الرئيسية
ديوان
إلى أبى ...
الشاعر/ محمود محمد صابر
عضو مؤسس بجمعية إبداع الثقافية
جمعية إبداع الثقافية
صرح ثقافى متميز
=====
يهتم بالمواهب الشابة فى كل المجالات الثقافية
أدبية – فنية – علمية
العنوان :
جمهورية مصر العربية -محافظة الشرقية
مدينة ديرب نجم – مساكن أرض السوق
عمارة 10 شقة 16
ت : 01203994402- 01141390421- 01009247239
بسم الله الرحمن الرحيم
----------------------
الإهداء
الي ابي
الي روح فارقنا جسدها ولاتزال هي معنا تجمع بيننا وتلم شملنا الي اخلاق زرعت داخلنا ومبادئ مازالت تمثل لنا طريق النجاة الي الحنان والعطف والقوة الي كل جميل في هذه الحياة
الي ابي
الشاعر
محمود محمد صابر
(1)
تغيب الشمس
***************
تغيب الشمس
يهل الليل ..
سواد عاتم
تحس الروح
كما المكتوف
علي الصدر حجر كاتم
وانفاسك كنزع الموت
واهاتك ناكرها الصوت
تتمدد علي سريرك
كأنه تابوت
وتفضل في الساعات تحسب
غريق وسط موج اسود
بتتمني يجيك الموت
بمجرد تغيب الشمس
....
في وسط النور
انا تايه ما بين الناس
ومش معروف
ملامحي في النهار جامده
ومش باين
انا فرحان ..يمكن
حزين ..جايز
او حتي هموت م الخوف
في وسط النور
بكون حر ومش مكتوف
....
لكن في الليل
انا ونفسي
مفيش قناع يخبيني
ولو هكدب علي روحي
مفيش كدبه هترضيني
ونار في الجسد تاكل
ولوم النفس يكويني
انا في الليل بكون خايف
بكون مرعوب
بكون ميت
ومستني نهار بكره
عشان الشمس تحييني
=====================================================
(2)
لو مرة تاه بينا القملا
========
لو مرة تاه بيّنا القمر
تاهت الخطاوي مننا
بحيث اننا
مطلوب نشبكها الايادي
لاجل ما نوصل كلنا
مطلوب نساعد بعضنا
وكل واحد يكون للتاني الامان
مطلوب تكون وسط الجموع
انسان ...
واياك تفوت لحظة ايدي
انا من غيرك ... كفيف
شوفي يا دوب
علي قد هدمة للبدن
شوفي علي قد الرغيف
زي طور الساقية داير
سكتي دايما دواير
راضي المذلة والمرض
والجهل نوع
اختياري دايما يكون
بين خوف وجوع
لا اعرف في الشتا دفا
ولا زهر اشمه في الربيع
انا باختصار
كائن وضيع
فصول حياتي كلها
فصل الخريف
احلام بتدبل فوق عود ناشف
نحيف ...
والجذع من جواه فراغ
اصبح شموخه في السما
موضوع سخيف
اياك تفّوت لحظة ايدي
انا من غيرك ضعيف
خليك بكامل همتك
دي مهمتك
كون الدليل
اياك تيأس مننا
احنا شايلين الجهالة سنين طويلة
ف عمرنا
اصبر وعافر
دا انت اللي باقي في حلمنا
دا لو مره غاب بيّنا القمر
تاهت الخطاوي مننا
***************
=================================================================
(3)
يوم ما اتولد
( صلى الله عليه وسلم)
***************
يوم ما اتولد
كان السلام
كان الدفا
للانسانيه والوءام
كانت القلوب
رغم عظيم كفرها
فاهمة الكلام
لكن خساره
راح الدفا
بعد منه خلاص انتهى
فينا الصفا
وعاد الكفر بعد منه بالمبادىء
قال .... كفى
يا عاشقين صحبته
صلوا عليه
واندموا
ابكوا الدموع زى البحور
واعلموا
حتى سيرته مننا
بقت بعيدة
حبة وشوش بدقون بليده
فاكره ان سيرته
جلباب قصير
وقلوب بقسوة الحجر
للنور عنيده
يا عاشقين صحبته
صلوا علية
واعرفوا
قيمة رسولكم المصطفى
***************
======================================================================
(4)
شعر غنائي
كده كفاية
************
اظن خلاص كده كفاية
نحط لعشقنا نهاية
وتختارلك طريق تاني
تمشيه ما يكونش ويّايّا
انا هبعد
ومش هعند
ومش هصبر عليك تاني
صبرت كتير علي قاسي
وظالم قلبه واناني
صبرت كتير وبصبري
مات الحب جوايا
اظن خلاص كده كفاية
.....
