الرئيسية
بسم الله الرحمن الرحيم
تصميم الغلاف للفنان المبدع / عبد الرحمن البدرى
اهداء
الي روح ابي الغالي
الي روح أمي الحبيبة
الي روح اختي الكبيرة
الي زوجتي العزيزة
الي ابنائي الاعزاء
الي كل احبابي
اهديكم باكورة دواويني
ليلي في الحضرة
البدري زايد
شيخ السجالات
الشاعر في سطور
الاسم : البدري عبد الحمن زايد
الميلاد : قشطوخ تلا منوفية
الأقامة : طنطا غربية
المؤهلات العلمية : بكالوريوس اقتصاد وعلوم سياسية جامعة القاهرة
1978
دراسات عليا في التخطيط الاقتصادي كلية التجارة جامعة طنطا
1983
دراسات عليا في النظم السياسية والاقتصادية جامعة القاهرة 1987
الانشطة الأدبية : عضو عامل في رابطة الزجالين وكتاب الأغاني
عضوية رقم 2811
اللقب : شيخ السجالات
========================
الي ابي رحمه الله الذي وافته المنية وهو يؤدي مناسك الحج
===============
لما ملك الموت سعالك
وانت ف نهاية المطاف
قوللي يابا ازي حالك
قوللي هل م الموت نخاف ؟
قلبك الطيب ساعتها
دق طبعا لما شاف
مقعد الصدق الحقيقي
وانت في نص الطواف
كنت ساجد ولا واقف ؟
كنت فرحان ولا خايف ؟
كنت ساعي ولا طايف ؟
كنت حاسس يالحرارة ؟
ولا شاعر بالجفاف ؟
كنت بالاحرام وحاسس
بالزحام وسط الخلايق ؟
ولا متحلل ولابس ؟
كنت خالي البال ورايق ؟
ولا مشغول بالقراية
ف سورة الرحمن وقاف ؟
دول صحابك من زمان
لما كنت بتقرا بيهم
واسمع الصوت والحنان
لما كنت تصلي بينا
بعد ماتخلص ادان
قوللي ريحة الجنة ايه ؟
ماانت طول عمرك بتسعي
قولل يابا ازاي وليه ؟
شفت روضة بجد واسعة؟
أد ايه طيبتك يابيه ؟
قوللي مين صلي عليك؟
م الحجيج أو شاف عينيك
لما روحك وبأمان
للاله فاضت كمان
سلمت والأمر هان
ربنا كان بيناديك
دعوتي ليا وليك
نفسي يابا ابقي معاك
بشتهي بسمة رضاك
الف رحمة ونور عليك
ألف رحمة ونور عليك .
القيت في ندوة رابطة الزجالين وكتاب الاغاني بالقاهرة 30/7/2019
=============================
في النيل
=====
قالوا النيل مليان اسرار
وبيتكلم ليل ونهار
واما تحب تناجي النيل
ركز واوعي كمان تحتار
واعرف امتي وفين وازاي
مين حيكون وياك او جاي
واهرب م الضوضاء لو تعرف
واشرب لك كباية شاي
رحت ف قبلي كتير وقليل
وسمعت علي النيل مواويل
لكن أجمل رحلة نيلية
مع حبايبنا اليوم بالليل
وف أجمل بقعة وف الصيف
وف لنشاتك يابني سويف
شفت النيل بمشاعر تانية
روضة حقيقي وقلب نضيف
وببركة احبابنا كمان
سيبنا العالم والسكان
والأنوار أهي هلا علينا
رغم بعادنا عن العمران
ويا الليل اتحرك قلبي
حسيت اني بجد بلبي
وبطوف واسعي ف قلب النيل
اكتبهالي تمللي ياربي
شفت النيل وماليه النور
والمركب بالخير مغمور
اللي يسبح واللي يصلي
واللي بدعوة ياناس مستور
صوت اللنش كانه سكون
والنيل مالي علينا الكون
فيض من ربك هو العاطي
أمره مابين الكاف والنون
والخير جاي من جوة القلب
والأنوار بتلالي يارب
ديم البركة يارب علينا
ويدوم بيننا كمان الحب .
القيت في رابطة الزجالين بالقاهرة في 9/7/2019
=========================
ليلي
===
ليلي ف الحضرة بتسقي
من ايديها الحب صافي
هيا محبوبي وعشقي
والحبيب امتي يوافي؟
ليلي طافت ع الحياري
خلت المشتاق يميل
والجميع صاروا سكاري
والغرام هو الدليل
ليلي قالت يامريدي
عندي م الأحباب كتير
كلهم عشاق ياسيدي
بس انا شرطي عسير
شرطي اني مليش شريك
جوة قلبك أو ف بالك
لاحظ اني باشتريك
واشتري نفسك ومالك
شرطي انك تبقي زاهد
لو حتلبس حتي خيش
تفني ذاتك نبقي واحد
لو تحب انك تعيش
شرطي انك ف الليالي
تبقي تايه ولا هايم
وانت ف الوجد وقبالي
تبقي محروم ولا صايم
واعرف ان القرب حالة
عاوزة منك الاحتمال
واوعي تبقي عويل وعالة
واحترس م الانشغال
اعرف ان الذكر واجب
للحبيب ويا السهر
ناجي سبح بس راقب
نوره في ضي القمر
اعرف ان الصد عندي
يبقي موت
واوعي تحكي سر وردي
حبنا عاوز سكوت
واسأل اللي عشقوا قبلك
واللي ذاعوا السر فين ؟
راحوا تاهوا دول زمايلك
وقعوا في نفس الكمين
ليلي طافت ع الخلايق
صبت النفحات في كاس
نبهت فينا اللي فايق
صحت الغفلان ياناس
ليلي طافت ع القلوب
خلت المشتاق يفوق
واحنا دوبنا فيها دوب
والغرام هو اللي فوق
ليلي ف الحضرة تغني
واحنا ليها مداحين
واللي فايق فيكوا عني
يدعي واحنا نقول امين
والحبيب لما تجلي
ليلي ف الحضرة تقول
انت يامولايا اولي
ف الحبيب تاهت عقول
قالت ان الرب واحد
والقلوب تعشق ضياه
باعبدك والكل شاهد
ان عقلي ف يوم ماتاه
ان عقلي ف يوم ماتاه.
أنا الأديب
أنا الأديب الأدباتي
وكلمتي هيا حياتي
لاباعرف ارقص ولا اطبل
من صغري شاعر يااخواتي
أنا الأدب والشعر اهو شاب
لكن قلبي لسة شباب
وان قلتلي فين دواوينك
حتلاقي شعري ف كل كتاب
اناالأديب واسال عني
وكلمتي تعكس فني
ولو حضرتم ويانا
ف الندوة طبع حنغني
انا الأديب والحظ مفيش
لكني ف المحراب درويش
ومهما ضاقت ويايا
باتمني بس عشانكوا اعيش
أنا الأديب جيت من طنطا
لاعندي فشر ولا اونطة
وقلمي عمره مابينافق
ويبخش ف جدال وبيزنطة
أنا الأديب سيدنا السيد
غرقان ف مدده ومتأيد
ف جدول المحاسيب مقبول
ولما ازوره باخد جيد
انا الأدب روحه ف دمي
وراضعه طبعا عن أمي
وبخبرتي جودته كمان
بالفصحي باكتب والعامي
انا الأديب للرابطة سعيت
لأني طبعا كدة حسيت
ان انتوا أهلي وخلاني
والزجالين فتحوا لي البيت
باشكركوا جدا يااخوانا
وادعيلكوا دايما ف الجنة
نكون صحاب وف يوم الدين
اشوفكوا افضل مااتمني
اشوفكوا افضل مااتمني
القيت في رابطة الزجالين وكتاب الاغاني بالقاهرة في 9/7/2019
القيت في نادي ادب طنطا
القيت في الصالون الثقافي لمهرجان الحب والسلام في دمنهور بحيرة
في 22/8/2019
=====================================
عن مؤتمر التصوف العام بالازهر الشريف بالقاهرة 18/9/2019
===========================
لما سيدنا الشيخ دعانا
قلت يبقي الفرح جانا
والهنا ضلل علينا
والضيوف اللي معانا
سيدنا قاللي بكرة تحضر
مؤتمر حيقيمه لازهر
ع التصوف والطريقة
واعرف ان الدين حقيقة
وف شريعته مبتغاه
هو توحيد الاله
والتزم جوة المقام
بالهدوء والاحترام
والسكينة والتخلي
والزم الأذكار وصلي
ع النبي خير البرية
وانسي ذاتك لو شوية
والمريد بيزيد بهاه
لو ف حالة الوجد تاه
والطريق كله محبة
والسلام بين الأحبة
واطعم المسكين تلاقي
ان دة هو اللي باقي
واقرا قرانك ووردك
يبقي يابختك ياسعدك
واعرف ان فروضنا خمسة
الشهادتين بس لسة
الصلا تحافظ عليها
والفلوس دي تزكي بيها
والصيام دا علينا واجب
ف المشارق والمغارب
لو قدرت ياريت تحج
واعف انك لو تهج
م الدنايا والمعاصي
مش حتلقي القلب عاصي
والتصوف مش نفاق
ولا ترقيع الهدوم
ولاتغرق ف الرياء
ولا تهرب م الهموم
ولا تسكت ع المظالم
ولا ترضي بالمغانم
التصوف ف السماحة
واللطافة والصراحة
والتصوف ف الجهاد
لجل تذكير العباد
هو دا اصل التصوف
مش بازور ولا ازيف
والخلاصة ف الختام
توصيات سيدنا الامام
ان مهر الجنة غالي
عاوزة سهار الليالي
اللي صاموا واللي قاموا
واللي ليلهم لم يناموا
مهما قال الناس وعادوا
ف المحافل ولا زادوا
اعرف انك م المهالك
تنجا لو مخلص وسالك
تنجا لو مخلص وسالك .
