الرئيسية
بطاقة الكتاب
-----------------------------------------------------------------------
عنوان المؤَلَّف : ياريت نحبِّك
المؤلِّف : السيد محمد صابر
التصنيف : أشعار
رقم الإيداع : 20444 - 2017
عدد الصفحات : صفحة
رقم الإصدار الداخلى : 37
تاريخ الإصدار الداخلى : طبعة أولى أكتوبر 2017
تصميم الغلاف والتنسيق : دار النيل والفرات للنشر والتوزيع
-------------------------------------------------------------
جميع حقوق الطبع والنشر محفوظة للشاعر، ولا يحق لأى دار نشر طبع ونشر وتوزيع الكتاب الا بموافـقة كتابية وموثـقة من الشاعـــر
كلمة الناشر
دفقات شعورية ينقلها الشاعر السيد محمد صابر بوعى شديد للمتلقى العادى لتكون حالة وصورة مكثفة للمشهد اليومى بمنتهى البساطة دون الإغراق فى الضبابية ومتاهات الصور الشعرية المركبة ليشارك مجتمعه تحت راية الحب والإنتماء للوطن فيطرح إشكاليته الجريئة فى كيفية حب الوطن من باب الأمنية حتى أنه كتب دفقاته الشعورية تحت عنوان ( ياريت نحـبِّـكْ ) وهو الأمل الذى يبحث عنه كل مفكر وكل مبدع جاد فلن يستوى حال الوطن إيجابيا إلا بالحب والإنتماء
فكل التقدير لهذا المناضل باسم الوطنية
الشاعر السيد محمد صابر
الشاعر والناقد ناجى عبد المنعم
رئيس مجلس إدارة دار النيل والفرات
للنشر والتوزيع
الإهـــــــــــداء
إلى أمى وأبى
إلى زوجتى الحبيبة وشريكة عمرى
إلى أبنائى وأحفادى سيف وسجى
إلى كل أصدقائى وأقاربى
إلى كل من تروق له كلماتى
أهديكم
أغلى ما أملك
أحرفى
أيام عمرى
الشاعر
السيد محمد صابر
أبين زين
====
أبين زين أبين
واوشوش الودع
واشوف بخت الصبية
واشوف بخت الجدع
وأخط الرمل مرة
يبان إللى إتخدع
واشوف فى الرمل صورة
للقلب إللى إتوجع
(1)
فى شاب هناك بيبكى
حاله فى الهوى
فى البعد وحيد وعايش
بقلبه إللى إنكوى
فارق فى يوم حبيبته
لجل يعود لها
بمهر كنوز كتيرة
ويحقق حلمها
لكن فى البعد قاسى
والحظ له معاند
تايه ياناس فى دنيا
الحزن فيها سايد
والغربة نار بتحرق
وأحلامه بتتشوى
لا تهنى ياناس بقربه
ولا حوش مهرها
وسنين كتير تعدى
ويجيله ف يوم جواب
من غير كلام ملامة
ومن غير كلمة عتاب
البنت جه نصيبها
والحظ ضحكلها
اليوم جالنا عريسها
عارف قدرها
وزن قبالها فضة
وسواها بالدهب
وكان أمر ربك
فى كتابها إللى إنكتب
نتمنى ليك ياغالى
تتهنى فى الحياه
وتلاقى بنت تانية
تحقق لك المنى
=======
أبين زين أبين
واوشوش الودع
واشوف بخت الصبية
واشوف بخت الجدع
وأخط الرمل مرة
يبان إللى إتخدع
واشوف فى الرمل صورة
للقلب إللى إتوجع
(2)
فى حبيبة هناك وعايشة
أحلامها فى الخيال
فارس بحصانه لأبيض
راجل سيد الرجال
خبط على بابها يسأل
وبيطلب الوصال
وكانت فرحة حلوة
فستان أبيض وزينة
وورود فى كل حتة
فى القرية والمدينة
تصحى على صوت ينادى
يا بنتى صحصحى
واقفة ساعات بهاتى
ولا راضية تفتحى
فوقى يا بنتى يلا
بقينا وسط النهار
وأنا مش قادرة أعمل
ولا شئ من مطرحى
قومى ربى قادر يحقق المنى
واشوفك قبل يومى
يا بنتى تفرحى
مش عارفة ليه ياغالية
الحظ ليه ناسيكى
ومفيش حد فى جمالك
والحسن إللى ماليكى
سرسب العمر منى
وكترت السنين
وخايفة أموت يا بنتى
واسيب قلبك حزين
بدعيلك ليل نهار
يجى إبن الحلال
وأشوف وأشيل ياروحى
ليك دستة عيال
=======
أبين زين أبين
واوشوش الودع
واشوف بخت الصبية
واشوف بخت الجدع
وأخط الرمل مرة
يبان إللى إتخدع
واشوف فى الرمل صورة
للقلب إللى إتوجع
(3)
ودا طالب وم الأساس
عينه ع الشهادة
بيجد كتير وعمره
ما فكر فى الإعادة
وصل ثانوية عامة
والحلم ياناس خلاص
بقى بينه وبينه خطوة
يمشيها بالحماس
قالوا ثانوية عامة
يعنى مفيهاش دراسة
لكن دروس خصوصى
تركيز وشد همة
وفلوس كتير بتطلع
الشرح يكون بذمة
شهور كتير تعدى
يخرب بيت اللى جابه
لكن بيقول دى هانت
ويهون ياناس عذابه
وفى يوم الإمتحان
كانت صدمة وكبيرة
طلبة فى قلب لجنة
ولحظات عدت مثيرة
ياناس أيه الحكاية
أعصابنا خلاص تعبنا
قالوا ع النت ظهرت
اسئلة الإمتحان
وحكومة كمان بتلغى
والله يستر كمان
تهرب أعصابه منه
ويندم ع اللى فات
ويقول خلاص يا دنيا
خلاص الحلم مات
وضاع كل تعبى
علشان إهمال حكومة
وموظف فيها خاين
باع وضميره مات
=======
أبين زين أبين
واوشوش الودع
واشوف بخت الصبية
واشوف بخت الجدع
وأخط الرمل مرة
يبان إللى إتخدع
واشوف فى الرمل صورة
للقلب إللى إتوجع
(4)
إفرد كفك تعالى
اشوفلك إللى كان
وأشوف خطوط حياتك
وإيه مخبى الزمان
أيوه دا خط عمرك
ومايل ع النهاية
وكمان دا خط قلبك
فيه مليون حكاية
إستنى أصبر شوية
فى خط ظهر كمان
بيقول إنك حالنجى
وعايش فهلوى
ومشغل كتير أغانى
وبتخدع بالقوى
لكن فى الكف باين
بتتجمع خطوط
خط العمر ونهايته
وخط القلب وحكايته
وخط الفهلوة
مع خط جديد يقولك
كما تدين تدان
أبين زين أبين
واوشوش الودع
واشوف بخت الصبية
واشوف بخت الجدع
وأخط الرمل مرة
يبان إللى إتخدع
واشوف فى الرمل صورة
للقلب إللى إتوجع
عدل سابقا من قبل السيد صابر في الجمعة مايو 22, 2020 9:01 pm عدل 1 مرات
