الرئيسية
عاشق وطن النوع : شعر عامي الكاتب : البدري عبد الرحمن زايد
اهداء
الي روح اختي الحبيبة ...فاطمة
الشاعر في سطور
الاسم : البدري عبد الحمن زايد
الميلاد : قشطوخ تلا منوفية
الأقامة : طنطا غربية
المؤهلات العلمية : بكالوريوس اقتصاد وعلوم سياسية جامعة القاهرة
1978
دراسات عليا في التخطيط الاقتصادي كلية التجارة جامعة طنطا
1983
دراسات عليا في النظم السياسية والاقتصادية جامعة القاهرة 1987
الانشطة الأدبية : عضو عامل في رابطة الزجالين وكتاب الأغاني
عضوية رقم 2811
اللقب : شيخ السجالات .
الأعمال السابقة : ديوان ليلي في الحضرة .
===========================================
(1)
ياريت
=====
ياريت دامت ليالينا
وعشناها حكاوينا
وحبة شاي علي الراكية
ونار كاشفة بلاوينا
ياريت دامت لنا الأيام
بساطة وحب ويا سلام
ومحبوبتي تناديني
ولا نعرفش فيها خصام
ياريت دامت لنا الشلة
وصحبتها اللي كات فلة
ولا كولدير وتلاجة
يساوي الشرب م القلة
ياريت دامت ليالي الصيف
بلا مراوح ولا تكييف
ورباني كدة النسمة
ولا اتيكيت ولا تكتيف
ياريت الحب كان باقي
وكانوا فضلوا عشاقي
ولا غابوا ولا ثانية
وفضلت ليا اشواقي .
==============================================
(2)
مصر
====
مصر الغالية علينا تمللي
قايمة ف عز الفجر تصلي
وتسبح للخير والرحمة
وتقول طلي يافرحة وهلي
مصر حضارة وشعب اصيل
والأهرام والليل والنيل
والأزهر والجامعة تنادي
والأوبرا بتعزف مواويل
مصر المصنع ولا الغيط
والأوليا واهل البيت
والحارة الحلوة الشعبية
احلي جران والحيط ف الحيط
مصر ف ميمها معاني محبة
مصر ف صادها صدوقة وشابة
واستحملت عشانها كتير
راعية الكل وللخير صبة .
============================================
(3)
انا المصري
=========
انا شاهد علي عبورك
لأني جندي ف اكتوبر
وانا خدمة علي سورك
وانا مصري وانا سوبر
انا شاهد علي نصرك
لأني حتة جواكي
وفي كوخك وفي قصرك
يامصر يابلدي محلاكي
انا عاشق اغانيكي
يامصر ياحتة م الجنة
وروحي منورة بيكي
وشعبك حقه يتهنا
وانا شاهد علي حسنك
وحلوة المية من نيلك
جميلة الضحكة من سنك
وجوة النني بنشيلك
انا شاهد علي جيلك
يلف الدنيا ويخطي
بيتغرب وبيجيلك
اوام يرسي علي شطي
نجيب محفوظ حكاويكي
وثومة تغني موالك
ودة درويش يغيكي
وانا سجلت اقوالك
ولو تاه الجميع عنك
انا اشيلك علي راسي
كفاية تشعري انك
اميرة والزمن قاسي .
==============================================
(4)
اكتوبريات
=========
مصر طبعا أحلي شاهدة
ياللي شعرك فل خالص
واللي نصرك زي وردة
والبطولة عاوزة فاحص
مصر ف اكتوبر معاندة
للعدو اللي مكانش حاسس
اصلها جت بعد شدة
لما كنا سلاحنا ناقص
بعد نكسة واما عدا
جيشنا منها تنوا كابس
ع الأعادي بكل حدة
والجنود فكوا المحابس
ع المياه واشتالوا عدة
تحني ضهر اللي يعاكس
والنيران من غير مودة
والقذايف للي باصص
والمدافع مستعدة
والرصاص حاصد وراصص
وف زمانها كان لي جدة
زغرطت والضرب هايص
قالت اني ياابني راصدة
جايزة للي يجيني فايز
والنيران ع الجبهة تقصف
والعدو بقي منها خايف
واللهيب اللي بيكشف
المواقع للي شايف
واللي بيخطط ويعرف
فاهم انه جحيم وزاحف
واما صحنا الله اكبر
كانت الصيحة اللي هيا
والملايكة جات تكبر
ماهي نصرة ربانية
والسادات شاور واشر
بعد رؤيا ازهرية
من امامنا انه يعبر
والحماية ليه وليا
خدنا سينا وانتصرنا
والشهيد هو اللي فاز
هو حرر لينا دارنا
هو والشهدا العزاز
اللي غسلوا لينا عارنا
مش خسارة والله فيهم
ياخدوا نوط الأمتياز .