===============================
صباح الفل
=====
صباح الفل كالعادة
عليكم خير وبزيادة
يااحلي صحبة ف الدنيا
يااهل الحب ياسادة
صباح يسري كما النسمة
وعارف كل شيء قسمة
ولاكن جيت اهنيكم
علي فرحتكو والبسمة
صباحكوا احلي م السكر
صباحكوا كلته عنبر
وباستني صباحكوا واقول
صباحكوا ع الوجود نور
صباح الحب تسقوني
ومهما فيكوا يلوموني
ح اغنيلكوا علي الأرغول
دة عقلي فيكوا وجنوني
صباح اخضر كما عودك
ياراسمة الورد ف خدودك
عشان خاطرك انا صاحي
وواقف خدمة ف حدودك
باصبح والصباح لله
وليكي ف العيون طلة
تخلي الفجر يتبسم
يصبح م انتي ليه هلة.
==================================
الصلا ع الزين
=======
لو حبيت انك تتهنا
تشبع م الجنة وتتغنا
لو حبيت قلبك يطمن
وتشم نسيمها وتتمني
انك ويا الحور العين
وملايكة معاك ع الصفين
بيباركولك ويغنولك
صلا ع الزين الصلا ع الزين
لو صلينا عليه علطول
قلبنا بيه حيكون مشغول
واما تملي عليه بنسلم
حيكلمنا كمان ويقول
دولا حبايبي ليوم الدين
مشافتهمش صحيح العين
لكن سيدنا النبي يااخوانا
وصا صحابه علي الحلوين
اللي يصلوا عليه ف زمانا
واتبعوه علي نفس السنة
قال احبابي وانتوا صحابي
ومعادنا معاهم في الجنة
صل وسلم ع المختار
مش حتقرب يوم م النار
وييسر لك ربنا حالك
وتكون دايما م الابرار.
القيت في رابطة الزجالين بالقاهرة 2/7/2019
=============================================
عالجوا
====
ياعيوني اللي جفاها النوم
واستسلمتي لأهل اللوم
هزي بلدنا ان كانت صاحية
تصحي تفز تهب تقوم
مش حنسيب العمر سنين
ونضيع تاني ليوم الدين
واللي ماداقش النوم من جوعه
حيشوف رؤيا مع الجعانين
والجعانين لو قاموا ياناس
يبقي عليها تقولوا خلاص
لايخلوا لا اخضر ولا يابس
دول فاقدين طعم الأحساس
بتحبوها طب صحوها
رشوا عليها المسك احموها
خدوا بايديها لو عاوزين
من امراضها ياناس عالجوها.
مؤلف الغناوي
ياللي انت ناوي
تقول غناوي
هاتلك مؤلف
يقول حكاوي
ويكون مولف
علي القهاوي
وكمان ملحن
بالطبلة حاوي
يدق بيها
ويكون مخاوي
وع الربابة
عازف وغاوي
وجن حاضر
وبخور وجاوي
افشر وهلس
وافتح مطاوي
طبل وهيص
وقول فتاوي
واوعي تفتش
علي البلاوي
كل الل عامل
طبيب مداوي
ولا عمره يقبض
تمن يساوي
اصل الل يكدب
سعره مساوي
هو الل يكسب
والكورة يلعب
واديله نمرة
يامستكاوي (الناقد الرياض نجيب المستكاوي ودرجات لاعبي الكرة )
ياللي انت ناوي
تقول غناوي
هاتلك مؤلف
يكون مخاوي .
==================================
قولي
===
قولي كمان
دة انتي حنان
شعرك كله جنان ف جنان
وكمان عودك غصن البان
ياللي مليتي الفجر ادان
قولي وغني علي الأغصان
واسقي بمية بحرك شطي
حاسبي ياشابة لما تخطي
واعرفي ان الشاطر عاوز
يوصل ودك ولا يتجاوز
عاوز يخلص م الحرمان
قولي كمان
===================================
الي زوجتي العزيزة
=========
احضني الباقي ف عمري
احضني الأيام ف شعري
ياللي عشقك هو روحي
والهوا ف شيبي وصغري
احضني الحب الحقيقي
وابعدي الخوف عن طريقي
ياللي احلامك بتسري
انتي احلامي وصديقي
دة انتي عمري الماضي كله
وانتي ليا الباقي ضله
وانتي ياام ولادي خيره
وانتي ياسمينه وفله
حطي روحك بين كفوفي
وانتي في دمك حروفي
وانتي نور الكون ف دربي
وانتي امني وانتي خوفي
واسبقيني بالف خطوة
ياللي حبك ليا غنوة
ان انا باقي ف روحك
وانتي ليا حاجة حلوة
همسك المليان حياة
يترسم فوق الجباه
يبقي ليا الف شارة
والشارات طوق النجاة
فاكرة ياما ازاي قاسينا
والحياة كتبت علينا
اننا نقاسي ونتعب
شيلنا روحنا بين ايدينا
بس ربك لجل حكمة
لو بتبقي الدنيا ضلمة
يطلع الفجر ف طريقنا
والنهار يسبق ببسمة
لو بعدتي مرة عني
مين معايا راح يغني؟
ولا مين يسمع بكايا ؟
دة انتي شعري وانتي فني .
القيت في رابطة الزجالين بالقاهرة 10/9/2019
=====================================
حبيب العمر
=======
ياحبيب العمر جرب
نبتدي صفحة جديدة
خلي سكتنا تقرب
والحياة تبقي سعيدة
ياحبيب القلب شوف
خلي احلامنا حقيقة
حني ويايا الكفوف
ضمني ضمة بريئة
ياحبيب العمر خلي
روحك الصافية معايا
احلي مرة لما اصلي
وانت بتأمن ورايا
ياحبيب العمر خايف
اني اتوه منك ياروحي
متداريش عني الشفايف
والعيون لتزيد جروحي
مهما كانت روحي فيكي
مهما قاد القلب نار
مستحيل ارجع اليكي
ياللي ساقياني المرار
قولوا ع الدنيا السلام
قلبي حبك لما دق
وابتدا هو الغرام
وانتي لم قلتيله لأ
قولوا ع الدنيا عوافي
قلبي حبك مش بخاف
والهنا كله موافي
حبنا كله عفاف
قولوا للاحباب ياعالم
اننا اهل الغرام
وان ربي بيا عالم
واني عاشقك والسلام
قولوا عمري ازاي بديته
هيا نظرة من عينيه
واعرفوا اني نهيته
لما عمري ضاع عليه
لما عمري ضاع عليه .
