنا وقت الشدة ايد واحده.
حسين: وده كويس بس ميكونش الاساس .. الطبيعي اننا نكون يد واحده على طول في كل وقت وكل شي.. بص على البلاد التانية يا واد عمي كلامهم قليل عملهم كتير واوعي تفتكر اننا اللي بنحب بلادنا بس هما كمان بس عما ناصحين ..متنورين عنديهم عقل وقلب اما احنا عندينا قلب وخفيف كمان .. عرفت ليه كنت ساكت " يعلو صدره ويهبط ويسكت لفتره..
تمام: كلامك زين والله ياصاحبي..
"يفيق حسين ويشير لتمام ان يقترب منه فيفعل تمام
حسين: لو ربنا قدر لك الحياه عاوزك توصل رسالة لامي.. اتوحشتها قوي..
تمام: ربنا هيشفيك ان شاء الله وهترجع لحضنها ونكون سوا ان شاء الله .. قول
(20)
حسين: قولها ولدك حسين كان قليل الكلام بس حبه لوطنه مصر علمه يتكلم ويعبر عن حبها بالفعل والاجتهاد ومش بالكلام وبس " سكت حسين سكوتا طويلا ولم يتكلم بعد ذلك.. احتضنه الموت .. هزه تمام ولكنه لم يرد .. وهنا ادرك انه مات شهيدا.. بكى بشده على صاحبه ولم تنم عيناه "
" اغنيه" دم الشهيد
ش هـ ي د شهيد
رجع مصر من جديد
نقطة دمه
دمعة امه
زرعت شجرة
طرحت زهرة
زهرة حرة
آه حرية من جديد
ش ه ي د شهيد
رجع مصر من جديد
حلف انه ميرجع بيته
يهجر عمله كمان وغبطه
عارف انك يا مصر غالية
قدم روحه لتبقي عالية
حضن الموت ومات سعيد
(21)
يا مصر ابنك مات شهيد
ش هـ ي د شهيد
رجع مصر من جديد
يا مصر انتي باقيه واحنا
تراب ف ارضك شجرك ونخلك
شطك ونيلك
نبتك وخيرك
ارجوكي يا مه
يا مصر يامه
ف يوم متنسي دم الشهيد
ده هوه يامه اللي زرعلك
ف عز ليلك نهار جديد
ش هـ ي د شهيد
رجع مصر من جديد
(22)
المشهد الثالث والاخير
*****************
" بعد ايام .. داخل المنزل.. تنتهي الام من صلاة العصر وتتمتم بدعاء لاولادها وخاصة تمام.. تنادي على هنادي"
الام: انتي فين يا بنيتي ، همي شوي، عمك همام وسلمى علوصول، خلصي.. هنسحرهم ولا ايه ..
هنادي: حاضر يا هنيه..
الام: هنيه حاف اكده يا قليلة الرباية..
هنادي: بدلعك يا ام تمام
الام: صليتي العصر يا بت؟
هنادي: والضهر والفجر كمان..ازاي مصليش وهي اللي بتخليني ارتاح وقلبي مليه الرضا.. مش انتي دايما تقولي اللي ميصليش ملوش لزمة يعيش.. وانا بسمع كلامك الزين ده يا ماي
" طرقات على الباب"
الام: همي يا هنادي عمك وسلمى على الباب..
" تهرول هنادي وتفتح الباب واذ بساعي البريد يعطيها جواب من تمام"
هنادي: اماي اماي جواب من خوي تمام .. نفسه فيه ياماي
الام: افتحي بسرعه واقريه..
هنادي: والوكل يا هنيه..
الام: يكلوا الموجود.. دا جواب من الغالي ابن الغالي كان نفسي بوكي يكون موجود ويقرا الجواب هوه ويطمن .. الله يرحمه عاش راجل ومات
(23)
راجل وخلف راجل.. اقري يا بتي مانتي متعلمه كفايه ورافعه راسي وصاقته الابتدائية.."
هنادي: تسلميلي يا حاجة دايما بترفعي من نفسياتي.. تهم هنادي بالقراءة الا ان الباب يدق مرة اخرى .. تذهب لتفتح
هنادي: طيب خلاص .. الباب اتجنن النهارده جك خابط ف نفوخك.. تفتح الباب" همام وسلمى"
هنادي : اتفضل يا عمي
الام: اتفضل يا حاج
همام: " يجلس" يزيد فضلك ياحاجة..
هنيه: وش الخير انتوا.. جايين على جواب تمام
سلمى: جواب من تمام يا هناكي يا سلمى ..اقراه يامه الحاجة..