================================================
(5)
بعشقك
====
حبيبتي بعشقك ميري
وقلبي حتة من قلبك
ولو تعزف مزاميري
حتتغني بطول حبك
وحبك سر تدميري
وانا ماشي علي دربك
لأنك شاغلة تفكيري
وحارماني ادوق قربك
رميت حملي علي المولي
وقلت يخلصه منك
وليا ف الخلاص جولة
وجولاتي بعيد عنك
بافوز فيها وباستولي
علي قلبك ولكنك
بتترسمي وانا أولي
انا عاشق جمال فنك .
================================================
(6)
الوطن
=====
الوطن لو ضاع نضيع
ارضه بتساع الجميع
واما يوم منه نهاجر
برضه نرجع ف الربيع
الوطن ف قلوبنا حب
هو ام وهو اب
هو راعي لينا دايما
للي شايب واللي شب
الوطن هو اللي باقي
مصري او حتي عراقي
كلنا ف الهم واحد
اللي شارب واللي ساقي
الوطن ناده علينا
واحنا والله بايدينا
اللي نقدر ننقذه
مهما رحنا ولا جينا
================================================
(7)
يابلادي ياعشقي
============
بلادي في الهوا عاشقة
وجوة القلب والنني
ومهما ف غربتي باشقي
لايمكن تبعدي عني
وانا ف الغربة باتالم
وباحلم بيكي يابلادي
وطول العمر باتعلم
ياارض جدودي وولادي
انا لبلدي ح اغني واقول
كلام ف الحب ليه معني
وف الغربة وع الأرغول
ح اخلي الكل يسمعنا
انا بلادي دي اصل الكون
حضارتها بقالها سنين
كلامها ف ليلي كله سكون
وانا ف الغربة كلي حنين
وشعب بلادي حلاها
وطول عمره بيبنيها
ومتغرب وخلاها
عزيزة و ارضه يحميها .
================================================
(
الغربة
=====
الغربة مش بس السفر
او يوحشك ضي القمر
الغربة ان القلب يبقي
قلب ميت او حجر
الغربة ماهش في الوطن
ولا هيا بعد عن السكن
الغربة انك ماتلاقيش
جواك مشاعر او شجن
الغربة مش بس المكان
الغربة انك ف الزمان
تتوه ياصاحبي وتتلفت
لاتلاقي حب ولا امان
ح تلاقيها في الكلام
غربة حتي ف السلام
غربة ف طريقة حياتك
غربة ف الخوف والألام
والغريب لو حتي عاد
بعد صبر وطول عناد
راح يلاقي الكل قافل
قلبه من طول البعاد
هيا دي الغربة بجد
واللي ليها وضعت حد
قلت اهرب منها واجي
ولحبايبي فردت يد .
==============================================
(9)
بلدي
====
انا ف الغربة عشقت بلادي
شفت الناس ف النيل والوادي
واحلم اني عشانهم باكتب
واستمتع بيهم واتعذب
وباشوفهم وف كل مكان
همة قوية وناس جدعان
لو ساكن هنا جنبي ف طنطا
او كنت مسافر للسنطة
لو ف شبين دارك ومكانك
او ف دسوق فاتح دكانك
لو من بحري او علي كرسي
قاعد ف مقام سيدنا المرسي
والبحر بيحضن احلامك
او ف كنيسة العدرا مقامك
من اسيوط او حتي المنيا
انا جاي عشانك بالعنيا
وف اسوان متقلش لحد
ع النيل اللي ف حضن السد
واستحمل مني المرة دي
اني اتكلم عن امجادي
وف طنطا ف حضنك درويش
متغرب وعشانك اعيش
والوطنية ماهش اوهام
ولا حكاوي ورص كلام
دا انا ف الغربة عرفت ياامي
انك عايشة ف روحي ودمي
========================================
(10) .
