الرئيسية
اهداء....
الي اغلي الناس
الي من احمل لهم كل الوداد
الي اساتذتي الأجلاء
======================================
بطاقة الكتاب :
ديوان شعر بالعامية (لمين ودادك )
الطبعة الاولي
مكتبة الندي بطنطا
رقم الايداع 21800 / 2019
تصميم الغلاف للفنان المبدع عبد الرحمن البدري
=====================
=====================
الشاعر في سطور
الاسم : البدري عبد الحمن زايد
الميلاد : قشطوخ تلا منوفية
الأقامة : طنطا غربية
المؤهلات العلمية : بكالوريوس اقتصاد وعلوم سياسية جامعة القاهرة
1978
دراسات عليا في التخطيط الاقتصادي كلية التجارة جامعة طنطا
1983
دراسات عليا في النظم السياسية والاقتصادية جامعة القاهرة 1987
الانشطة الأدبية : عضو عامل في رابطة الزجالين وكتاب الأغاني
عضوية رقم 2811
اللقب : شيخ السجالات .
الأعمال السابقة : ديوان ليلي في الحضرة .
ديوان عاشق وطن .
================================================
قيمتي
===
قيمتي عندك
اني منك
قيمتي ف ردودك عليا
قيمتي ف الناس اللي زيك
***
قيمتي لما بتصالحني
قيمتي لما بتصارحني
بالحاجات الحلوة ديا
قيمتي لما بتسامحني
***
قيمتي عندي ف ابتسامك
قيمتي من طيبة كلامك
قيمتي لما ترد عني
اي غيبة وف سلامك
***
قيمتي تعلا لما تعلا
والحياة وياك بتحلا
قيمتي لما الاقيك معايا
دنيتي اغلا وتغلا
***
قيمتي ف محبتكوا ليا
ياحبايبي يانور عينيا
ياللي كنتوا تمللي جنبي
ياللي بتخافوا عليا .
=============================================
لمين الوداد
=======
ياعيد الضحية
يابدر التمام
يااحلي هدية
ياعالي المقام
وصيتك وصية
ف يوم الزحام
تكون لي شفيعي
تقول انه هام
في عرفة وكبر
وصلي وصام
وانه ف ودادك
وفي كل عام
يصلي وينحر
وساقه الغرام
لمكة ومدينة
وزمزم اوام
وواصل وداده
لكل الأنام
ويشفع نبينا
عليه السلام
لكل اللي حبه
اذا الفجر قام
وصلي وسبح
وتاب م الاثام .
================================================
مواويل
(1 )
حبايبي كانوا ويايا بنتمني
يعيش العمر احلامنا ونتهني
ومهما زادوا ف فراقهم راح استني
معادنا لما تجمعنا ف يوم جنة
***
حبايبي والله نسيوني وانا مسكين
ولما قلت ح القاهم يانور العين
دموعي بالألم كانت من الشاهدين
وبادعي ربي يجمعنا وقولوا امين .
===============================
(2)
يابو القلم قوال
وبتكتب الموال
مبدع بجد ياخال
***
موالك المسبوع
وضح لنا الموضوع
يابو النغم مسموع
انا نفسي اكون زجال .
=======================================
(3)
بكرة لما الفجر ييجي ع البيبان
والأمل يخضر عوده ف الغيطان
والحياة تعزف وتضرب ع الكمان
تلقي موالي بيضحك للادان
***
ياللا قولوا الفجر شقشق
والنهار طالع يزقزق
حتي لما الشيب يطقطق
يبقي طاقة نور ودقق
***
وانشر الخير ع الجميع
واوعي تهرب او تضيع
اصل انا قبل الربيع
قلت موال ع السريع .
================================================
قيمة الشاعر
========
الحكاية مش كلام
قيمة الشاعر ف فكرة
مش يرص ويسوي كام
انه بيعرفنا فكرة
لما يبدع ف الغرام
لما بين شطرة وشطرة
يذهل العقل واوام
يدي للأحلام دي نظرة
يبني بخياله المقام
يوزن القافية بكسرة
ولافتحة ولا كام
حرف من كلمة وفقرة
ليها مني الاحترام
قيمته يرسم صورة حلوة
بيها تحلو المشاعر
قيمته يبقي كلامه غنوة
للي فاهم واللي شاعر
قيمته للعشاق ف دعوة
م اللي واصل واللي هاجر
صوته يرفع لينا شكوي
صوته ضاحك صوته ساخر
واللي يكشف كل بلوي
لما بتزيد المساخر
قيمة الشاعر ف فنه
والفنون اصل الحياة
قيمته ف المعني اللي جنه
واللي هو ف مبتداه
ولا في خبره كأنه
صورة من صنع الأله
قيمته ابدا مش ف سنه
ولا ضهره اللي حناه
قيمته ف الوجدان لأنه
هو دا غايته ومناه
========================================= الشعر حي
=======
الشعر مايحبش سكات
الشعر بيحب الأهات
م المعجبين
ويحب يتكلم لغات
الشعر روح
عاوزة تبوح
والريحة لو حلوة اكيد
منه تفوح
الشعر نعمة م الأله
طوق النجاة
لو مات
تموت فينا الحياة .
=========================================
تحية لرابطة الزجالين وابطالها
الشاعر الكبير الأستاذ محمد البهنساوي
والأستاذ الجال الكبير سرور
والأستاذ الخلوق احمد حسن
===========
الله عليك ياسرور
ياعم يازجال
ياللي ف طبق بنور
بتقدم الموال
فيه الدهب مبدور
والشعر والأزجال
ياللي الصبايا الحور
بيعشقوك ياخال
اكتب وقول والنبي
عن رابطة جامعانا
فيها سرور مطلبي
والفرح اهو جانا
ياشمس لا تغربي
وتنوري حدانا
ع الزجالين اكتبي
واشهد يامولانا
اني حداهم صبي
والرابطة ساندانا
والبهنساوي شهد
ايوة ان انا زجال
وسرور معاه اتحد
وايد الأقوال
وعمي احمد رصد
في دفتر الأحوال
خلوني دول للأبد
بفضلهم قوال
وهما ليا المدد
ف الكلمة والأفعال
وهما اكبر سند
وهما اهل ومال .
============================================
الزجالين
=======
الزجالين ف الهوا
زي البشر انواع
يدوا العليل الدوا
ويعالجوا ف الأوجاع
دا منهم اللي استوي
وكسبنا بالأجماع
ومنهم اللي انكوي
ومنهم اللي ضاع
ومنهم اللي اشتري
ومنهم اللي باع
ومنهم اللي اكتفي
ومنهم الطماع
ومنهم اللي اختفي
ومعدش ليه اتباع
ومنهم اللي شبع
ومنهم اللي جاع
ومنهم اللي علي
وصيته طبعا ذاع
ومنهم اللي وطي
واللي اترمي ف القاع
ومنهم اللي نشر
واللي ملا الأسماع
ومنهم اللي فشر
شعره يجيب لي صداع
ومنهم اللي انكسر
واللي اشتغل تباع
ومنهم اللي اسد
ومنهم اللي بتاع
ومنهم اللي المعاني
شاورت عليه بصباع
ومنهم اللي الأغاني
من جملة الأشياع
ومنهم اللي انفطم
ع الشعر بعد رضاع
ومنهم اللي صنم
واللي واخدها دراع
واللي الزجل مهنته
واللي فاكرها مشاع
يازجالين دة الأمل
تصححوا الأوضاع
وتغزلوا بالعمل
اقوالكوا ياصناع
سايق عليكوا النبي
عاوز كدة امتاع
دا حقي أو مطلبي
اني أشوف ابداع .