همام: لا هنادي هيه اللي هتقراه .. متعلمه اكتر منك
هنادي: الله يجبر بخاطرك يا عمي.. متزعليش يا سلمى كل واحد على كد علامه..
تقرأ هنادي جواب تمام"
==============
أبدأ كلامي يامايا بالسﻻم
كيفك انتي
وكيف هنادى
وخطيبتي سلمى وعمي همام
وكيف غيطان القمح واسراب الحمام
(24)
وسط المدافع والنيران بكتبلكو
مشتاقلكو
مشتاق لكل شبر عندكو
ابعتي يما وطمنيني
ع الحبايب والجيران
أما أنا فاطمني
ولدك همام
من يوم مازرعتي فيا الحب لبﻻدي
اصبح كﻻمي عن الوطن احلى كﻻم
من يوم م قلتي يا ولدي
اوعاك تبقا جبان
في كل خطوه اكون اولهم
شايل سﻻحي ووطني
ف عيوني ملونهم
وكلامك اوعاك تبقا جبان
على كتافي شايلهم
ولو تطول السنين
تصوري واحنا في عز المعركة قابلت مين؟
والدم بيروي المكان
زي السواقي في الغيطان
(25)
لما بتروي زرعنا العطشان
قابلت مين؟
الواد حسين
منتي خبراه
كان منطوي
مكنتش تعرف شفته لغة الكﻻم
حب الوطن حرره نحرره
شفته طايح ف الصهاينه
ولا عنتر
عمال يرش الموت من مدفعه ويكبر
الله أكبر الله أكبر الله أكبر
صرخت وقلت مين نطقه
وخلا لسانه بيعبر
رد اللي جانبي وقال يا صاجبي
ربنا وتراب الوطن غالي ميتقدر
قلت يا صاحبي تمام
وشفت ف عنيه السمر
مصر الحلوه بتصلي
وكف ايده بالدم الحر متحني
وبص لي وقالي
(26)
ياصاحبي لو في يوم شفت امي قولها
ولدك حب الوطن علمه لغة الكﻻم
وغمض عينيه للأبد
وعينيا يامايا من يومها
مش راضية تنام
وعينيا يامايا من يومها
مش راضيه تنام
ولدك تمام
" يبكي الجميع"
هنادي: وبيقول كمان انه جاي بكره الصبح مع جثة حسين" تترك الرسالة وتنخرط في البكاء"
الام: يا حبيبي يا حسين يا ولدي ..كان واد زين صح.. متعلم ومتربي ومؤدب ومكنش يرفع راسه من الارض لو قابل وحده في الشارع..
سلمى : صح يا مه الحاجة كان مؤدي ويخدم الكل .. شافني مره شايله تقيل في الشارع وقفني وشال عني لحد الدار ومشي علطول من غير ميقف .. ومره تانيه شاف واحد بيضايقني قام مسخرة وقل قيمته قدام الناس كلها .. كان زي اخوي ..
هنيه: ابلغ امه كيف دلوك دلني يا حاج؟
(27)
همام: لا اله الا الله يا الحاجة ام حسين مؤمنة وقويه.. بعرف عنها انها معلماه زين .. كنت اشوفها مقعداه جمبيها وهو صغير وتتحدت معاه وهو عينه في عنيها وبيسمع كلامها .. وبعدين كلاتنا فدا مصر
الام: دبرنا يا حاج.. نبلغها كيف عقلي هيشط مني وقلبي واجعني .. كان هوه تمام اصحاب وحبايب ومبيفترقوش ؟
همام:شوفي يا حاجة: نفطروا وبعدين نروح عنديه.. البيت قريب مش بعيد
" تقوم الام وتفتح المذياع على نشرة الاخبار
الام: نسمع اللي بيحصل ونشوف عملنا ايه في ولاد القرود
المذيع: هنا القاهرة .. نجحت قواتنا المسلحة الباسلة في اقتحام قناة السويس وتلقين العدو الاسرائيلي درسا في فنون الحرب لن ينساه .. وتتوالى الضربات على العدو الذي فقد وعيه . وسنواليكم بالاخبار تباعا .. هنا القاهرة..
المذيعه: حان الان موعد صلاة المغرب نتمنى لكم صوما مقبولا وافطارا شهيا .
" الجميع جالس على مائدة الافطار .. انتهوا من افطارهم ..
همام: كل سنه وانتي طيبه يا ام تمام متشكرين..