عاشق وطن
========
رسمتك جوة ميت كراس
وشفتك في وشوش الناس
بهية والعيون خضرة
يامالكة القلب والأحساس
كتبتك سطر ف دموعي
ياساكنة جوة ف ضلوعي
وقلت ف حصة الانشا
يابلدي داانتي موضوعي
وعشتك ف العيون فرحة
عروسة توبها والطرحة
خضارهم بيه بتتغني
بلابل ف السما سارحة
حفظتك اية ف كتابي
وناسك جوة محرابي
وشاهر للطاغوت سيفي
وانا جندي مع عرابي
رويتك دم من دمي
يااغلي عندي من امي
يامعزوفة ف اناشيدي
انا العالم وانا العامي
وزفيتك مسا وصباح
وانا عامل وانا فلاح
ودقت المر علشانك
وعشقك هو دا المفتاح
عشقتك كلمة مسموعة
حاجات تانية وممنوعة
عشان تتهني وتعيشي
وراسك تبقي مرفوعة
انا العاشق سمار نيلك
وليلي ف ضي قنديلك
بيبقي ياحبيتي نهار
وانا اهة مواويلك
لاموني الناس علي حبك
وقالوا اتجن في قربك
انا العاشق وانا المجنون
ياحاضنة قلبي في قلبك .
===========================================
(11)
الصعايدة
======
قبلي عشقته بخيره وناسه
اهله لقلبي ياناس حراسه
من اول متخش الجيزة
تلقي الخلق نفوسها عزيزة
واوعي تفكر نفسك ضيف
دا انت ف اهلك في بني سويف
فيها مشايخي وسيدي واهلي
فيها اصول الخير تندهلي
واما تحود ع الفيوم
تلقي سواقي ف خير بتعوم
واما تقبل تلقي المنيا
طه حسينها وقد الدنيا
وف ساعتين ح تكون مبسوط
لما تقرب من اسيوط
ياما سهرت ليالي ف نيلها
علشان كدة برضه باغنيلها
خد تفريعة وخش الوادي
تلقي حلاوة ارض بلادي
اما اللولي ف وسط التاج
مش حتشوفهم غير ف سوهاج
اجدع خلق ف مصر بحالها
هما جنودها وهما رجالها
واقرا الفاتحة وقلبك ناوي
يتعطر ويقول ياقناوي
جيت لمقامك قنا بالذات
فيها حبايبي واعز خوات
فيها رجولة وطيبة واصل
مدرسة هما اساتذت فصل
واركبلك حنطور واتحنطر
وانت بتتفسح ف الاقصر
واما تزود علي اسوان
تلقي شهامة ف كل مكان
تلقي عماير زي السد
تلقي الطيبة وملهاش حد
دولا صعايدة عشقهم قلبي
دولا رجولة ودولا حبايبي
وارجع تاني اغني ياناس
عن شهامتهم وباخلاص
قبلي عشقته بخيره وناسه
اهله لقلبي ياناس حراسه .
================================================
(12)
المنايفة
=====
يعيش المنايفة الاف السنين
وبينهم اخوة وصداقة ودين
واذا عزت تعرف بلادهم ياصاحبي
فدا من قويسنا ودا من شبين
يعيش المنايفة مشايخ طابور
وشيخنا الباجوري هنا م الباجور
واما كتابه اللي عاش من زمان
عن الحاشية وافهم مابين السطور
يعيش المنايفة وقول ياولا
دا هما الزعامة واهل العلا
وف الحرب والسلم غني وقول
سادات الرياسة هنا من تلا
يعيش المنايفة وحلق وطوف
وعبي المحبة ودق الكفوف
دي اطيب اراضي ف مصر السلام
ويشهد عليها التاريخ من منوف
يعيش المنايفة ف ارض الجدود
يخوضوا المعارك ويحموا الحدود
من الفتح شهدا وليهم مقام
ياسيدي محمد ياشبل الأسود
يعيش المنايفة وفي كل عام
تغني النوارج وبرج الحمام
علي دنشواي اللي كانت علامة
اذا الشمس طلعت ف وسط الظلام
يعيش المنايفة ف اشمون تجلوا
وللسبع بركة وصاموا وصلوا
وفي كل خطوة باحييي الجميع
دا هما ولادنا وهما اللي هلوا
يعيش المنايفة اذا قلت فن
تلاقي المليجي وماجدة ياجن
وفي كل عزبة شيوخ للادان
وصوتك ياطبلاوي ليهم يحن
يعيش المنايفة عليهم ينادي
حسن باشا زايد كريم الأيادي
تبرع بماله وارضه كمان
ف قشطوخ صراوة لجامعة بلادي
يعيش المنايفة وفي كل دار
تلاقي اساتذة وغيرهم كتار
دا شيخنا اسماعيل اللي كان ع المنابر
يصوته ياازهر دا كان دفتدار
يعيش المنايفة توشيبا ياعربي
لو الجمسي شاور بينفك كربي
وف العسكرية مشير بامتياز
ويهزم جيوش الأعادي ف حربي
نماذج وباهدي اليهم تحية
واقدم كمان السلام والهدية
وعذرا اذا كنت منهم نسيت
مشاهير كتيرة يجوا الف مية
يعيش المنايفة وليهم كلام
يدوم التفوق يدوم الوئام
تدوم المحبة عليكم جميعا
وتبنوا بلادنا يااهل الغرام .