القيت في رابطة الزجالين بالقاهرة الثلاثاء 30/7/2019
كما القيت في نادي أدب طنطا 27/8/2019
=========================================
شاعر
====
سجلوني ف الصدارة
واكتبوا عني بجدارة
ان انا ملك العبارة
والمهارة والجسارة
بس حظي ياميت خسارة
باع لي فدادين الشطارة
***
ف الكلام اكتب وازوق
ف الغرام اعشق واروق
واشتهي حلم الحياة
خطوتي سابقاني اه
بس ياما بتصادفني
ف الطريق احداث تفوق
كلها مش بتحالفني
لأ دي دايما بتخالفني
بس برضه مسيري اعافر
والمعونة م الأله
***
اسالوا عني المشاعر
ح تجاوبكوا ايوة شاعر
عبا حمله هموم وسافر
ف الحقيقة دا واد مغامر
***
يمكن الخطوة تاخدني للبراح
املا صدري بحبكوا بنور الصباح
وارسم البسمة علي وجوه الملاح
واستحق وعن جدارة
اني اكون ملك العبارة .
===============================================
طنطا العامرة
(مع حفظ الالقاب للسادة اولياء الله نفعنا الله بهم )
================================
طنطا فيها الفجرلاح
من مقام نور الصباح
وادا للسيد تمام
عنده جوة ف المقام
عب رحيم نادي ف سيجر
سيدي مسعود خش راخر
وافتتح عز الرجال
ويا مضيها المجال
سيدي احمد حجاب
خلوته ويا الصحاب
ويا عبد العال ياسيدي
حبهم يجري ف وريدي
خد لهم من جوة طنطا
الحلاوة معاك ف شنطة
وانت بتزور الدسوقي
اللي واخد كل شوقي
وابعت الفاتحة تحية
وانت رايح اسكندرية
لما للمرسي حتوصل
ولهدومك راح تفصل
البوصيري حيساعدنا
نغزل البردة بايدنا
والحكاية حتبقي دوبل
لما توصل سيدي شبل
وانت رايح للحسين
اوعي تنسي دعوتين
دعوة عند الست ليا
دعوة تانية مدارية
وانت بتزور المقام
خللي بالك م الزحام
طنطا في وسط العمار
فيها اوليا كتار
فيها حبي والسلام
ع النبي خير الأنام
صلي وانت هناك عليه
تشرب الخير من ايديه .
=============================================
بلياتشو
=====
انا بلياتشو عشانكم جيت
العب واتشقلب ع الحيط
كل دموعي هناك ف البيت
واعمل فيها سعيد ومزقطط
ورقصتلكم اهو وغنيت
***
ورسمت الالوان علي وشي
واقصر واطول واشفط كرشي
حطيت المسكرة علي رمشي
واعمل قرد وكلب مقطقط
وانصب سيرك ولو علي نعشي
***
طفل صغير كهل عجوز
ست تخينة ولاوية البوز
شابة جميلة كله يجوز
باعرف اضحككم مع اني
عمري ماكنت ف يوم اراجوز
***
ممكن يبقي الشعر طويل
واحلق زيرو واركب ديل
والبس جيبة مع البناطيل
لو حبيتوا كمان راح اغني
بس ياناس ليه حظي قليل
***
ليلي نهار سهران محبوس
لما تشوفني تقول ملبوس
باعمل جن وبادي دروس
كوميدي وعمري ماشفت البسمة
فوق الصعب عشانكوا بادوس .
============================================
رحلة من المنصورة للاسكندرية
===================
تلاتين يونية
والعالم سهران ويانا
رحنا ف دنيا غير الدنيا
جنة ويمكن مش دنيانا
جنة لقيتها حقيقي معاكي
لما حضنتي بكفك ايدي
حسيت ان الروح وياكي
هايمة ياروحي
طايرة ياسيدي
هو دا نيل ولا دي سماكي
والليلة وف فرحي وعيدي
كنت باغني وزاد تنهيدي
ف الستين سهران صباحي
والخطوة جريئة ومجبورة
ومفيش نوم وفضلت انا صاحي
حد ينام في ليل المنصورة ؟
وانا علي كتفك خدت براحي
قلبي اتاخد مني ف صورة
ممكن اعرف امتي وفين
عدينا علي بحر الحب ؟
فاتت جمصة وادكو ومين
ينسي رشيد وطريقها الصعب ؟
لما شفايفك دول الاتنين
جم وخدوني لشط القرب
كانت ايدك بتطبطبلي
وف مرساكي انا كنت باطب
ف الفجرية انا دبت خلاص
وانت يامرسي يابو العباس
تشهد اني غريق ف رحابها
طبعا من دون كل الناس
رحلة مايعرفهاش الا انتي
دا انتي حبيبتي وعمري وكنتي
جوة القلب ودادك ياللي
كل حياتي وعشقي وضلي .
================================================
تسمحي لي ؟
========
تسمحي لي اني بشفايفي
احضن الشفة اللي فوق
اللي ياما سكرت منها
لما في حلمي بادوق
كل شهدك والحلاوة
اني ف خدودك بافوق
كل مرة تساليني
صاحي بدري ليه ياذوق ؟
دا انتي احلامي ومنايا
وانتي نبضي في العروق
كل ماباشوفك ف حلمي
اصحي يانا وكلي شوق
ياللي ياما سكرت فيكي
لما من حلمك بافوق
الشفايف بالفراولة
فوق وتحت وهما اولي
واللي كان مني علاولة
اني باحضنهم واقوللك
اه لاقوة او لاحولا
مش شفايفك دول عيون
يفضحوكي اما باكون
صاحي اشرب من عسلهم
وانتي فاردة لي الجفون
اسمحي لي وانتي روحي
اني اصارحك مانتي بوحي
اني حسيت من جروحي
لما فكيتي بشفايفك
اسري وانهدت صروحي
اني اهرب مني ليكي
والحكاية معدش فيكي
غير شفايفك او ايديكي
هما دول روحي ياروحي .
مش لعب عيال
هو لعب عيال يالولو ؟
ولا حب القلب غاب ؟
والله مهما الناس يقولوا
برضه حنعلي الجواب
لو يعدي الليل بطوله
انتي عندي ف السحاب
واللي حبك لو عزوله
حب يعمل فيها ناب
واللي غاروا لو ساقوله
الف واحدة م الشباب
مش حيبقوا زي لولو
لولو دي رحلة عذاب
انتي زينة التوب ونوله
وانتي اغلي م الصحاب
هاتوا فلبي واغزلوله
بدلة بيضة والكتاب
اكتبوله واشرحوله
ان قلبي ف يوم ماتاب .
================================================
اوعي تخون
=========
اوعي مرة تبقي خاين
دي الخيانة شيء فطيع
اوعي تخدع او تماين
او تنافق اوتبيع
اوعي تجرحني وعاين
قبل ماتبيع الجميع
كل كدبك ليا باين
ربنا هو السميع
وانت لو للحب صاين
عمر ماحبك يضيع .
=============================================
حلم
====
صحتيني بحلم بيننا
والهنا مضلل علينا
صوت ملايكة ف وسط جنة
والسعادة اللي ف عنينا
صوتك الولهان برنة
كان لقلبي احن مينا
للي حبك واللي غنا
واللي في حضنك سفينة
شطها بيكي تغنا
وانتي ف ودادك حزينة
عاوز اشوفك كل ثانية
فيها ايه لو تحضنينا
عاوز اشوفك مرة تانية
عاوز اضمك لو قسينا
ذكريات العمر جاية
وانتي ع الربان ضنينة
عاوز اشوف الحلم تاني
وانشر الحلم ف مدينة
افشي سر العمر ياني
وانتي ع الاسرار امينة
يعني لو طيفك ناداني
يبقي رب الكون حامينا
اما لو رمشك ناجاني
يبقي روحك بتنادينا
يبقي روحك بتنادينا.
================================================
شقاوة
====
ياضحكة وسطها الملفوف
وخطوتها اللي شايلاها
يا رعشة صمتها المخطوف
كأنه كلامها وغناها
يابسمتها وبص وشوف
سكونها هو نجواها
***
ياهزة وسطها النونو
تقول غادة وميادة
وعشق غرامي وجنونه
جميلة وحسنها زيادة
وتملا القلب وتصونه
ويبقي حبها عبادة
وعمر الحب ماتخونه
سفيرة ليه فوق العادة .