هنيه: على ايه يا حاج
سلمي : كل سنه وانتي طيبه يا مه الحاجة وكلك زين قوي تسلم يدك ..
هنيه: بالهنا يا بنيتي ان شاء الله عن قريب انتي اللي هتوكلينا من يدك ؟
سلمي: بخجل .. ان شاء الله
(28)
همام: طيب انا اروح الجامع اصلي المغرب ونتقابل قدام دار ام حسين
الام: وانا هقوم اصلي كمان .. يلا يا هنادي انتي وسلمي روحوا صلوا الله يهديكم ويفتح عليكم ..
ستار
" داخل الدار التي تشبه دار ام تمام جلس همام وهنيه مع ام حسين التي ترحب بهم"
ام حسين: ياالف مرحبا ياحاج همام يا مرحبتين يا ام تمام
خطوة عزيزة.. ايه يا خيتي بقالي فتره مشفتكيش ..
هنية: يعز مقدارك يا ام حسين.. الحقيقة احنا مقصرين معاكي حبتين حقك عليا انتي عارفة المشاغل بقا انا وهنادي وحدينا ومقدرش اسيبها لوحدها .. من يوم تمام مخدوه الجهادية وانا قاعدة لحالي انا وهنادي..
ام حسين: وانا كمان قاعدة لحاي من الجهادية مخدت ولدي حسين ربنا يرجعوا بالسلامة ..
هنيه: انا كنت عاوزة اقولك شي.. تتردد.. قول انته يا حاج همام..
ام حسين: متردده ليه قولي اللي ف نفسك ولا تخافي احنا خوات صح؟
هنيه: صح ...
همام: ايوه هقول اهوه.. بقولك ايه يا ام حسين.. بقالك قد ايه مسمعتيش حاجة عن ولدك حسين؟
ام حسين: من زمان من اول مخدوه للجهادية .. اتوحشته قوي قوي وقلبي عمال يدق بقاله كام يوم كل ما ياجي اسمه قلبي يفط من الفرحة ده نور عيني اللي بشوف بيها بس هوه مقصر معايا مبعتليش جواب من اسبوع .... اقولكو شي؟
(29)
همام وهنيه: قولي..
ام حسين : شفته عشيه جايلي في المنام لابس ابيض ووشه ابيض وبيضحاكلي بس قلبه مجروح يا حبة عيني .. قلت هيه الحرب اكده..
وكماني اصحابه شيلينه لفوق كانه عريس ليلة حنته .. هوه بيحب بلده قوي قوي وبيكره القرود قوي قوي ورايح ومشمر درعاته عشان يرجع والنصر معاه.. وانا مستنياه علشان ازفه هو واصحابه وازغرط واملى الدنيا زغاريت .. اتوحشته قوي .. دموعها تنزل ..
هنيه: اهو جايلك بكره واصحابه شايلينه برضك
ام حسين: بتقولي بكره.. بكره.. يا فرحتك يا زينه.. تلتفت لهنيه" شايلينه..
همام:" يوجه كلامه لهنيه" اقفلي خاشمك ده " لزينه ام حسين" شوفي ياام حسين " ربنا رزق ولدك حسين الشهادة .. وبقيتي ام الشهيد " صمتت زينه ولم ترد نهائيا ولم تدمع عيناها بل اصبحت اكثر قوه.
ام حسين: انا ولدي وعيلتي فداك وتعيش انتي يا مصر.. انتي الاصل ..انتي الباقية واحنا الماشيين.