================================================
(13)
ألم الدوالي
==========
الدوالي مغلباني
من المها دوخت ياني
مهما ابلبع في المسكن
الوجع ابدا لايمكن
ينتهي ويسيبني انام
ولا ازغط في الحمام
زي ماتكون جبت سيخ
بيه بتكوي اه ياشيخ
او ف رجلي كنت داقق
ميت شاكوش وانا مش ملاحق
والصداع اللي ماسكني
لما من راسي لدقني
كل دا والحر طبعا
مش مخليني اصهين
واتلهي عنها وافوق
والي اكتر مش بادوق
اي طعم لأي حاجة
حتي مش باكتب دباجة
للقصايد والقصص
بعد مازاد المغص
بادعي ربي انه يزيح
والشفا ييجي بصحيح
دي الدوالي مغلباني
من المها دخت ياني .
================================================
(14)
في بيتنا الكبير
==========
ف بيتنا الكبير
باغني واطير
وبالعب واهيص
وانام ع السرير
ف بيتنا الكبير
وبيجيلي نوم
وانسي الهموم
برغم السنين
وفرحي يدوم
ف بيتنا الكبير
كما الطفل بالعب
واشرق واغرب
وتبدا حياتي
واشخبط واجرب
ف بيتنا الكبير
واقابل صحابي
وباكتب كتابي
واقرا الكلام
وباخد جوابي
ف بيتنا الكبير
واشوف ضي عيني
وامي تناديني
وابويا يجاوبني
واختي وحنيني
ف بيتنا الكبير
ولو عزت مرة
تشوف المسرة
ح ناخد حصيرة
ونفرشها برة
ف بيتنا الكبير
واخدكم معايا
وناخد عصايا
ونسند عليها
وابص ف مرايا
ف بيتنا الكبير
واعيش الف ذكري
وحكمة وفكرة
وعيشة هنية
وكبوة ونصرة
ف بيتنا الكبير
يابيتنا الكبير
ياذكري الضمير
واصل الحكاية
لشعري الكتير
يابيتنا الكبير
بحبك حقيقي
لانك طريقي
ونوري ومنايا
وعشقي وصديقي
يابيتنا الكبير .
=============================================
(15)
الجيران
========
عندنا جار وولاده تلاتة
عاملين غارة ف قلب الشارع
تلقاهم بزعيق وتباتة
بيجعروا وتملي صواتهم
متقولش بنادق ومدافع
والبمب بيضرب صواريخ
طاخ طاخ طيخ
طاخ طاخ طيخ
وينادوا علي بعض بصوت
لو سمعوه اصحاب الكهف
كانوا فاقوا واتمنوا الموت
بينطقوا ف الكورة تمللي
واللي يحب النبي بيعلي
ولاليهم مفتاح للبيت
تسمعهم بيجيبوا الزيت
م البقال ويبوسوا ايديه
تفتح لنا ياحبيبي ياريت
ولا ام بتسال ف عيال
يسهروا برة ليالي طوال
والأب مسافر علطول
كل وظيفته يجيب المال
ودلعهم ح احكيلكوا عليه
ماسخ الف سفخس عليه
ينقط خلا الكل بيشكي
منهم قلت ياناس بريه
التربية دي عاوزة شطارة
م البيت والجامع والحارة
وبدونها الأجيال حتتضيع
وساعتها وياالف خسارة
مش حنلوم غير بعض ياناس
ع الاهمال لو فيه احساس
وساعتها احكيلكوا عن الجارة
بطة ف صوت امها زمارة
خلت عقلي يطق ياهووو
والعن فتحي وزين وسمارة .