اظن خلاص كده تمشي
ترحل يعني وتسيبني
وانا وحدي هكون احسن
مهما الدنيا تتعبني
هلملم روحي علي روحي
اداوي قلبي وجروحي
واصالح دمعي وعيوني
واقول توبه وسامحوني
ولو في مرة لقيتوني
بحن اليه ....
فوتوني
ولا تتعذبوا معايا
اظن خلاص كدة كفاية
************
=====================================================================
(5)
في صورتك
اسمي والعنوان
****************
تمر ايام علي بعدك
تاخدنا الدنيا والمسافات
تلاقيني العيون فاكره
تقول ناسي
وحنينه مات
ارد .. واقول تفتكروا ..؟
طيابا ما يعرفوش انك
معايا ف بكره اللي جاي لسه
وكنت معايا في اللي فات
طيابا ما يعرفوش انك
اصلي وسر ان انا انسان
ولو مرت سنين عمري
ف قلبي ليك انت لسه مكان
ولو تاه الطريق مني
في صورتك اسمي والعنوان
.....
لا الايام تنسيني
ولا دنيا هتلهيني
يا كل الجاي واللي كان
ازاي انساك وانا منك
واسمي بيحضنه اسمك
دا شكلي صوره من رسمك
وانت الريشه والالوان
طيابا ما يعرفوش اني
لو تاه الطريق مني
في صورتك اسمي والعنوان
.......
انا محافظ علي الوعد اللي كان بينا
ولا عمره هيتعدل
لو اتبدل نظام الكون
حبي ليك ما يتبدل
دا انا النبته اللي طارحه خضارها
من بذرك
اموت في الحال لو اني
نسيت اصلي
نسيت اني امتداد جذرك
ولو عودي في يوم فكر يتوه عنك
كأنه ما كان
دا لو تاه الطريق مني
في صورتك اسمي والعنوان
****************
====================================================================
(6)
ابويا مات ...
*************
مرة قالوا
اللي خلف يوم ما مات
لأه دا مات
وابنه عايش
بس مات
لما اللحظة عليه تعدي بعمر سنه
يبقي مات
لما الضحكة تدبل جوا منه
يبقي مات
لما الدمعة تبات في عينه
غصب عنه
يبقي مات
لما الدنيا فيه تهد
ومش لاقي اللي يحوشها عنه
يبقي مات
مات لحظة ابوه ما مات
ضهره مات
سنده مات
مات تاريخه
مات ماضيه
ماتت كل حاجه فيه
ايوه عايش
بس مات
عايش الصرخة ف سكات
عايش الدمعة واهات
عايش بكره ف ذكريات
عايش يبكي ع اللي فات
مش مصدق انه مات
ليه بالكدب تقولوا
اللي خلف يوم ما مات
ما ابويا مات
مات وماتت كل حاجة يوم ما مات
ماتت اللمة ودفاها
ماتت العيشة وهناها
والهمة ماتت عُلاها
ولولا ايمانها بقضاها
وصبر سيد فوق رضاها
أحمد المولي ف ثبات
ابويا مات ...
================================================================
(7)
يوم ماراح...
======
يوم ما راح ...
خد معاه حاجات كتير
مش فلوس ولا جاه وسلطة
ما كانش سلطان او امير
كان يا دوب ..
كان يا دوب حد طيب
عرقه عيش
اللقمة مغموسه الضمير
كان واحد بس عيلة
لمة الصغير والكبير
كان وسط العتمة نور
كان في الضيقة البراح
يوم ما راح
....
يوم ما راح
خد معاه القلب الأبيض
خد معاه الضحكة الجنان
خد معاه الطيبة لمسة
خد معاه همس الحنان
وخد معاه الشدة لما
كنت بغلط
خد معاه قرص الودان
خد معاه الحضن دافي
حضن يحميك م الزمان
يوم ما راح
..........