================
الي صديقي
======
تحياتي تحياتي
ياحتة حبيبة من ذاتي
ياخويا وعزوتي واهلي
ياناسي الحلوة ياخواتي
ياحتة قريبة مني
وساكنة القلب والنني
اتوه منك تلاقيني
اغيب عنك تلاغيني
لو احتجتك
اوام والله بتجيني
لو احزن
برضه تواسيني
ولو بافرح
بحس بفرحتي جواك
وانا طبعا بشيل همك
وروحي فداك
يااقرب ليا من ناسي
انا اشيلك علي راسي
يامنطقة... الغاز حيخش حدانا
قالوا الغاز حيخش حدانا
قلت ياناس الفرح اهو جانا
توبة نصوحة بعد النوبة
مش راح اشيل تاني الأنبوبة
ولا فيها مخزن ولا طوابير
وحنخبز بتاو وفطير
اصل الغاز حيخش ياناس
ولا حنشيل الهم خلاص
ولا نتزاحم ولا نتراخم
ولا الاستبن عاوز تغيير
ولا عربية تنادي عليا
ولاحتمرمط ف الطوابير
ولا ف الشتا تحصل لك ازمة
ولا وانا بجري انسي الجزمة
واخد الأنبوبة تجرجير
ولاعيل وملوش ميت لازمة
نازل خبط ياناس وجعير
كل امالي شوية غاز
وبعزة نفس وبوتاجاز
اصل انا راجل حلمي بسيط
نفسي ف هدمة وحتة بيت
مليان ستر وعيش وسميط
وبابوس ايدي وش وضهر
لما اصلي واقوم الفجر
وارضي برزقي وجنب الحيط
بامشي ودوغري باروح الغيط
طول ما المولي ساترها معانا
مش راح نحمل هم عشانا
ايوة ياناس الفرح اهو جانا
اصل الغاز حيخش حدانا.
===================
دموع العواجيز
=======
مهما تتصابي خلاص
الزمان فرمك وداس
للي زيك ف الحكومة
هيا طلقة من رصاص
مهما تعمل حيسبوك
تمشي ولا حتي يجيبوك
يسالوك ازاي وامتي
غبت ليه وحياة ابوك
مين بيسال عنا يابا
دة احنا م الناس الغلابة
اللي كبروا واللي عانوا
واللي قاسوا م الديابة
حتي أولادنا سابونا
زي مايكونوا باعونا
للزمن يقضي علينا
ولكلابه يعذبونا .
مع كل الاعتذار للعواجيز امثالي .
====================
أطيب الأمنيات لحفيدتي وحفيدي
============
عيشي كل العمر عيشي
ياحفيدتي يالابسة ريشي
ياللي باتمني تكوني
فرحة ليا متنتهيشي
اجري ف الخطوة بسرعة
اجري ساندك بس اوعي
بعدها تحاسب وتجري
يا حفيدي بخطوة واسعة
واسبقوني ف الخطاوي
واسمعوا مني الحكاوي
دي الحكاية اللي بقولها
جدي قالهالي ف غناوي
خدت منه الحكمة ياما
عشت ف الدنيا بكرامة
حتي عكازه ساعدني
لما عديت بالسلامة
اوعي يابني م الغرور
او تسيب الأرض بور
او تقول دة عجوز وخرف
وافهم المعني وثور
وانتي ياسايقة ف دلالك
وابتسامتك وف جمالك
بكرة قولي جدو قاللي
ان راسمالك عيالك
انتوا نور العين وحبي
وانتوا ليا نبض قلبي
وانتوا احفادي وهدية
بادعي تحميهم ياربي .
ذكريات مع سيدي علي الكومي ومقامه العامر بالبندارية وهي احدي قري مركز تلا منوفية ومتاخمة لقريتنا قشطوخ تلا منوفية.
==================================================
عاوز اخلص من همومي
واترمي ف حضنك ياكومي
ياللي ساكن بندارية
وف مقامك مدارية
كل احلام السنين
والصبايا الفلاحين
اللي في ساحتك خدوني
طيروا النوم من عيوني
فيها شط الذكريات
فيها احلي الامنيات
لما كنا صغار بنلعب
اللي ع المرجيحة يركب
واللي ف الدحديرة جاري
م الضحي لحد العصاري
كنا فلا بلادنا القريبة
اهل حب واهل طيبة
كنا ع الأخلاص بنصحي
اللي يكتب شعر فصحي
واللي عامي والمهندس
والطبيب ويا المدرس
كلنا كنا بنحلم
كانه خير والله اعلم
فجاة ضاع العمر مني
وابتديت اتمني اني
نفسي اخلص من همومي
واترمي ف حضنك ياكومي
الي (توحيد) مسحراتية قريتنا قشطوخ تلا منوفية
باقولهالكم وبالتاكيد
مفيش رمضان بدون توحيد
واقولها كمان
واعيدهالكم بعلو الصوت
دي ليلة تفوت
بدون صوتها وطبلتها
دي تبقي اكيد
مهش محسوبة من رمضان
لأنك ف الحقيقة كمان
حتبقي جعان
ولو تصحي علي صوتها
ح تتهنا وتتسحر
ولا مرة ح تتاخر
وحتصلي وتتشطر
وتدعي ربنا وتشكر
وتتجهز عشان تفطر
ويوم العيد
حتتعطر وتبقي سعيد
ولبسك كله يااستاذ
جديد ف جديد
وتعرف ان دة كله
بفضل الطبلة والأناشيد
بتاعت عمتك توحيد .
==============
ياأولياء الله
=====
مجروح ومالي دوا
غيركم ياأوليا
لما رماني الهوا
ووقعت في الخية
مجذوب عطاني حكم
وهيا موصوفة
للي خلاص اتقتل
ومعدلهوش دية
قال الحكيم ليا
يامريدي ياحبي
لو لسة عندك خجل
أو لسة بتخبي
حالك حيفضح هنا
كل اللي في قلبك
وان زاد عليك الضنا
راح ينجدك ربك
بالذكر راح نشغلك
طوالي ياعمي
بالليل تقول الزجل
في حب ال البيت
وف كل احبابه
تنزاح همومك كدة
بالفصحي والعامي .
========
ياريتني مداح
======
مدح النبي غية
والحب دة هدية
صلوا عليه دايما
هو ضيا عينيا
دي صلاة ومفروضة
وان كنت في الروضة
يبقي تصلي عليه
صاحي وف الأوضة
وان كنت ف الحضرة
مع صاحب الذكري
صلي ياسيدي وقول
الفين صلا حاضرة
واذكر يامولانا
ان النبي جانا
قبل الصلا والصوم
بالحب وصانا
مدحه دا نور عيني
وحياتي وسنيني
صلي عليه واسمع
ف المدح تفنيني
انا مش حقول شعري
ولا راح يطيب ذكري
الا اما اصلي عليه
يادنيتي وعمري .
اللهم صل وسلم وبارك عليه .
============
هو مين ؟
====
هو نور واضح مبين
هو خير المرسلين
هو محمود هو احمد
رحمة للعالمين
هو سيد الأمة طه
حوضه في الجنة سقاها
كفه منه الكل يشرب
سلسبيل لما رواها
صلي ياموحد وقول
اني مداح للرسول
اصلي طمعان في الشفاعة
والرجا منه القبول .
اللهم صل وسلم وبارك عليه .