==============================================
(16)
تيك اواي
=======
كل حاجة ف الزمن دة
تيك اواي
حتي ريحت الوردة صارت
تيك اواي
لو دعوك مرة ف ندوة
تيك اواي
او عزومتك جت ف غدوة
تيك اواي
قل لي فين زمن البساطة ؟
اللي كنا بنمشي فيه
حتي بالاطة
واللي كات فيه المعاني
ليها قيمة
في المدارس والمصانع
والحكايات القديمة
والحياة كات سهلة جدا
اصلها ماكانتش ابدا
تيك اواي
الأغاني في الزمن دة بيعزفوها
تيك اواي
والأماني بيسلقوها
تيك اواي
حتي حتلاقي المعاهد
تيك اواي
مش حقولك والمساجد
تيك اواي
حتي شعري هو راخر
تيك اواي
واللي علق واللي ساخر
تيك اواي
واللي كاتب ع المشاعر
تيك اواي
واللي حاسس واللي شاعر
تيك اواي
اصل انا مبحبش ازرع
تيك اواي
هو مين فاضي حيقلع
تيك اواي
ولا يحرت ولا يصنع
تيك اواي
يعني بالمحسوس ياسادة
اللي مطلوب الأجادة
في العمل او في العبادة
ولا اقولك جو اواي .
===========================================
(17)
نمبر وان
=======
ولا نمبر ون ولاجن
اهو صوت دبور بيزن
ولا تقدر تاخد منه
احساس ولاحبة فن
يتنطط يبقي عظيم
وبيتلطم تلطيم
يارحيم ارحم يارحيم
واما تحاوره القنوات
يحكيلهم ع الحكايات
ويبين لك كرامات
وكانه نغم بيرن
الله ع الفن الهادف
مش مافيا وكلام هايف
ياخوانا ارحموا احساسنا
وجيبولي شوية قطن
احشيهم جوة الودن .
==========================================
(18)
حادث القطار
===========
اسالوا عني المحطة
والرصيف والسامعين
اسالوا عني الاشارة
ولا جراركوا اللعين
ولاقضبان الطريق
والفلنكات والسنين
حيقولولكوا دا قلب مين
اللي مرمي من جراحه
واللي لسة نبضه شايل
دمعته وف كل عين
واللي خايف واللي قايل
هي فين الدفنة فين ؟
اسالوا كل اللي سافر
واللي مستني وحزين
لما قطر الغم صفر
وانفجر مني الأنين
واللي طارت منه رجله
واللي طار منه الأدين
واللي اصبح فحمة سودة
واللي صاروا محروقين
حيقولولكوا دا كان مسافر
طب م القطر الدفين
ساب رسالة لكل مصري
دمي ف رقابتكوا دين
دمي ف رقابتكوا دين .
=============================================
(19)
عن الفول .... اتحدث
===========
يافول يالحم الغلابة
يامعلي همتنا
تملا بطوننا
وتعمل في العقول فتنة
ياحلو مين يكرهك
وانت عمود بيتنا
ف الصبح انت الأساس
يافطار محبتنا
مع اصل فحل البصل
ولمونة وف زيتنا
الكل ياكل ويشبع
مبروكة لقمتنا
يمكن كمان ع الغدا
لو برة عن بيتنا
وانت حبيب العشا
يامحلي سهرتنا
سايق عليك النبي
متشوف دلالك يوم
دة لو غليت يافول
يبقي خراب بيتنا
=====================================
(20)
وعن الكشري
======= ....