يوم ما راح
وقال كفاية
ان الاوان ارتاح بقي
قال خلاص جات النهاية
تعبت م الدنيا الردية
والدنيا تعبت معايا
قال سلام
كملوها انتوا الحياة
عشت بيكوا حلم عمري
خلاص وصلت لمنتهاه
بس فايت علم فيكوا
كل جرح ايه دواه
فايت في قلوبكوا الامانة
قلب مؤمن بالاله
فايت فيكوا الصبر طبع
لليالي يكون صباح
يوم ما راح ...
======================================================================
(
خلاص ماشى....
======
خلاص ماشي ..
خلاص ماشي مفيش فايده
رايح انت للجنة
وسايب فيا نار قايده
سايب ..
سايب دمعة علي خدودنا
سواد حاطط علي وجودنا
وقلوب أمنت بمولاها
كاتمة في نفسها وراضية
خلاص ماشي مفيش فايده
لا استني
استني لسه ما شبعتش
حنان ايدك
لسه في بوسة من قلبي
علي جبينك
ولسه عمر ما ارتاحتوش
بعد ما عشت
عشنا الصعب في سنينك
لا أستني
لسه حق في رقبتي
ما سددتوش
دين عايش بطول عمري
ما وفتهوش
لسه رحمتك بيا
قوة زرعتها فيا
لسه طبطبة ايدك
علي كتفي بحنيه
لسه ضحكتك م القلب
عيونك حاضنة لعنيا
لسه اللمة في وجودك
وحمل بيه انحني عودك
وصدق تملي في وعودك
لسه يابا عاوزينك
بعدك الحياة فاضية
خلاص ماشي مفيش فايدة
لا استني
لا استني في لسه
حكاية لسه ما حكيتها
واية تملي علي لسانك
ترددها
لسه مناغشتك لامي
عشان تسمعها ضحكتها
ولسه كتير
لسه كتير قوي يابا
دي رحلة وانت سكتها
سلام يابا
رحيلك يعني نهايتها
سلام يابا
خلاص ارتاح
براح الكون جوار ربك
وفوقه براح
لا هم هناك ولا شكوي
ولا احزان ولا في جراح
في رب رحيم اكيد عالم
غفور دايما وكله سماح
سلام يابا
================================================================
(9)
بين الحياة والموت
========
بين الحياه والموت
رحله طولها سنين
فيها اللي عاشها سكوت
وفيها اللي عاشها حزين
وفيها اللي بيحارب
علشان يكون غالب
ولا عمره يوم فكر
يداري راسه في طين
احداثه بيعملها
اقداره يبدلها
احلامه بيطولها
لو بعد صبر سنين
بين الحياه والموت
رحله طولها سنين
فيها اللي عاش وحداني
مقفول عليه الباب
علي نفسه كان الجاني
قضي حياته سراب
وفيها اللي عاش للناس
بالحب والاحساس
عمل عشانها كتير
الكل ليه احباب
بين الحياه والموت
====================================================================
(10)
تفاءل خير
*********
عاوز تشجيع
يتبدل كده حالك
ما بين لحظة والتانية
ماهي مراجيح
تشيلك فوق
كانك طير
فرد جناحاته للدنيا
وعلي غفلة
تجيبك ارض
تحط عليك كده في ثانية
وتصحي وانت مستبشر
وطالب خير
تنام والدموع اكتر
وقلب كسير
وف عز الازمة والضيقة
تتفاجئ بيها اتحلت
لا تعلم منين الحل
ومنين جالك التيسير
علمك بس متحدد
انك عبد لرب كبير
صاحب القدرة والتدبير
علي الله سيبها واتوكل
==================================================================
(11)
وليه أنت ...؟
=======
وليه انت
ومن بين كل البشر
انت
مش عارف
محتاجلك ... ؟
من امتي الدنيا بتديني
اللي محتاجه
محتاجلي ... ؟
من امتي الورد بيسعدنا
من بعد ما تدبل اوراقه
من امتي الحضن يدفينا
لو كانت ماتت اشواقه
من امتي القلب المتجرح
بتضيع اناته
من بعد ما ماتت ايامه
وماتت لحظاته
معقول الميت يوم يرجع
ولا انت حياة
جايلي والفرحة في احضانك
من بعد الاه
عشان خاطرك
بقيت تاني
خلاص قربت انساني
بقيت لابس علي وشي
وش غريب
لا انا منه
لا هو مني
وش غريب كتير عني
ولما روحي تسألني
تقولي ده مين
ما القي جواب علي لساني
كما المسحور