================================================
بقيت بانسي
========
انا راجل بقيت بانسي
وعقلي يتوه ويتحير
وحاسس اني ف الجلسة
كلامي بيبقي متغير
ولو قاضي ودي الكارثة
حكم بيننا حيتمنظر
ويديني سنين خمسة
ويمكن اقل او اكتر
ويبقي الحكم بالحبسة
عشان عقلي بقي صغير
ومش ذنبي ان انا بانسي
وعقلي يتوه وتحير
حافكركم باني خلاص
بقيت بانسي
ولموا قلمكوا والكراس
ولا همسة
وقولوا فاقد الأحساس
ولا حاسة
ومبتفرقش عنده الناس
ولابيرسي
علي شط الأمل وان داس
بقي بيقسي
ولا شاعر ولا حساس
ياعم انسي
نسيت اسمي وعنواني
نسيت بيتنا مكانه فين
نسيت ف الزحمة خلاني
نسيت صحبة بقالها سنين
نسيت شعري وألحاني
نسيت قلبي وكلي حنين
نسيت يااخوانا اوطاني
وانا تايه مع التايهين
ولسة حبيبتي فاكراني
ولسة الغربة شط حزين
لكن مش ح انسي سجاني
ليوم الدين
ولا حانسي اعيش تاني
واجيبه سجين .
================================================
حادث معهد الأورام
===========
في المعهد حجزوك سنتين
والدوا مر بجد ياناس
وصفوا كماوي علي الورمين
ورم الروح واللي في الراس
واما ابتدا وضعك يتحسن
قالوا حتخرج م المستشفي
ومالوش لبس كمان ف المخزن
والمحاليل ملهوش ماهي ناشفة
يخرج احسن ع الدكتور
اهو يتعالج عنده هناك
واما يعدي يادوب السور
ممكن يجري يلف تراك
هرب الأبعد كدة م الموت
بس الموت كان مستنيه
هو يادوب بيعدي يفوت
العربية انفجرت فيه
اصل الموت دا ملوهش كبير
يحصدة فينا بالف طريقة
مرة بقلة دوا وضمير
ونموت برضه بفعل حريقة
ولا الهم يعدي عليك
يقصف عمرك وانت ىسليم
والأرهاب يابني يخليك
اعرج ومكسح وعقيم
هي بلدنا حترجع تاني
معجونة بمية عفاريت
كل ماتيجي تفوق بتعاني
يظهر اني خلاص عكيت
نقسي ف مرة اشوف الجاني
واتعلق ف رقبته ياريت
واتعلق ف رقبته ياريت .
================================================
صون الود
=========
مين قاللك تعمل مابدالك
وتسيب زوجتك وام عيالك
ولا عشان ماهش فاضيالك
ومقضية العمر فداك
تغسل تطبخ تجري وراك
وتشيل همك والأولاد
احفظ ياابني العشرة وصونها
واحمد ربك ع اللي معاك
صون الود وراعي ضميرك
دي بتحفظ مالك وسريرك
وبترعي كبيرك وصغيرك
واستحملت الغلب عشانك
اديها ياحبيبي حنانك
مش تديها ياروحي قفاك .
================================================
أشواق
=====
اللي حار فيه الاطبا
واشتكي منه الحبايب
شوق بيكبر حبة حبة
شوق يخلي القلب دايب
سكته ياخوانا صعبة
اللي تلقي حبيبه غايب
ع الحبيب دايما بادور
حتي لو أصبحت شايب
اسالوا العشاق تلاقوا
شوقنا زاد والشوق مطايب
كل عاشق بيته كعبة
للي عاصي واللي تايب
واللي داخ م الموجة مرة
يشتهي قدوم المراكب .
================================================
لعمي زايد في سيدي ابي الحسن الشاذلي رضي الله عنه
====================================
يادولة الأخيار
واقفين هنا زنهار
واقفين علي بابكم
نظرة يااهل الدار
ياعم يازايد
نورك هنا قايد
طوالي ليل ونهار
بسالكم الفاتحة
بالستر والصحة
ونصرة ع الأغيار
دعواتكوا ياسادة
بالحسني وزيادة
والحقنا بالأخيار
كلي امل فبكم
والشوق كمان ليكم
قايد ف قلبي النار
غانمين كدة وسالمين
بالبشري دول راجعين
زايد ياوش الخير
ترجع لنا سالم
مجبور كدة وغانم
ياكاتم الأسرار .
================================================مقتطفات من سجال انا الريفي
(1)
يامعلمني الصبر انا ريفي
بازرع درة وشعير والقمح
واخبز وباكلكوا رغيفي
انا للارض الخير والملح
واسالوا عني كل ضيوفي
متعود علطول ع الصفح
كل نهاري تعب والليل
سهرة بريئة اكيد يااخوانا
حبة شاي و ف قلب النيل
كني معاكوا ف قلب الجنة
انا ريفي والطبع جميل
وباحب الفرح وباتهنا
==================
(2)
انا الريفي وانا المسؤؤل
عن الليلة واصحابها
تعالي سجالنا دوغري وقول
انا الريفي علي بابها
وكلمتنا نغم علطول
وانتوا ياسيدي خطابها
================
(3)
دعيتك يااله الكون
انا الريفي اللي حب الناس
تصون بلدي دي مهما يكون
بلد للخير وللاخلاص
وتقضي عللي فيها يخون
وتقطع دابره ساس او راس
=====================
(4)
انا الريفي وانا المصري
وكله اتربي من خيري
انا دايما زعيم عصري
ومين ينفع زعيم غيري
ولو عزت الكلام حصري
سلاحي ف فاسي وف طيري
===================
(5)
انا نيلي بيرويني
وانا فلاح
ومية مصر تسقيني
وبيها ارتاح
وجعضيضها بيشفيني
تقول تفاح
=====================
(6)
انا الريفي باقول موال
وبارسم صورة ع المية
ولو فارس فانا خيال
معيا مهرة وصبية
ولو عزمي يهد جبال
فصوتي كله حنية
انا بيكم ياناس مفتون
لأني ريفي وابن اصول
ولايمكن اكون مجنون
ولو كان اكلي هو الفول
بحب الناس ودة بيكون
خلاصة للوداد والقول
=======================
(7)
انا الريفي وعمري طويل
حضارتي علمها سايد
وباكتب شعر او مواويل
دا نوري للجميع قايد
ولو تسال ف يوم ياجميل
دا انا البدري وانا زايد .
================================================
مقتطفات من سجال قول الصدق
(1)
قول الصدق ولو تنداس
واوعاك تكدب يوم ع الناس
دا اللي يقول الصدق ياصاحبي
كدة حنشيلك فوق الراس
=======================
(2)
كلامي هو رسمالي
مليت دواوين باعمالي
ورابطتنا كمان شاهدة
وتحكيلكوا علي حالي
=======================
(3)
وافعالي واقوالي
تلاقوها ف موالي
كلامي ان شالله يعجبكوا
وتبقي السهرة طوالي
=======================
(4)
معايا مزان
لكن فنان
جواهرجي ف اشعاري
وباوزن لولي او مرجان
=======================
(5)
اذا قلت الكلام هين
تقول انه دهب لين
وفي الحق الكلام كالسيف
يشق الفجر ويبين
=======================
(6)
انا شيخكم وليا الفخر
ولو يديني ربي العمر
ح اغنيلكم واهنيكم
واقدم ليكوا كل الشكر
========================
(7)
الكداب حيخش النار
وكمان عيشته حتبقي مرار
والناس تحذر طبعا منه
ومفيش بيني وبينه عمار
=======================
(
والصدق ينجي من الضيق
خليه ليك العمر رفيق
يوسف كان صادق مع ربه
لما ناداه قاللوا ياصديق
========================
(9)
واوعاك تنسي ابو بكر كمان
صادق بقي صديق عشمان
يدخل بيها الجنة وصاحبه
حبه لسيدنا النبي عنوان
========================
(10)
والكداب لو حتي معاه
كل المال والناس والجاه
عمره مايكسب ولا حيفوز
وحيخسر دوغري ياولداه
========================
(11)
كدبك حيوديك ف جهنم
وتعيش عمرك كدة تتالم
ولأن حياتك مليانة
كدب وغش ياريت تتعلم .