عند سيدنا الحسين
قبل مانزوره بشوية
قلنا ناكل لقمتين
منها يعني نسد جوعنا
وف مقامه نصلي طبعا ركعتين
قالوا كبدة
قلنا حامية
صدرنا حيقيد نارين
قالوا لحمة
قلنا غالية
شوفوا حاجة بجنيهين
قالوا حبة فول ونخلص
قلنا دا احنا من جنابه زهقانين
قالوا تاهت ولقناها
هما حبة كشري يابا
منه نضرب علبتين
قلنا ماشي اهي حاجة سخنة
رز صلصة وفوقها دقة
والكمالة ولعتين
ريحة الكشري جمييييييييلة
لاكن العلبة قليلة
واللي فيها حبتين
كام ياريس ؟
قال وهيس
كل علبة خمستين
يابا راجع
مستحيل دا العلبة ناقصة
عاوزة لسة كبشتين
يابا مش لحمة
دا حبة عدس لابس جبتين
ايه جري ف الدنيا يابا
لما باكل ليه باحس بجوع ف جيبي يامسلمين ؟
يعني لو مشوي ونيفا
او عكاوي
كنا ندفع مية ؟
ايه ؟
طب قول ميتين
خد حسابك يابني وبلاش الكمالة
واحنا نسرع ف الخطاوي
لجل مانصلي
ونقرا الفاتحة جوة
عند سيدنا الحسين .
================================================
(21)
البدنجان
======
يابدنجان يابدنجان
يابدنجان يااسمر محلاك
وانت ف وسط الطاسة ومقلي
والزيت يغلي
دخل جواك
والفلفل الاخضر وياك
عامل احلي دويتو معاك
يابدنجان يابدنجان
قالوا عليك قال بيض الجان
وبتاع الأسماك شعبان
لو يعرف قيمتك اتباعه
كان حطك ف المنيو بتاعه
زي البربون والمرجان
يابدنجان
والبهوات يااسمر طبخوك
بالصلصة وباللحمة كلوك
اه يامسقعة لما شافوك
قالوا عليك اكل السلطان
يابدنجان
يابدنجان طول عمرك قلبك
ابيض زي الفل وجنبك
ننسي اللحمة والعصبان
يابدنجان
يابدنجان ياابيض ياحبيبي
محشي ف وسط السفرة نصيبي
منك كام صابع ولهيبي
بيزيد لك يابو عنق جنان
يابدنجان
يابدنجان طيرت العقل
لما بتتحدق بالخل
تبقي مخلل زي الفل
واعذرني لو كنت جعان
يابدنجان
اسم الله عليك
لما ف افرانهم يشووك
وكمان بابا غنوج عملوك
حتوديني كدة موريستان
يابدنجان
يابدنجان ف صواني رصوك
يابدنجان لا اللحمة الضاني
ولا الفتة ف يوم يساووك
يابدنجان
يابدنجان ليه سعرك زاد ؟
لو عملولك حتي مزاد
مش حنبطل ناكلك ابدا
لو عشنا عشانك بالكاد
يابدنجان
يابدنجان دة معدش حدانا
غيرك بعد الفول ماادانا
مقلب ف الأسعار ورمانا
بعد العشرة وهننا عليه
وكأننا ولا كنا جيران
يابدنجان
يابدنجان طول ماانت معانا
وف سعرك ماشي علي هوانا
وبتعمل انجاز ويانا
حنقليلك ونصفرلك
وكمان جلدك حنقشرلك
ونغنيلك ونهيصلك
وحندعيلك
ترجع تاني زي زمان
ريحة القلي ف كل مكان
يابدنجان يابدنجان .
===============================================
(22)
عن اللحمة
=======
رغم اني وقور وشيخ
يس روحي ياناس بتعشق
لحمة مرشوقة ف سيخ
لما اشوفها بتتشوي
والله باعرق
حتة الضاني المتينة
ليها ريحة تجري ريقي
هيا طبعا لو سمينة
احلي م الفول ياصديقي
والبتلو والمخاصي
دول حبايبي من زمان
والعكاوي ان كنت ناسي
يوصلوا الشوق بالحنان
والكباب دا م الماسي
لو طلبتوا ف الصيام
واللي بيرص الكراسي
قام شوا قبل الادان
يبقي ابشر راح تصلي
بعد مايسكوا البيبان
والمساجد يقفلوها
والعشا خلصت كمان
وانت واكل ولا عاصي
ولا شدوك م الودان
مصمص الكارع تمللي
دة اللي يسري
واللي يسلي
واللي يمري
ايه حصل لي ؟
كل دة م الحبهان
اللي حطوه والتوابل
ف الجواهر واللسان
وادي نيفة طعمة جدا
راح تدوب ف الفم طبعا
ولا مخ وكبدة عال
والدواير والطحال
كله كوم والشوربة كوم
فيها طبعا راح تعوم
اوعي تنسي اني بسببها
ياما بقعت الهدوم
هيا دي والفتة حلمي
ان يبقي عليها توم
ياااااه ياحاتي
نسيت ملامحك
نفسي اجري عليك واصالحك
بس خايف م الجيران
لو شافوني حداك يقولوا
صالحوا ليه ابن الجعان ؟
اصل انا وولاد خواتي
والعيال هما ومراتي
لجل كيلو م البناتي
بعنا بيتنا بمليمين
نفسنا ناكل ونشبع
بس فين ؟
صوتنا واطي
مش بيطلع
هفتانين
صورونا جنبكم
كدة من يومين
والكبابجي قال علينا
دولا حبة شحاتين
دولا حبة شحاتين .