انا بسحرك
غريق وسط موج بحرك
اتخاصم مع روحي
اجري عليك واصالحك
عشان خاطرك
====================================================================
(12)
وليا فى الغرام قصة
=========
وليا فى الغرام قصة
على شط الهوى احكيها
بانغامى انا و عودى
غنوه يوماتى اغنيها
حنين للارض والصحبه
بيقوى تملى فى الغربه
حنين لجماعه فى الجامع
ولجيرانى اللى فى الشارع
وثومه تغنى وانا السامع
ارددها اغانيها
حنين لامى وضحكتها
شجن صوتها في دعوتها
دفا العيله ولمتها
وسهرايه فى ليل شاتى
وحكاوى بنحكيها
حنين للاب والقوة
وحضنه يدوبك جوا
تطبطب ايده علي كتافي
دا سندي وقوتي هو
حنين ليهم ولاخواتي
وعيلتي وكل من فيها
====================================================================
(13)
عشان قلبك
======
عشان قلبك
فى يوم كان لي دنيا
اتمنى اعيش فيها
ويوم ما اخترت يوم بعدى
لقتنى غريب وحيد فيها
انا اسف على انى
مش القلب اللى تتمنى
برغم الحب اللى جوايا ورغم انى
عاشق قربك
عشان قلبك
عشان قلبك بعدت بعيد
وقلت كفايه تعيشى انتى
وياما كنت بندهلك وبالصمت تردى انتى
اشوف كلمه كتبتيها اقول ليا
واشوف صوره لعيونك
تعيش فيا
واشوف الضحكه فى الدنيا
اقول هي
افوق من عز احلامى
على صوتك
يقول معلش مش قادره
اكون حبك
عشان قلبك
====================================================================
(14)
دفتر ذكرياتي
**********
في دفتر ذكرياتي
بقلب في الورق
لقيت رسمه لقلب جميل
وشمعه بتتحرق
ليقت ورده ودبلانه
شوقها فيها اتخنق
ومن اسمك ومن اسمي
حروف كتبناها
وكلمة حب من قلبك
انا كنت حساها
يومها انا طرت م الفرحة
فى حلم جميل انام واصحى
يوم ما تحضنك عينى
بيوم فرحي وبالطرحة
بيوم ما يضمني حضنك
واقول للدنيا انا مسامحة
واتاري الحلم يفضل حلم
وعمره ما اتخلق
في دفتر ذكرياتي
بقلب في الورق
ودى صفحة لقيت فيها
عيون والدمع ماليها
واه مكتوم فيها صوتها
عشان غدر الزمان بيها
لقيت صورتك فيها سراب
اتارى الحلم كان كداب
وبقيت تايهه ومش عارفه
عليك ابكى ولا
ولا ابكى عمرى اللى اتسرق
فى دفتر ذكرياتى
بقلب فى الورق
يبقى أنت غريب
====================================================================
(15)
أنت .... غريب
========
لما الكلمه جوا حدودك
تكره صوتك
لما احساسك حتى بذاتك
يعشق موتك
لما تحس ان انت خلاص
وسط ضياع
لما ترفض انك تندم
على يوم ضاع
ويبقى العادى لما الفرحة
تملى تفوتك
يبقى انت .. غريب
......
يبقى انت.. غريب
مش غربة اهل وناس وحدود
الغربة وجود
لما سواد الدنيا بحالها
لعنيك هيسود
لما دموعك رغم احزنك
هتبدل فرحتها جحود
لما فكرك وانت فايق
يبقي شرود
لما تفتح قلبك .. عينك
شايف كل طريق مسدود
يبقى انت .. غريب
======================================================================
(16)
وحشتينى ...
******
وحشتينى ...
ونفسي فى لحظة ألقاكى
وادوب لما تضمينى
واحس بنفسي وياكى
دا من غيرك انا ميت
وجسد عايش
بدن ساتره عن الاحساس
كفن بايش
وعارف نفسي هعود تانى
لمسة ايديك هتحيينى
وحشتينى...
وحشتينى
وغالبنى الشوق
وجليبي بسببك غاب
ما راضى يفوق
وبحر غربتى هايج
وعالى الموج
غريق وسطه ومستنى
على مرسى ترسينى
وحشتينى ...
يا بلاد الغربه يا كافره
باحساسى
يا مباعده ما بين نفسي
وبين ناسى
يا ملعونه عدد نبضى
وانفاسى
يا سارقه منى ايامى
وعرق فاسي
امتى بس تنسينى
واعود لحضنها الدافى
واصرخها
وحشتينى ...