===============================================
الساعة
======
هي كل الدنيا ساعة
ناس تحب تعيشها طاعة
ربنا يكتبنا منهم
والفريق التاني دا ف غاية البشاعة
الدقيقة تساوي عمر
والثواني لو تمر
كلنا ح نحس بيها
ساعة واقفة بقالها شهر
دوق مرارة الأنتظار
واللي مكوي فيه بنار
عارف ان اليوم سنين
لو صبرنا دا المرار
انتظرتك عمري كله
واللي ليه محبوب يقول له
اوعي تنساني ف ساعة
ياحبيب قلبي وضله
اكتبوا لي عاش ساعات
ساعة ضايعة وعمر فات
واما فقت من انتظاري
قالوا كان مولود......... ومات
================================================
موعدنا العاشرة
===========
قلبي اتعلق بيها ياناس
فاضل ساعة وربع خلاص
لما الساعة عشرة بتيجي
تسمع ضرب ف قلبي رصاص
قلبي اتعلق بيها اكيد
واستنتها بلبس جديد
زي الطفل مايكوي هدومه
ويبات بيها ف ليلة العيد
قلبي اتعلق بيها ودق
وانت ياوقت اشهد بالحق
نادي زماني وقول له يقدم
ترس الساعة كمان ويزق
قلبي اتعلق بيها ثواني
ياللا تعالي اوام علشاني
دي الأيام بتمر بطيئة
وانا مش عاوزك تستناني
قلبي اتعلق بالمغرور
حاسس اني بقيت مسحور
الفين حاجز بيني وبينك
اصل الوقت كأنه بحور
قلبي اتعلق بيها وراح
يحسب وقته عشان يرتاح
لكن كل ماثانية تعدي
تلقي الوقت كانه براح
قلبي اتعلق بيها وداب
والحكمة اتكتبت ف كتاب
والساعة تقوللك ياحبيبي
عمرنا عدي كانه سراب.
================================================
عزف الكلمات
==========
اعزف وقول ياجميل
دا كلام كبير وتقيل
اعزف دا من كلمتك
يتربي بيكم جيل
اعزف وقول غني
راح تسمعوا مني
كلام وليه العجب
راح تسمعوا فني
اعزف كمنجة وعود
وربنا المعبود
انت كلامك دهب
فقول ياعم وجود
اعزف وقول الحان
دا انت بروح فنان
واللي يعز الطرب
ييجي حدانا كمان
اعزف معايا وقول
وغني ع الأرغول
ياللي كلامك حكم
تتغذي منه عقول
اعزف لي من قلبك
لما باكون جنبك
اللحن يتغنا
وتكالنا علي ربك
اعزف لي ياعيوني
هما اللي لاموني
حيفيد بايه لومهم
لو مرة سمعوني
اعزف لي ع النوتة
او قللي حدوتة
ياابني وسمعني
دا انا لسة بنوتة
اعزف كلام موزون
خلي معانا الكون
يسمع ويتمايل
دا احنا شبعنا سكون
اعزف ومتفسرش
والوزن متكسرش
واضحك وفرحني
ياللا ومتكشرش
اعزف ووريني
ياحبيبي واشجيني
يابو الكلام اصلي
وكمنجتك صيني
اعزف لي الحاني
وانا مش حقول تاني
ولا كلمة ف الاخر
باختم في ديواني .
================================================
خاطرة حزينة
========
سك الباب
ياامل كداب
ياللي مليت الدنيا سراب
والنور غاب
حتي لقانا مع الأحباب
كله عذاب
اصبح ليهم عاشق تاني
والعيب فيهم
وف احزاني
باعدت بيني وبينهم ياااااااني
ورجعت اسال مين الجاني ؟
مهما راح اعمل راح تنساني
اصل الحب امل كداب
كله عذاب
سك الباب
ياللي مليت الدنيا سراب .
================================================
نهاية
===
سيبك انتي من حكايتي
يظهر اني جت نهايتي
قبل مااهرب اواتوب
يظهر اني دوبت دوب
هي ساعة او يدوب
لحظتين وتجيني تاني
سيبك انتي من زماني
مانتي لو فاكرة مكاني
كنتي جيتي لحد بيتي
واشتكيتي
سيبك انتي من حناني
ماانتي لو عايشة ف كياني
كنت جتلك
قلتلك
ليه رصيدي ف دنيتك
اصبح مفيش
ليه حكايتي ف سكتك
مبتنتهيش
بس قلبي ياحلوة مات
لحننا صابه السكات
عاوز اقوللك كلمتين
نفسي اقولهم من زمان
احنا ماننفعش بعض
ان مابيني وبينك الف سد
سيبك انتي من حكايتي
هي دي يمكن نهايتي
هي دي يمكن نهايتي .
===============================================
بنادي عليك
========
ياعاشق في طريق النور
ومستني الصبايا الحور
ناديتك بالهنا تجيني
يافارس عدي بينا السور
انا عبلة ياميت عنتر
انا ليلي ياقيس سكر
انا للحسن محسوبة
وباستني جدع اشطر
ياخدني بعيد ف احضانه
يشيلني جوة اجفانه
ولا يهرب ف بطن الحوت
وانا بين عقله وجنانه
في بطن الحوت حنتعذب
ف جمر النار حنتقلب
بلاش احسن وخلينا
نقول الشعر او نكتب
ولايهمك ولاتحتار
علي جناحي حقول اشعار
وتبقي معايا ف الجنة
ونبعد عن طريق النار
حناني كله حاديلك
وحبي كله حاسقيلك
ومهما ابعد راح اشرحلك
واغنيلك وحا حكيلك .
================================================
وصفة سهلة
========
للي بكي حظه
واللي الزمن هزه
باهديك انا وصفة
لاتخش مستشقي
ولا تندب الدنيا
انا جي بالعنيا
ارسم لك البسمة
ح تعدي م الأزمة
لو تفتكر ربك
قادر يزيح كربك
وان كنت مش راضي
او حتي مش فاضي
راسك ف اقرب حيط
وعشان انا مليت
من كتر ارشادك
او حتي اسعادك
خلصنا من ياسك
علشان يزول نحسك
واصبر وصبرني
وياريت تعبرني
انا مش ح قول تاني
ياللي انت بتعاني
خليك مع المولي
ومحبته اولي
يارب يحمينا
وياريت يقوينا .
================================================
هدية من ابني
=========
مهما اقول عنك ياابني
ليا نور طول ماانت جنبي
باستند دايما عليك
وانت حبك جوة فلبي
مهماياابني تخلا بيا
بردو ياابني انت اللي ليا
وانت روحي وكل حلمي
وانت ياابني نور عينيا
وانت حافظ للجميل
وانت واصلني واصيل
وانت ليا زي ضلي
ياابني قلبي ليك يميل
يشهد المولي عليا
ان حبك زاد شوية
بعد ماعاتبتك وجيت
جبت وياك الهدية .