================================================
(23)
مانتش جاني ..... دعوة للتسامح
======================
مانتش جاني
وانا متاكد
انت عشاني
اكيد بتسدد
فواتير تاني
وبتتهدد
حافضل طول العمر اردد
مانتش جاني
مانتش جاني وانا مبسوط
لو تنساني
دا يعني الموت
حافضل اقولها بعلو الصوت
مانتش جاني
مانتش جاني كفاية عتاب
قلبي الفاني
ف حبك داب
عمري قضيته
عذاب في عذاب
مانتش جاني
مانتش جاني ياسيدي خلاص
ولخلاني وكل الناس
باعلنها صريحة باخلاص
ماتش جاني
مانتش جاني
سامحني تعبت
من عنواني
واهلي هربت
وف احزاني
لوحدي غرقت
مانتش جاني
مانتش جاني
بقلبي بقول
وف احضاني كتمت القول
دة استناني العمر يطول
ومنالش حبيبي المامول
مانتش جاني
مانتش جاني
ورغم بعادك
هز كياني
وزاد ف عنادك
شفت حناني
شهيد ف جهادك
مانتش جاني
مانتش جاني
حبيبي ارتحت ؟
لو تلقاني
عفيت وسامحت
اعرف اني عشانك تهت
مانتش جاني
========================================
(24) .
لاتلمني
===== ....
لاموني العوازل
ف عشق الحبيب
وقالوا دة مرضان
وعاوز طبيب
وقالوا دة خرف
بفعل المشيب
فقلت اللي لاموا
كلامهم عجيب
فلا مرة داقوا
وصال القريب
ولا مرة سمعوا
بكا او نحيب
اذا العشق عرفوا
ماكانوا يلوموني
ولا حسوا اني
في حالي غريب
ف حبك ياطه
والك بدوب
وحبك يخلي
قلوبنا تطيب
========================================
(25)
حوار بين ثلاثة
=========
أنا
وأختي الله يرحمها .فاطمة . (هي)
وزوجها الله يرحمه . فتحي .(هو)
الذي وافته المنية بعد ايام قليلة من وفاتها
رحم الله الجميع رحمة واسعة . امين
هو :
في الفرح انا منسي
ولا حد يبعت لي
ولا جني ولا انسي
أصل الحبيب مات لي
هي :
قرب تعالي اوام
دة الفرح عندنا موت
والدمع ف الأحلام
يبقي فرج مكبوت
هو :
لو تقدروا تجوني
وتمسحوا دمعي
دة لو تعزوني
حتنوروا شمعي
انا :
الصرخة مكتومة
ولا الفؤاد مجروح
والنفس محرومة
ولا اللقا مسموح
ولا مرة حتعدي
او حتي تتصلي
ياختي اللي بتهدي
ف الروح وتتواصلي
هو :
امتي اللقا امتي
دا القلب ليكم مال
لو ساعة أو ستة
وف احسن الأحوال
انا حالبس الحتة
واملا الكفن موال
واقيد لكم دستة
م الشمع ف الغربال
واروح ولو جتة
لحبايبي وبدون مال
هي :
حروفي فيها من حرفك
ومين عرفك
بيشهد اننا قلبين
ويعرف اننا الأتنين
من اللفة اتكتبنا لبعض
ولا زفة ولا قضبان
ولا جني ولا انسان
يفرق بيننا لو عدنا
دي حتة الدفنة ياسيادنا
في نفس الأرض
دة حتي الموت
حيجمعنا في يوم العرض
هو :
انا منك
وسني جزء من سنك
دة حتي الاسم
زي الرسم
من جرحي
انا فتحي
وفاطمة هي دي فرحي
هي :
اكيد تاني حنتقابل
ولو طفناها طول او عرض
هو :
دة انا حتي رفضت اعيش
وقلت امشي لأني مليش
ولا لحظة ف يوم بعدك
ولا ليا انا ف بعدك
هي :