=====================================================================
(17)
مالك يا صاحبى..
************
يمكن اكون بعيوني شايفك
نفس شكلك
ذات ملامحك
بس حاسك حد تاني
جوا منك حاجة ضاعت
حاجة باعت
شخص عكس الاولاني
روحت فين
فين حقيقتك
ليه بقيت كره ماشي
بس شايل نفس صورتك
ليه تضيع عمر فات
ليه تدنس حلو سيرتك
قولي مالك ... جرح قلبك
ولا ظلم الدنيا قابلك
قولى مالك
بس اوعى تقول ما فيش
كنت فينا قلب ابيض
والضحكه ما بتنتهيش
كنت تصرخ في الحياه
غصب عنك راح اعيش
كنت لما تشوفني ابكي
تقولي اضحك
اي حاجه ما تساويش
ليه بقيت انت الدموع
والحزن فينا
فتحت قلبك للجراح
وانت اللي كنت بتداوينا
ليه شباب العمر شاب
والعيون بقت الحزينة
ليه مسلم للالم
فين كفاحك فين عزيمتك
مالك يا صاحبى ..
====================================================================
(18)
الهى...
*******
وانت اعلم بى
على باب رحمتك
واقف
على ضهرى
ذنوب عمرى
ومن غضبك
انا خايف
الهى
وانت رب الكون
تقول للشىء كن فيكون
انا عبدك
ضعيف
تايه
لطريقى مش شايف
طالب رحمتك
و رضاك
تنورلى ضلام نفسى
يا رب ماليش حد سواك
يخرجنى من يأسى
وابقى لسكتك عارف
الهى
بحق عفوك على ادم
ويونس جوا بطن الحوت
اكون فى رحمتك عايش
واكون فيها وقت الموت
بقول اغفرى فى صمتى
وبقولها بأعلى الصوت
دا أنا عبدك ذليل عطفك
يا صاحب القوة والجبروت
الهى
على باب رحمتك
واقف
يا رب
======================================================================
(19)
جليب ابيض
***********
جليب ابيض
ولون خمرى
وضحكة سن
تسكرني
ونظرة حب في عيونها
ولمسة كفها... دنيا
وجوا الحضن الحنين طاغي
ياخد دنيتي مني
يا عيونها يا لون الليل حرام بعدك
يا لسانها يا قطر الشهد
بدوق المر في بعدك
جليب ابيض .
......
جليب ابيض
ولون خمري
وضحكة هدايه للحيران
ولو ادفع سنيين عمري
ما تكفي
تعبرلك انا الولهان
انا العاشق صفا قلبك
انا المجذوب جميل حبك
انا الناسك في محرابك
وغيرك هان
جليب ابيض
......
انا العاشق يا حوريه
وكلماتي جميع زادي
انا المحروم من الميه
تطفي لهيب اهاتي
انا حالي بقي يصعب
انا غلبان
بربك حني علي قلبي
بربك حني علي الانسان
جليب ابيض
=======================================================================
(20)
انا بشر*
*****
انا مش ملاك بجناحين
انا بشر
بغلط كتير لكن بتوب
ولا عمري بكفر بالقدر
حامد اله كل النعم
راضي نعم
بس مش معني الرضا
اني اكون ليكم ذليل
المولي قال في كتاب جليل
لازم نغير نفسنا
الثورة مش ضد الحياه
الثورة مش ضد الاله
مش ضد دين ربنا
معني الرضا
الحكم يسري ع الجميع
العدل فينا يكون سريع
ما يحدش ابدا الاتجاه
الثورة مش ضد الحياه
معالقين ليا المشانق
لاجل يوم قلت اه
مسجون انا واللي سارق
بتنحني ليه الجباه
انا العميل للاجانب
ويوماتي ليهم تسجدوا
انا اللي خاين شرف بلادي
وانتوا اللي ليها بتعبدوا
عملتوا ايه علشان تقوم
قولوا كده
كنتم اذله سنيين طويله
متحججين بالرضا
شايفين مالها بيتنهب
شايفين دينها بيترهب
شايفين ايامنا اللي جايه
في كل مقتل تنضرب
عاملتم ايه
لاجل نيجي للحياه
ونكون بشر
نلقي الكرامه محققه
نلقي عمل
نلقي الحقيقه معلنه في الخبر
نلقي الكفاءه في الميزان
بين الجميع
عاملتم ايه
قولوا كدة
غير انكم بخنوع سنيين
ضيعتوا مستقبل جيلين
باسم الرضا
شيلوا البياده ع الرؤوس
ارقص قدام اللجان
وتعالي ع الدين اللي هان
ودوس
عري شرفك في الميدان
احضن وبوس
اكتم في صوت الحق فيك
خاف الملامه
برر فشل بعده فشل
يلا السلامه
وتعالي ع الامل الوحيد
وحط طين
انا مش ملاك بجناحين
انا بشر
=======================================================================
(21)
همسة ...