================================================
بطاقة الكتاب
-----------------------------------------------------------------------
عنوان المؤَلَّف : لمين ودادك
المؤلِّف : الشاعر/ البدري عبد الحمن زايد
التصنيف : أشعار ( عامية )
:رقم الإيداع: : 21800 / 2019
عدد الصفحات : 76 صفحة
رقم الإصدار الداخلى : 258
تاريخ الإصدار الداخلى : يونيو / 2017 الطبعة الأولى
-------------------------------------------------------------
جميع حقوق الطبع والنشر محفوظة للشاعر، ولا يحق لأى دار نشر طبع ونشر وتوزيع الكتاب الا بموافـقة كتابية وموثـقة من الشاعـــر
الي اغلي الناس
الي من احمل لهم كل الوداد
الي اساتذتي الأجلاء
======================================
بطاقة الكتاب :
ديوان شعر بالعامية (لمين ودادك )
الطبعة الاولي
مكتبة الندي بطنطا
رقم الايداع 21800 / 2019
تصميم الغلاف للفنان المبدع عبد الرحمن البدري
=====================
=====================
الشاعر في سطور
الاسم : البدري عبد الحمن زايد
الميلاد : قشطوخ تلا منوفية
الأقامة : طنطا غربية
المؤهلات العلمية : بكالوريوس اقتصاد وعلوم سياسية جامعة القاهرة
1978
دراسات عليا في التخطيط الاقتصادي كلية التجارة جامعة طنطا
1983
دراسات عليا في النظم السياسية والاقتصادية جامعة القاهرة 1987
الانشطة الأدبية : عضو عامل في رابطة الزجالين وكتاب الأغاني
عضوية رقم 2811
اللقب : شيخ السجالات .
الأعمال السابقة : ديوان ليلي في الحضرة .
ديوان عاشق وطن .
================================================
قيمتي
===
قيمتي عندك
اني منك
قيمتي ف ردودك عليا
قيمتي ف الناس اللي زيك
***
قيمتي لما بتصالحني
قيمتي لما بتصارحني
بالحاجات الحلوة ديا
قيمتي لما بتسامحني
***
قيمتي عندي ف ابتسامك
قيمتي من طيبة كلامك
قيمتي لما ترد عني
اي غيبة وف سلامك
***
قيمتي تعلا لما تعلا
والحياة وياك بتحلا
قيمتي لما الاقيك معايا
دنيتي اغلا وتغلا
***
قيمتي ف محبتكوا ليا
ياحبايبي يانور عينيا
ياللي كنتوا تمللي جنبي
ياللي بتخافوا عليا .
=============================================
لمين الوداد
=======
ياعيد الضحية
يابدر التمام
يااحلي هدية
ياعالي المقام
وصيتك وصية
ف يوم الزحام
تكون لي شفيعي
تقول انه هام
في عرفة وكبر
وصلي وصام
وانه ف ودادك
وفي كل عام
يصلي وينحر
وساقه الغرام
لمكة ومدينة
وزمزم اوام
وواصل وداده
لكل الأنام
ويشفع نبينا
عليه السلام
لكل اللي حبه
اذا الفجر قام
وصلي وسبح
وتاب م الاثام .
================================================
مواويل
(1 )
حبايبي كانوا ويايا بنتمني
يعيش العمر احلامنا ونتهني
ومهما زادوا ف فراقهم راح استني
معادنا لما تجمعنا ف يوم جنة
***
حبايبي والله نسيوني وانا مسكين
ولما قلت ح القاهم يانور العين
دموعي بالألم كانت من الشاهدين
وبادعي ربي يجمعنا وقولوا امين .
===============================
(2)
يابو القلم قوال
وبتكتب الموال
مبدع بجد ياخال
***
موالك المسبوع
وضح لنا الموضوع
يابو النغم مسموع
انا نفسي اكون زجال .
=======================================
(3)
بكرة لما الفجر ييجي ع البيبان
والأمل يخضر عوده ف الغيطان
والحياة تعزف وتضرب ع الكمان
تلقي موالي بيضحك للادان
***
ياللا قولوا الفجر شقشق
والنهار طالع يزقزق
حتي لما الشيب يطقطق
يبقي طاقة نور ودقق
***
وانشر الخير ع الجميع
واوعي تهرب او تضيع
اصل انا قبل الربيع
قلت موال ع السريع .
================================================
قيمة الشاعر
========
الحكاية مش كلام
قيمة الشاعر ف فكرة
مش يرص ويسوي كام
انه بيعرفنا فكرة
لما يبدع ف الغرام
لما بين شطرة وشطرة
يذهل العقل واوام
يدي للأحلام دي نظرة
يبني بخياله المقام
يوزن القافية بكسرة
ولافتحة ولا كام
حرف من كلمة وفقرة
ليها مني الاحترام
قيمته يرسم صورة حلوة
بيها تحلو المشاعر
قيمته يبقي كلامه غنوة
للي فاهم واللي شاعر
قيمته للعشاق ف دعوة
م اللي واصل واللي هاجر
صوته يرفع لينا شكوي
صوته ضاحك صوته ساخر
واللي يكشف كل بلوي
لما بتزيد المساخر
قيمة الشاعر ف فنه
والفنون اصل الحياة
قيمته ف المعني اللي جنه
واللي هو ف مبتداه
ولا في خبره كأنه
صورة من صنع الأله
قيمته ابدا مش ف سنه
ولا ضهره اللي حناه
قيمته ف الوجدان لأنه
هو دا غايته ومناه
========================================= الشعر حي
=======
الشعر مايحبش سكات
الشعر بيحب الأهات
م المعجبين
ويحب يتكلم لغات
الشعر روح
عاوزة تبوح
والريحة لو حلوة اكيد
منه تفوح
الشعر نعمة م الأله
طوق النجاة
لو مات
تموت فينا الحياة .
=========================================
تحية لرابطة الزجالين وابطالها
الشاعر الكبير الأستاذ محمد البهنساوي
والأستاذ الجال الكبير سرور
والأستاذ الخلوق احمد حسن
===========
الله عليك ياسرور
ياعم يازجال
ياللي ف طبق بنور
بتقدم الموال
فيه الدهب مبدور
والشعر والأزجال
ياللي الصبايا الحور
بيعشقوك ياخال
اكتب وقول والنبي
عن رابطة جامعانا
فيها سرور مطلبي
والفرح اهو جانا
ياشمس لا تغربي
وتنوري حدانا
ع الزجالين اكتبي
واشهد يامولانا
اني حداهم صبي
والرابطة ساندانا
والبهنساوي شهد
ايوة ان انا زجال
وسرور معاه اتحد
وايد الأقوال
وعمي احمد رصد
في دفتر الأحوال
خلوني دول للأبد
بفضلهم قوال
وهما ليا المدد
ف الكلمة والأفعال
وهما اكبر سند
وهما اهل ومال .
============================================
الزجالين
=======
الزجالين ف الهوا
زي البشر انواع
يدوا العليل الدوا
ويعالجوا ف الأوجاع
دا منهم اللي استوي
وكسبنا بالأجماع
ومنهم اللي انكوي
ومنهم اللي ضاع
ومنهم اللي اشتري
ومنهم اللي باع
ومنهم اللي اكتفي
ومنهم الطماع
ومنهم اللي اختفي
ومعدش ليه اتباع
ومنهم اللي شبع
ومنهم اللي جاع
ومنهم اللي علي
وصيته طبعا ذاع
ومنهم اللي وطي
واللي اترمي ف القاع
ومنهم اللي نشر
واللي ملا الأسماع
ومنهم اللي فشر
شعره يجيب لي صداع
ومنهم اللي انكسر
واللي اشتغل تباع
ومنهم اللي اسد
ومنهم اللي بتاع
ومنهم اللي المعاني
شاورت عليه بصباع
ومنهم اللي الأغاني
من جملة الأشياع
ومنهم اللي انفطم
ع الشعر بعد رضاع
ومنهم اللي صنم
واللي واخدها دراع
واللي الزجل مهنته
واللي فاكرها مشاع
يازجالين دة الأمل
تصححوا الأوضاع
وتغزلوا بالعمل
اقوالكوا ياصناع
سايق عليكوا النبي
عاوز كدة امتاع
دا حقي أو مطلبي
اني أشوف ابداع .