============
اللهم صل وسلم علي سيدنا النبي من الألف للياء
===================
أ
النبي في القلب مبدأ
لو جميعا كنا نبدأ
بالصلاة علي نبينا
يبقي لينا أحن مرفأ
ب
للنبي في القلب حب
للبدن والروح دا طب
صلي رب الكون عليه
بيه يفرج كل كرب
ت
النبي في القلب ثابت
واللي راسي ف حبه شابت
صل يامسلم عليه
تلقي خير الحب نابت
ث
النبي لو حبه حادث
أو قديم وملهش ناكث
صل يامسلم عليه
تنجا من شر الحوادث
ج
النبي هو السراج
حبه عندي اغلي تاج
صل يامسلم عليه
لامساس ولااعوجاج
ح
النبي مسكه دا فاح
هو دا زين الملاح
صل ياموحد عليه
تبقي من اهل الفلاح
خ
النبي حبه دا راسخ
واللي صلي ياناس عليه
استحالة يبقي دايخ
د
النبي ف القلب قاعد
وانت راكع ولا ساجد
صل يامسلم عليه
نوره لازم راح تشاهد
ذ
النبي لقلبك ملاذ
لو حقيقي بتستعاذ
صل ياموحد عليه
حتي لو ابليس فولاذ
ر
النبي ف قلوبنا نور
كلمته هيا العبور
صل يامسلم عليه
تبقي من اهل السرور
ز
النبي للحب حاز
واللي حبه هو فاز
صل يامسلم عليه
تبقي مؤمن بامتياز
س
النبي في القلب ماس
واللي يوم ع الصعب داس
لو ف يوم صلي عليه
يملا قلبه بالحماس
ش
النبي خلقه البشاش
واللي مزنوق ف المعاش
لو يصلي ياناس عليه
يلقي خير وفلوسه كاش
ص
النبي في الحب اخلص
مرة عمم مرة خصص
واللي صلي ياناس عليه
عمره مايعرف يهجص
ض
النبي مدده يفيض
ع البراري والصعيد
لما صلي الناس عليه
غرقوا ف الخير الشديد
ط
النبي في القلب رابط
حبه لصحابه حاطط
نور لمن صلي عليه
واللي باعد واللي شاطط
ظ
النبي للقلب حافظ
والحبيب هادي وواعظ
واللي صلي ياناس عليه
وعظه فوق كل المواعظ
ع
النبي ف القلب سامع
صوت سلامنا ونوره ساطع
صل يامسلم عليه
تبقي للخير كله جامع
غ
النبي ف القلب سابغ
فضله ومشعشع وبالغ
صلوا ياحجاج عليه
قبل مانحرم في رابغ
ف
النبي للقلب مسعف
واللي داق طبعا حيعرف
ان من صلي عليه
من بحور الخير حيغرف
ق
النبي في القلب باقي
هو ع الحوض اللي ساقي
واللي صلي ياناس عليه
هو دا فايز وراقي
ك
النبي لو لينا شاكي
نبقي هلكي والتباكي
مش حينفع او يفيد
الا لو صليت عليه
ل
النبي سيد الرجال
معدن الجود والنوال
صل ياموحد عليه
لجل مايزيد الوصال
م
النبي والقلب هام
لما حبه واستقام
وابتدا يصلي عليه
لما شافه ف المنام
ن
النبي ف القلب زين
شاهدي المختار ياعين
صل يامؤمن عليه
تحظي بالنصر المبين
ه
النبي ف قلوبنا نوره
عم ع العالم سروره
صلوا ياحضار عليه
تغرفوا الخير من بحوره
و
للنبي ف القلب تقوي
بيها تكشف كل بلوي
لما حتصلي عليه
تعرف الأسرار وتقوي
لا
النبي ف القلب يحلا
وانت في نوره حتعلا
صل ياموحد عليه
عند ربك تبقي اغلا
ي
النبي ف القلب ضي
خلا شعري ملهش زي
أصل انا صليت عليه
م الضحي لحد العشي .
اللهم صل وسلم وبارك عليه .
=============
رمضان
=====
يفوت رمضان ورا التاني
واصومه وسط خلاني
وباتعبد بقرآني
وليله الحلو خلاني
اقومه وتبقي اجفاني
مخاصمة النوم وحارماني
من العشاق وسايباني
مع ربي
لأن العشق رباني
يفوت رمضان ورا التاني
وبلقاني
ف ليلة القدر ياخوانا بشر تاني
ملاك طاير بوجداني
وليلة العمر
دي بالأمر ساحراني
يفوت رمضان ورا التاني
والاقيني بجسد تاني
بروح تعطف علي المساكين
بشمعة قايدة ف كياني
بطفل فانوسه نور لي
طريق النور وعلاني
بحبة مية فطرني
وتورة تمر أسواني
يفوت رمضان ورا التاني
ونرجع ف الحسين نفطر
بحبة فول ولا الضاني
وسيدنا مقامه متعطر
بريحة تمللي شداني
وف الأزهر
بنتسحر
وع القهوة
دا شاي اخضر
ودي كنافة
ودي قطايف
علي صواني
يفوت رمضان ورا التاني
وصوت طبلة تسحرني
ومدفع ع الفطار جاني
وخلاني
وخلا الكل يتمني
يعيش رمضان ورا التاني
ولايفوتنا صيام أبدا
ونبقي ف فرحة طول العام
ملايكة احنا
ومن قدام
وليلي ف زفة رمضاني
وليلي ف زفة رمضاني .
================
عيد الأضحي
======
يعدي الأضحي بالبركات
عليكم والله وعلينا
ويملا دارنا بالنفحات
اله الكون ويحمينا
ونتمني علي عرفات
نكون صحبة ويحيينا
يعدي الأضحي ع الحجاج
وهما ف الجبل واقفين
ولما يطوفوا بالأفواج
ولما يلبوا أو ساعيين
ح تلقاهم كما الأمواج
يارب تزوروا قولوا آمين
يعودها عليكوا بالصحة
وتتهنوا ونتهنا
وللي بالخروف ضحا
ينول كل اللي يتمني
وبالعامية والفصحي
بقول له معادنا ف الجنة
يعدي الأضحي واسألكم
علي اللي مشيوا وفاتونا
واقول يارب يرحمكم
عيوني بيكوا مفتونة
ودايما والله فاكرينكم
برغم ان انتوا سيبتونا .
============
يامكة
===
وريحتك يامكة وصورتك ف بالي
وشفتك حقيقة وحلم ف خيالي
ودايما بافكر أزورك تمللي
وبفضل ف بعدك أعد الليالي
عشقتك حقيقي ياارض الحجاز
لأن ف ترابك حبايبي العزاز
نبينا وصحبه وزينة الرجال
وابويا بدفنه حداهم دا فاز
وتيجي المواسم عليا بذكري
واكتب قصايد واعبر بفكرة
وشوقي لمكة تملي يزيد
وبحلم بحجة واكون جي بكرة
يعودها عليكم جميعا بخير
وتلقوني بكرة اليها باطير
واهرول وباسعي وباحرم واطوف
ويارب هون علينا العسير
ويارب هون علينا العسير .
=====================
علي باب سيدنا الرفاعي
======
(1)
فقير علي باب الرفاعي وقف
ودمعه سايل ولا بطل ف يوم ولا جف
رمي همومه ورا ضهره
وبص ع الشباك وعرف
ان المحبة تتكتب ف صحف
لكنها ف القلب فوق الوصف
ناجي الهه وقال له
كل عيان خف
عبدك يارب ضعيف
والقوة بدونك ضعف
نجي بفضلك عبيدك
يارب يوم الزحف
=========
(2)
فقير وواقف علي باب الرفاعي ياهو
ضعيف وعارف غلطته
وبدوا توبة قبل ماتحاسبوه
ولما دمعه نزل
قاموا الأحبة خدوه
لحد سيدنا الرفاعي
يمكن هناك يداووه
وبنظرة م الشباك
يعرف دواه ويتوه
قال الأطبا الأفاضل
ياما الكرام نصحوه
يرمي همومه
يسيب نومه
ينادي ياهووو
يارب توبة نصوحة
وتغفر له
ومين شاهدوه .
يارب الستر والصحة
كفاية ياسيدي باللي معاك
تعيش مستور
بحبة ستر م اللي حداك
ح تبني قصور
وبالصحة اللي ربي عطاك
تعدي بحور
وأما اللبس ف دلابك
فدا حيدوب
ويبقي يدوب
مع الكستور
مجرد خرقة مرمية
قديمة
والدولاب مهجور
يامحلا العيشة بالصحة
وطوالي كدة مسرور .
=============
الخاتمة (في حب رسول الله)
ف رحابك ياحبيبي بروح
وبسافر وتقول الروح
للمسك من الروضة يفوح
ياحبيبي يارسول الله
علي بابك مرغت الخد
ودموع ياما وملهاش حد
نزلت ع الشباك وبجد
مشتاقلك يارسول الله
ف الروضة وانا كنت باصلي
مش عارف ايه اللي حصلي
دي الأشواق في القلب تخلي
حبك نور يارسول الله
ف المحراب القلب اتعلق
لما الجذع دا حن وغرق
بدموعي المنبر والخندق
ف مدينتك يارسول الله
من نورك مستني النظرة
وارجع بيها معايا البشري
لحبايبي وناسي والأسرة
واوعدهم يارسول الله .
واوعدهم يا رسول الله .