**********
تاخر هموم قلبك
افتح طريق للفرح
دا الهم لو نال منك
مسيره يصبح جرح
علي في صوت ضحكتك
ولو ماليها دموع
جمع اهات وحدتك
واعمل منها الشموع
نور ضلام سكتك
واحلف ما فيها رجوع
يأسك يساوي الممات
وكده يكون الطرح
**********
(22)
همسة ...
**********
انا ودموعى على خدى
بقولها يارب
حمولى مش على قدى
وده الصعب
على بابك واعتابك
وعشمى ابقى فى رحابك
من غير ذنب
على كتافى شايل ياما
على كتافى ذنوب وذنوب
وخايف اسيبها دنيايا
وقبل ما اتوب
تقبلنى فى غفرانك
وارحمنى جحيم نارك
وبعطفك تزيح عنى
هموم القلب
انا ودموعى على خدى
بقولها يا رب
======================================================================
(23)
صياد حزين
***********
صياد حزين
بيمسح بايده ع الجبين
دمع العرق
والوش شقق م اللى شاف
فى سنيين عجاف
والقلب م الهم اتخنق
وبرده راضى
عايش على حلم يكون
انسان فى يوم
بيراضى نفسه بالفتات
وكل ما يفتكر اللى فات
يقول خلاص
هانت بقى
الجى احلى يوم اكيد
ناسى العبيط
السوس فى المركب الخشب
عمال يبيض
بيبنى جيشه من جديد
راجع يصفى حساب قديم
راجع بوش كريه لئيم
حالف لتغرق مركبه
وللفقير يبقى الشقى
حافظ يا جاهل م الفروق
صحصح وفوق
واياك تتوه عن سكتك
حقك عرفته وانتهينا
حقك من خيرها يوم تتدوق
هتفضل راضى بالفتات
اصرخ وقول حقى هات
دى الاهه خارجه من الوجع
ومش دواها ابدا سكات
اصرخ واصرخ
هتبقى حر فى السجون
او هتحصل اللى مات
ما الكل مات ..... ومين بقى
====================================================================
(24)
مش هى دى المعضله
*************
تعدى سنه
تيجى سنه
مش هى دى المعضله
دا المشكله
هى الولد
يا عينى من يوم ما اتولد
وهو حياته مشقلبه
زى غيره من النفوس
مفيش فلوس
والغم طابق على النفس
مفيش فرح
وفى حبه اهو
قلبه انجرح
قاعد عواطلى
على القهاواى
لا شغله ليه
ولا مشغله
وهى دى المسأله
يبقى تفرق ايه معاه
تعدى سنه
او تيجى سنه
مش هى دى
المعضله
=======================================================================
(25)
الحقيقة ..