القيت في رابطة الزجالين بالقاهرة الثلاثاء 30/7/2019
كما القيت في نادي أدب طنطا 27/8/2019
=========================================
شاعر
====
سجلوني ف الصدارة
واكتبوا عني بجدارة
ان انا ملك العبارة
والمهارة والجسارة
بس حظي ياميت خسارة
باع لي فدادين الشطارة
***
ف الكلام اكتب وازوق
ف الغرام اعشق واروق
واشتهي حلم الحياة
خطوتي سابقاني اه
بس ياما بتصادفني
ف الطريق احداث تفوق
كلها مش بتحالفني
لأ دي دايما بتخالفني
بس برضه مسيري اعافر
والمعونة م الأله
***
اسالوا عني المشاعر
ح تجاوبكوا ايوة شاعر
عبا حمله هموم وسافر
ف الحقيقة دا واد مغامر
***
يمكن الخطوة تاخدني للبراح
املا صدري بحبكوا بنور الصباح
وارسم البسمة علي وجوه الملاح
واستحق وعن جدارة
اني اكون ملك العبارة .
===============================================
طنطا العامرة
(مع حفظ الالقاب للسادة اولياء الله نفعنا الله بهم )
================================
طنطا فيها الفجرلاح
من مقام نور الصباح
وادا للسيد تمام
عنده جوة ف المقام
عب رحيم نادي ف سيجر
سيدي مسعود خش راخر
وافتتح عز الرجال
ويا مضيها المجال
سيدي احمد حجاب
خلوته ويا الصحاب
ويا عبد العال ياسيدي
حبهم يجري ف وريدي
خد لهم من جوة طنطا
الحلاوة معاك ف شنطة
وانت بتزور الدسوقي
اللي واخد كل شوقي
وابعت الفاتحة تحية
وانت رايح اسكندرية
لما للمرسي حتوصل
ولهدومك راح تفصل
البوصيري حيساعدنا
نغزل البردة بايدنا
والحكاية حتبقي دوبل
لما توصل سيدي شبل
وانت رايح للحسين
اوعي تنسي دعوتين
دعوة عند الست ليا
دعوة تانية مدارية
وانت بتزور المقام
خللي بالك م الزحام
طنطا في وسط العمار
فيها اوليا كتار
فيها حبي والسلام
ع النبي خير الأنام
صلي وانت هناك عليه
تشرب الخير من ايديه .
=============================================
بلياتشو
=====
انا بلياتشو عشانكم جيت
العب واتشقلب ع الحيط
كل دموعي هناك ف البيت
واعمل فيها سعيد ومزقطط
ورقصتلكم اهو وغنيت
***
ورسمت الالوان علي وشي
واقصر واطول واشفط كرشي
حطيت المسكرة علي رمشي
واعمل قرد وكلب مقطقط
وانصب سيرك ولو علي نعشي
***
طفل صغير كهل عجوز
ست تخينة ولاوية البوز
شابة جميلة كله يجوز
باعرف اضحككم مع اني
عمري ماكنت ف يوم اراجوز
***
ممكن يبقي الشعر طويل
واحلق زيرو واركب ديل
والبس جيبة مع البناطيل
لو حبيتوا كمان راح اغني
بس ياناس ليه حظي قليل
***
ليلي نهار سهران محبوس
لما تشوفني تقول ملبوس
باعمل جن وبادي دروس
كوميدي وعمري ماشفت البسمة
فوق الصعب عشانكوا بادوس .
============================================
رحلة من المنصورة للاسكندرية
===================
تلاتين يونية
والعالم سهران ويانا
رحنا ف دنيا غير الدنيا
جنة ويمكن مش دنيانا
جنة لقيتها حقيقي معاكي
لما حضنتي بكفك ايدي
حسيت ان الروح وياكي
هايمة ياروحي
طايرة ياسيدي
هو دا نيل ولا دي سماكي
والليلة وف فرحي وعيدي
كنت باغني وزاد تنهيدي
ف الستين سهران صباحي
والخطوة جريئة ومجبورة
ومفيش نوم وفضلت انا صاحي
حد ينام في ليل المنصورة ؟
وانا علي كتفك خدت براحي
قلبي اتاخد مني ف صورة
ممكن اعرف امتي وفين
عدينا علي بحر الحب ؟
فاتت جمصة وادكو ومين
ينسي رشيد وطريقها الصعب ؟
لما شفايفك دول الاتنين
جم وخدوني لشط القرب
كانت ايدك بتطبطبلي
وف مرساكي انا كنت باطب
ف الفجرية انا دبت خلاص
وانت يامرسي يابو العباس
تشهد اني غريق ف رحابها
طبعا من دون كل الناس
رحلة مايعرفهاش الا انتي
دا انتي حبيبتي وعمري وكنتي
جوة القلب ودادك ياللي
كل حياتي وعشقي وضلي .
================================================
تسمحي لي ؟
========
تسمحي لي اني بشفايفي
احضن الشفة اللي فوق
اللي ياما سكرت منها
لما في حلمي بادوق
كل شهدك والحلاوة
اني ف خدودك بافوق
كل مرة تساليني
صاحي بدري ليه ياذوق ؟
دا انتي احلامي ومنايا
وانتي نبضي في العروق
كل ماباشوفك ف حلمي
اصحي يانا وكلي شوق
ياللي ياما سكرت فيكي
لما من حلمك بافوق
الشفايف بالفراولة
فوق وتحت وهما اولي
واللي كان مني علاولة
اني باحضنهم واقوللك
اه لاقوة او لاحولا
مش شفايفك دول عيون
يفضحوكي اما باكون
صاحي اشرب من عسلهم
وانتي فاردة لي الجفون
اسمحي لي وانتي روحي
اني اصارحك مانتي بوحي
اني حسيت من جروحي
لما فكيتي بشفايفك
اسري وانهدت صروحي
اني اهرب مني ليكي
والحكاية معدش فيكي
غير شفايفك او ايديكي
هما دول روحي ياروحي .
مش لعب عيال
هو لعب عيال يالولو ؟
ولا حب القلب غاب ؟
والله مهما الناس يقولوا
برضه حنعلي الجواب
لو يعدي الليل بطوله
انتي عندي ف السحاب
واللي حبك لو عزوله
حب يعمل فيها ناب
واللي غاروا لو ساقوله
الف واحدة م الشباب
مش حيبقوا زي لولو
لولو دي رحلة عذاب
انتي زينة التوب ونوله
وانتي اغلي م الصحاب
هاتوا فلبي واغزلوله
بدلة بيضة والكتاب
اكتبوله واشرحوله
ان قلبي ف يوم ماتاب .
================================================
اوعي تخون
=========
اوعي مرة تبقي خاين
دي الخيانة شيء فطيع
اوعي تخدع او تماين
او تنافق اوتبيع
اوعي تجرحني وعاين
قبل ماتبيع الجميع
كل كدبك ليا باين
ربنا هو السميع
وانت لو للحب صاين
عمر ماحبك يضيع .
=============================================
حلم
====
صحتيني بحلم بيننا
والهنا مضلل علينا
صوت ملايكة ف وسط جنة
والسعادة اللي ف عنينا
صوتك الولهان برنة
كان لقلبي احن مينا
للي حبك واللي غنا
واللي في حضنك سفينة
شطها بيكي تغنا
وانتي ف ودادك حزينة
عاوز اشوفك كل ثانية
فيها ايه لو تحضنينا
عاوز اشوفك مرة تانية
عاوز اضمك لو قسينا
ذكريات العمر جاية
وانتي ع الربان ضنينة
عاوز اشوف الحلم تاني
وانشر الحلم ف مدينة
افشي سر العمر ياني
وانتي ع الاسرار امينة
يعني لو طيفك ناداني
يبقي رب الكون حامينا
اما لو رمشك ناجاني
يبقي روحك بتنادينا
يبقي روحك بتنادينا.
================================================
شقاوة
====
ياضحكة وسطها الملفوف
وخطوتها اللي شايلاها
يا رعشة صمتها المخطوف
كأنه كلامها وغناها
يابسمتها وبص وشوف
سكونها هو نجواها
***
ياهزة وسطها النونو
تقول غادة وميادة
وعشق غرامي وجنونه
جميلة وحسنها زيادة
وتملا القلب وتصونه
ويبقي حبها عبادة
وعمر الحب ماتخونه
سفيرة ليه فوق العادة .