===========
عنوان الكتاب : ليلي في الحضرة
النوع : شعر عامي
الكاتب : البدري عبد الرحمن زايد
اسم الشهرة : شيخ السجالات . البدري زايد
الطبعة : الاولي
رقم الايداع : 21789/2019
مكتبة الندي بطنطا
تصميم الغلاف للفنان المبدع / عبد الرحمن البدرى
اهداء
الي روح ابي الغالي
الي روح أمي الحبيبة
الي روح اختي الكبيرة
الي زوجتي العزيزة
الي ابنائي الاعزاء
الي كل احبابي
اهديكم باكورة دواويني
ليلي في الحضرة
البدري زايد
شيخ السجالات
الشاعر في سطور
الاسم : البدري عبد الحمن زايد
الميلاد : قشطوخ تلا منوفية
الأقامة : طنطا غربية
المؤهلات العلمية : بكالوريوس اقتصاد وعلوم سياسية جامعة القاهرة
1978
دراسات عليا في التخطيط الاقتصادي كلية التجارة جامعة طنطا
1983
دراسات عليا في النظم السياسية والاقتصادية جامعة القاهرة 1987
الانشطة الأدبية : عضو عامل في رابطة الزجالين وكتاب الأغاني
عضوية رقم 2811
اللقب : شيخ السجالات
========================
الي ابي رحمه الله الذي وافته المنية وهو يؤدي مناسك الحج
===============
لما ملك الموت سعالك
وانت ف نهاية المطاف
قوللي يابا ازي حالك
قوللي هل م الموت نخاف ؟
قلبك الطيب ساعتها
دق طبعا لما شاف
مقعد الصدق الحقيقي
وانت في نص الطواف
كنت ساجد ولا واقف ؟
كنت فرحان ولا خايف ؟
كنت ساعي ولا طايف ؟
كنت حاسس يالحرارة ؟
ولا شاعر بالجفاف ؟
كنت بالاحرام وحاسس
بالزحام وسط الخلايق ؟
ولا متحلل ولابس ؟
كنت خالي البال ورايق ؟
ولا مشغول بالقراية
ف سورة الرحمن وقاف ؟
دول صحابك من زمان
لما كنت بتقرا بيهم
واسمع الصوت والحنان
لما كنت تصلي بينا
بعد ماتخلص ادان
قوللي ريحة الجنة ايه ؟
ماانت طول عمرك بتسعي
قولل يابا ازاي وليه ؟
شفت روضة بجد واسعة؟
أد ايه طيبتك يابيه ؟
قوللي مين صلي عليك؟
م الحجيج أو شاف عينيك
لما روحك وبأمان
للاله فاضت كمان
سلمت والأمر هان
ربنا كان بيناديك
دعوتي ليا وليك
نفسي يابا ابقي معاك
بشتهي بسمة رضاك
الف رحمة ونور عليك
ألف رحمة ونور عليك .
القيت في ندوة رابطة الزجالين وكتاب الاغاني بالقاهرة 30/7/2019
=============================
في النيل
=====
قالوا النيل مليان اسرار
وبيتكلم ليل ونهار
واما تحب تناجي النيل
ركز واوعي كمان تحتار
واعرف امتي وفين وازاي
مين حيكون وياك او جاي
واهرب م الضوضاء لو تعرف
واشرب لك كباية شاي
رحت ف قبلي كتير وقليل
وسمعت علي النيل مواويل
لكن أجمل رحلة نيلية
مع حبايبنا اليوم بالليل
وف أجمل بقعة وف الصيف
وف لنشاتك يابني سويف
شفت النيل بمشاعر تانية
روضة حقيقي وقلب نضيف
وببركة احبابنا كمان
سيبنا العالم والسكان
والأنوار أهي هلا علينا
رغم بعادنا عن العمران
ويا الليل اتحرك قلبي
حسيت اني بجد بلبي
وبطوف واسعي ف قلب النيل
اكتبهالي تمللي ياربي
شفت النيل وماليه النور
والمركب بالخير مغمور
اللي يسبح واللي يصلي
واللي بدعوة ياناس مستور
صوت اللنش كانه سكون
والنيل مالي علينا الكون
فيض من ربك هو العاطي
أمره مابين الكاف والنون
والخير جاي من جوة القلب
والأنوار بتلالي يارب
ديم البركة يارب علينا
ويدوم بيننا كمان الحب .
القيت في رابطة الزجالين بالقاهرة في 9/7/2019
=========================
ليلي
===
ليلي ف الحضرة بتسقي
من ايديها الحب صافي
هيا محبوبي وعشقي
والحبيب امتي يوافي؟
ليلي طافت ع الحياري
خلت المشتاق يميل
والجميع صاروا سكاري
والغرام هو الدليل
ليلي قالت يامريدي
عندي م الأحباب كتير
كلهم عشاق ياسيدي
بس انا شرطي عسير
شرطي اني مليش شريك
جوة قلبك أو ف بالك
لاحظ اني باشتريك
واشتري نفسك ومالك
شرطي انك تبقي زاهد
لو حتلبس حتي خيش
تفني ذاتك نبقي واحد
لو تحب انك تعيش
شرطي انك ف الليالي
تبقي تايه ولا هايم
وانت ف الوجد وقبالي
تبقي محروم ولا صايم
واعرف ان القرب حالة
عاوزة منك الاحتمال
واوعي تبقي عويل وعالة
واحترس م الانشغال
اعرف ان الذكر واجب
للحبيب ويا السهر
ناجي سبح بس راقب
نوره في ضي القمر
اعرف ان الصد عندي
يبقي موت
واوعي تحكي سر وردي
حبنا عاوز سكوت
واسأل اللي عشقوا قبلك
واللي ذاعوا السر فين ؟
راحوا تاهوا دول زمايلك
وقعوا في نفس الكمين
ليلي طافت ع الخلايق
صبت النفحات في كاس
نبهت فينا اللي فايق
صحت الغفلان ياناس
ليلي طافت ع القلوب
خلت المشتاق يفوق
واحنا دوبنا فيها دوب
والغرام هو اللي فوق
ليلي ف الحضرة تغني
واحنا ليها مداحين
واللي فايق فيكوا عني
يدعي واحنا نقول امين
والحبيب لما تجلي
ليلي ف الحضرة تقول
انت يامولايا اولي
ف الحبيب تاهت عقول
قالت ان الرب واحد
والقلوب تعشق ضياه
باعبدك والكل شاهد
ان عقلي ف يوم ماتاه
ان عقلي ف يوم ماتاه.
أنا الأديب
أنا الأديب الأدباتي
وكلمتي هيا حياتي
لاباعرف ارقص ولا اطبل
من صغري شاعر يااخواتي
أنا الأدب والشعر اهو شاب
لكن قلبي لسة شباب
وان قلتلي فين دواوينك
حتلاقي شعري ف كل كتاب
اناالأديب واسال عني
وكلمتي تعكس فني
ولو حضرتم ويانا
ف الندوة طبع حنغني
انا الأديب والحظ مفيش
لكني ف المحراب درويش
ومهما ضاقت ويايا
باتمني بس عشانكوا اعيش
أنا الأديب جيت من طنطا
لاعندي فشر ولا اونطة
وقلمي عمره مابينافق
ويبخش ف جدال وبيزنطة
أنا الأديب سيدنا السيد
غرقان ف مدده ومتأيد
ف جدول المحاسيب مقبول
ولما ازوره باخد جيد
انا الأدب روحه ف دمي
وراضعه طبعا عن أمي
وبخبرتي جودته كمان
بالفصحي باكتب والعامي
انا الأديب للرابطة سعيت
لأني طبعا كدة حسيت
ان انتوا أهلي وخلاني
والزجالين فتحوا لي البيت
باشكركوا جدا يااخوانا
وادعيلكوا دايما ف الجنة
نكون صحاب وف يوم الدين
اشوفكوا افضل مااتمني
اشوفكوا افضل مااتمني
القيت في رابطة الزجالين وكتاب الاغاني بالقاهرة في 9/7/2019
القيت في نادي ادب طنطا
القيت في الصالون الثقافي لمهرجان الحب والسلام في دمنهور بحيرة
في 22/8/2019
=====================================
عن مؤتمر التصوف العام بالازهر الشريف بالقاهرة 18/9/2019
===========================
لما سيدنا الشيخ دعانا
قلت يبقي الفرح جانا
والهنا ضلل علينا
والضيوف اللي معانا
سيدنا قاللي بكرة تحضر
مؤتمر حيقيمه لازهر
ع التصوف والطريقة
واعرف ان الدين حقيقة
وف شريعته مبتغاه
هو توحيد الاله
والتزم جوة المقام
بالهدوء والاحترام
والسكينة والتخلي
والزم الأذكار وصلي
ع النبي خير البرية
وانسي ذاتك لو شوية
والمريد بيزيد بهاه
لو ف حالة الوجد تاه
والطريق كله محبة
والسلام بين الأحبة
واطعم المسكين تلاقي
ان دة هو اللي باقي
واقرا قرانك ووردك
يبقي يابختك ياسعدك
واعرف ان فروضنا خمسة
الشهادتين بس لسة
الصلا تحافظ عليها
والفلوس دي تزكي بيها
والصيام دا علينا واجب
ف المشارق والمغارب
لو قدرت ياريت تحج
واعف انك لو تهج
م الدنايا والمعاصي
مش حتلقي القلب عاصي
والتصوف مش نفاق
ولا ترقيع الهدوم
ولاتغرق ف الرياء
ولا تهرب م الهموم
ولا تسكت ع المظالم
ولا ترضي بالمغانم
التصوف ف السماحة
واللطافة والصراحة
والتصوف ف الجهاد
لجل تذكير العباد
هو دا اصل التصوف
مش بازور ولا ازيف
والخلاصة ف الختام
توصيات سيدنا الامام
ان مهر الجنة غالي
عاوزة سهار الليالي
اللي صاموا واللي قاموا
واللي ليلهم لم يناموا
مهما قال الناس وعادوا
ف المحافل ولا زادوا
اعرف انك م المهالك
تنجا لو مخلص وسالك
تنجا لو مخلص وسالك .