**************
الحقيقة هى انك
غير كل البلاد .. حبيبتى
هى انك لينا مرسى
بعد رحلة شوق طويلة
فيكى نرسى
هى انك حضن دافى
فيه كل الهموم بننسى
دى الحقيقة .. رغم انك
فى بعض يوم علينا قاسية
بتحكمى فينا اللى خاين
واللى بيخربها مداين
واللى خيرك فيه بيغرق
وفاكر نفسة ليكى داين
واللى جرحى او دموعى
هوانى وذلى وجوعى
عنده هاين
وعشان عاشقين يا غاليه
اى حاجه بتبقى مشاية
نرضى دايما بالكفاف
فول حراتى او بصارة
ولا حتى اللقمة حاف
وهدمة سترانا وخلاص
تكفينا شر الجفاف
بس برده بنعشقك
اللى باعلى صوته ينده
واللى ساكت
واللى خاف
واللى عرى يوم فسادك
فى الميدان والكل شاف
مش هيجى يوم تحنى
غاويه خيرك ليه تضنى
نفسى تاخدينى فى حضنك
وتقوليلى وحشنى يا بنى
دى الحقيقة
ان حضنك كتير وحشنى
======================================================================
(26)
دى بلادى
*********
دى بلادى
وانتوا مين
مصر ام الدنيا
وحضارة سنين
مصر نهر النيل
والامان فى الذكر المبين
مصر جنه لونها اخضر
ولولى نازل على الجبين
مصر سد عالى جدا
ياما هد الطامعين
مصر فلاح الشقى
المصانع والصانعين
مصر الغلابة الطيبين
الكادحين
الصابرين
العشمانين
يوم ما تهدى قلوب بتغلى
ويناموا متطمنين
مصر الاف السنين
كانت يوم ما كانت
وحدها فى الدنيا دى
والبقيه
لسه يدوب متصنعين
معمولين
بالطمع والخيانة مرسومين
مش ببالغ يوم ما اقول
مصر الوجود
مصر الخلود
ارض صلبه من تاريخ
بالدم كتبه الجدود
مصر آية فى الكتاب
مش تراب او حدود
مصر عشق فى القلوب
قبطها والمسلمين
انتوا مين
*********
=======================================================================
(27)
على الله التدبير
*************
فى عز الفرحة نبكى دموع
وندعى ربنا يكون خير
وتبقى بطونا فيها الجوع
ونطعم اكلنا للغير
ونقول ماشيه ومستوره
اصل على الله التدبير
....
حبة ملح يا ام احمد
وطقم الصينى عندى ضيوف
ببان بيوتنا مفتوحة
وهيجى منين الخوف
جيران واهل مش فارق
جامعنا الود والمعروف
....
ملاك صاحبى جاله مولود
بدر منور الدنيا
بنوته وبسكوتة
حلاوة اخر العنقود
....
دى بلادنا دى عادتنا
بنستحملها فى الشده
عشان فى الفرحة جمعتنا
وبسننا راح ناكل
اللى يفض لمتنا
هنفضل كده عايشين
ما تعرف مسلم ولا مسيحى
ولا يفرقنا يوم الدين
مسيحى عاشق لصوت رفعت
ومسلم بيقول الترانيم
عاشق معشوق
جسد واحد
وللفرقه اكيد كارهين
....
بتتكلم باسم الله
وانت بتقتل الضحكه
بتدارى فى توب ناقص
بتخوفنا باللحية
عمر الدين ما كان مظهر
وغضب فى وشوش كارهه
عمر الدين ما كان ارهاب
وشتيمه والفاظ جارحه
عمر الدين ما كان بالسيف
وباكاذيبك الواضحة
بتتكلم باسم الله
علم قلبك الطيبة
وعلم روحك الاحسان
خليها كده مسامحه
اعرف قيمة الانسان
تلقى الدنيا كده مصالحه
=======================================================================
(28)
انا الكلمة ...
***********
انا الكلمة ... وانا حروفها
انا الحالة ... وانا خوفها
انا ايامك ... انا سنينك
انا الحزن فى تكوينك
انا اللى بكره كان اجمل
فى احلامى
صحيت على خونة ساكنينك
لايامى خانقنها
لديانتى كارهنها
لاحلامى سارقنها
وسارقينك
ولما صرخت بعلو الصوت
و بصدرى فى وش الموت
لاقيت كل عشاقك
فى ضهرى
ملو ميادينك
نفس الصرخة
نفس الاهـ
نفس الحلم
لنفس حياه
اتارى الكل كان واقف
مستنى حد يقولها
انا الكلمة...
انا حروفها
انا الحالة...
انا خوفها
انا اللى كتبت فى قصايدى
حكاية عشق عشناها
انا وبنت كان املى
اعيش العمر وياها
صحيح خانت العشره
صحيح باعت امل بكرة
لكن معلش مش نادم
عندى بلدى بهواها
=======================================================================
(29)
الي امي ..
******
قلت ألحق فيكي الباقي
من الأيام
من الذكرى
زمان ...
وانتي بترسمي بكره
عمر عشته في ملامحك
ضحكة للرضا عاشقة
تداري كل شيء جارحك
تجاعيد الزمن بانت
علي وشك خلاص يامه
ولسه قلبك الاخضر
كما هو ... دليل دربك
ولسه دعوتك ليا
طريق موصول
ما بيني انا الجاهل
وبين ربك
لاقتني عاوز اقولهالك
ورب الكون
انا بحبك ...