مادام الموت حيجمعنا
حيبقي للحياة معني ؟
وعمري حتة من سنك
انا :
انا اختصرتك ف كلمة
ف بيت ف شعري ف حكمة
ياللي انتوا دايما معايا
باشوفكوا دمعة وبسمة
ولو بتبعد حياتي
عنكوا بيحكي سكاتي
ويقول لي ايه الحكاية
ياروحي حتي ف مماتي
كل اللي ماتوا وسابونا
وبدمعنا لم جابونا
لو رحنا ليهم بأية
بالرحمة حيقربونا
هو :
يا روحي جيت لك بجسمي
والروح وكلي ورسمي
ولا طقت اقعد لوحدي
والقبر يهتف باسمي
كل اما بابعد باقرب
ولو حتسال مجرب
حيكون جوابه في صالحي
لو حتي شرق وغرب
حيقول مطقتش بعادك
وف عز ليلي وسهادك
قررت ربي يساعدني
ويكون رقادي رقادك
ويكون رقادي رقادك .
==============================================
(26)
لأمي
=====
جواب بعطرك
لجل خاطرك
دا انتي كل الكون ياامي
تحت امرك
من حبيب قلبك ضناكي
اللي كات روحه فداكي
اللي ساكن في حشاكي
واللي بيبوس الايدين
اللي شيلتيه ف العينين
بابتغي ياما رضاكي
السلام ليكي امانة
وانتي ف الجنة ونعيمها
يااما واحشانا وهوانا
اننا نشوفك بخير
عند رب العالمين
يااما ف العيد اللي جاي
اكتبي لي كلمتين
عن حياتك ف النعيم
وادعي لينا وانتي عندك
دعوة منك في الصميم
الف رحمة ونور عليكي
وكل من قالها .....امين .
==============================================
(27)
لما غلا سعر الليمون
===============
الجمالون دة اسم حوض زراعي قي قريتي قشطوخ تلا منوفية معروف بخصوبة ارضه .
ازرع واقلع ف الجمالون
بدل القمح ازرعها لمون
قل لي حنعمل ايه بالعيش
وانا م السعر بقيت مجنون
اللي يقول الخطة بلاها
هي العيشة دي ايه غلاها
الا الهري وكتر الفتوي
وادي البيضة وادي اللي قلاها
واللي يقول عاوزينها خضار
او اناناس وفراولة ونار
واللي يقول لي بلاش برسيم
وانسي الأكل كمان ياحمار
اتلخبطنا خلاص يامعلم
والفلاح بقا ماله مبلم
ولا يعرف غيطه من داره
ساب الأرض ونمره مسلم
الطف بينا يارب اوام
وابعت لنا عصافير وحمام
ناكل منها عشان حضراتنا
بدل الشغل بقينا ننام .
===============================================
(28)
لحن الوفا
=========
لحن الوفا المعزوف
من قلبها الملهوف
بيخلي طعم الحب وانت ف غربتك
والله احلي م الحروف
واما تتدغدغ حنين
حتلاقي منها كلمتين
وعبارة احنا لبعضنا
رغم اللي مكتوب ع الجبين
وتحس طعم الانبهار
بالأصل والخير والنهار
لما تشوف ام البنات
وتحس ان فراقكوا نار
قلبي معاها او معاك
وبيجري ويدور وراك
علي كلمة منك تسعفه
ويقول دي هي دي الملاك
=========================
بطاقة الكتاب
عنوان الكتاب : عاشق وطن
النوع : شعر عامي
الكاتب : البدري عبد الرحمن زايد
اسم الشهرة : شيخ السجالات . البدري زايد
الطبعة : الاولي
رقم الايداع : 21799/2019
منتدى جمعية إبداع الثقافية
رقم الايداع : 17/2020