." خرجت هنيه وهمام وتركوا زينه والمذياع يقدم
" صباح جديد.. القرية كلها في استقبال الابطال ... الرجال والنساء بزي واحد ابيض وغطاء الراس علم مصر .. حانت اللحظة المرتقبه.. جاءت سيارة الاسعاف وبداخلها جثمان حسين .. يخرجها الجنود.. تتقدم زينه من وسط الناس رافعة راسها .. تصل الى النعش الملفوف بعلم مصر تنظر الى تمام الواقف بجانبها .. تطلق زغرودة طويلة ثم تنطلق الزغاريد من كل مكان
بسم الله الرحمن الرحيم
(30)
" ولا تحسبن الذين قتلوا في سبيل الله امواتا بل احياء عن ربهم يرزقون" صدق الله العظيم
" يتقدم تمام ليسلم على عمه وخطيبته واخته ويقف امام امه يقبل راسها ويديها
تمام: انا عاوز اقولكم شي يا اهل بلدي : مش حسين صاحبي بس هو اللي قدم روحه فدا مصر في ناس كتيرة قوي الناس متعرفهاش.. دافعوا عن البلد بارواحهم من غير شيء الا الحب والكرامة والعزة .. في كل بلد بطل شهيد .. وفي كل بيت ام شهيد شجاعة وقوية زي الارض بتحب ولادها وبتديهم وبتعلمهم علشان يردولها الجميل .. في ناس استشهدوا قدام عيني فرحانين ووشهم غرقان بالدم والابتسامة مفرقتهوش.. في شهدا سابوا وراهم اطفال وزوجه وفيه شهدوا كانوا امل اهاليهم في الحياه وضحوا بارواحهم .. عاوز اقول ان حسين هو رمز الشهدا في مصر كلها .. واسمحوا لي اقدم لكم شهدا كتير من الناس ميسمعوش عنهم حاجة
*******************************************************
إبــراهيــم الرفـــاعـــي"
المجموعة 39 قتال
(أسطـــورة العمليــــات الخــاصـــــة)
فمن هو المقاتل إبراهيم الرفاعي ؟؟
ولد البطل إبراهيم الرفاعي في محافظة الدقهلية في السابع والعشرين من يونيه 1931 ، وقد ورث عن جده(الأميرالاى ) عبد الوهاب لبيب التقاليد العسكرية والرغبة في التضحية فداءاً للوطن ، كما كان لنشئته وسط أسرة تتمسك بالقيم الدينية أكبر الأثر على ثقافته وأخلاقه.
(31)
التحق إبراهيم بالكلية الحربية عام 1951 وتخرج 1954
ومن أبطال حرب التحرير والعبـــــور
العميد حسن أبو سعدة " أحد أسود سيناء "
فى يوم 8 أكتوبر 1973 قام العميد حسن أبو سعدة قائد الفرقة الثانية مشاة بالجيش الثانى بصد الهجوم المضاد الذى قام به لواء 190 مدرع الإسرائيلى ( دبابات هذا اللواء كانت تتراوح ما بين 75 حتى 100 دبابة ) وتدمير كافة دباباته وأسر قائد إحدى كتائب اللواء وهو العقيد عساف ياجورى.
الشهيد عمرو طلبه توفى في منطقه القنطرة شرق سيناء بعد أن أدى مهمته على أكمل وجه وساهم في انتصار لن يُمحي من ذاكرة المصريين مهما مرت السنين .. وسطر لنا أسطورة في الفداء بالروح أغلي مايملك من أجل تراب الوطن..
العميد يسري عمارة وكان وقت الحرب برتبة نقيب وهو البطل الذى أسر - عساف ياجوري - أشهر أسير إسرائيلي في حرب أكتوبر حيا ًعلى أرض المعركة بالرغم من إصابته ، كما سبق له الاشتراك مع أسرة التشكيل في حرب الإستنزاف في أسر أول ضابط إسرائيلي واسمه دان افيدان شمعون
محمد المصرى و الذى تمكن من إصطياد 27 دبابة مستخدما فى ذلك 30 صاروخ فقط من ضمنها دبابة عساف ياجورى الذى طلب أن يراه فبعد أن تم أسره قال عساف أنه يريد كوب ماء ليروى عطشه و الثانى مشاهدة الشاب الذى ضرب دبابته و أخذ عساف ينظر إليه بإعجاب
(32)
تمام:
حرب اكتوبر علمتنا التحدي والاصرار والصمود.. علمتنا ازاي نحافظ على كرامتنا .. علمتنا ازاي نكون ايد واحده .. المسلم والمسيحي الكبير والصغير.. الغني والفقي كنا بنصلي على الرمل صف واحد من تغيير تمييز.. علمتنا يكون لنا هدف ونصر على تحقيقه.. علمتنا ازاي نكون نفس واحد وقلب واحد .. ووصلت رسالة للعالم كله ان مصر دايما قويه بايمانها بالله سبحانه وتعالى وبرجالها ودعوات امهاتنا ..
يصطف الجميع لتحية العلم الذي يرفع في وسط المسرح..
تمت
الأشخاص حسب الظهور :-
هنية .............................. جهاد
هنادى ............................. سمر
همام .............................. محمد حسن
سلمى ........................... حنان مهاود
تمام ............................... مجدى صقر
سامى ...................... ..... محمد ايمن
القائد ............................. كامل مصطفى
العسكرى الاول .................. السمرى
العسكرى الثانى .................. محمود
العسكرى الثالث ................. محمد جمال
*************************************************