ولا اعرف انسي ولا جني
يشغل في الفؤاد مني
مكان حبك ..
ومين في الدنيا يستاهل
مكان امي
وهي اللي حباني
بلا مطمع
ائن تبقي سمعاني
من غير حتي ما اتوجع
تبص عينيا تعرفني
بقول الحق او بخدع
حافظة كل تجاعيدي
نبض الدم في وريدي
ومين غيرها يفمني
ومين في الدنيا يستاهل
مكان امي
*************
======================================================================
(30)
أعمي رغم انه
*************
بيحاول يكتب
مش عارف
الكلمة حبيسة افكاره
أعمي رغم انه
صحيح شايف
تايهة الخطوة ف مشواره
النوم بيجافي ساعات ليلته
والعقل تكتر أسئلته
يفضل يتقلب ...
يتعذب
يواصل ليله بنهاره
بيحاول يكتب مش عارف
الكلمة حبيسة افكاره
ماسك قلمه وكشكوله
يكتب ...
يشطب كل اللي يقوله
ويرجع يكتب من تاني
ينقي كلامه ويختاره
يضيع المعني من الفكرة
يزهق ..
يقفل كشكوله
يستسلم ..
يفقد اصراره
وتعيش الفكرة
خلاص جواه
واحده من جملة اسراره
بيحاول يكتب مش عارف
الكلمة حبيسة افكاره
========================================================================
(31)
انا مش بخير
***********
انا مش بخير
حتي لما بتسالوا
اكدب واقول
تمام .. بخير
لكن بكون جوايا غير
حمل الزمن
اصبح عسير
واحساس بيدبل في الجسد
وجليب كسير
وغربتي حاصدة السنين
عجزت فيا الأماني
والشعر شاب
وبقيت ... كبير
والحلم كنت بحلمه
تاهت ملامحه
اتبدلت
حتي البعاد
في الجسم قاد
نار السعير
انا نفسي تاني اعود صغير
انا مش بخير
وازاي اكون
والوحدة رغم الزحمة عايشة
جوا ذاتي
ورغم علو الصوت ليه
ساكتة اهاتي
رغم البراح
من غير جناح
ازاي يطير اي طير
انا مش بخير
====================================================================
(32)
وشها لما بتضحك
********
وشها لما بتضحك
زي ورد يا دوب مفتح للحياة
زي ميه في بحر صافي
زي طفل في حضن دافي
زي راحة بعد آه
وشها لما بتضحك
زي ورد يا دوب مفتح للحياة
.....
وشها لما بتضحك
سيمفونية
عزف ناي علي شط نيل
في المغربية
رقصة علي صوت سمسمية
زي نظرة بين حبايب
هو عاشق
عاشقة هي
وشها لما بتضحك
تضحك الدنيا معاه
وشها لما بتضحك
زي ورد يا دوب مفتح للحياة
.....
وشها لما بتضحك
زي فجر لسه طالع
زي انتاج المصانع
زي زرع لسه اخضر في المزارع
زي صوت الست دايما
بيشجي كل اللي سامع
وشها لما بتضحك
فرحي بيكون منتهاه
وشها لما بتضحك
زي ورد يا دوب مفتح للحياة
.....
وشها لما بتضحك
زي عاصي حن قلبه
وابتدي يعرف هداه
زي تايه وسط دربه
راجع بيصحح خطاه
زي قلب عاش يدور ع السعاده
والتقاها في رضاه
وشها لما بتضحك
نعمة ..
عليها تشكر الإله
وشها لما بتضحك
زي ورد يا دوب مفتح للحياة
***********
======================================================================
بطاقة الكتاب
-----------------------------------------------------------------------
عنوان المؤَلَّف : إلى أبى ....
المؤلِّف : الشاعر/ محمود محمد صابر
التصنيف : أشعار ( عامية )
رقم الإيداع : 30/2020
عدد الصفحات :
رقم الإصدار الداخلى : 225
تاريخ الإصدار الداخلى : يونيو / 2017 الطبعة الأولى
-------------------------------------------------------------
جميع حقوق الطبع والنشر محفوظة للشاعر، ولا يحق لأى دار نشر طبع ونشر وتوزيع الكتاب الا بموافـقة كتابية وموثـقة من الشاعـــر
جمعية إبداع الثقافية
(بيت كل المبدعين العرب)