===============================
صباح الفل
=====
صباح الفل كالعادة
عليكم خير وبزيادة
يااحلي صحبة ف الدنيا
يااهل الحب ياسادة
صباح يسري كما النسمة
وعارف كل شيء قسمة
ولاكن جيت اهنيكم
علي فرحتكو والبسمة
صباحكوا احلي م السكر
صباحكوا كلته عنبر
وباستني صباحكوا واقول
صباحكوا ع الوجود نور
صباح الحب تسقوني
ومهما فيكوا يلوموني
ح اغنيلكوا علي الأرغول
دة عقلي فيكوا وجنوني
صباح اخضر كما عودك
ياراسمة الورد ف خدودك
عشان خاطرك انا صاحي
وواقف خدمة ف حدودك
باصبح والصباح لله
وليكي ف العيون طلة
تخلي الفجر يتبسم
يصبح م انتي ليه هلة.
==================================
الصلا ع الزين
=======
لو حبيت انك تتهنا
تشبع م الجنة وتتغنا
لو حبيت قلبك يطمن
وتشم نسيمها وتتمني
انك ويا الحور العين
وملايكة معاك ع الصفين
بيباركولك ويغنولك
صلا ع الزين الصلا ع الزين
لو صلينا عليه علطول
قلبنا بيه حيكون مشغول
واما تملي عليه بنسلم
حيكلمنا كمان ويقول
دولا حبايبي ليوم الدين
مشافتهمش صحيح العين
لكن سيدنا النبي يااخوانا
وصا صحابه علي الحلوين
اللي يصلوا عليه ف زمانا
واتبعوه علي نفس السنة
قال احبابي وانتوا صحابي
ومعادنا معاهم في الجنة
صل وسلم ع المختار
مش حتقرب يوم م النار
وييسر لك ربنا حالك
وتكون دايما م الابرار.
القيت في رابطة الزجالين بالقاهرة 2/7/2019
=============================================
عالجوا
====
ياعيوني اللي جفاها النوم
واستسلمتي لأهل اللوم
هزي بلدنا ان كانت صاحية
تصحي تفز تهب تقوم
مش حنسيب العمر سنين
ونضيع تاني ليوم الدين
واللي ماداقش النوم من جوعه
حيشوف رؤيا مع الجعانين
والجعانين لو قاموا ياناس
يبقي عليها تقولوا خلاص
لايخلوا لا اخضر ولا يابس
دول فاقدين طعم الأحساس
بتحبوها طب صحوها
رشوا عليها المسك احموها
خدوا بايديها لو عاوزين
من امراضها ياناس عالجوها.
مؤلف الغناوي
ياللي انت ناوي
تقول غناوي
هاتلك مؤلف
يقول حكاوي
ويكون مولف
علي القهاوي
وكمان ملحن
بالطبلة حاوي
يدق بيها
ويكون مخاوي
وع الربابة
عازف وغاوي
وجن حاضر
وبخور وجاوي
افشر وهلس
وافتح مطاوي
طبل وهيص
وقول فتاوي
واوعي تفتش
علي البلاوي
كل الل عامل
طبيب مداوي
ولا عمره يقبض
تمن يساوي
اصل الل يكدب
سعره مساوي
هو الل يكسب
والكورة يلعب
واديله نمرة
يامستكاوي (الناقد الرياض نجيب المستكاوي ودرجات لاعبي الكرة )
ياللي انت ناوي
تقول غناوي
هاتلك مؤلف
يكون مخاوي .
==================================
قولي
===
قولي كمان
دة انتي حنان
شعرك كله جنان ف جنان
وكمان عودك غصن البان
ياللي مليتي الفجر ادان
قولي وغني علي الأغصان
واسقي بمية بحرك شطي
حاسبي ياشابة لما تخطي
واعرفي ان الشاطر عاوز
يوصل ودك ولا يتجاوز
عاوز يخلص م الحرمان
قولي كمان
===================================
الي زوجتي العزيزة
=========
احضني الباقي ف عمري
احضني الأيام ف شعري
ياللي عشقك هو روحي
والهوا ف شيبي وصغري
احضني الحب الحقيقي
وابعدي الخوف عن طريقي
ياللي احلامك بتسري
انتي احلامي وصديقي
دة انتي عمري الماضي كله
وانتي ليا الباقي ضله
وانتي ياام ولادي خيره
وانتي ياسمينه وفله
حطي روحك بين كفوفي
وانتي في دمك حروفي
وانتي نور الكون ف دربي
وانتي امني وانتي خوفي
واسبقيني بالف خطوة
ياللي حبك ليا غنوة
ان انا باقي ف روحك
وانتي ليا حاجة حلوة
همسك المليان حياة
يترسم فوق الجباه
يبقي ليا الف شارة
والشارات طوق النجاة
فاكرة ياما ازاي قاسينا
والحياة كتبت علينا
اننا نقاسي ونتعب
شيلنا روحنا بين ايدينا
بس ربك لجل حكمة
لو بتبقي الدنيا ضلمة
يطلع الفجر ف طريقنا
والنهار يسبق ببسمة
لو بعدتي مرة عني
مين معايا راح يغني؟
ولا مين يسمع بكايا ؟
دة انتي شعري وانتي فني .
القيت في رابطة الزجالين بالقاهرة 10/9/2019
=====================================
حبيب العمر
=======
ياحبيب العمر جرب
نبتدي صفحة جديدة
خلي سكتنا تقرب
والحياة تبقي سعيدة
ياحبيب القلب شوف
خلي احلامنا حقيقة
حني ويايا الكفوف
ضمني ضمة بريئة
ياحبيب العمر خلي
روحك الصافية معايا
احلي مرة لما اصلي
وانت بتأمن ورايا
ياحبيب العمر خايف
اني اتوه منك ياروحي
متداريش عني الشفايف
والعيون لتزيد جروحي
مهما كانت روحي فيكي
مهما قاد القلب نار
مستحيل ارجع اليكي
ياللي ساقياني المرار
قولوا ع الدنيا السلام
قلبي حبك لما دق
وابتدا هو الغرام
وانتي لم قلتيله لأ
قولوا ع الدنيا عوافي
قلبي حبك مش بخاف
والهنا كله موافي
حبنا كله عفاف
قولوا للاحباب ياعالم
اننا اهل الغرام
وان ربي بيا عالم
واني عاشقك والسلام
قولوا عمري ازاي بديته
هيا نظرة من عينيه
واعرفوا اني نهيته
لما عمري ضاع عليه
لما عمري ضاع عليه .