================================================
بقيت بانسي
========
انا راجل بقيت بانسي
وعقلي يتوه ويتحير
وحاسس اني ف الجلسة
كلامي بيبقي متغير
ولو قاضي ودي الكارثة
حكم بيننا حيتمنظر
ويديني سنين خمسة
ويمكن اقل او اكتر
ويبقي الحكم بالحبسة
عشان عقلي بقي صغير
ومش ذنبي ان انا بانسي
وعقلي يتوه وتحير
حافكركم باني خلاص
بقيت بانسي
ولموا قلمكوا والكراس
ولا همسة
وقولوا فاقد الأحساس
ولا حاسة
ومبتفرقش عنده الناس
ولابيرسي
علي شط الأمل وان داس
بقي بيقسي
ولا شاعر ولا حساس
ياعم انسي
نسيت اسمي وعنواني
نسيت بيتنا مكانه فين
نسيت ف الزحمة خلاني
نسيت صحبة بقالها سنين
نسيت شعري وألحاني
نسيت قلبي وكلي حنين
نسيت يااخوانا اوطاني
وانا تايه مع التايهين
ولسة حبيبتي فاكراني
ولسة الغربة شط حزين
لكن مش ح انسي سجاني
ليوم الدين
ولا حانسي اعيش تاني
واجيبه سجين .
================================================
حادث معهد الأورام
===========
في المعهد حجزوك سنتين
والدوا مر بجد ياناس
وصفوا كماوي علي الورمين
ورم الروح واللي في الراس
واما ابتدا وضعك يتحسن
قالوا حتخرج م المستشفي
ومالوش لبس كمان ف المخزن
والمحاليل ملهوش ماهي ناشفة
يخرج احسن ع الدكتور
اهو يتعالج عنده هناك
واما يعدي يادوب السور
ممكن يجري يلف تراك
هرب الأبعد كدة م الموت
بس الموت كان مستنيه
هو يادوب بيعدي يفوت
العربية انفجرت فيه
اصل الموت دا ملوهش كبير
يحصدة فينا بالف طريقة
مرة بقلة دوا وضمير
ونموت برضه بفعل حريقة
ولا الهم يعدي عليك
يقصف عمرك وانت ىسليم
والأرهاب يابني يخليك
اعرج ومكسح وعقيم
هي بلدنا حترجع تاني
معجونة بمية عفاريت
كل ماتيجي تفوق بتعاني
يظهر اني خلاص عكيت
نقسي ف مرة اشوف الجاني
واتعلق ف رقبته ياريت
واتعلق ف رقبته ياريت .
================================================
صون الود
=========
مين قاللك تعمل مابدالك
وتسيب زوجتك وام عيالك
ولا عشان ماهش فاضيالك
ومقضية العمر فداك
تغسل تطبخ تجري وراك
وتشيل همك والأولاد
احفظ ياابني العشرة وصونها
واحمد ربك ع اللي معاك
صون الود وراعي ضميرك
دي بتحفظ مالك وسريرك
وبترعي كبيرك وصغيرك
واستحملت الغلب عشانك
اديها ياحبيبي حنانك
مش تديها ياروحي قفاك .
================================================
أشواق
=====
اللي حار فيه الاطبا
واشتكي منه الحبايب
شوق بيكبر حبة حبة
شوق يخلي القلب دايب
سكته ياخوانا صعبة
اللي تلقي حبيبه غايب
ع الحبيب دايما بادور
حتي لو أصبحت شايب
اسالوا العشاق تلاقوا
شوقنا زاد والشوق مطايب
كل عاشق بيته كعبة
للي عاصي واللي تايب
واللي داخ م الموجة مرة
يشتهي قدوم المراكب .
================================================
لعمي زايد في سيدي ابي الحسن الشاذلي رضي الله عنه
====================================
يادولة الأخيار
واقفين هنا زنهار
واقفين علي بابكم
نظرة يااهل الدار
ياعم يازايد
نورك هنا قايد
طوالي ليل ونهار
بسالكم الفاتحة
بالستر والصحة
ونصرة ع الأغيار
دعواتكوا ياسادة
بالحسني وزيادة
والحقنا بالأخيار
كلي امل فبكم
والشوق كمان ليكم
قايد ف قلبي النار
غانمين كدة وسالمين
بالبشري دول راجعين
زايد ياوش الخير
ترجع لنا سالم
مجبور كدة وغانم
ياكاتم الأسرار .
================================================مقتطفات من سجال انا الريفي
(1)
يامعلمني الصبر انا ريفي
بازرع درة وشعير والقمح
واخبز وباكلكوا رغيفي
انا للارض الخير والملح
واسالوا عني كل ضيوفي
متعود علطول ع الصفح
كل نهاري تعب والليل
سهرة بريئة اكيد يااخوانا
حبة شاي و ف قلب النيل
كني معاكوا ف قلب الجنة
انا ريفي والطبع جميل
وباحب الفرح وباتهنا
==================
(2)
انا الريفي وانا المسؤؤل
عن الليلة واصحابها
تعالي سجالنا دوغري وقول
انا الريفي علي بابها
وكلمتنا نغم علطول
وانتوا ياسيدي خطابها
================
(3)
دعيتك يااله الكون
انا الريفي اللي حب الناس
تصون بلدي دي مهما يكون
بلد للخير وللاخلاص
وتقضي عللي فيها يخون
وتقطع دابره ساس او راس
=====================
(4)
انا الريفي وانا المصري
وكله اتربي من خيري
انا دايما زعيم عصري
ومين ينفع زعيم غيري
ولو عزت الكلام حصري
سلاحي ف فاسي وف طيري
===================
(5)
انا نيلي بيرويني
وانا فلاح
ومية مصر تسقيني
وبيها ارتاح
وجعضيضها بيشفيني
تقول تفاح
=====================
(6)
انا الريفي باقول موال
وبارسم صورة ع المية
ولو فارس فانا خيال
معيا مهرة وصبية
ولو عزمي يهد جبال
فصوتي كله حنية
انا بيكم ياناس مفتون
لأني ريفي وابن اصول
ولايمكن اكون مجنون
ولو كان اكلي هو الفول
بحب الناس ودة بيكون
خلاصة للوداد والقول
=======================
(7)
انا الريفي وعمري طويل
حضارتي علمها سايد
وباكتب شعر او مواويل
دا نوري للجميع قايد
ولو تسال ف يوم ياجميل
دا انا البدري وانا زايد .
================================================
مقتطفات من سجال قول الصدق
(1)
قول الصدق ولو تنداس
واوعاك تكدب يوم ع الناس
دا اللي يقول الصدق ياصاحبي
كدة حنشيلك فوق الراس
=======================
(2)
كلامي هو رسمالي
مليت دواوين باعمالي
ورابطتنا كمان شاهدة
وتحكيلكوا علي حالي
=======================
(3)
وافعالي واقوالي
تلاقوها ف موالي
كلامي ان شالله يعجبكوا
وتبقي السهرة طوالي
=======================
(4)
معايا مزان
لكن فنان
جواهرجي ف اشعاري
وباوزن لولي او مرجان
=======================
(5)
اذا قلت الكلام هين
تقول انه دهب لين
وفي الحق الكلام كالسيف
يشق الفجر ويبين
=======================
(6)
انا شيخكم وليا الفخر
ولو يديني ربي العمر
ح اغنيلكم واهنيكم
واقدم ليكوا كل الشكر
========================
(7)
الكداب حيخش النار
وكمان عيشته حتبقي مرار
والناس تحذر طبعا منه
ومفيش بيني وبينه عمار
=======================
(
والصدق ينجي من الضيق
خليه ليك العمر رفيق
يوسف كان صادق مع ربه
لما ناداه قاللوا ياصديق
========================
(9)
واوعاك تنسي ابو بكر كمان
صادق بقي صديق عشمان
يدخل بيها الجنة وصاحبه
حبه لسيدنا النبي عنوان
========================
(10)
والكداب لو حتي معاه
كل المال والناس والجاه
عمره مايكسب ولا حيفوز
وحيخسر دوغري ياولداه
========================
(11)
كدبك حيوديك ف جهنم
وتعيش عمرك كدة تتالم
ولأن حياتك مليانة
كدب وغش ياريت تتعلم .