================
الي صديقي
======
تحياتي تحياتي
ياحتة حبيبة من ذاتي
ياخويا وعزوتي واهلي
ياناسي الحلوة ياخواتي
ياحتة قريبة مني
وساكنة القلب والنني
اتوه منك تلاقيني
اغيب عنك تلاغيني
لو احتجتك
اوام والله بتجيني
لو احزن
برضه تواسيني
ولو بافرح
بحس بفرحتي جواك
وانا طبعا بشيل همك
وروحي فداك
يااقرب ليا من ناسي
انا اشيلك علي راسي
يامنطقة... الغاز حيخش حدانا
قالوا الغاز حيخش حدانا
قلت ياناس الفرح اهو جانا
توبة نصوحة بعد النوبة
مش راح اشيل تاني الأنبوبة
ولا فيها مخزن ولا طوابير
وحنخبز بتاو وفطير
اصل الغاز حيخش ياناس
ولا حنشيل الهم خلاص
ولا نتزاحم ولا نتراخم
ولا الاستبن عاوز تغيير
ولا عربية تنادي عليا
ولاحتمرمط ف الطوابير
ولا ف الشتا تحصل لك ازمة
ولا وانا بجري انسي الجزمة
واخد الأنبوبة تجرجير
ولاعيل وملوش ميت لازمة
نازل خبط ياناس وجعير
كل امالي شوية غاز
وبعزة نفس وبوتاجاز
اصل انا راجل حلمي بسيط
نفسي ف هدمة وحتة بيت
مليان ستر وعيش وسميط
وبابوس ايدي وش وضهر
لما اصلي واقوم الفجر
وارضي برزقي وجنب الحيط
بامشي ودوغري باروح الغيط
طول ما المولي ساترها معانا
مش راح نحمل هم عشانا
ايوة ياناس الفرح اهو جانا
اصل الغاز حيخش حدانا.
===================
دموع العواجيز
=======
مهما تتصابي خلاص
الزمان فرمك وداس
للي زيك ف الحكومة
هيا طلقة من رصاص
مهما تعمل حيسبوك
تمشي ولا حتي يجيبوك
يسالوك ازاي وامتي
غبت ليه وحياة ابوك
مين بيسال عنا يابا
دة احنا م الناس الغلابة
اللي كبروا واللي عانوا
واللي قاسوا م الديابة
حتي أولادنا سابونا
زي مايكونوا باعونا
للزمن يقضي علينا
ولكلابه يعذبونا .
مع كل الاعتذار للعواجيز امثالي .
====================
أطيب الأمنيات لحفيدتي وحفيدي
============
عيشي كل العمر عيشي
ياحفيدتي يالابسة ريشي
ياللي باتمني تكوني
فرحة ليا متنتهيشي
اجري ف الخطوة بسرعة
اجري ساندك بس اوعي
بعدها تحاسب وتجري
يا حفيدي بخطوة واسعة
واسبقوني ف الخطاوي
واسمعوا مني الحكاوي
دي الحكاية اللي بقولها
جدي قالهالي ف غناوي
خدت منه الحكمة ياما
عشت ف الدنيا بكرامة
حتي عكازه ساعدني
لما عديت بالسلامة
اوعي يابني م الغرور
او تسيب الأرض بور
او تقول دة عجوز وخرف
وافهم المعني وثور
وانتي ياسايقة ف دلالك
وابتسامتك وف جمالك
بكرة قولي جدو قاللي
ان راسمالك عيالك
انتوا نور العين وحبي
وانتوا ليا نبض قلبي
وانتوا احفادي وهدية
بادعي تحميهم ياربي .
ذكريات مع سيدي علي الكومي ومقامه العامر بالبندارية وهي احدي قري مركز تلا منوفية ومتاخمة لقريتنا قشطوخ تلا منوفية.
==================================================
عاوز اخلص من همومي
واترمي ف حضنك ياكومي
ياللي ساكن بندارية
وف مقامك مدارية
كل احلام السنين
والصبايا الفلاحين
اللي في ساحتك خدوني
طيروا النوم من عيوني
فيها شط الذكريات
فيها احلي الامنيات
لما كنا صغار بنلعب
اللي ع المرجيحة يركب
واللي ف الدحديرة جاري
م الضحي لحد العصاري
كنا فلا بلادنا القريبة
اهل حب واهل طيبة
كنا ع الأخلاص بنصحي
اللي يكتب شعر فصحي
واللي عامي والمهندس
والطبيب ويا المدرس
كلنا كنا بنحلم
كانه خير والله اعلم
فجاة ضاع العمر مني
وابتديت اتمني اني
نفسي اخلص من همومي
واترمي ف حضنك ياكومي
الي (توحيد) مسحراتية قريتنا قشطوخ تلا منوفية
باقولهالكم وبالتاكيد
مفيش رمضان بدون توحيد
واقولها كمان
واعيدهالكم بعلو الصوت
دي ليلة تفوت
بدون صوتها وطبلتها
دي تبقي اكيد
مهش محسوبة من رمضان
لأنك ف الحقيقة كمان
حتبقي جعان
ولو تصحي علي صوتها
ح تتهنا وتتسحر
ولا مرة ح تتاخر
وحتصلي وتتشطر
وتدعي ربنا وتشكر
وتتجهز عشان تفطر
ويوم العيد
حتتعطر وتبقي سعيد
ولبسك كله يااستاذ
جديد ف جديد
وتعرف ان دة كله
بفضل الطبلة والأناشيد
بتاعت عمتك توحيد .
==============
ياأولياء الله
=====
مجروح ومالي دوا
غيركم ياأوليا
لما رماني الهوا
ووقعت في الخية
مجذوب عطاني حكم
وهيا موصوفة
للي خلاص اتقتل
ومعدلهوش دية
قال الحكيم ليا
يامريدي ياحبي
لو لسة عندك خجل
أو لسة بتخبي
حالك حيفضح هنا
كل اللي في قلبك
وان زاد عليك الضنا
راح ينجدك ربك
بالذكر راح نشغلك
طوالي ياعمي
بالليل تقول الزجل
في حب ال البيت
وف كل احبابه
تنزاح همومك كدة
بالفصحي والعامي .
========
ياريتني مداح
======
مدح النبي غية
والحب دة هدية
صلوا عليه دايما
هو ضيا عينيا
دي صلاة ومفروضة
وان كنت في الروضة
يبقي تصلي عليه
صاحي وف الأوضة
وان كنت ف الحضرة
مع صاحب الذكري
صلي ياسيدي وقول
الفين صلا حاضرة
واذكر يامولانا
ان النبي جانا
قبل الصلا والصوم
بالحب وصانا
مدحه دا نور عيني
وحياتي وسنيني
صلي عليه واسمع
ف المدح تفنيني
انا مش حقول شعري
ولا راح يطيب ذكري
الا اما اصلي عليه
يادنيتي وعمري .
اللهم صل وسلم وبارك عليه .
============
هو مين ؟
====
هو نور واضح مبين
هو خير المرسلين
هو محمود هو احمد
رحمة للعالمين
هو سيد الأمة طه
حوضه في الجنة سقاها
كفه منه الكل يشرب
سلسبيل لما رواها
صلي ياموحد وقول
اني مداح للرسول
اصلي طمعان في الشفاعة
والرجا منه القبول .
اللهم صل وسلم وبارك عليه .