===============================================
الساعة
======
هي كل الدنيا ساعة
ناس تحب تعيشها طاعة
ربنا يكتبنا منهم
والفريق التاني دا ف غاية البشاعة
الدقيقة تساوي عمر
والثواني لو تمر
كلنا ح نحس بيها
ساعة واقفة بقالها شهر
دوق مرارة الأنتظار
واللي مكوي فيه بنار
عارف ان اليوم سنين
لو صبرنا دا المرار
انتظرتك عمري كله
واللي ليه محبوب يقول له
اوعي تنساني ف ساعة
ياحبيب قلبي وضله
اكتبوا لي عاش ساعات
ساعة ضايعة وعمر فات
واما فقت من انتظاري
قالوا كان مولود......... ومات
================================================
موعدنا العاشرة
===========
قلبي اتعلق بيها ياناس
فاضل ساعة وربع خلاص
لما الساعة عشرة بتيجي
تسمع ضرب ف قلبي رصاص
قلبي اتعلق بيها اكيد
واستنتها بلبس جديد
زي الطفل مايكوي هدومه
ويبات بيها ف ليلة العيد
قلبي اتعلق بيها ودق
وانت ياوقت اشهد بالحق
نادي زماني وقول له يقدم
ترس الساعة كمان ويزق
قلبي اتعلق بيها ثواني
ياللا تعالي اوام علشاني
دي الأيام بتمر بطيئة
وانا مش عاوزك تستناني
قلبي اتعلق بالمغرور
حاسس اني بقيت مسحور
الفين حاجز بيني وبينك
اصل الوقت كأنه بحور
قلبي اتعلق بيها وراح
يحسب وقته عشان يرتاح
لكن كل ماثانية تعدي
تلقي الوقت كانه براح
قلبي اتعلق بيها وداب
والحكمة اتكتبت ف كتاب
والساعة تقوللك ياحبيبي
عمرنا عدي كانه سراب.
================================================
عزف الكلمات
==========
اعزف وقول ياجميل
دا كلام كبير وتقيل
اعزف دا من كلمتك
يتربي بيكم جيل
اعزف وقول غني
راح تسمعوا مني
كلام وليه العجب
راح تسمعوا فني
اعزف كمنجة وعود
وربنا المعبود
انت كلامك دهب
فقول ياعم وجود
اعزف وقول الحان
دا انت بروح فنان
واللي يعز الطرب
ييجي حدانا كمان
اعزف معايا وقول
وغني ع الأرغول
ياللي كلامك حكم
تتغذي منه عقول
اعزف لي من قلبك
لما باكون جنبك
اللحن يتغنا
وتكالنا علي ربك
اعزف لي ياعيوني
هما اللي لاموني
حيفيد بايه لومهم
لو مرة سمعوني
اعزف لي ع النوتة
او قللي حدوتة
ياابني وسمعني
دا انا لسة بنوتة
اعزف كلام موزون
خلي معانا الكون
يسمع ويتمايل
دا احنا شبعنا سكون
اعزف ومتفسرش
والوزن متكسرش
واضحك وفرحني
ياللا ومتكشرش
اعزف ووريني
ياحبيبي واشجيني
يابو الكلام اصلي
وكمنجتك صيني
اعزف لي الحاني
وانا مش حقول تاني
ولا كلمة ف الاخر
باختم في ديواني .
================================================
خاطرة حزينة
========
سك الباب
ياامل كداب
ياللي مليت الدنيا سراب
والنور غاب
حتي لقانا مع الأحباب
كله عذاب
اصبح ليهم عاشق تاني
والعيب فيهم
وف احزاني
باعدت بيني وبينهم ياااااااني
ورجعت اسال مين الجاني ؟
مهما راح اعمل راح تنساني
اصل الحب امل كداب
كله عذاب
سك الباب
ياللي مليت الدنيا سراب .
================================================
نهاية
===
سيبك انتي من حكايتي
يظهر اني جت نهايتي
قبل مااهرب اواتوب
يظهر اني دوبت دوب
هي ساعة او يدوب
لحظتين وتجيني تاني
سيبك انتي من زماني
مانتي لو فاكرة مكاني
كنتي جيتي لحد بيتي
واشتكيتي
سيبك انتي من حناني
ماانتي لو عايشة ف كياني
كنت جتلك
قلتلك
ليه رصيدي ف دنيتك
اصبح مفيش
ليه حكايتي ف سكتك
مبتنتهيش
بس قلبي ياحلوة مات
لحننا صابه السكات
عاوز اقوللك كلمتين
نفسي اقولهم من زمان
احنا ماننفعش بعض
ان مابيني وبينك الف سد
سيبك انتي من حكايتي
هي دي يمكن نهايتي
هي دي يمكن نهايتي .
===============================================
بنادي عليك
========
ياعاشق في طريق النور
ومستني الصبايا الحور
ناديتك بالهنا تجيني
يافارس عدي بينا السور
انا عبلة ياميت عنتر
انا ليلي ياقيس سكر
انا للحسن محسوبة
وباستني جدع اشطر
ياخدني بعيد ف احضانه
يشيلني جوة اجفانه
ولا يهرب ف بطن الحوت
وانا بين عقله وجنانه
في بطن الحوت حنتعذب
ف جمر النار حنتقلب
بلاش احسن وخلينا
نقول الشعر او نكتب
ولايهمك ولاتحتار
علي جناحي حقول اشعار
وتبقي معايا ف الجنة
ونبعد عن طريق النار
حناني كله حاديلك
وحبي كله حاسقيلك
ومهما ابعد راح اشرحلك
واغنيلك وحا حكيلك .
================================================
وصفة سهلة
========
للي بكي حظه
واللي الزمن هزه
باهديك انا وصفة
لاتخش مستشقي
ولا تندب الدنيا
انا جي بالعنيا
ارسم لك البسمة
ح تعدي م الأزمة
لو تفتكر ربك
قادر يزيح كربك
وان كنت مش راضي
او حتي مش فاضي
راسك ف اقرب حيط
وعشان انا مليت
من كتر ارشادك
او حتي اسعادك
خلصنا من ياسك
علشان يزول نحسك
واصبر وصبرني
وياريت تعبرني
انا مش ح قول تاني
ياللي انت بتعاني
خليك مع المولي
ومحبته اولي
يارب يحمينا
وياريت يقوينا .
================================================
هدية من ابني
=========
مهما اقول عنك ياابني
ليا نور طول ماانت جنبي
باستند دايما عليك
وانت حبك جوة فلبي
مهماياابني تخلا بيا
بردو ياابني انت اللي ليا
وانت روحي وكل حلمي
وانت ياابني نور عينيا
وانت حافظ للجميل
وانت واصلني واصيل
وانت ليا زي ضلي
ياابني قلبي ليك يميل
يشهد المولي عليا
ان حبك زاد شوية
بعد ماعاتبتك وجيت
جبت وياك الهدية .
================================================
بطاقة الكتاب
-----------------------------------------------------------------------
عنوان المؤَلَّف : لمين ودادك
المؤلِّف : الشاعر/ البدري عبد الحمن زايد
التصنيف : أشعار ( عامية )
:رقم الإيداع: : 21800 / 2019
عدد الصفحات : 76 صفحة
رقم الإصدار الداخلى : 258
تاريخ الإصدار الداخلى : يونيو / 2017 الطبعة الأولى
-------------------------------------------------------------
جميع حقوق الطبع والنشر محفوظة للشاعر، ولا يحق لأى دار نشر طبع ونشر وتوزيع الكتاب الا بموافـقة كتابية وموثـقة من الشاعـــر