============
اللهم صل وسلم علي سيدنا النبي من الألف للياء
===================
أ
النبي في القلب مبدأ
لو جميعا كنا نبدأ
بالصلاة علي نبينا
يبقي لينا أحن مرفأ
ب
للنبي في القلب حب
للبدن والروح دا طب
صلي رب الكون عليه
بيه يفرج كل كرب
ت
النبي في القلب ثابت
واللي راسي ف حبه شابت
صل يامسلم عليه
تلقي خير الحب نابت
ث
النبي لو حبه حادث
أو قديم وملهش ناكث
صل يامسلم عليه
تنجا من شر الحوادث
ج
النبي هو السراج
حبه عندي اغلي تاج
صل يامسلم عليه
لامساس ولااعوجاج
ح
النبي مسكه دا فاح
هو دا زين الملاح
صل ياموحد عليه
تبقي من اهل الفلاح
خ
النبي حبه دا راسخ
واللي صلي ياناس عليه
استحالة يبقي دايخ
د
النبي ف القلب قاعد
وانت راكع ولا ساجد
صل يامسلم عليه
نوره لازم راح تشاهد
ذ
النبي لقلبك ملاذ
لو حقيقي بتستعاذ
صل ياموحد عليه
حتي لو ابليس فولاذ
ر
النبي ف قلوبنا نور
كلمته هيا العبور
صل يامسلم عليه
تبقي من اهل السرور
ز
النبي للحب حاز
واللي حبه هو فاز
صل يامسلم عليه
تبقي مؤمن بامتياز
س
النبي في القلب ماس
واللي يوم ع الصعب داس
لو ف يوم صلي عليه
يملا قلبه بالحماس
ش
النبي خلقه البشاش
واللي مزنوق ف المعاش
لو يصلي ياناس عليه
يلقي خير وفلوسه كاش
ص
النبي في الحب اخلص
مرة عمم مرة خصص
واللي صلي ياناس عليه
عمره مايعرف يهجص
ض
النبي مدده يفيض
ع البراري والصعيد
لما صلي الناس عليه
غرقوا ف الخير الشديد
ط
النبي في القلب رابط
حبه لصحابه حاطط
نور لمن صلي عليه
واللي باعد واللي شاطط
ظ
النبي للقلب حافظ
والحبيب هادي وواعظ
واللي صلي ياناس عليه
وعظه فوق كل المواعظ
ع
النبي ف القلب سامع
صوت سلامنا ونوره ساطع
صل يامسلم عليه
تبقي للخير كله جامع
غ
النبي ف القلب سابغ
فضله ومشعشع وبالغ
صلوا ياحجاج عليه
قبل مانحرم في رابغ
ف
النبي للقلب مسعف
واللي داق طبعا حيعرف
ان من صلي عليه
من بحور الخير حيغرف
ق
النبي في القلب باقي
هو ع الحوض اللي ساقي
واللي صلي ياناس عليه
هو دا فايز وراقي
ك
النبي لو لينا شاكي
نبقي هلكي والتباكي
مش حينفع او يفيد
الا لو صليت عليه
ل
النبي سيد الرجال
معدن الجود والنوال
صل ياموحد عليه
لجل مايزيد الوصال
م
النبي والقلب هام
لما حبه واستقام
وابتدا يصلي عليه
لما شافه ف المنام
ن
النبي ف القلب زين
شاهدي المختار ياعين
صل يامؤمن عليه
تحظي بالنصر المبين
ه
النبي ف قلوبنا نوره
عم ع العالم سروره
صلوا ياحضار عليه
تغرفوا الخير من بحوره
و
للنبي ف القلب تقوي
بيها تكشف كل بلوي
لما حتصلي عليه
تعرف الأسرار وتقوي
لا
النبي ف القلب يحلا
وانت في نوره حتعلا
صل ياموحد عليه
عند ربك تبقي اغلا
ي
النبي ف القلب ضي
خلا شعري ملهش زي
أصل انا صليت عليه
م الضحي لحد العشي .
اللهم صل وسلم وبارك عليه .
=============
رمضان
=====
يفوت رمضان ورا التاني
واصومه وسط خلاني
وباتعبد بقرآني
وليله الحلو خلاني
اقومه وتبقي اجفاني
مخاصمة النوم وحارماني
من العشاق وسايباني
مع ربي
لأن العشق رباني
يفوت رمضان ورا التاني
وبلقاني
ف ليلة القدر ياخوانا بشر تاني
ملاك طاير بوجداني
وليلة العمر
دي بالأمر ساحراني
يفوت رمضان ورا التاني
والاقيني بجسد تاني
بروح تعطف علي المساكين
بشمعة قايدة ف كياني
بطفل فانوسه نور لي
طريق النور وعلاني
بحبة مية فطرني
وتورة تمر أسواني
يفوت رمضان ورا التاني
ونرجع ف الحسين نفطر
بحبة فول ولا الضاني
وسيدنا مقامه متعطر
بريحة تمللي شداني
وف الأزهر
بنتسحر
وع القهوة
دا شاي اخضر
ودي كنافة
ودي قطايف
علي صواني
يفوت رمضان ورا التاني
وصوت طبلة تسحرني
ومدفع ع الفطار جاني
وخلاني
وخلا الكل يتمني
يعيش رمضان ورا التاني
ولايفوتنا صيام أبدا
ونبقي ف فرحة طول العام
ملايكة احنا
ومن قدام
وليلي ف زفة رمضاني
وليلي ف زفة رمضاني .
================
عيد الأضحي
======
يعدي الأضحي بالبركات
عليكم والله وعلينا
ويملا دارنا بالنفحات
اله الكون ويحمينا
ونتمني علي عرفات
نكون صحبة ويحيينا
يعدي الأضحي ع الحجاج
وهما ف الجبل واقفين
ولما يطوفوا بالأفواج
ولما يلبوا أو ساعيين
ح تلقاهم كما الأمواج
يارب تزوروا قولوا آمين
يعودها عليكوا بالصحة
وتتهنوا ونتهنا
وللي بالخروف ضحا
ينول كل اللي يتمني
وبالعامية والفصحي
بقول له معادنا ف الجنة
يعدي الأضحي واسألكم
علي اللي مشيوا وفاتونا
واقول يارب يرحمكم
عيوني بيكوا مفتونة
ودايما والله فاكرينكم
برغم ان انتوا سيبتونا .
============
يامكة
===
وريحتك يامكة وصورتك ف بالي
وشفتك حقيقة وحلم ف خيالي
ودايما بافكر أزورك تمللي
وبفضل ف بعدك أعد الليالي
عشقتك حقيقي ياارض الحجاز
لأن ف ترابك حبايبي العزاز
نبينا وصحبه وزينة الرجال
وابويا بدفنه حداهم دا فاز
وتيجي المواسم عليا بذكري
واكتب قصايد واعبر بفكرة
وشوقي لمكة تملي يزيد
وبحلم بحجة واكون جي بكرة
يعودها عليكم جميعا بخير
وتلقوني بكرة اليها باطير
واهرول وباسعي وباحرم واطوف
ويارب هون علينا العسير
ويارب هون علينا العسير .
=====================
علي باب سيدنا الرفاعي
======
(1)
فقير علي باب الرفاعي وقف
ودمعه سايل ولا بطل ف يوم ولا جف
رمي همومه ورا ضهره
وبص ع الشباك وعرف
ان المحبة تتكتب ف صحف
لكنها ف القلب فوق الوصف
ناجي الهه وقال له
كل عيان خف
عبدك يارب ضعيف
والقوة بدونك ضعف
نجي بفضلك عبيدك
يارب يوم الزحف
=========
(2)
فقير وواقف علي باب الرفاعي ياهو
ضعيف وعارف غلطته
وبدوا توبة قبل ماتحاسبوه
ولما دمعه نزل
قاموا الأحبة خدوه
لحد سيدنا الرفاعي
يمكن هناك يداووه
وبنظرة م الشباك
يعرف دواه ويتوه
قال الأطبا الأفاضل
ياما الكرام نصحوه
يرمي همومه
يسيب نومه
ينادي ياهووو
يارب توبة نصوحة
وتغفر له
ومين شاهدوه .
يارب الستر والصحة
كفاية ياسيدي باللي معاك
تعيش مستور
بحبة ستر م اللي حداك
ح تبني قصور
وبالصحة اللي ربي عطاك
تعدي بحور
وأما اللبس ف دلابك
فدا حيدوب
ويبقي يدوب
مع الكستور
مجرد خرقة مرمية
قديمة
والدولاب مهجور
يامحلا العيشة بالصحة
وطوالي كدة مسرور .
=============
الخاتمة (في حب رسول الله)
ف رحابك ياحبيبي بروح
وبسافر وتقول الروح
للمسك من الروضة يفوح
ياحبيبي يارسول الله
علي بابك مرغت الخد
ودموع ياما وملهاش حد
نزلت ع الشباك وبجد
مشتاقلك يارسول الله
ف الروضة وانا كنت باصلي
مش عارف ايه اللي حصلي
دي الأشواق في القلب تخلي
حبك نور يارسول الله
ف المحراب القلب اتعلق
لما الجذع دا حن وغرق
بدموعي المنبر والخندق
ف مدينتك يارسول الله
من نورك مستني النظرة
وارجع بيها معايا البشري
لحبايبي وناسي والأسرة
واوعدهم يارسول الله .
واوعدهم يا رسول الله .
===========
عنوان الكتاب : ليلي في الحضرة
النوع : شعر عامي
الكاتب : البدري عبد الرحمن زايد
اسم الشهرة : شيخ السجالات . البدري زايد
الطبعة : الاولي
رقم الايداع : 21789/2019
مكتبة الندي بطنطا
